ಬಿಗ್ ಬಾಸ್ ಕನ್ನಡ: ಸುದೀಪ್​ಗೆ ವಿಶೇಷ ಗಿಫ್ಟ್ ಕೊಟ್ಟ ಬಿಗ್ ಬಾಸ್; ಭಾವುಕರಾದ ಕಿಚ್ಚ

ಬಿಗ್ ಬಾಸ್ ಆರಂಭ ಆಗಿ 10 ವರ್ಷಗಳು ಕಳೆದಿವೆ. ಪ್ರತಿ ಸೀಸನ್​ನ ನಡೆಸಿಕೊಟ್ಟಿದ್ದು ಕಿಚ್ಚ ಸುದೀಪ್ ಅವರು. ಸಿನಿಮಾ ಕೆಲಸಕ್ಕಾಗಿ ಅವರು ಎಲ್ಲಿಗೇ ಹೋದರೂ ಬಿಗ್ ಬಾಸ್ (Bigg Boss) ನಡೆಸಿಕೊಡಲು ಅವರು ಬೆಂಗಳೂರಿಗೆ ಓಡೋಡಿ ಬರುತ್ತಾರೆ. ಅವರು ಸಾಕಷ್ಟು ಇಷ್ಟಪಟ್ಟು ಈ ಶೋ ನಡೆಸಿಕೊಡುತ್ತಿದ್ದಾರೆ. ಪ್ರತಿ ಸೀಸನ್ ಯಶಸ್ವಿ ಆಗಲು ಕಿಚ್ಚನ ಕೊಡುಗೆಯೂ ದೊಡ್ಡದಿದೆ. ಈ ಕಾರಣಕ್ಕೆ ಕಿಚ್ಚ ಸುದೀಪ್ ಅವರಿಗೆ ವಿಶೇಷ ಗೌರವ ನೀಡಲಾಗಿದೆ. ಇದನ್ನು ನೋಡಿ ಕಿಚ್ಚ ಸುದೀಪ್ ಅವರು ಭಾವುಕರಾಗಿದ್ದಾರೆ.

ಬಿಗ್ ಬಾಸ್ 10 ವರ್ಷಗಳನ್ನು ಪೂರೈಸಿದೆ. ಹೀಗಾಗಿ, ವೇದಿಕೆ ಮೇಲೆ 10 ಕಟೌಟ್​​ಗಳನ್ನು ನಿರ್ಮಿಸಲಾಗಿತ್ತು. ಪ್ರತಿ ಸೀಸನ್​ನ ಒಂದು ಗೆಟಪ್​ನ ಕಟೌಟ್ ಮಾಡಿ ನಿಲ್ಲಿಸಲಾಗಿದೆ. ಇದು ಕಿಚ್ಚ ಸುದೀಪ್​ಗೆ ಇಷ್ಟ ಆಗಿದೆ. ಅವರು ಇದನ್ನು ನೋಡಿ ಭಾವುಕರಾದರು. ಸುದೀಪ್ ಬಗ್ಗೆ ಬಿಗ್ ಬಾಸ್ ಕಡೆಯಿಂದ ವಿಶೇಷ ಘೋಷಣೆ ಕೂಡ ಆಯಿತು.

‘ಇದು 10ನೇ ಸೀಸನ್. ಇಷ್ಟು ವರ್ಷಗಳಲ್ಲಿ ಮನೆ ಬದಲಾಗಿದೆ, ಸ್ಥಳ ಬದಲಾಗಿದೆ. ತಂತ್ರಜ್ಞರು ಬದಲಾಗಿದ್ದಾರೆ, ಪ್ರಸಾರಕರು ಬದಲಾಗಿದ್ದಾರೆ. ಸ್ಪರ್ಧಿಗಳಂತೂ ಬದಲಾಗುತ್ತಲೇ ಇರುತ್ತಾರೆ. ಬದಲಾಗದ ಒಂದೇ ಒಂದು ವಿಚಾರ ಎಂದರೆ ಅದು ಸುದೀಪ್. ತಪ್ಪುಗಳನ್ನು ತಿದ್ದುವ, ದಾರಿ ತೋರಿಸುವ ನಾಯಕ ಸುದೀಪ್. ಪ್ರಾಮಾಣಿಕತೆ ತುಂಬಿದವರು ಸುದೀಪ್. ನೀವಿಲ್ಲದೆ ಬಿಗ್ ಬಾಸ್​ನ ಊಹಿಸಲೂ ಸಾಧ್ಯವಿಲ್ಲ’ ಎಂದು ಬಿಗ್ ಬಾಸ್ ಘೋಷಣೆ ಮಾಡಿದರು.

10 ವರ್ಷಗಳ ಪಯಣ ಹೇಗಿತ್ತು ಎಂಬುದನ್ನು ವಿಡಿಯೋ ಮೂಲಕ ತೋರಿಸಲಾಯಿತು. ಬಿಗ್ ಬಾಸ್ ಆರಂಭ ಆಗುವ ಸಂದರ್ಭದಲ್ಲಿ ಸುದೀಪ್ ಅವರು ದೊಡ್ಮನೆ ಒಳಗೆ ಹೋಗಿ ದೀಪ ಹಚ್ಚಿದ್ದರಿಂದ ಹಿಡಿದು ಇಂದಿನ ಎಪಿಸೋಡ್​ವರೆಗೆ ಎಲ್ಲವನ್ನೂ ತೋರಿಸಲಾಯಿತು. ಕಿಚ್ಚ ಸುದೀಪ್ ಕ್ಲಾಸ್ ತೆಗೆದುಕೊಂಡಿದ್ದು, ಗೆಳೆಯರನ್ನು ಒಂದು ಮಾಡಿದ್ದು ಸೇರಿದಂತೆ ಎಲ್ಲವನ್ನೂ ವಿಶೇಷ ವಿಡಿಯೋದಲ್ಲಿ ತೋರಿಸಲಾಯಿತು. ಇದು ಅನೇಕರಿಗೆ ಇಷ್ಟ ಆಯಿತು. ಸ್ವತಃ ಕಿಚ್ಚ ಸುದೀಪ್ ಕೂಡ ಇದನ್ನು ಇಷ್ಟಪಟ್ಟರು.

ಇದನ್ನೂ ಓದಿ: ವಿನಯ್ ಎಲಿಮಿನೇಷನ್ ಫೇರ್​ ಅಲ್ಲ ಎಂದವರಿಗೆ ಕಿಚ್ಚ ಕೊಟ್ಟ ಉತ್ತರ ಏನು?

ಕಿಚ್ಚ ಸುದೀಪ್ ಅವರು ಕೂಡ ಎಲ್ಲರಿಗೂ ಧನ್ಯವಾದ ಹೇಳಿದರು. ‘ನೀವು ನೀಡಿದ ಬೆಂಬಲದಿಂದಲೇ ನನ್ನ ಈ ಜರ್ನಿ ಸಾಧ್ಯ ಆಯಿತು. ಈ ಸೀಸನ್​ನ ತುಣುಕುಗಳನ್ನು ಹಾಕಿ ವಿಡಿಯೋ ಮಾಡಬಹುದಿತ್ತು. ಆದರೆ, ನೀವು ಆ ರೀತಿ ಮಾಡಿಲ್ಲ. ಈ ವಿಡಿಯೋ ಮಾಡಲು ಹಲವು ದಿನಗಳ ಪರಿಶ್ರಮ ಬೇಕಾಗಿದೆ’ ಎಂದರು ಸುದೀಪ್. ಅವರಿಗೆ ಈ ಸೆಲೆಬ್ರೇಷನ್ ಸಾಕಷ್ಟು ಖುಷಿ ನೀಡಿದೆ. ಈ ಬಾರಿ ಬಿಗ್ ಬಾಸ್ ಕಲರ್ಸ್ ಕನ್ನಡ ಹಾಗೂ ಜಿಯೋ ಸಿನಿಮಾದಲ್ಲಿ ಪ್ರಸಾರ ಕಂಡಿದೆ. ಜಿಯೋ ಸಿನಿಮಾದಲ್ಲಿ 24 ಗಂಟೆ ಲೈವ್ ನೋಡಲು ಅವಕಾಶ ಇದೆ.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ