ಬಿಗ್ ಬಾಸ್ ಮನೆಗೆ ಬಂದ ‘ಬ್ರ್ಯಾಟ್’ ನಟ ಡಾರ್ಲಿಂಗ್ ಕೃಷ್ಣ: ಮಾಳುಗೆ ಗುಡ್ ನ್ಯೂಸ್

‘ಬಿಗ್ ಬಾಸ್ ಕನ್ನಡ ಸೀಸನ್ 12’ (Bigg Boss Kannada 12) ಆಟದಲ್ಲಿ 40 ದಿನಗಳು ಕಳೆದಿವೆ. ಈಗಾಗಲೇ ಕೆಲವು ಅತಿಥಿಗಳು ಬಿಗ್ ಬಾಸ್ ಮನೆಗೆ ಬಂದು ಹೋಗಿದ್ದಾರೆ. ಲೇಟೆಸ್ಟ್ ಆಗಿ ಬಂದಿರುವುದು ‘ಬ್ರ್ಯಾಟ್’ ಸಿನಿಮಾ (Brat) ತಂಡ. ಹೌದು, ನಿರ್ದೇಶಕ ಶಶಾಂಕ್ ಮತ್ತು ನಟ ಡಾರ್ಲಿಂಗ್ ಕೃಷ್ಣ ಅವರು ಬಿಗ್ ಬಾಸ್ ಮನೆಗೆ ಅತಿಥಿಗಳಾಗಿ ಬಂದಿದ್ದಾರೆ. ಸಿನಿಮಾದ ಬಗ್ಗೆ ಸ್ಪರ್ಧಿಗಳ ಜೊತೆ ಮಾತನಾಡಿದ್ದಾರೆ. ಅಲ್ಲದೇ ಈ ವಾರದ ಕ್ಯಾಪ್ಟನ್ ಯಾರು ಎಂಬುದನ್ನು ಕೂಡ ಘೋಷಿಸಿದ್ದಾರೆ. ಮಾಳು ನಿಪನಾಳ ಅವರು ಈ ವಾರದ ಕ್ಯಾಪ್ಟನ್ ಆಗಿದ್ದಾರೆ. ಬಿಗ್ ಬಾಸ್ ಮನೆಯ ಸದಸ್ಯರ ಎದುರಲ್ಲಿ ಈ ವಿಷಯವನ್ನು ಡಾರ್ಲಿಂಗ್ ಕೃಷ್ಣ (Darling Krishna) ಅವರು ಬಹಿರಂಗಪಡಿಸಿದ್ದಾರೆ.

ಸಿಂಗರ್ ಮಾಳು ನಿಪನಾಳ ಅವರು ಇಷ್ಟು ದಿನಗಳ ಕಾಲ ಸೈಲೆಂಟ್ ಆಗಿದ್ದರು. ಅವರು ಮಾತನಾಡುವುದೇ ಇಲ್ಲ ಎಂದು ಎಲ್ಲರೂ ಹೇಳುತ್ತಿದ್ದರು. ಆದರೆ ಈ ವಾರದಲ್ಲಿ ಅಭಿಮಾನಿಗಳು ಬಿಗ್ ಬಾಸ್ ಮನೆಯ ಒಳಗೆ ಬಂದಾಗ ಮಾಳು ಅವರು ಖಡಕ್ ಆಗಿ ಮಾತನಾಡಿದರು. ಅದರ ಪರಿಣಾಮದಿಂದ ಮಾಳು ಅವರಿಗೆ ಅಭಿಮಾನಿಗಳು ಹೆಚ್ಚು ವೋಟ್ ಹಾಕಿದ್ದಾರೆ. ಇದರಿಂದಾಗಿ ಮಾಳುಗೆ ಕ್ಯಾಪ್ಟನ್ ಪಟ್ಟ ಸಿಕ್ಕಿದೆ.

ಈ ವಾರ ಇಡೀ ಮನೆ ನಾಮಿನೇಟ್ ಆಗಿದೆ. ಅಲ್ಲದೇ ಸದಸ್ಯರಿಗೆ ಯಾವುದೇ ಟಾಸ್ಕ್ ಕೂಡ ನೀಡಿಲ್ಲ. ಕೇವಲ ಎಲ್ಲ ಸ್ಪರ್ಧಿಗಳ ವರ್ತನೆ ಮೇಲೆಯೇ ವೀಕ್ಷಕರು ಅವರ ಭವಿಷ್ಯವನ್ನು ನಿರ್ಧರಿಸಲಿದ್ದಾರೆ. ಮಾಳು ಅವರಿಗೆ ಕ್ಯಾಪ್ಟನ್ ಆಗುವ ಅವಕಾಶ ಸಿಕ್ಕಿರುವುದರಿಂದ ಹೆಚ್ಚು ಕಾಣಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಅವರು ಕ್ಯಾಪ್ಟನ್ ಪಟ್ಟ ಪಡೆದ್ದಿದ್ದಕ್ಕೆ ಅಶ್ವಿನಿ ಗೌಡ, ಜಾಹ್ನವಿ, ಗಿಲ್ಲಿ ನಟ ಮುಂತಾದವರು ಸಂತಸ ಪಟ್ಟಿದ್ದಾರೆ.

ಕ್ಯಾಪ್ಟನ್ ಪಟ್ಟ ಪಡೆದಿರುವ ಮಾಳು ಅವರು ತಮ್ಮ ಅಭಿಮಾನಿಗಳಿಗೆ ಧನ್ಯವಾದ ತಿಳಿಸಿದ್ದಾರೆ. ಕ್ಯಾಪ್ಟನ್ ಆಗುವುದು ಅಷ್ಟು ಸುಲಭ ಅಲ್ಲ. ಅತಿರೇಕವಾಗಿ ವರ್ತಿಸುವ ಎಲ್ಲ ಸ್ಪರ್ಧಿಗಳನ್ನು ನಿಭಾಯಿಸಬೇಕಾಗುತ್ತದೆ. ಇಷ್ಟು ದಿನಗಳ ಕಾಲ ಮಾತನಾಡಲು ಹಿಂದೇಟು ಹಾಕುತ್ತಿದ್ದ ಅವರು ಈಗ ಕ್ಯಾಪ್ಟನ್ ಆಗಿರುವುದರಿಂದ ಜೋರಾಗಿ ಮಾತನಾಡಲೇಬೇಕಿದೆ.

ಇದನ್ನೂ ಓದಿ: ‘ಬ್ರ್ಯಾಟ್’ ನೋಡಿದ ಪ್ರೇಕ್ಷಕರ ಪ್ರತಿಕ್ರಿಯೆ ಕಂಡು ಶಶಾಂಕ್ ಮುಖದಲ್ಲಿ ಮೂಡಿತು ನಗು

ಡಾರ್ಲಿಂಗ್ ಕೃಷ್ಣ ಅವರು ಬಿಗ್ ಬಾಸ್ ಮನೆ ಒಳಗೆ ಬಂದಾಗ ಎಲ್ಲರಿಗೂ ಖುಷಿ ಆಯಿತು. ‘ಬ್ರ್ಯಾಟ್’ ಸಿನಿಮಾದ ಸೂಪರ್ ಹಿಟ್ ‘ನಾನೇ ನೀನಂತೆ..’ ಹಾಡನ್ನು ಪ್ಲೇ ಮಾಡಲಾಯಿತು. ಬಳಿಕ ‘ಗಂಗಿ ಗಂಗಿ..’ ಹಾಡು ಕೂಡ ಬಂತು. ಸಿನಿಮಾ ಎಲ್ಲ ಕಡೆಗಳಲ್ಲಿ ಯಶಸ್ವಿಯಾಗಿ ಪ್ರದರ್ಶನ ಕಾಣುತ್ತಿದೆ ಎಂಬುದನ್ನು ನಿರ್ದೇಶಕ ಶಶಾಂಕ್ ಅವರು ತಿಳಿಸಿದರು. ಅಲ್ಲದೇ ಸಿನಿಮಾದ ವಿಶೇಷತೆಗಳ ಬಗ್ಗೆಯೂ ಅವರು ಮಾತನಾಡಿದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.