ಸೌಂದರ್ಯಾ ಕಾಲು ಹಿಡಿದುಕೊಂಡ ಯಶಸ್; ಅಸಹ್ಯ ಎಂದ ಜಗದೀಶ್, ಪ್ರಶಾಂತ್

‘ಬಿಗ್ ಬಾಸ್ ಕನ್ನಡ ಸೀಸನ್ 13’ ರಿಯಾಲಿಟಿ ಶೋನಲ್ಲಿ ಯಶಸ್ ಅವರು ಕೆಲವು ಸ್ಪರ್ಧಿಗಳ ಜೊತೆ ಹೆಚ್ಚು ಕಾಲ ಕಳೆಯುತ್ತಿದ್ದಾರೆ. ಸೌಂದರ್ಯಾ ಶೆಟ್ಟಿ ಹಾಗೂ ಆಸಿಯಾ ಜೊತೆ ಯಶಸ್ ಅವರು ಹೆಚ್ಚು ಬೆರೆತಿದ್ದಾರೆ. ಆದರೆ ಅವರ ನಂಟಿನ ಬಗ್ಗೆ ಕೆಲವು ಸ್ಪರ್ಧಿಗಳಿಗೆ ಅಸಮಾಧಾನ ಇದೆ. ಈ ಮೊದಲು ಕೆಲವರು ಆ ಬಗ್ಗೆ ಮಾತನಾಡಿದ್ದರು. ಈಗ ಜಗದೀಶ್ ಮತ್ತು ಪ್ರಶಾಂತ್ ಕೂಡ ಯಶಸ್ ಅವರ ವರ್ತನೆಯನ್ನು ಟೀಕಿಸಿದ್ದಾರೆ.

ಅಕ್ಟೋಬರ್ 13ರ ಸಂಚಿಕೆಯಲ್ಲಿ ಒಂದು ಘಟನೆ ನಡೆಯಿತು. ಕಾವ್ಯಾ, ಸೌಂದರ್ಯಾ ಶೆಟ್ಟಿ ಹಾಗೂ ಯಶಸ್ ಅವರು ಕುಳಿತು ಮಾತನಾಡುತ್ತಿದ್ದರು. ತಮ್ಮ ಕಾಲು ಇಟ್ಟುಕೊಳ್ಳಲು ಜಾಗ ಇಲ್ಲ ಎಂದು ಸೌಂದರ್ಯಾ ಅವರು ಹೇಳಿದರು. ಆಗ ಅವರ ಕಾಲನ್ನು ಯಶಸ್ ಅವರು ತಮ್ಮ ಅಂಗೈಯಲ್ಲಿ ಹಿಡಿದುಕೊಂಡರು. ಅದನ್ನು ಕಂಡು ಜಗದೀಶ್ ಹಾಗೂ ಪ್ರಶಾಂತ್ ಮಾತನಾಡಿಕೊಂಡರು.

‘ಅವಳ ಕಾಲು ಹಿಡಿದುಕೊಂಡಿದ್ದಾನೆ ನೋಡು. ಅಸಹ್ಯ ಎನಿಸುತ್ತದೆ. ಅಯ್ಯೋ ಕಥೆ’ ಎಂದು ಜಗದೀಶ್ ಅವರು ಗೊಣಗಿದರು. ‘ಏನಾಗಿದೆ ಯಶಸ್​ಗೆ? ಇದನ್ನೇ ಅವನು ಹೆಮ್ಮೆ ಎಂದುಕೊಂಡಿದ್ದಾನಾ? ಎರಡು ವಾರ ಆದಮೇಲೆ ಆಟ ತೋರಿಸುತ್ತಾನೆ ಅಂತಾನೆ ಅಷ್ಟೇ’ ಎಂದು ಪ್ರಶಾಂತ್ ಅವರು ಟೀಕೆ ಮಾಡಿದರು. ‘ಬರೀ ನೋಡು ಅಂತ ಹೇಳಿದೆ ಅಷ್ಟೇ. ಅವರ ಬಗ್ಗೆ ಮಾತನಾಡಬೇಡ. ಅಸಹ್ಯ ಆಗುತ್ತದೆ’ ಎಂದು ಜಗದೀಶ್ ಅವರು ಖಾರವಾಗಿ ನುಡಿದರು.

‘ನನಗೆ ಅನುಮಾನ ಆಗುತ್ತಿದೆ. ಆಸಿಯಾನ ಯಶಸ್ ಇಷ್ಟಪಡುತ್ತಿದ್ದಾನಾ ಅಥವಾ ಸೌಂದರ್ಯಾನ ಇಷ್ಟಪಡುತ್ತಿದ್ದಾನಾ’ ಎಂದು ಪ್ರಶಾಂತ್ ಅವರು ಅನುಮಾನ ವ್ಯಕ್ತಪಡಿಸಿದರು. ಆ ಬಗ್ಗೆ ಹೆಚ್ಚು ಮಾತನಾಡಲು ಜಗದೀಶ್ ಇಷ್ಟಪಡಲಿಲ್ಲ. ಒಟ್ಟಿನಲ್ಲಿ ಯಶಸ್ ಅವರು ಆಟದ ಮೇಲೆ ಹೆಚ್ಚು ಗಮನ ಹರಿಸುವುದರ ಬದಲು ಸೌಂದರ್ಯಾ ಜೊತೆ ಸಮಯ ಕಳೆಯುತ್ತಿರುವುದು ದೊಡ್ಮನೆಯಲ್ಲಿ ಚರ್ಚೆಯ ವಿಷಯ ಆಗುತ್ತಿದೆ.

ಇದನ್ನೂ ಓದಿ: ಈ ವಾರ ಇರಲ್ಲ ಎಲಿಮಿನೇಷನ್; ನಾಮಿನೇಷನ್ ಮೂಲಕ ಸೂಚನೆ ಕೊಟ್ಟ ಬಿಗ್ ಬಾಸ್

ಈ ವಾರ ಎರಡು ತಂಡಗಳಲ್ಲಿ ಟಾಸ್ಕ್ ಆಡಬೇಕು ಎಂದು ನಿರ್ಧರಿಸಲಾಗಿದೆ. ಸ್ವತಂತ್ರವಾಗಿ ಆಡುವ ಸಾಮರ್ಥ್ಯ ಇರುವವರು ಯಾರು? ಇಲ್ಲದವರು ಯಾರು ಎಂದು ಕ್ಯಾಪ್ಟನ್ ಧನುಷ್ ತೀರ್ಮಾನಿಸಿದ್ದಾರೆ. ‘ಸೌಂದರ್ಯಾ ಅವರಿಗೆ ಒಬ್ಬಂಟಿಯಾಗಿ ಆಟ ಆಡುವ ಸಾಮರ್ಥ್ಯ ಇಲ್ಲ. ಯಶಸ್ ಅವರಿಗೆ ಹಲವು ಬಾರಿ ಅವಕಾಶ ಸಿಕ್ಕಿದೆ. ಆದರೆ ಅವರಿಗೆ ಯಾವಾಗಲೂ ಒಬ್ಬರ ಬೆಂಬಲ ಬೇಕಾಗುತ್ತದೆ. ಅವರಿಗೆ ಒಂಟಿಯಾಗಿ ಆಟ ಆಡುವ ಸಾಮರ್ಥ್ಯ ಇಲ್ಲ’ ಎಂದು ಧನುಷ್ ಹೇಳಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.