‘ಜೈಲಿನಲ್ಲೂ ಬಿಗ್ ಬಾಸ್ ನೋಡ್ತಾರೆ’: ಈ ಮಾತು ವಿವಾದ ಆಗತ್ತೆ ಎಂದಿದ್ದಕ್ಕೆ ಸುದೀಪ್ ಹೇಳಿದ್ದೇನು?

ವಿವಾದಗಳಿಂದಲೇ ಸುದ್ದಿಯಾದ ಚೈತ್ರಾ ಕುಂದಾಪುರ ಅವರ ಈಗ ‘ಬಿಗ್​ ಬಾಸ್ ಕನ್ನಡ ಸೀಸನ್​ 11’ ರಿಯಾಲಿಟಿ ಶೋ ಸ್ಪರ್ಧಿಯಾಗಿ ದೊಡ್ಮನೆಗೆ ಬಂದಿದ್ದಾರೆ. ಮೊದಲ ಸಂಚಿಕೆಯಲ್ಲಿ ಅವರನ್ನು ಸುದೀಪ್​ ಮಾತನಾಡಿಸಿದರು. ತಾವು ಬಿಗ್​ ಬಾಸ್​ ಕಾರ್ಯಕ್ರಮದಲ್ಲಿ ಸ್ಪರ್ಧಿಸಲು ಒಪ್ಪಿಕೊಂಡಿದ್ದು ಹೇಗೆ ಎಂಬುದನ್ನು ಚೈತ್ರಾ ಕುಂದಾಪುರ ವಿವರಿಸಿದರು. ಈ ಮೊದಲು ಅವರು ಜೈಲಿಗೆ ಹೋಗಿದ್ದರು. ಆಗಲೇ ಅವರು ಬಿಗ್​ ಬಾಸ್​ ಕಾರ್ಯಕ್ರಮವನ್ನು ಪೂರ್ತಿಯಾಗಿ ನೋಡಿದ್ದು. ಆ ಕುರಿತು ಮಾತನಾಡುವಾಗ ಜೈಲಿನ ವಿಷಯ ಪ್ರಸ್ತಾಪ ಆಯಿತು.

‘ಮೊದಲು ಇದು ಸ್ಕ್ರಿಪ್ಟೆಡ್​ ಶೋ ಅಂತ ನನಗೆ ಅನಿಸಿತ್ತು. ನಾನು ಬಿಗ್​ ಬಾಸ್​ ಸೀಸನ್​ 10 ನೋಡಿದ್ದ ಜೈಲಿನಲ್ಲಿ. ಆಗ ವರ್ತೂರು ಸಂತೋಷ್​ ಕೂಡ ಜೈಲಿಗೆ ಬಂದಿದ್ದರು. ಅವರು ಬಂದಿದ್ದರಿಂದ ಇದು ಸ್ಕ್ರಿಪ್ಟೆಡ್​ ಅಲ್ಲ ಅಂತ ತಿಳಿಯಿತು. ಕಾಮನ್ ಸೆನ್ಸ್​ ಇರುವವರಿಗೆ ಇದು ಗೊತ್ತಾಗುತ್ತದೆ. ಕಳೆದ ಸೀಸನ್​ ಅನ್ನು ನಾನು ಪೂರ್ತಿಯಾಗಿ ನೋಡಿದ್ದರಿಂದ ಈ ಬಾರಿ ಬಿಗ್​ ಬಾಸ್​ಗೆ ಬರಲು ಒಪ್ಪಿಕೊಂಡೆ’ ಎಂದರು ಚೈತ್ರಾ ಕುಂದಾಪುರ.

‘ಬಿಗ್​ ಬಾಸ್​ಗೆ ಹೊರಗಡೆ ಎಷ್ಟು ಫ್ಯಾನ್ ಫಾಲೋಯಿಂಗ್​ ಇದೆಯೋ ಅದಕ್ಕಿಂತಲೂ ಜಾಸ್ತಿ ಫ್ಯಾನ್​ ಫಾಲೋಯಿಂಗ್​ ಜೈಲಿನ ಒಳಗೂ ಇದೆ ಅಂತ ನನಗೆ ಅನಿಸುತ್ತೆ’ ಎಂದು ಚೈತ್ರಾ ಹೇಳಿದಾಗ, ‘ಇದರ ಬಗ್ಗೆ ಹೇಗೆ ಪ್ರತಿಕ್ರಿಯೆ ನೀಡಬೇಕೋ ನನಗೆ ಗೊತ್ತಿಲ್ಲ’ ಎಂದರು ಸುದೀಪ್​. ‘ಇದು ಕೂಡ ಕಾಂಟ್ರವರ್ಸಿ ಆಗಬಹುದೇನೋ’ ಎಂದು ಚೈತ್ರಾ ಪ್ರತಿಕ್ರಿಯಿಸಿದರು. ‘ಹಾಗೇನೂ ಇಲ್ಲ. ಇದರಲ್ಲಿ ಕಾಂಟ್ರವರ್ಸಿ ಏನಿದೆ? ನಮ್ಮ ಕಾರ್ಯಕ್ರಮವನ್ನು ಎಲ್ಲ ಕಡೆ ಜನರು ನೋಡಿ ಮೆಚ್ಚುತ್ತಿದ್ದಾರೆ. ಅದಕ್ಕೆ ನಮಗೆ ಖುಷಿ ಇದೆ. ಈ ಕಾರ್ಯಕ್ರಮಕ್ಕೂ ಜೈಲಿಗೂ ಇರುವ ಸಂಬಂಧ ಏನು ಅಂತ ನಮಗೂ ಈಗಲೇ ಗೊತ್ತಾಗುತ್ತಿರುವುದು’ ಎಂದರು ಸುದೀಪ್​.

ಇದನ್ನೂ ಓದಿ: ತುಕಾಲಿ ಸಂತು ಪತ್ನಿ ಮಾನಸಾಗೆ ಸವಾಲು ಹಾಕಿ ಬಿಗ್​ ಬಾಸ್​ಗೆ ಬಂದ ನಟಿ ಹಂಸಾ

ಜೈತ್ರಾ ಕುಂದಾಪುರ ಮಾತ್ರವಲ್ಲದೇ ಲಾಯರ್​ ಜಗದೀಶ್​ ಕೂಡ ಈ ಮೊದಲು ಜೈಲಿಗೆ ಹೋಗಿದ್ದರು. ಅವರು ಕೂಡ ಜೈಲಿನಲ್ಲಿ ಇದ್ದಾಗಲೇ ಬಿಗ್​ ಬಾಸ್​ ಕಾರ್ಯಕ್ರಮವನ್ನು ನೋಡಿದ್ದರು. ಈಗ ಅವರು ‘ಬಿಗ್​ ಬಾಸ್​ ಕನ್ನಡ ಸೀಸನ್​ 11’ ಕಾರ್ಯಕ್ರಮದ ಸ್ಪರ್ಧಿಯಾಗಿದ್ದಾರೆ. ಒಟ್ಟು 17 ಮಂದಿ ಈ ಬಾರಿ ಸ್ಪರ್ಧಿಸುತ್ತಿದ್ದಾರೆ. ಸಿನಿಮಾ, ಸೀರಿಯಲ್​, ಕ್ರೀಡೆ, ಸೋಶಿಯಲ್​ ಮೀಡಿಯಾದಲ್ಲಿ ಖ್ಯಾತಿ ಗಳಿಸಿದವರು ದೊಡ್ಮನೆಗೆ ಎಂಟ್ರಿ ಪಡೆದಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.