‘ರಾಮಾಯಣ’ ಮೂಲಕ ಸಿನಿಮಾ ವೀಕ್ಷಣೆಯ ಮೊದಲ ಅನುಭವ ಪಡೆದ ಯಶ್ ಮಕ್ಕಳು

ಯಶ್ ಮತ್ತು ರಾಧಿಕಾ ಪಂಡಿತ್ ಅವರ ಮಕ್ಕಳ ಮೊದಲ ಸಿನಿಮಾ ಅನುಭವವೇ ಭಾರತೀಯ ಸಂಸ್ಕೃತಿ ಮತ್ತು ಪರಂಪರೆಯ ಪ್ರತೀಕವಾದ ರಾಮಾಯಣದ ಮೂಲಕ ಆರಂಭವಾಗಿರುವುದು ವಿಶೇಷ. ಐರಾ ಹಾಗೂ ಅಕ್ಟೋಬರ್ 30ರಂದು ಏಳು ವರ್ಷಕ್ಕೆ ಕಾಲಿಟ್ಟಿರುವ ಯಥರ್ವ್ ಅವರು ಲಾಸ್ ಏಂಜಲೀಸ್‌ನಲ್ಲಿ ನಡೆದ ‘ರಾಮಾಯಣ’ ಚಿತ್ರದ ವಿಶೇಷ ಪ್ರದರ್ಶನದಲ್ಲಿ ಮೊದಲ ಬಾರಿಗೆ ಸಿನಿಮಾ ವೀಕ್ಷಿಸಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ.

ಮಕ್ಕಳು ಚಿತ್ರವನ್ನು ಹೇಗೆ ಆಸ್ವಾದಿಸಿದರು ಎಂಬ ವಿವರಗಳನ್ನು ಕುಟುಂಬ ಗೌಪ್ಯವಾಗಿಟ್ಟುಕೊಂಡಿದೆ. ಆದರೆ, ಈ ವಿಶೇಷ ಕ್ಷಣ ಅಭಿಮಾನಿಗಳಲ್ಲಿ ಸಂತಸ ಮೂಡಿಸಿದೆ. ‘ರಾಮಾಯಣ’ ಚಿತ್ರದಲ್ಲಿ ರಾವಣನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವ ಯಶ್ ಅವರಿಗೆ ಈ ಸಿನಿಮಾ ವೃತ್ತಿಜೀವನದ ಮಹತ್ವದ ಮೈಲಿಗಲ್ಲಾಗಿದೆ. ಮತ್ತೊಂದೆಡೆ, ಅವರ ಮಕ್ಕಳ ಪಾಲಿಗೆ ಇದು ಮೊದಲ ಸಿನಿಮಾ ವೀಕ್ಷಣೆಯಾಗಿ ಸದಾ ಸ್ಮರಣೀಯವಾಗಿರಲಿದೆ.

ಮಕ್ಕಳ ಹೆಸರುಗಳ ಹಿಂದಿನ ಅರ್ಥವೂ ವಿಶೇಷವಾಗಿದೆ. ಐರಾ ಎಂಬ ಹೆಸರು ಐರಾವತಿಯ ಹೆಸರಿನಿಂದ ಪ್ರೇರಿತವಾಗಿದ್ದು, ಇದು ಲಕ್ಷ್ಮೀ ದೇವಿಯ ಮತ್ತೊಂದು ಹೆಸರಾಗಿದೆ. ಇನ್ನು ಯಥರ್ವ್ ಎಂದರೆ ‘ಪೂರ್ಣತೆ’ ಎಂಬ ಅರ್ಥವಿದೆ. ಯಥರ್ವ್ ಹೆಸರಿನಲ್ಲಿ ಯಶ್, ರಾಧಿಕಾ ಹಾಗೂ ಐರಾ ಅವರ ಹೆಸರುಗಳ ಅಂಶಗಳನ್ನೂ ಸೇರಿಸಲಾಗಿದೆ ಎಂದು ಈ ಹಿಂದೆ ದಂಪತಿ ತಿಳಿಸಿದ್ದರು.

ಹೀಗೆ, ತಲೆಮಾರುಗಳಿಂದ ಭಾರತೀಯರ ಮನಸ್ಸಿನಲ್ಲಿ ನೆಲೆಸಿರುವ ರಾಮಾಯಣ ಮಹಾಕಾವ್ಯ ಇದೀಗ ಯಶ್ ಕುಟುಂಬದ ವೈಯಕ್ತಿಕ ನೆನಪಿನ ಭಾಗವಾಗಿಯೂ ರೂಪುಗೊಂಡಿದೆ. ತಂದೆಯ ಸಿನಿಮಾ ಪಯಣದ ಮಹತ್ವದ ಘಟ್ಟಕ್ಕೆ ಮಕ್ಕಳ ಮೊದಲ ಸಿನಿಮಾ ಅನುಭವವೂ ಜೊತೆಯಾಗಿರುವುದು ಭಾವನಾತ್ಮಕ ಕ್ಷಣವಾಗಿದೆ.

ಇದನ್ನೂ ಓದಿ: ‘ರಾಮಾಯಣ’ ಸಿನಿಮಾಗೆ ಮೆಚ್ಚುಗೆ; ‘ಲಾರ್ಡ್ ಆಫ್ ದಿ ರಿಂಗ್ಸ್’ ಚಿತ್ರಕ್ಕೆ ಹೋಲಿಸಿದ ಪ್ರೇಕ್ಷಕರು

ನಮಿತ್ ಮಲ್ಹೋತ್ರಾ ಅವರ ‘ಪ್ರೈಮ್ ಫೋಕಸ್’ ಸಂಸ್ಥೆ ನಿರ್ಮಿಸಿರುವ, ನಿತೇಶ್ ತಿವಾರಿ ನಿರ್ದೇಶನದ ಈ ಚಿತ್ರಕ್ಕೆ ಯಶ್ ಅವರ ‘ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್’ ಸಹ-ನಿರ್ಮಾಣದ ಹೊಣೆ ಹೊತ್ತಿದೆ. ಜೊತೆಗೆ ಕರ್ನಾಟಕದಲ್ಲಿ ವಿತರಣೆಯ ಜವಾಬ್ದಾರಿಯನ್ನೂ ವಹಿಸಿಕೊಂಡಿದೆ. ಚಿತ್ರದಲ್ಲಿ ಯಶ್ ರಾವಣನ ಪಾತ್ರಕ್ಕೆ ಜೀವ ತುಂಬಿದ್ದು, ನವೆಂಬರ್ 5ರಂದು ತೆರೆಗೆ ಬರಲಿರುವ ಈ ಬಹುನಿರೀಕ್ಷಿತ ಚಿತ್ರಕ್ಕಾಗಿ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.