ಬೆಂಗಳೂರು: ಪಾರ್ಕ್​ನಲ್ಲಿ ಮಲಗಿದ್ದಾಗ ಮರ ಬಿದ್ದು ವ್ಯಕ್ತಿ ದುರ್ಮರಣ!

ಬೆಂಗಳೂರು, (ನವೆಂಬರ್ 24): ಮರ ಬಿದ್ದು ವ್ಯಕ್ತಿಯೋರ್ವ ಸಾವನ್ನಪ್ಪಿರುವ ಘಟನೆ ರಾಜಾಜಿನಗರದ ನವರಂಗ್ ಬಳಿಯ ಬಿಬಿಎಂಪಿ ಪಾರ್ಕ್​ನಲ್ಲಿ ನಡೆದಿದೆ. ಲಕ್ಷ್ಮಣ್(31) ಮೃತ ದುರ್ವೈವಿ. ಕಸದ ಗಾಡಿ ಚಾಲಕನಾಗಿ ಕೆಲಸ ಮಾಡುತ್ತಿದ್ದ ಲಕ್ಷ್ಮಣ್, ರಾಜಾಜಿನಗರದ ನವರಂಗ್ ಬಳಿ ಪಾರ್ಕ್​ನಲ್ಲಿ ಮಲಗಿದ್ದ ವೇಳೆ ಏಕಾಏಕಿ ಬೃಹತ್ ಮರ ಮರ ಬಿದ್ದಿದೆ. ಪರಿಣಾಮ ಎದೆ ಭಾಗಕ್ಕೆ ಗಂಭೀರವಾಗಿ ಗಾಯವಾಗಿ ಮೃತಪಟ್ಟಿದ್ದಾನೆ. ಈ ಸಂಬಂಧ ರಾಜಾಜಿನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಮನೆ ಬಳಿ ಕುಳಿತಿದ್ದ ವ್ಯಕ್ತಿಗೆ ಕಾರು ಡಿಕ್ಕಿ

ಬೆಂಗಳೂರು: ವಾಹನ ಚಲಾಯಿಸುವ ಕೊಂಚ ಯಾಮಾರಿದರೂ ಅಪಾಯ ಎಂಬಂತೆ ಕಾರು ಚಾಲಕ ಬ್ರೇಕ್​ ತುಳಿಯುವ ಬದಲು ಎಕ್ಸ್​ಲೇಟರ್ ತುಳಿದುಬಿಟ್ಟಿದ್ದಾನೆ. ಪರಿಣಾಮ ವೇಗವಾಗಿ ಬಂದ ಕಾರು ಮೊಬೈಲ್​ ನೋಡಿಕೊಂಡು ಮನೆ ಮುಂದೆ ಕುಳಿತತ್ತಿದ್ದ ವ್ಯಕ್ತಿಗೆ ಗುದ್ದಿದೆ. ಇದರಿಂದ ವ್ಯಕ್ತಿಯ ಎರಡೂ ಕಾಲುಗಳಿಗೆ ಗಂಭೀರ ಗಾಯವಾಗಿದೆ. ಬೆಂಗಳೂರಿನ ರಾಜಾಜಿನಗರದ ಮಂಜುನಾಥ ನಗರದಲ್ಲಿ ಈ ದುರ್ಘಟನೆ ಸಂಭವಿಸಿದೆ. ಕಾರು ಡಿಕ್ಕಿಯಾಗಿ ಮಂಜು ಎಂಬುವರ ಕಾಲುಗಳಿಗೆ ಗಾಯವಾಗಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಇನ್ನು ಗುದ್ದಿದ ಏಟಿಗೆ ಕಾರಿನ ಸ್ಟೇರಿಂಗ್ ಎದೆ ಭಾಗಕ್ಕೆ ಬಡಿದಿದ್ದರಿಂದ ಚಾಲಕ ಮಹಾವೀರ್​ ಸಹ ಗೊಂಡಿದ್ದು, ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇನ್ನು ಈ ಸಂಬಂಧ ಚಾಲಕ ಮಹಾವೀರ್ ವಿರುದ್ಧ ವಿಜಯನಗರ ಸಂಚಾರಿ ಠಾಣೆಯಲ್ಲಿ ಎಫ್​ಐಆರ್ ದಾಖಲಾಗಿದೆ.