ಮೆಟ್ರೋ ಮಾದರಿಯ ರೂಲ್ಸ್ಗೆ ಮುಂದಾದ ಬಿಎಂಟಿಸಿ: ಬಸ್ನಲ್ಲಿ ಲೌಡ್ ಸ್ಪೀಕರ್ ಹಾಕಿದ್ರೆ ಕೆಳಗಿಳಿಸುವುದು ಗ್ಯಾರಂಟಿ
ಬಸ್ಗಳಲ್ಲಿ ಲೌಡ್‌ಸ್ಪೀಕರ್ ಬಳಕೆಗೆ ಬ್ರೇಕ್ ಹಾಕಲು ಬಿಎಂಟಿಸಿ ನಿಗಮ ಮುಂದಾಗಿದೆ. ಆ ಮೂಲಕ ನಮ್ಮ ಮೆಟ್ರೋ ಮಾದರಿಯಲ್ಲಿ ಹೊಸ ನಿಯಮ ಜಾರಿಗೆ ತರಲು ಸಜ್ಜಾಗಿದೆ. ಜೋರಾಗಿ ಹಾಡು ಕೇಳುವುದು ಅಥವಾ ರೀಲ್ಸ್ ನೋಡುವ ಮೂಲಕ ಇತರೆ ಪ್ರಯಾಣಿಕರಿಗೆ ಕಿರಿಕಿರಿ ಉಂಟು ಮಾಡುವವರನ್ನ ಬಸ್ನಿಂದ ಕೆಳಗಿಳಿಸುವಂತೆ ನಿರ್ವಾಹಕರಿಗೆ ಬಿಎಂಟಿಸಿ ಸೂಚನೆ ನೀಡಿದೆ.
Updated on: Oct 11, 2026 | 8:57 PM
ಮುಖ್ಯಾಂಶಗಳು
- ಬಿಎಂಟಿಸಿ ಬಸ್ನಲ್ಲಿ ಜೋರಾಗಿ ಸಾಂಗ್ಸ್, ರೀಲ್ಸ್ ನೋಡುವವರ ಸಂಖ್ಯೆ ಹೆಚ್ಚಳ
- ಪ್ರಯಾಣಿಕರಿಗೆ ಕಿರಿಕಿರಿ ಉಂಟಾಗುವುದನ್ನ ತಡೆಯಲು ಮುಂದಾದ ಬಿಎಂಟಿಸಿ
- ಮೆಟ್ರೋ ಮಾದರಿಯ ರೂಲ್ಸ್ ಜಾರಿಗೆ ಮುಂದಾದ ಬಿಎಂಟಿಸಿ
ಬೆಂಗಳೂರು, ಅಕ್ಟೋಬರ್ 11: ಇತ್ತೀಚೆಗೆ ಬಿಎಂಟಿಸಿ ಬಸ್ನಲ್ಲಿ ಮೊಬೈಲ್ ಲೌಡ್ ಸ್ಪೀಕರ್ ಮೂಲಕ ಜೋರಾಗಿ ಹಾಡು ಹಾಕುವುದು, ರೀಲ್ಸ್ ನೋಡುವುದು, ಯೂಟ್ಯೂಬ್ ವೀಕ್ಷಣೆ ಮಾಡುವ ಮೂಲಕ ಅಕ್ಕಪಕ್ಕದ ಪ್ರಯಾಣಿಕರಿಗೆ ಕಿರಿಕಿರಿ ನೀಡುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ಇದಕ್ಕೆ ಬ್ರೇಕ್ ಹಾಕಲು ಬಿಎಂಟಿಸಿ ಮುಂದಾಗಿದ್ದು, ಇನ್ಮುಂದೆ ಲೌಡ್ ಸ್ಪೀಕರ್ ಹಾಕುವ ಮೂಲಕ ಕಿರಿಕಿರಿ ಮಾಡಿದರೆ ಬಸ್ನಿಂದ ಕೆಳಗಿಳಿಸಲಾಗುತ್ತದೆ.
ಬಿಎಂಟಿಸಿಯಲ್ಲಿ ನಮ್ಮ ಮೆಟ್ರೋ ಮಾದರಿಯ ರೂಲ್ಸ್
ನಮ್ಮ ಮೆಟ್ರೋದಲ್ಲಿ ಪ್ರಯಾಣಿಕರು ಫೋನ್ನಲ್ಲಿ ಲೌಡ್ ಸ್ಪೀಕರ್ ಹಾಕಿ ಜೋರಾಗಿ ಹಾಡು ಕೇಳುವಂತಿಲ್ಲ, ರೀಲ್ಸ್ ನೋಡುವಂತಿಲ್ಲ, ಯೂಟ್ಯೂಬ್ನಲ್ಲಿ ವಿಡಿಯೋ ವೀಕ್ಷಿಸುವಂತಿಲ್ಲ. ಒಂದು ವೇಳೆ ಪ್ರಯಾಣಿಕರಿಗೆ ಕಿರಿಕಿರಿ ಮಾಡಿದರೆ ದಂಡ ಹಾಕುತ್ತಾರೆ. ಇದರಿಂದ ಪ್ರಯಾಣಿಕರು ಯಾರು ಲೌಡ್ ಸ್ಪೀಕರ್ ಹಾಕಲ್ಲ, ಸಹ ಪ್ರಯಾಣಿಕರಿಗೆ ತೊಂದರೆ ಕೂಡ ಕೊಡಲ್ಲ. ಆದರೆ ಹೆಡ್ಪೋನ್ ಹಾಕಿಕೊಂಡು ಸಾಂಗ್ಸ್ ಕೇಳಬಹುದು.
ಇದು ಸರಿಯಾದ ನಿರ್ಧಾರ ಎಂದ ಪ್ರಯಾಣಿಕರು
ಸದ್ಯ ಬಿಎಂಟಿಸಿ ನಿಗಮ ಅಲರ್ಟ್ ಆಗಿದ್ದು, ಬಸ್ಗಳಲ್ಲಿ ಲೌಡ್ ಸ್ಪೀಕರ್ ಹಾಕಿ ಸಹ ಪ್ರಯಾಣಿಕರಿಗೆ ಕಿರಿಕಿರಿ ಮಾಡಿದರೆ ಬಸ್ನಿಂದ ಕೆಳಗೆ ಇಳಿಸಲು ಕಂಡಕ್ಟರ್ಗಳಿಗೆ ಅಧಿಕಾರಿಗಳು ಸೂಚನೆ ನೀಡಿದ್ದಾರೆ. ಇನ್ನು ಈ ಕುರಿತಾಗಿ ಬಿಎಂಟಿಸಿ ಬಸ್ ಪ್ರಯಾಣಿಕರಾದ ಡಾ. ಬಸವರಾಜ್ ಅವರು ಟಿವಿ ಜೊತೆಗೆ ಮಾತನಾಡಿದ್ದು, ‘ಇದು ಸರಿಯಾದ ನಿರ್ಧಾರ’ ಎಂದು ಸ್ವಾಗತಿಸಿದ್ದಾರೆ.
ಪ್ರಯಾಣಿಕರನ್ನ ಬಸ್ನಿಂದ ಕೆಳಗಿಳಿಸಲು ಸೂಚನೆ
ಈಗಾಗಲೇ ಕೆಲವು ಬಸ್ಗಳಲ್ಲಿ ಮೊಬೈಲ್ನಲ್ಲಿ ಜೋರಾಗಿ ಮಾತನಾಡುವುದು, ರೀಲ್ಸ್ ನೋಡುವುದು, ಹಾಡು ಕೇಳುವುದು ನಿಷೇಧಿಸಲಾಗಿದೆ. ಆದರೂ ಸಹ ಕೆಲವು ಪ್ರಯಾಣಿಕರು ಬಸ್ನಲ್ಲಿ ಮೊಬೈಲ್ನಲ್ಲಿ ಲೌಡ್ ಸ್ಪೀಕರ್ ಹಾಕುವ ಮೂಲಕ ಅಕ್ಕಪಕ್ಕದ ಪ್ರಯಾಣಿಕರಿಗೆ ಕಿರಿಕಿರಿ ಉಂಟುಮಾಡುತ್ತಿದ್ದಾರೆ. ಆದರೆ ಈ ಬಗ್ಗೆ ಕಂಡಕ್ಟರ್ಗಳು ಪ್ರಯಾಣಿಕರಿಗೆ ಸೂಚನೆ ನೀಡಿದರೆ, ಪ್ರಯಾಣಿಕರು ಕಂಡಕ್ಟರ್ಗಳಿಗೆ ಆವಾಜ್ ಹಾಕ್ತಿದ್ದಾರಂತೆ. ಅಂತಹ ಪ್ರಯಾಣಿಕರನ್ನು ಕೂಡಲೇ ಬಸ್ನಿಂದ ಕೆಳಕ್ಕೆ ಇಳಿಸಲು ಬಿಎಂಟಿಸಿ ಸೂಚನೆ ನೀಡಿದೆ. ಹೀಗಾಗಿ ಯಾರಾದರೂ ಬಸ್ನಲ್ಲಿ ಪ್ರಯಾಣಿಕರಿಗೆ ತೊಂದರೆ ಕೊಟ್ಟರೆ, ಲೌಡ್ ಸ್ಪೀಕರ್‌ನಲ್ಲಿ ಹಾಡು ಹಾಕಿ ಕಿರಿಕಿರಿ ಮಾಡಿದರೆ, ಮೊದಲಿಗೆ ಎಚ್ಚರಿಕೆ ಕೊಡಲು ನಿರ್ವಾಹಕರಿಗೆ ಬಿಎಂಟಿಸಿ ಸೂಚನೆ ಕೊಟ್ಟಿದೆ. ವಾರ್ನಿಂಗ್ಗೂ ಬಗ್ಗದಿದ್ದರೆ ಅಂತಹ ಪ್ರಯಾಣಿಕರನ್ನು ಕೂಡಲೇ ಬಸ್ನಿಂದ ಕೆಳಕ್ಕೆ ಇಳಿಸಲು ಸೂಚನೆ ನೀಡಲಾಗಿದೆ.
ಒಟ್ಟಿನಲ್ಲಿ ಬಿಎಂಟಿಸಿ ಬಸ್ನಲ್ಲಿ ಲೌಡ್ ಸ್ಪೀಕರ್ ಹಾಕಿಕೊಂಡು, ಸಹ ಪ್ರಯಾಣಿಕರಿಗೆ ತೊಂದರೆ ಕೊಡುವವರಿಗೆ ಬ್ರೇಕ್ ಹಾಕಲು ಮುಂದಾಗಿರುವುದು ಒಳ್ಳೆಯದು. ಆದರೆ ಈ ರೂಲ್ಸ್ ಎಷ್ಟು ದಿನ ಫಾಲೋ ಆಗುತ್ತದೆ ಎಂದು ಕಾದು ನೋಡಬೇಕಿದೆ.
ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
