ಚಿಕ್ಕಬಳ್ಳಾಪುರ: ಕ್ರಿಮಿನಾಶಕ, ಗೊಬ್ಬರ ಸಿಂಪಡಣೆಗೆ ಬಂತು ಡ್ರೋನ್; ರೈತರ ಸಮಸ್ಯೆಗಳಿಗೆ ರಾಮಬಾಣ

ಚಿಕ್ಕಬಳ್ಳಾಪುರ: ಬೆಳೆಗಳಿಗೆ ಔಷಧಿ ಸಿಂಪಡಿಸಬೇಕು ಅಂದರೆ ಒಂದೆಡೆ ಕೂಲಿಕಾರ್ಮಿಕರ ಸಮಸ್ಯೆ, ಮತ್ತೊಂದೆಡೆ ನುರಿತ ಕಾರ್ಮಿಕರ ಅಲಭ್ಯ ಇದೆ. ಇನ್ನು ಅಗತ್ಯಕ್ಕಿಂತ ಅನಗತ್ಯವಾಗಿ ಖರ್ಚಾಗುವ ಔಷಧಿಯ ಸಮಸ್ಯೆಯೂ ಕೂಡ ಬೆಳೆಗಾರರನ್ನು ಕಾಡುತ್ತಿದೆ. ಇವೆಲ್ಲದಕ್ಕೂ ಪರಿಹಾರ ಎಂಬಂತೆ, ಈಗ ವಿನೂತನ ಮಾದರಿಯ ಡ್ರೋನ್​ಗಳು ರೈತರ ಬೆಳೆಗಳಿಗೆ, ಔಷಧಿ, ಗೊಬ್ಬರ ಸಿಂಪಡಿಸುವ ಪ್ರಯೋಗದಲ್ಲಿ ಯಶಸ್ವಿಯಾಗಿದೆ ಏನಿದು ಡ್ರೋನ್ ಔಷಧಿ ಸಿಂಪಡಣೆ ಅಂತೀರಾ ಈ ವರದಿ ನೋಡಿ

ಪಾಸ್ಟ್ ಫುಡ್, ಬೇಡಿಕೆ ನೀಗಿಸುವುದರಿಂದ ಹಿಡಿದು, ಮನುಷ್ಯನಿಗೆ ಬೇಕಾಗಿರುವ ಔಷಧಿ ಸರಬರಾಜು ಮಾಡುವವರೆಗೆ ಅತ್ಯಾಧುನಿಕ ಮಾದರಿಯ ಡ್ರೋನ್​ಗಳು ಯಶಸ್ವಿ ಪ್ರಯೋಗ ನಡೆಸಿ ಸೈ ಎನಿಸಿಕೊಂಡಿವೆ. ಇನ್ನು ಒಂದು ಹೆಜ್ಜೆ ಮುಂದೆ ಹೋಗಿರುವ ಡ್ರೋನ್​ಗಳು ಈಗ ರೈತರ ಅಗತ್ಯಕ್ಕೆ ತಕ್ಕಂತೆ ಕೆಲಸ ಮಾಡುವಲ್ಲಿ ಸೈ ಎನಿಸಿಕೊಂಡಿವೆ.

ಚಿಕ್ಕಬಳ್ಳಾಪುರ ಜಿಲ್ಲೆ ಶಿಡ್ಲಘಟ್ಟ ತಾಲ್ಲೂಕಿನ ಸಾದಲಿ ಬಳಿ ರೈತರ ಜಮೀನಿನಲ್ಲಿ ಡ್ರೋನ್​ಗಳು ಕಮಾಲ್ ಮಾಡಿವೆ. ಅದರಲ್ಲೂ ರೈತರಿಗೆ ಅಗತ್ಯ ಹಾಗೂ ಜಟಿಲವಾಗಿದ್ದ, ಅವರ ಬೆಳೆಗಳಿಗೆ ಔಷಧಿ ಸಿಂಪಡಿಸುವ ಕಾರ್ಯಕ್ಕೆ ಡ್ರೋನ್​ಗಳು ಇಳಿದಿವೆ. ಖಾಸಗಿ ಕ್ರಿಮಿನಾಶಕ ತಯಾರಿಕಾ ಸಂಸ್ಥೆಯೊಂದು, ಬಾಡಿಗೆ ಆಧಾರದ ಮೇಲೆ ರೈತರ ಬೆಳೆಗಳಿಗೆ ಕ್ರಿಮಿನಾಶಕ ಸಿಂಪಡಿಸುತ್ತಿದೆ. ಒಂದು ಎಕರೆ ಜಮೀನಿನಲ್ಲಿರುವ ಬೆಳೆಗೆ ಕೇವಲ 7 ನಿಮಿಷದಲ್ಲಿ, ಔಷಧಿ ಸಿಂಪಡಣೆ ಮಾಡುತ್ತದೆ. ಅದರಲ್ಲೂ ಔಷಧಿ ವ್ಯರ್ಥವಾಗದ ಹಾಗೆ ಬೆಳೆಗಳ ಮೇಲೆ ಔಷಧಿ ಸಿಂಪಡಿಸುತ್ತದೆ. ಇದರಿಂದ ರೈತರ ವಿವಿಧ ಸಮಸ್ಯೆಗಳಿಗೆ ಡ್ರೋನ್​ಗಳು ರೈತಮಿತ್ರವಾಗುತ್ತಿವೆ ಎಂದು ಡ್ರೋನ್ ನಿರ್ವಾಹಕ ರಬ್ಬಾನಿ ಹೇಳಿದ್ದಾರೆ.

ಅಸಲಿಗೆ ಡ್ರೋನ್​ಗಳಲ್ಲಿ 6 ಮಾಡೆಲ್​ಗಳಿವೆ, 10 ಲೀಟರ್ ಸಾಮರ್ಥ್ಯದ ಡ್ರೋನ್​, 16 ಲೀಟರ್ ಸಾಮರ್ಥ್ಯದ ಹೈಬ್ರಿಡ್ ಡ್ರೋನ್​, 21 ಲೀಟರ್ ಸಾಮರ್ಥ್ಯದ ಡ್ರೋನ್​ ಸೇರಿದಂತೆ, 22 ಕೆಜಿ ಹೊತ್ತು ಹಾರಾಡಬಲ್ಲ ಡ್ರೋನ್​ಗಳಿವೆ. ಡ್ರೋನ್ ಬುಡದಲ್ಲಿ ಟ್ಯಾಂಕ್ ಒಂದನ್ನು ಅಳವಡಿಸಿದ್ದು, ಅದಕ್ಕೆ ಸ್ಪ್ರೇಯರ್ ಪಂಪ್ ಅಳವಡಿಸಲಾಗಿದೆ. ಬೆಳೆಗೆ ತಕ್ಕ ಎತ್ತರಕ್ಕೆ ಸೀಮಿತವಾಗಿ, ಡ್ರೋನ್​ಗಳು ಕಾರ್ಯನಿರ್ವಹಿಸುತ್ತಿವೆ. ಇನ್ನು ಡ್ರೋನ್​ಗೆ ಜಿಪಿಎಸ್ ಅಳವಡಿಸಲಾಗಿದೆ. ಜಮೀನಿನ ಮ್ಯಾಪ್​ ಅನ್ನು ಡ್ರೋನ್​ಗೆ ಅಳವಡಿಸಿದರೆ ಡ್ರೋನ್​ ಆ ಜಮೀನು ಬಿಟ್ಟು ಅಕ್ಕಪಕ್ಕ ಜಮೀನಿಗೆ ಹೋಗಲ್ಲ. ಇದರಿಂದ ರೈತರು ಡ್ರೋನ್ ಕಾರ್ಯಕ್ಕೆ ಫೀದಾ ಆಗಿದ್ದಾರೆ.

ಕೃಷಿ ಹಾಗೂ ತೋಟಗಾರಿಕೆಯಲ್ಲಿ ಡ್ರೋನ್​ ಬಳಕೆಗೆ ನಾಗರೀಕ ವಿಮಾನಯಾನ ಸಚಿವಾಲಯ ಅನುಮತಿ ನೀಡಿದೆ. 200 ಮೀಟರ್ ಎತ್ತರದ ವರೆಗೂ ಹಸಿರುವಲಯದಲ್ಲಿ ಡ್ರೋನ್​ಗಳು ಹಾರಾಟ ನಡೆಸಬಹುದಾಗಿದೆ. ಆದರೆ ರೆಡ್ ಜೋನ್, ಯಲ್ಲೋ ಜೋನ್, ಸೇರಿದಂತೆ ನಿಷೇಧಿತ ಪ್ರದೇಶದಲ್ಲಿ ಡ್ರೋನ್​ಗಳ ಹಾರಾಟಕ್ಕೆ ಅನುಮತಿ ನೀಡಿಲ್ಲ. ಒಟ್ಟಾರೆ ಕೃಷಿಗೆ ಡ್ರೋನ್ ಬಳಕೆಯಿಂದ ಕೃಷಿಯಲ್ಲಿ ಮತ್ತೊಂದು ಹೊಸ ಕ್ರಾಂತಿಯೇ ಸೃಷಿಯಾಗಿರುವುದಂತು ಸತ್ಯ.

ವರದಿ: ಭೀಮಪ್ಪ ಪಾಟೀಲ್​

ಇದನ್ನೂ ಓದಿ: Viral Video: ಈ ಡ್ರೋನ್​ನಲ್ಲಿ ಮನುಷ್ಯರೂ ಕೂತು ಹಾರಬಹುದು! ವಿಡಿಯೋ ನೋಡಿ

ಜಮ್ಮು ದಾಳಿಯ ನಂತರ ಶ್ರೀನಗರದಲ್ಲಿ ಡ್ರೋನ್‌, ಮಾನವರಹಿತ ವಾಹನಗಳಿಗ ನಿಷೇಧ