ಸತೀಶ್ ಸೈಲ್​ಗೆ ಜೈಲು ಶಿಕ್ಷೆ: ಯಾವ ಪ್ರಕರಣದಲ್ಲಿ ಎಷ್ಟು ಶಿಕ್ಷೆ? ಇಲ್ಲಿದೆ ವಿವರ

ಬೆಂಗಳೂರು, ಅಕ್ಟೋಬರ್ 26: ಬೇಲೆಕೇರಿ ಬಂದರಿನಿಂದ ಅದಿರು ನಾಪತ್ತೆಯಾಗಿ ಸುಮಾರು 14 ವರ್ಷಗಳ ನಂತರ ಇದೀಗ ತೀರ್ಪು ಹೊರಬಿದ್ದಿದೆ. ಆರು ಪ್ರಕರಣಗಳಲ್ಲಿ ಕಾರವಾರ-ಅಂಕೋಲಾ ಕ್ಷೇತ್ರದ ಕಾಂಗ್ರೆಸ್ ಶಾಸಕ ಸತೀಶ್ ಸೈಲ್ (Satish Sail) ಸೇರಿದಂತೆ ಉಳಿದ ಆರೋಪಿಗಳಿಗೆ ಒಟ್ಟು 7 ವರ್ಷ ಕಠಿಣ ಶಿಕ್ಷೆ ವಿಧಿಸಿ ಬೆಂಗಳೂರಿನ ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯವು ಇಂದು ಆದೇಶ ಹೊರಡಿಸಿದೆ. ಹಾಗಾದರೆ ಯಾವ ಯಾವ ಪ್ರಕರಣದಲ್ಲಿ ಎಷ್ಟು ಶಿಕ್ಷೆ ಎಂದು ಸಂಪೂರ್ಣ ಇಲ್ಲಿದೆ.

6 ಲಕ್ಷ ಮೆಟ್ರಿಕ್ ಟನ್ ಅದಿರು ನಾಪತ್ತೆ ಕೇಸ್

2010 ರ ಮಾರ್ಚ್ 20ರಲ್ಲಿ ಸೀಜ್ ಆಗಿದ್ದ 8ಲಕ್ಷ ಮೆಟ್ರಿಕ್ ಟನ್ ಅದಿರಿನ ಪೈಕಿ, ಕೇವಲ 80 ದಿನಗಳಲ್ಲಿ 6 ಲಕ್ಷ ಮೆಟ್ರಿಕ್ ಟನ್ ನಾಪತ್ತೆಯಾಗಿತ್ತು. ಸುಪ್ರೀಂಕೋರ್ಟ್ ಸೂಚನೆ ಮೇರೆಗೆ ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದ ಸಿಬಿಐ ತನಿಖೆ ಆರಂಭಿಸಿತ್ತು.

ಇದನ್ನೂ ಓದಿ: ಕಾಂಗ್ರೆಸ್​ನ ಸತೀಶ್​​ ಸೈಲ್​ಗೆ 7 ವರ್ಷ ಜೈಲು: ಬೇಲೆಕೇರಿ ಅದಿರು ಅಕ್ರಮ ಸಾಗಾಟ ಪ್ರಕರಣದಲ್ಲಿ ಮಹತ್ವದ ತೀರ್ಪು

ಶಾಸಕ ಸತೀಶ್ ಸೈಲ್, ಮಹೇಶ್ ಬಿಳಿಯೆ, ಕಾರಾಪುಡಿ ಮಹೇಶ್, ಸ್ವಸ್ತಿಕ್ ನಾಗರಾಜು ಸೇರಿದಂತೆ ಹಲವರ ವಿರುದ್ಧ ಆರೋಪಪಟ್ಟಿ ದಾಖಲಿಸಿತ್ತು. ಇದೀಗ ಜನಪ್ರತಿನಿಧಿಗಳ ವಿಶೇಷ ಕೋರ್ಟ್ ಸತೀಶ್ ಸೈಲ್ ಸೇರಿದಂತೆ 7 ಆರೋಪಿಗಳ ವಿರುದ್ಧ ಶಿಕ್ಷೆ ಪ್ರಮಾಣ ಪ್ರಕಟಿಸಿದೆ.

1ನೇ ಕೇಸ್​ನಲ್ಲಿ 7 ವರ್ಷ ಶಿಕ್ಷೆ: 6 ಕೋಟಿ ರೂ. ದಂಡ

1ನೇ ಅಪರಾಧಿ ಮಹೇಶ್ ಬಿಳಿಯೆ, 2ನೇ ಅಪರಾಧಿ ಮಲ್ಲಿಕಾರ್ಜುನ ಶಿಪ್ಪಿಂಗ್, 3ನೇ ಅಪರಾಧಿ ಸತೀಶ್ ಸೈಲ್, 4ನೇ ಅಪರಾಧಿ ಪಿಜೆಎಸ್‌ ಓವರ್ ಸೀಸ್ ವಿರುದ್ಧದ ಪ್ರಕರಣದಲ್ಲಿ, 11312 ಮೆಟ್ರಿಕ್ ಟನ್ ಅದಿರು ಕಳ್ಳತನ, ಷಡ್ಯಂತ್ರ, ವಂಚನೆ, ಆರೋಪವಿತ್ತು. ಈ ಪ್ರಕರಣದಲ್ಲಿ ಕೋರ್ಟ್ ಗರಿಷ್ಟ ಶಿಕ್ಷೆಯಾಗಿ 7 ವರ್ಷ ಕಠಿಣ ಕಾರಾಗೃಹವಾಸದ ಶಿಕ್ಷೆ ವಿಧಿಸಿ, ಅಪರಾಧಿಗಳಿಗೆ ಒಟ್ಟು 6 ಕೋಟಿ ದಂಡ ವಿಧಿಸಿದೆ.

2ನೇ ಕೇಸ್​ನಲ್ಲಿ 7 ವರ್ಷ ಕಠಿಣ ಶಿಕ್ಷೆ: 9 ಕೋಟಿ 6 ಲಕ್ಷ ರೂ. ದಂಡ

1ನೇ ಅಪರಾಧಿ ಮಹೇಶ್ ಬಿಳಿಯೆ, 2ನೇ ಅಪರಾಧಿ ಆಶಾಪುರ ಮೈನ್‌ಚೆಮ್ ಲಿಮಿಟೆಡ್, 3ನೇ ಅಪರಾಧಿ ಚೇತನ್ ಶಾ, 4 ನೇ ಅಪರಾಧಿ ಮಲ್ಲಿಕಾರ್ಜುನ ಶಿಪ್ಪಿಂಗ್, 5ನೇ ಅಪರಾಧಿ ಸತೀಶ್ ಸೈಲ್ ವಿರುದ್ಧದ ಪ್ರಕರಣದಲ್ಲಿ, 27995 ಮೆ.ಟನ್ ಕಬ್ಬಿಣದ ಅದಿರಿನ ಕಳ್ಳತನ, ಷಡ್ಯಂತ್ರ, ವಂಚನೆ ಆರೋಪವಿತ್ತು. ಈ ಪ್ರಕರಣದಲ್ಲಿ ಕೋರ್ಟ್ ಗರಿಷ್ಟ ಶಿಕ್ಷೆಯಾಗಿ 7 ವರ್ಷ ಕಠಿಣ ಕಾರಾಗೃಹವಾಸದ ಶಿಕ್ಷೆ ವಿಧಿಸಿ, ಅಪರಾಧಿಗಳಿಗೆ 9 ಕೋಟಿ 6 ಲಕ್ಷ ದಂಡ ವಿಧಿಸಿದೆ.

3ನೇ ಕೇಸ್​ನಲ್ಲಿ 7 ವರ್ಷ ಕಠಿಣ ಶಿಕ್ಷೆ: 9 ಕೋಟಿ 36 ಲಕ್ಷ ರೂ. ದಂಡ

1ನೇ ಅಪರಾಧಿ ಮಹೇಶ್ ಬಿಳಿಯೆ, 2ನೇ ಅಪರಾಧಿ ಐಎಲ್‌ಸಿ ಇಂಡಸ್ಟ್ರೀಸ್, 4 ನೇ ಅಪರಾಧಿ ಮಲ್ಲಿಕಾರ್ಜುನ ಶಿಪ್ಪಿಂಗ್, 5ನೇ ಅಪರಾಧಿ ಸತೀಶ್ ಸೈಲ್ ವಿರುದ್ಧ 19297 ಮೆಟ್ರಿಕ್ ಟನ್ ಕಬ್ಬಿಣದ ಅದಿರಿನ ಕಳ್ಳತನ, ವಂಚನೆ, ಒಳಸಂಚಿನ ಆರೋಪಗಳು ಸಾಬೀತಾಗಿದ್ದು ಅಪರಾಧಿಗಳಿಗೆ ಕೋರ್ಟ್ 9 ಕೋಟಿ 36 ಲಕ್ಷ ದಂಡ ವಿಧಿಸಿದೆ.

4 ನೇ ಕೇಸ್​ನಲ್ಲಿ 7 ವರ್ಷ ಕಠಿಣ ಶಿಕ್ಷೆ: 9 ಕೋಟಿ 52 ಲಕ್ಷ ರೂ. ದಂಡ

1 ನೇ ಅಪರಾಧಿ ಮಹೇಶ್ ಬಿಳಿಯೆ, 2 ನೇ ಅಪರಾಧಿ ಸ್ವಸ್ತಿಕ್ ಸ್ಟೀಲ್ಸ್, 3ನೇ ಅಪರಾಧಿ ಸ್ವಸ್ತಿಕ್ ನಾಗರಾಜ್, 4ನೇ ಅಪರಾಧಿ ಕೆ.ವಿ.ಎನ್. ಗೋವಿಂದರಾಜ್, 5ನೇ ಅಪರಾಧಿ ಶ್ರೀ ಮಲ್ಲಿಕಾರ್ಜುನ ಶಿಪ್ಪಿಂಗ್ ಲಿಮಿಟೆಡ್, ವಿರುದ್ಧ 27000 ಮೆಟ್ರಿಕ್ ಟನ್ ಕಬ್ಬಿಣದ ಅದಿರಿನ ಕಳ್ಳತನ, ವಂಚನೆ, ಒಳಸಂಚಿನ ಆರೋಪಗಳು ಸಾಬೀತಾಗಿದ್ದು ಅಪರಾಧಿಗಳಿಗೆ ಕೋರ್ಟ್ 9 ಕೋಟಿ 52 ಲಕ್ಷ ದಂಡ ವಿಧಿಸಿದೆ.

5ನೇ ಕೇಸ್​ನಲ್ಲಿ 7 ವರ್ಷ ಕಠಿಣ ಶಿಕ್ಷೆ: 9 ಕೋಟಿ 25 ಲಕ್ಷ ರೂ. ದಂಡ

5ನೇ ಕೇಸ್ ನಲ್ಲಿ 1ನೇ ಅಪರಾಧಿ ಮಹೇಶ್ ಬಿಳಿಯೆ, 2ನೇ ಅಪರಾಧಿ ಲಕ್ಷ್ಮಿ ವೆಂಕಟೇಶ್ವರ ಮಿನರಲ್ಸ್, 3ನೇ ಅಪರಾಧಿ ಕಾರಾಪುಡಿ ಮಹೇಶ್, 4ನೇ ಆಪರಾಧಿ ಮಲ್ಲಿಕಾರ್ಜುನ ಶಿಪ್ಪಿಂಗ್ ಲಿಮಿಟೆಡ್, 5 ನೇ ಅಪರಾಧಿ ಸತೀಶ್ ಸೈಲ್ ವಿರುದ್ಧ 35369 ಮೆಟ್ರಿಕ್ ಟನ್ ಕಬ್ಬಿಣದ ಅದಿರಿನ ಕಳ್ಳತನ, ಷಡ್ಯಂತ್ರ, ವಂಚನೆ ಆರೋಪವಿತ್ತು. ಈ ಪ್ರಕರಣದಲ್ಲಿ ಕೋರ್ಟ್ ಗರಿಷ್ಟ ಶಿಕ್ಷೆಯಾಗಿ 7 ವರ್ಷ ಕಠಿಣ ಕಾರಾಗೃಹವಾಸದ ಶಿಕ್ಷೆ ವಿಧಿಸಿ, ಅಪರಾಧಿಗಳಿಗೆ 9 ಕೋಟಿ 25 ಲಕ್ಷ ದಂಡ ವಿಧಿಸಿದೆ.

6ನೇ ಕೇಸ್​ನಲ್ಲಿ 7 ವರ್ಷ ಕಠಿಣ ಶಿಕ್ಷೆ: 90 ಲಕ್ಷ ರೂ. ದಂಡ

6 ನೇ ಕೇಸ್ ನಲ್ಲಿ 1ನೇ ಅಪರಾಧಿ ಮಹೇಶ್ ಬಿಳಿಯೆ, 2ನೇ ಅಪರಾಧಿ ಲಾಲ್ ಮಹಲ್ ಲಿಮಿಟೆಡ್, 3ನೇ ಅಪರಾಧಿ ಪ್ರೇಮ್ ಚಂದ್ ಗರ್ಗ್, 5 ನೇ ಅಪರಾಧಿ ಮಲ್ಲಿಕಾರ್ಜುನ ಶಿಪ್ಪಿಂಗ್, 6 ನೇ ಅಪರಾಧಿ ಸತೀಶ್ ಸೈಲ್ ವಿರುದ್ಧ 24442 ಮೆಟ್ರಿಕ್ ಟನ್ ಕಬ್ಬಿಣದ ಅದಿರಿನ ಳ್ಳತನ, ಷಡ್ಯಂತ್ರ, ವಂಚನೆ ಆರೋಪವಿತ್ತು. ಈ ಪ್ರಕರಣದಲ್ಲಿ ಕೋರ್ಟ್ ಗರಿಷ್ಟ ಶಿಕ್ಷೆಯಾಗಿ 7 ವರ್ಷ ಕಠಿಣ ಕಾರಾಗೃಹವಾಸದ ಶಿಕ್ಷೆ ವಿಧಿಸಿ, ಅಪರಾಧಿಗಳಿಗೆ 90 ಲಕ್ಷ ದಂಡ ವಿಧಿಸಿದೆ.

ಸತೀಶ್ ಸೈಲ್ ಶಾಸಕ ಸ್ಥಾನ ಅನರ್ಹತೆ ಭೀತಿ

ಶಾಸಕ ಸತೀಶ್ ಸೈಲ್​ಗೆ ಅನರ್ಹತೆಯ ಭೀತಿ ಎದುರಾಗಿದೆ. 7 ವರ್ಷ ಶಿಕ್ಷೆಯಾಗಿರುವ ಹಿನ್ನೆಲೆ, ಶಾಸಕ ಸ್ಥಾನ ವಜಾವಾಗುವ ಸಾಧ್ಯತೆಯಿದೆ. ಹೈಕೋರ್ಟ್‌ನಲ್ಲಿ ಶಿಕ್ಷೆಗೆ ತಡೆ ಸಿಕ್ಕರೆ ಮಾತ್ರ ಅನರ್ಹತೆಯಿಂದ ಬಚಾವಾಗಬಹುದು ಎನ್ನಲಾಗಿದೆ.

ರಾಜ್ಯದ ಮತ್ತಷ್ಟ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.

Published On - 5:51 pm, Sat, 26 October 24