ಇಂಗ್ಲಿಷ್ ಸಬ್ಜೆಕ್ಟ್ನಲ್ಲಿ ಫೇಲ್ ಆದ ಯುವಕನೇ ಇಂದು ಇಂಗ್ಲಿಷ್ ಪಂಡಿತ; ಇದೊಂದು ಸ್ಪೂರ್ತಿದಾಯಕ ಸ್ಟೋರಿ
ರಮೇಶ್ ಚೆನ್ನಾಗಿ ಇಂಗ್ಲಿಷ್ ಕಲಿತ ಮೇಲೆ ಮಲೇಷಿಯಾ, ಸಿಂಗಾಪುರಗಳಲ್ಲಿ ಟೂರ್ ಗೈಡಾಗಿ ಕೆಲಸ ಮಾಡಿದ್ದಾನೆ. ಹತ್ತಾರು ಸರ್ಕಾರಿ ಕಾಲೇಜುಗಳಿಗೆ ಇಂಗ್ಲಿಷ್ ರಿಸೋರ್ಸ್ ಪರ್ಸ್ನ್ ಆಗಿದ್ದಾನೆ. ಅಷ್ಟೇ ಅಲ್ಲದೆ ಇವರ ಬಳಿ ಇಂಗ್ಲಿಷ್ ಶಿಕ್ಷಕರು, ಇಂಗ್ಲಿಷ್ ಉಪನ್ಯಾಸಕರು, ಪೊಲೀಸ್ ಅಧಿಕಾರಿಗಳು, ಕೆಎಎಸ್, ಅಧಿಕಾರಿಗಳು ಕೂಡಾ ಇಂಗ್ಲಿಷ್ ಕಲಿಯುವುದಕ್ಕೆ ಬರುತ್ತಾರೆ.
Updated on: Jan 21, 2022 | 7:47 PM
ಕೋಲಾರ: ಪಿಯುಸಿಯಲ್ಲಿ (PUC) ಇಂಗ್ಲಿಷ್ ವಿಷಯದಲ್ಲಿ ಫೇಲ್ ಆಗಿ ಕೂಲಿ ಕೆಲಸ ಮಾಡಲು ಹೋಗಿದ್ದ ಯುವಕ, ಸೋತಲ್ಲೇ ಮತ್ತೆ ಎದ್ದು ನಿಲ್ಲಬೇಕೆಂದು ಹಠದಿಂದ ಹೋರಾಟ ನಡೆಸಿದ್ದಾನೆ. ಪರಿಣಾಮ ಇಂದು ತನಗೆ ಪಾಠ ಕಲಿಸಿದ ಗುರುಗಳಿಗೆ ಇಂಗ್ಲಿಷ್ (English) ಹೇಳಿಕೊಡುವಷ್ಟರ ಮಟ್ಟಿಗೆ ಬೆಳೆದಿದ್ದಾನೆ. ಅಷ್ಟೇ ಅಲ್ಲ ಇಂಗ್ಲಿಷ್ ಕಲಿಯಲು ತನ್ನದೇ ಸೂತ್ರಗಳನ್ನು ಬರೆದು ವಿಶ್ವದಾಖಲೆ (World record) ಮಾಡಿದ್ದಾನೆ. ಸೌತ್ ಆಫ್ರಿಕಾ, ಅಮೇರಿಕಾ, ಸಿಂಗಾಪುರ, ಮಲೇಷಿಯಾ, ಶೈಲಿಯಲ್ಲಿ ಇಂಗ್ಲಿಷ್ ಮಾತನಾಡಬಲ್ಲ ಈತನ ಇಂಗ್ಲಿಷ್ ಪಾಂಡಿತ್ಯಕ್ಕೆ ಸಿಕ್ಕಿರುವ ಗೌರವ ಹಾಗೂ ವಿಶ್ವದಾಖಲೆಗಳು ಹತ್ತು ಹಲವು. ಇಲ್ಲಿದೆ ಕೋಲಾರ ಜಿಲ್ಲೆಯ ಯುವಕನ ಸ್ಪೂರ್ತಿದಾಯಕ ಕಥೆ.
ಕೋಲಾರ ಜಿಲ್ಲೆ ಮಾಲೂರು ತಾಲ್ಲೂಕು ಉಪ್ಪಾರಹಳ್ಳಿಯ ಬಡ ಕುಟುಂಬದಲ್ಲಿ ಹುಟ್ಟಿದ ರಮೇಶ್ ಎಂಬ ಯುವಕ ಕಳೆದ ಹತ್ತು ವರ್ಷಗಳ ಹಿಂದೆ ಇಂಗ್ಲಿಷ್ ವಿಷಯದಲ್ಲಿ ಪಿಯುಸಿಯಲ್ಲಿ ಪೇಲ್ ಆಗಿದ್ದ. ಆಗ ಬೇರೆ ದಾರಿ ಕಾಣದೆ ಮಾಲೂರು ಸೇರಿ ಹಲವೆಡೆ ಕೂಲಿ ಕೆಲಸಕ್ಕೆ ಹೊಗಿದ್ದಾನೆ. ಸುಮಾರು ತಿಂಗಳುಗಳ ಕಾಲ ಕೂಲಿಕೆಲಸ ಮಾಡಿಕೊಂಡಿದ್ದ ರಮೇಶ್ ಸಾಕಷ್ಟು ಅವಮಾನಗಳಿಂದ ನೊಂದಿದ್ದನು. ಇದರಿಂದ ತಾನು ಎಲ್ಲಿ ಸೋತಿದ್ದೇನೋ ಅಲ್ಲಿಂದೆ ಮೇಲೆದ್ದು ಬರಬೇಕೆಂದು ನಿರ್ಧರಿಸಿ ಹೊರಟು ಇಂದು ತನ್ನ ಗುರಿ ತಲುಪುವಲ್ಲಿ ಯಶಸ್ವಿಯಾಗಿದ್ದಾನೆ.
ಬಡತನದಲ್ಲೂ ಹಠ ಬಿಡದೆ ಗೆದ್ದು ಬಂದ ಯುವಕ
ರಮೇಶ್ ತನ್ನ ಗುರಿಯ ಬೆನ್ನೇರಿ ಹೊರಟಾಗ ಹತ್ತಾರು ಅಡೆ ತಡೆಗಳು ಬಂದಿವೆ. ಆದೆಲ್ಲವನ್ನು ಮೆಟ್ಟಿನಿಂತು ರಮೇಶ್ ಹಣವಿಲ್ಲದೆ ಮೊದಲು ತನ್ನ ಅಕ್ಕನ ಚಿನ್ನದ ಉಂಗುರುವನ್ನು ಮಾರಿ ಟ್ಯೂಷನ್ಗೆ ಸೇರಿ ಪಿಯುಸಿ ಪಾಸ್ ಮಾಡಿದ್ದಾನೆ. ನಂತರ ರಮೇಶ್ ಬೆಂಗಳೂರಿನಲ್ಲಿ ಪದವಿ ತರಗತಿಗೆ ಸೇರಿ ಅಲ್ಲೇ ಇಂಗ್ಲಿಷ್ ಕಲಿಯುವುದಕ್ಕೆ ಶುರು ಮಾಡಿದ್ದ ಆಗ ಅಲ್ಲಿ ತನಗೆ ಸಿಕ್ಕ ಗೆಳೆಯರು ಹಾಗೂ ಪ್ರಾದ್ಯಾಪರುಗಳ ಸಹಾಯದಿಂದ ಹಠಕ್ಕೆ ಬಿದ್ದವನಂತೆ ಹಗಲು ರಾತ್ರಿ ಇಂಗ್ಲಿಷ್ ಪಠಣೆ ಮಾಡಲು ಶುರು ಮಾಡಿಕೊಂಡಿದ್ದಾನೆ ಪರಿಣಾಮ ಇಂದು ರಮೇಶ್ ಇಂಗ್ಲೀಷ್ ಪಂಡಿತನಾಗಿದ್ದಾನೆ.
ಮಲೇಷಿಯಾ ಸಿಂಗಾಪುರಗಳಲ್ಲಿ ಕೆಲಸ ಮಾಡಿದ ಅನುಭವ ಇದೆ!
ರಮೇಶ್ ಚೆನ್ನಾಗಿ ಇಂಗ್ಲಿಷ್ ಕಲಿತ ಮೇಲೆ ಮಲೇಷಿಯಾ, ಸಿಂಗಾಪುರಗಳಲ್ಲಿ ಟೂರ್ ಗೈಡಾಗಿ ಕೆಲಸ ಮಾಡಿದ್ದಾನೆ. ಹತ್ತಾರು ಸರ್ಕಾರಿ ಕಾಲೇಜುಗಳಿಗೆ ಇಂಗ್ಲಿಷ್ ರಿಸೋರ್ಸ್ ಪರ್ಸ್ನ್ ಆಗಿದ್ದಾನೆ. ಅಷ್ಟೇ ಅಲ್ಲದೆ ಇವರ ಬಳಿ ಇಂಗ್ಲಿಷ್ ಶಿಕ್ಷಕರು, ಇಂಗ್ಲಿಷ್ ಉಪನ್ಯಾಸಕರು, ಪೊಲೀಸ್ ಅಧಿಕಾರಿಗಳು, ಕೆಎಎಸ್, ಅಧಿಕಾರಿಗಳು ಕೂಡಾ ಇಂಗ್ಲಿಷ್ ಕಲಿಯುವುದಕ್ಕೆ ಬರುತ್ತಾರೆ.
ಗೂಗಲ್ನಲ್ಲೂ ಸಿಗದ 5000 ಸೂತ್ರಗಳನ್ನು ಬರೆದು ವಿಶ್ವ ದಾಖಲೆ ಮಾಡಿರುವ ರಮೇಶ್!
ರಮೇಶ್ ಇಂಗ್ಲಿಷ್ ಕಲಿಯೋದಕ್ಕೆ ಹಾಗೂ ಇಂಗ್ಲಿಷ್ ಕಲಿಸೋದಕ್ಕೆ ತನ್ನದೇ ಕೆಲವು ಸೂತ್ರಗಳನ್ನು ಮಾಡಿಕೊಂಡಿದ್ದಾನೆ. ನಿಮಗೆ ಗೂಗಲ್ನಲ್ಲೂ ಸಿಗದ ಸುಮಾರು ಇಂಗ್ಲಿಷ್ನ 5000 ಸೂತ್ರಗಳನ್ನು ಬರೆದು ಹಲವು ವಿಶ್ವದಾಖಲೆಗಳನ್ನು ಮಾಡಿದ್ದಾನೆ. ಈ ಸೂತ್ರಗಳ ಅಡಿಯಲ್ಲೇ ರಮೇಶ್ ಯಾರಿಗೆ ಬೇಕಾದರು ಸುಲಭವಾಗಿ ಇಂಗ್ಲಿಷ್ ಹೇಳಿಕೊಡಬಲ್ಲ ಇಂಗ್ಲಿಷ್ ಪಂಡಿತನಾಗಿ ಹೆಸರುವಾಸಿಯಾಗಿದ್ದಾನೆ.
ರಮೇಶ್ ಸಾಧನೆಗೆ ಸಿಕ್ಕಿವೆ ಹತ್ತು ಹಲವು ದಾಖಲೆಗಳು
ಇಷ್ಟಕ್ಕೇ ನಿಲ್ಲದ ರಮೇಶ್ರವರ ಇಂಗ್ಲಿಷ್ ಪ್ರತಿಭೆ ತನ್ನ ಇಂಗ್ಲಿಷ್ ಸೂತ್ರಗಳಿಂದಲೇ ಅಮೇರಿಕಾ ಬುಕ್ ಆಫ್ ರೆಕಾರ್ಡ್, ಇಂಡಿಯಾ ಬುಕ್ ಆಫ್ ರೆಕಾರ್ಡ್, ಎಕ್ಸ್ಲೂಸಿವ್ ವರ್ಡ್ ರೆಕಾರ್ಡ್, ಬ್ರಾವೋ ಇಂಟರ್ನ್ಯಾಷನಲ್ ಬುಕ್ ಆಫ್ ರೆಕಾರ್ಡ್, ಹೈರೇಂಜ್ ಬುಕ್ ಆಫ್ ವರ್ಡ್ ರೆಕಾರ್ಡ್, ಇಂಟರ್ನ್ಯಾಷನಲ್ ಬುಕ್ ಆಫ್ ರೆಕಾರ್ಡ್, ಫೆಂಟಾಸ್ಟಿಕ್ ಅಚೀವ್ಮೆಂಟ್ ಅವಾರ್ಡ್, ಮಾರ್ವಲೆಸ್ ಬುಕ್ ಆಫ್ ರೆಕಾರ್ಡ್ ಹೀಗೆ 4 ಅಂತರಾಷ್ಟ್ರೀಯ ದಾಖಲೆ, 8 ರಾಷ್ಟ್ರ ಮಟ್ಟದ ದಾಖಲೆಗಳನ್ನು ಮಾಡಿದ್ದಾನೆ. ಅಷ್ಟೇ ಯಾಕೆ ರಮೇಶ್ ಸುಮಾರು ಸೌತ್ ಆಫ್ರಿಕಾ, ಅಮೆರಿಕಾ, ಇಂಗ್ಲೆಂಡ್, ಮಲೇಷಿಯಾ, ಸಿಂಗಾಪುರ್, ಜಪಾನ್, ಸೇರಿದಂತೆ 14 ದೇಶಗಳ ಶೈಲಿಯಲ್ಲಿ ಇಂಗ್ಲಿಷ್ ಮಾತನಾಡುವ ಕಲೆಯನ್ನು ಮೈಗೂಡಿಸಿಕೊಂಡಿದ್ದಾನೆ.
ತನ್ನ ತವರಲ್ಲೇ ಇಂಗ್ಲಿಷ್ ಕಲಿಸುವ ಕಾಯಕ ಮಾಡಿಕೊಂಡು ಸೇವೆ
ಇಷ್ಟೇಲ್ಲಾ ಬುದ್ಧಿವಂತಿಕೆ ಇರುವ ರಮೇಶ್ಗೆ ಲಕ್ಷಾಂತರ ರೂಪಾಯಿ ಸಂಬಳ ಸಿಗುವ ಕೆಲಸ ಸಿಗುತ್ತದೆ. ಹಲವಾರು ಕಂಪನಿಗಳು ಆಫರ್ ಮಾಡಿದ್ದಾರೆ. ಆದರೆ ಅದ್ಯಾವುದನ್ನೂ ಲೆಕ್ಕಕ್ಕಿಡದ ರಮೇಶ್ ತನ್ನ ತವರಲ್ಲೇ ಏನಾದರೂ ಮಾಡಬೇಕು ಎಂದು ನಿರ್ಧಾರ ಮಾಡಿದ್ದಾನೆ. ಡೆಪೋಡೈಲ್ಸ್ ಇಂಗ್ಲಿಷ್ ಅಕಾಡೆಮಿ ಅನ್ನೋ ಸಂಸ್ಥೆಯನ್ನು ಕಟ್ಟಿ ಅದರಲ್ಲಿ ಆಸಕ್ತರಿಗೆ ಇಂಗ್ಲಿಷ್ ಹೇಳಿಕೊಡುತ್ತಾ ತಮ್ಮ ಜೀವನ ಕಟ್ಟಿಕೊಂಡಿದ್ದಾರೆ. ಇಲ್ಲಿ ಸರ್ಕಾರಿ ಶಾಲೆ ಶಿಕ್ಷಕರು, ಪ್ರಾದ್ಯಾಪಕರು, ಅಧಿಕಾರಿಗಳು, ಪೊಲೀಸ್ ಅಧಿಕಾರಿಗಳು, ವಿದ್ಯಾರ್ಥಿಗಳು, ಜನಪ್ರತಿನಿಧಿಗಳಿಗೆ ಸುಲಭವಾಗಿ ಇಂಗ್ಲಿಷ್ ಹೇಳಿಕೊಡುವ ಮೂಲಕ ಇಂಗ್ಲಿಷ್ ಕಲಿಸುವುದನ್ನೇ ತನ್ನ ಜೀವನದ ಕೆಲಸವನ್ನಾಗಿ ರೂಪಿಸಿಕೊಂಡಿದ್ದಾರೆ. ಇನ್ನು ಇವರ ಬಳಿ ಇಂಗ್ಲಿಷ್ ಕಲಿತಿರುವ ಅದೆಷ್ಟೋ ಜನರು ಕೂಡಾ ತಮ್ಮ ಜೀವನವನ್ನೇ ಉಜ್ವಲವಾಗಿಸಿಕೊಂಡಿದ್ದಾರೆ.
ಒಟ್ಟಾರೆ ಮನಸ್ಸಿದ್ದರೆ ಮಾರ್ಗ ಜೀವನದಲ್ಲಿ ಹಠವೊಂದಿದ್ದರೆ ಯಾವುದೂ ಅಸಾಧ್ಯವಲ್ಲ ಎನ್ನುವುದಕ್ಕೆ ಹಳ್ಳಿ ಹುಡುಗ ರಮೇಶ್ ಸಾಕ್ಷಿ. ಇಂಗ್ಲಿಷ್ನಲ್ಲೇ ಫೇಲ್ ಆಗಿ ಇಂದು ಗೂಗಲ್ಗೆ ಇಂಗ್ಲಿಷ್ ಹೇಳಿಕೊಡುವಷ್ಟರ ಮಟ್ಟಿಗೆ ಸಾಧನೆ ಮಾಡಿದ್ದಾರೆ. ಅಂದರೆ ಅದು ನಿಜಕ್ಕೂ ತಮಾಷೆಯ ಮಾತಲ್ಲ. ರಮೇಶ್ ಅವರ ಬೆಟ್ಟದಷ್ಟು ಸಾಧನೆಯ ಹಿಂದೆ ಬೆಟ್ಟದಷ್ಟು ಪರಿಶ್ರಮವೂ ಇದೆ.
ವರದಿ : ರಾಜೇಂದ್ರ ಸಿಂಹ
ಇದನ್ನೂ ಓದಿ:
