ದೀಪಾವಳಿ ಹೊತ್ತಲ್ಲೇ ಜನರಿಗೆ ಮತ್ತೊಂದು ಶಾಕ್: ನಂದಿನಿ ತುಪ್ಪ, ಬೆಣ್ಣೆ, ಪನ್ನೀರ್ ಬೆಲೆ ಭಾರೀ ಏರಿಕೆ

ಬೆಂಗಳೂರು, ನವೆಂಬರ್ 5: ದೀಪಾವಳಿ ಹಬ್ಬದ ಹೊತ್ತಲ್ಲೇ ರಾಜ್ಯದ ಜನರಿಗೆ ಬೆಲೆ ಏರಿಕೆಯ ಮತ್ತೊಂದು ಶಾಕ್ ಎದುರಾಗಿದೆ. ಈಗಾಗಲೇ ನಂದಿನಿ ಹಾಲು ಮತ್ತು ಮೊಸರಿನ ದರ ಏರಿಕೆಯಿಂದ ಗ್ರಾಹಕರು ಬೇಸರಗೊಂಡಿರುವ ಬೆನ್ನಲ್ಲೇ, ಇದೀಗ ನಂದಿನಿ ಬ್ರ್ಯಾಂಡ್‌ನ ತುಪ್ಪ, ಬೆಣ್ಣೆ ಹಾಗೂ ಪನ್ನೀರ್ ಉತ್ಪನ್ನಗಳ ಬೆಲೆಯನ್ನೂ ಕೆಎಂಎಫ್ ಹೆಚ್ಚಿಸಿದೆ. ಪರಿಷ್ಕೃತ ದರಗಳು ಬುಧವಾರ ಮಧ್ಯರಾತ್ರಿಯಿಂದಲೇ ಜಾರಿಗೆ ಬಂದಿವೆ.

ಕೆಎಂಎಫ್ ಪ್ರಕಟಿಸಿರುವ ಪರಿಷ್ಕೃತ ದರಪಟ್ಟಿಯಂತೆ ಹಲವು ಉತ್ಪನ್ನಗಳ ಬೆಲೆಯಲ್ಲಿ ಗಣನೀಯ ಏರಿಕೆಯಾಗಿದೆ. ಪ್ರಮುಖವಾಗಿ ನಂದಿನಿ ತುಪ್ಪದ ಬೆಲೆ ಲೀಟರ್‌ಗೆ ₹100 ಹೆಚ್ಚಳವಾಗಿದೆ. ಬೆಣ್ಣೆ ಹಾಗೂ ಪನ್ನೀರ್ ದರಗಳಲ್ಲೂ ಏರಿಕೆ ಕಂಡುಬಂದಿದೆ.

ತುಪ್ಪ, ಬೆಣ್ಣೆ, ಪನ್ನೀರ್ ಬೆಲೆಯಲ್ಲಿ ಎಷ್ಟು ಏರಿಕೆ?

ನಂದಿನಿ ತುಪ್ಪದ ಲೀಟರ್‌ಗೆ ಹಳೆಯ ದರ ₹750 ಇದ್ದರೆ, ಇದೀಗ ₹850ಕ್ಕೆ ಏರಿಕೆಯಾಗಿದೆ. ಅಂದರೆ ಲೀಟರ್‌ಗೆ ₹100 ಹೆಚ್ಚಳವಾಗಿದೆ. ನಂದಿನಿ ಬೆಣ್ಣೆಯ ಪ್ರತಿ ಕೆಜಿ ದರ ₹700ರಿಂದ ₹780ಕ್ಕೆ ಏರಿಕೆಯಾಗಿದ್ದು, ₹80 ಹೆಚ್ಚಳವಾಗಿದೆ. ಪನ್ನೀರ್ ಪ್ರತಿ ಕೆಜಿ ದರ ₹408ರಿಂದ ₹485ಕ್ಕೆ ಏರಿಕೆಯಾಗಿದ್ದು, ₹77 ಹೆಚ್ಚಳವಾಗಿದೆ.

ಇದರ ಜೊತೆಗೆ ವಿವಿಧ ಪ್ಯಾಕಿಂಗ್‌ನ ತುಪ್ಪ ಮತ್ತು ಬೆಣ್ಣೆ ಉತ್ಪನ್ನಗಳ ದರಗಳಲ್ಲೂ ಹೆಚ್ಚಳ ಮಾಡಲಾಗಿದೆ.

ನಂದಿನಿ ಉತ್ಪನ್ನಗಳ ಪರಿಷ್ಕೃತ ದರಗಳು

• ನಂದಿನಿ ತುಪ್ಪ 1 ಲೀಟರ್ ಸ್ಯಾಚೆಟ್: ₹715ರಿಂದ ₹850ಕ್ಕೆ – ₹135 ಹೆಚ್ಚಳ
• ನಂದಿನಿ ತುಪ್ಪ 1 ಲೀಟರ್ ಪೆಟ್ ಜಾರ್: ₹735ರಿಂದ ₹870ಕ್ಕೆ – ₹135 ಹೆಚ್ಚಳ
• ತುಪ್ಪ 15 ಕೆಜಿ ಟಿನ್: ₹11,625ರಿಂದ ₹14,100ಕ್ಕೆ – ₹2,475 ಹೆಚ್ಚಳ
• ಉಪ್ಪು ಬೆಣ್ಣೆ 500 ಗ್ರಾಂ: ₹310ರಿಂದ ₹380ಕ್ಕೆ – ₹70 ಹೆಚ್ಚಳ
• ಉಪ್ಪಿಲ್ಲದ ಬೆಣ್ಣೆ 500 ಗ್ರಾಂ: ₹330ರಿಂದ ₹390ಕ್ಕೆ – ₹60 ಹೆಚ್ಚಳ
• ಉಪ್ಪಿಲ್ಲದ ಬೆಣ್ಣೆ 200 ಗ್ರಾಂ: ₹135ರಿಂದ ₹160ಕ್ಕೆ – ₹25 ಹೆಚ್ಚಳ
• ಬೆಣ್ಣೆ ಬ್ಲಿಸ್ಟರ್ ಪ್ಯಾಕ್: ₹80ರಿಂದ ₹90ಕ್ಕೆ – ₹10 ಹೆಚ್ಚಳ

ಬೇಕರಿ, ಹೋಟೆಲ್ ತಿಂಡಿ-ಸಿಹಿನಿಸುಗಳ ಬೆಲೆಯೂ ಏರಿಕೆಯಾಗುವ ಸಾಧ್ಯತೆ

ಹಾಲಿನ ದರ ಹೆಚ್ಚಳವಾದ ಬಳಿಕ ಹಲವು ಹೋಟೆಲ್‌ಗಳು ಕಾಫಿ ಮತ್ತು ಟೀ ಬೆಲೆಯನ್ನು ₹5ರವರೆಗೆ ಹೆಚ್ಚಳ ಮಾಡಿದ್ದವು. ಇದೀಗ ತುಪ್ಪ, ಬೆಣ್ಣೆ ಮತ್ತು ಪನ್ನೀರ್ ದರಗಳೂ ಏರಿಕೆಯಾಗಿವೆ. ಈ ಉತ್ಪನ್ನಗಳನ್ನು ಹೋಟೆಲ್, ಬೇಕರಿ ಹಾಗೂ ಸಿಹಿ ತಿಂಡಿ ಮಳಿಗೆಗಳಲ್ಲಿ ವ್ಯಾಪಕವಾಗಿ ಬಳಸಲಾಗುವುದರಿಂದ ತಿಂಡಿ-ತಿನಿಸು ಮತ್ತು ಸಿಹಿ ಪದಾರ್ಥಗಳ ಬೆಲೆ ಕೂಡ ಹೆಚ್ಚಳವಾಗುವ ಸಾಧ್ಯತೆ ಇದೆ.

ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಸಿಹಿ ತಿಂಡಿಗಳು ಮತ್ತು ವಿವಿಧ ಆಹಾರ ಪದಾರ್ಥಗಳಿಗೆ ಬೇಡಿಕೆ ಹೆಚ್ಚಾಗುವ ಹೊತ್ತಲ್ಲೇ ನಂದಿನಿ ಉತ್ಪನ್ನಗಳ ದರ ಏರಿಕೆಯಾಗಿರುವುದು ಗ್ರಾಹಕರ ಜೇಬಿಗೆ ಮತ್ತಷ್ಟು ಹೊರೆ ಆಗುವ ಆತಂಕ ಮೂಡಿಸಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ