ಒಂದೇ ಮಗ್ಗುಲಲ್ಲಿ ಮಲಗುವುದರಿಂದ ಕೆಟ್ಟ ಕನಸು ಬೀಳುತ್ತಾ?

ನಿದ್ರೆ ಮಾಡುವಾಗ ಕನಸು ಕಾಣದವರೇ ಇಲ್ಲ. ಆದರೆ, ಕೆಲವೊಂದು ಕನಸುಗಳು ನಮಗೆ ಖುಷಿ ತಂದರೆ ಇನ್ನು ಕೆಲವು ಭಯ ಬೀಳಿಸುತ್ತವೆ. ನಾವು ಮಲಗುವ ರೀತಿಗೂ ನಮಗೆ ಬೀಳುವ ಕನಸಿಗೂ ಸಂಬಂಧವಿದೆಯೇ? ಕನಸುಗಳು ಯಾಕೆ ಬೀಳುತ್ತವೆ? ಕನಸಿನ ಅರ್ಥವೇನು? ಎಂಬ ಬಗ್ಗೆ ಹಲವು ಸಂಶೋಧನೆಗಳು ನಡೆದಿವೆ. ನಮ್ಮ ಎಡಭಾಗದಲ್ಲಿ ಮಲಗುವುದರಿಂದ ದುಃಸ್ವಪ್ನಗಳು ಹೆಚ್ಚಾಗಬಹುದು ಎಂದು ಸಂಶೋಧನೆಯೊಂದು ತಿಳಿಸಿದೆ. ಏಕೆಂದರೆ ಎಡಭಾಗದ ನಿದ್ರೆ ಹೃದಯದ ಮೇಲೆ ಹೆಚ್ಚಿನ ಒತ್ತಡವನ್ನು ಉಂಟುಮಾಡುತ್ತದೆ ಎಂದು ಕನಸಿನ ಡಿಕೋಡರ್ ಥೆರೆಸಾ ಚೆಯುಂಗ್ ಹೇಳಿದ್ದಾರೆ.

‘ಸ್ಲೀಪ್ ಆ್ಯಂಡ್ ಹಿಪ್ನಾಸಿಸ್’ ಜರ್ನಲ್‌ನಲ್ಲಿ ಪ್ರಕಟವಾದ ಅಧ್ಯಯನದ ಪ್ರಕಾರ, ನೀವು ಮಲಗುವ ಭಂಗಿಯು ನಿಮ್ಮ ನಿದ್ರೆಯ ಗುಣಮಟ್ಟದ ಮೇಲೆ ಪ್ರಭಾವ ಬೀರುತ್ತದೆ. ‘ತಪ್ಪು’ ಭಂಗಿಯಲ್ಲಿ ಮಲಗುವುದರಿಂದ ರಾತ್ರಿಯಲ್ಲಿ ನೀವು ದುಃಸ್ವಪ್ನಗಳನ್ನು ಕಾಣಬಹುದು. ಸ್ಲೀಪ್ ಆ್ಯಂಡ್ ಹಿಪ್ನಾಸಿಸ್ ಜರ್ನಲ್ ತಮ್ಮ ಎಡ ಮಗ್ಗುಲಿನಲ್ಲಿ ಮಲಗುವ ಜನರು ಹೆಚ್ಚಾಗಿ ಕೆಟ್ಟ ಕನಸುಗಳನ್ನು ಕಾಣುತ್ತಾರೆ ಎಂದು ಕಂಡುಹಿಡಿದಿದೆ.

ಇದನ್ನೂ ಓದಿ: ರಾತ್ರಿ ಪದೇ ಪದೆ ನಿದ್ರೆಯಿಂದ ಎಚ್ಚರಗೊಳ್ಳಲು ಕಾರಣವೇನು?

ತಮ್ಮ ಬಲಭಾಗದಲ್ಲಿ ಮಲಗುವವರಲ್ಲಿ ಕೇವಲ ಶೇ. 15ರಷ್ಟು ಜನರು ರಾತ್ರಿಯಲ್ಲಿ ಕೆಟ್ಟ ಕನಸುಗಳನ್ನು ಕಾಣುತ್ತಾರೆ. ಎಡಭಾಗದಲ್ಲಿ ಮಲಗುವವರಲ್ಲಿ ಶೇ. 41ರಷ್ಟು ಜನರು ದುಃಸ್ವಪ್ನಗಳನ್ನು ಕಾಣುತ್ತಾರೆ. ಒತ್ತಡ ಇದ್ದಾಗಲೆಲ್ಲಾ ನಿದ್ರೆಯ ಗುಣಮಟ್ಟ ಕಡಿಮೆಯಾಗಿರುತ್ತದೆ. ಇದರಿಂದ ದುಃಸ್ವಪ್ನಗಳು ಬೀಳುವುದು ಖಚಿತ.

30 ಮತ್ತು 40 ವರ್ಷದಲ್ಲಿ ನಿದ್ರೆಯ ಅಡಚಣೆಗಳು ಸಾಮಾನ್ಯ. ಇದು ಜೀವನದಲ್ಲಿ ಮನಸ್ಸಿನ ಮೇಲೆ ಪರಿಣಾಮ ಬೀರಬಹುದು ಎಂದು ಅಧ್ಯಯನ ತಿಳಿಸಿದೆ. ಮೇಲ್ಮುಖವಾಗಿ ಮಲಗುವವರಿಗೆ ಹೋಲಿಸಿದರೆ ಬೆನ್ನು ಮೇಲೆ ಮಾಡಿ ಮಲಗುವವರು ಕೂಡ ದುಃಸ್ವಪ್ನಗಳಿಂದ ಬಳಲುತ್ತಿದ್ದಾರೆ ಎಂದು ಚೆಯುಂಗ್ ಉಲ್ಲೇಖಿಸಿದ್ದಾರೆ.

ಇದನ್ನೂ ಓದಿ: ಉತ್ತಮ ನಿದ್ರೆಗೆ ರಾತ್ರಿ ಯಾವ ದಿಕ್ಕಿನಲ್ಲಿ ತಲೆಯಿಟ್ಟು ಮಲಗಬೇಕು?

ನಿಮಗೆ ಕೆಟ್ಟ ಕನಸುಗಳು ಬೀಳುತ್ತಿದ್ದರೆ ನಿಮ್ಮ ಮಲಗುವ ಸ್ಥಾನವನ್ನು ಬದಲಾಯಿಸುವುದು ಉತ್ತಮ. ಇದು ಕೂಡ ನಿಮ್ಮ ಕನಸುಗಳ ಮೇಲೆ ಪ್ರಭಾವ ಬೀರಬಹುದು. ಆರೋಗ್ಯಕರ ಉಸಿರಾಟಕ್ಕೆ ಸೂಕ್ತವಾದ ಸ್ಥಾನದಲ್ಲಿ ಮಲಗುವುದು ಉತ್ತಮ ಮಾರ್ಗವಾಗಿದೆ. ಹೀಗಾಗಿ, ಆದಷ್ಟೂ ಬಲ ಮಗ್ಗುಲಿನಲ್ಲಿ ಮಲಗುವುದು ಉತ್ತಮ.

ಇನ್ನಷ್ಟು ಜೀವನಶೈಲಿಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 6:27 pm, Wed, 10 January 24