ಥೈಲ್ಯಾಂಡನ್ನು‌ “ನಗುವಿನ ನಾಡು” ಎಂದು ಕರೆಯೋದೇಕೆ ಗೊತ್ತಾ?

ಪ್ರತಿಯೊಂದು ದೇಶವೂ ಒಂದಲ್ಲಾ ಒಂದು ವಿಶೇಷತೆಯನ್ನು ಹೊಂದಿರುತ್ತದೆ. ಈ ವಿಶಿಷ್ಟತೆಯ ಕಾರಣದಿಂದಲೇ ಕೆಲವೊಂದಿಷ್ಟು ದೇಶಗಳನ್ನು ವಿಶಿಷ್ಟ ಅಡ್ಡ  ಹೆಸರುಗಳಿಂದ ಕರೆಯಲಾಗುತ್ತದೆ. ಉದಾಹರಣೆಗೆ ನಮ್ಮ ಭಾರತವನ್ನು ವೈವಿಧ್ಯತೆಯ ದೇಶ, ವಿವಿಧತೆಯಲ್ಲಿ ಏಕತೆಯ ದೇಶ ಎಂದು ಕರೆದರೆ ಫಿನ್‌ಲ್ಯಾಂಡ್‌ ದೇಶವನ್ನು ಸಂತೋಷದ ದೇಶ, ಜಪಾನ್‌ ದೇಶವನ್ನು ಸೂರ್ಯ ಉದಯಿಸುವ ನಾಡು ಎಂದು ಕರೆಯಲಾಗುತ್ತದೆ. ಅದೇ ರೀತಿ ಪ್ರವಾಸಿಗರ ನೆಚ್ಚಿನ ದೇಶವಾದ ಥೈಲ್ಯಾಂಡನ್ನು (Thailand) ನಗುವಿನ ನಾಡು ಎಂದು ಕರೆಯಲಾಗುತ್ತದೆ. ಈ ದೇಶವನ್ನು ಲ್ಯಾಂಡ್‌ ಆಫ್‌ ಸ್ಮೈಲ್ಸ್‌ ಎಂದು ಕರೆಯೋದೇಕೆ ಗೊತ್ತಾ? ಈ ಕುರಿತ ಇಂಟರೆಸ್ಟಿಂಗ್‌ ಮಾಹಿತಿ ಇಲ್ಲಿದೆ.

ಥೈಲ್ಯಾಂಡನ್ನು ನಗುವಿನ ನಾಡು ಎಂದು ಕರೆಯೋದೇಕೆ?

ಥೈಲ್ಯಾಂಡ್‌ ದೇಶದ ಜನ ಯಾವಾಗಲೂ ಯಾವಾಗಲೂ ನಗು ನಗುತ್ತಲೇ ಇರುತ್ತಾರೆ. ಥೈಲ್ಯಾಂಡ್‌ನಲ್ಲಿ, ನಗು ಕೇವಲ ಸಂತೋಷದ ಸಂಕೇತವಲ್ಲ, ಅದು ಗೌರವ, ಸಭ್ಯತೆ, ತಾಳ್ಮೆ ಮತ್ತು ಸಾಮಾಜಿಕ ಸಾಮರಸ್ಯವನ್ನು ಮತ್ತು ವಾತ್ಸಲ್ಯವನ್ನು ತೋರಿಸುವ ಒಂದು ಮಾರ್ಗವೂ ಆಗಿದೆ. ನಗುವುದು ಸಂತೋಷದ ವಾತಾವರಣವನ್ನು ಸೃಷ್ಟಿಸುವುದು ಮಾತ್ರವಲ್ಲದೆ ಮತ್ತು ಉತ್ತಮ ಸಂಬಂಧಗಳನ್ನು ಬೆಳೆಸಲು ಸಹಾಯ ಮಾಡುತ್ತದೆ ಎಂದು ಥೈಲ್ಯಾಂಡ್ ಜನರು ನಂಬುತ್ತಾರೆ. ಅದರಲ್ಲೂ ಪ್ರವಾಸಿಗರನ್ನು ನಗು ಮೊಗದಿಂದ ಸ್ವಾಗತಿಸುತ್ತಾರೆ ಮತ್ತು ದಯೆಯಿಂದ ವರ್ತಿಸುತ್ತಾರೆ, ಉತ್ತಮ ಆತಿಥ್ಯವನ್ನೂ ನೀಡುತ್ತಾರೆ. ಈ ಕಾರಣಕ್ಕಾಗಿಯೇ ಥೈಲ್ಯಾಂಡನ್ನು ನಗುವಿನ ದೇಶ ಎಂದು ಕರೆಯುವುದು.

ಬೌದ್ಧ ಬೋಧನೆಗಳಿಂದ ಮಾರ್ಗದರ್ಶಿಸಲ್ಪಟ್ಟ ಇಲ್ಲಿನ ಜನರು ಶಾಂತವಾಗಿರುವುದು, ಸಂಘರ್ಷ, ಜಗಳಗಳನ್ನು ತಪ್ಪಿಸುವುದು ಮತ್ತು ದಯೆಯನ್ನು ಹರಡುವುದರಲ್ಲಿ ನಂಬಿಕೆಯನ್ನು ಹೊಂದಿದ್ದಾರೆ. ಜೊತೆಗೆ ಕಠಿಣ ಸಂದರ್ಭಗಳಲ್ಲಿಯೂ ಸಹ, ಸೌಮ್ಯವಾದ ನಗುವಿನಿಂದ ಪ್ರತಿಕ್ರಿಯಿಸುವುದು ಒಂದು ಸುಂದರವಾದ ಮಾರ್ಗವೆಂದು ಅವರು ಪರಿಗಣಿಸುತ್ತಾರೆ.  ಇವರು ಶಾಂತಿಯಿಂದ ಬದುಕುವುದು ಮತ್ತು ಇತರರ ಬಗ್ಗೆ ಸಹಾನುಭೂತಿ ತೋರಿಸುವುದು ಮುಂತಾದ ಬೌದ್ಧ ತತ್ವಗಳನ್ನು ಅನುಸರಿಸುತ್ತಾರೆ. ಇಲ್ಲಿನ ಜನ ಎಲ್ಲರೊಂದಿಗೂ ನಗು ಮೊಗದೊಂದಿಗೆಯೇ ಸಂವಹನ ನಡೆಸುತ್ತಾರೆ.

ಇದನ್ನೂ ಓದಿ: ಹೆಚ್ಚಿನ ಡೆನಿಮ್‌ ಜೀನ್ಸ್‌ಗಳಲ್ಲಿ ಹಳದಿ ದಾರದ ಸ್ಟಿಚಿಂಗ್ ಏಕೆ ಇರುತ್ತವೆ ಗೊತ್ತಾ?‌

ಥೈಲ್ಯಾಂಡ್‌ ದೇಶದ ಆಸಕ್ತಿದಾಯಕ ಸಂಗತಿಗಳು:

• ಥಾಯ್ “ವಾಯ್” ಶುಭಾಶಯ: ಸಾಂಪ್ರದಾಯಿಕ ಥಾಯ್ ಶುಭಾಶಯವನ್ನು ವಾಯ್ ಎಂದು ಕರೆಯಲಾಗುತ್ತದೆ, ಇಲ್ಲಿನ ಜನ ತಲೆ ಬಾಗಿ  ಕೈಗಳನ್ನು ಜೋಡಿಸಿ ನಮಸ್ಕರಿಸಿ ಶುಭಾಶಯಗಳನ್ನು ತಿಳಿಸುತ್ತಾರೆ. ಈ ಶುಭಾಶಯವು ಥಾಯ್ ಸಂಸ್ಕೃತಿಯಲ್ಲಿ ಗೌರವ ಮತ್ತು ನಮ್ರತೆಯನ್ನು ಪ್ರತಿಬಿಂಬಿಸುತ್ತದೆ.
• ಬೌದ್ಧ ಧರ್ಮದ ಪ್ರಭಾವ: ಥೈಲ್ಯಾಂಡ್‌ನಲ್ಲಿ ಹೆಚ್ಚಿನ ಜನರು ಬೌದ್ಧಧರ್ಮವನ್ನು ಅನುಸರಿಸುತ್ತಾರೆ, ಬೌದ್ಧ ಧರ್ಮ  ಕರುಣೆ, ಶಾಂತಿ ಮತ್ತು ಭಾವನಾತ್ಮಕ ಸಮತೋಲನವನ್ನು ಕಲಿಸುತ್ತದೆ, ನಗುವುದನ್ನು ಆಂತರಿಕ ಶಾಂತತೆಯನ್ನು ಕಾಪಾಡಿಕೊಳ್ಳಲು ಮತ್ತು ಸಕಾರಾತ್ಮಕ ಶಕ್ತಿಯನ್ನು ಹರಡಲು ಒಂದು ಮಾರ್ಗವೆಂದು ಇಲ್ಲಿನ ಜನ ಪರಿಗಣಿಸಿದ್ದಾರೆ.
• ನಗುವುದು: ಥೈಲ್ಯಾಂಡ್‌ನಲ್ಲಿ, ನಗು ದೈನಂದಿನ ಸಂವಹನದ ಭಾಗವಾಗಿದೆ ಮತ್ತು ಇದು ಇಲ್ಲಿ  ಕೃತಜ್ಞತೆ, ಸಭ್ಯತೆ, ಕ್ಷಮೆಯಾಚನೆಯ ಭಾಗವೂ ಹೌದು.
• ಆತಿಥ್ಯ ಮತ್ತು ಪ್ರವಾಸೋದ್ಯಮ ಸಂಸ್ಕೃತಿ: ಥೈಲ್ಯಾಂಡ್ ತನ್ನ ಸ್ನೇಹಪರ ವರ್ತನೆ, ಸಂಸ್ಕೃತಿಯಿಂದಲೇ ಪ್ರತಿವರ್ಷ ಲಕ್ಷಾಂತರ ಪ್ರವಾಸಿಗರನ್ನು ಸ್ವಾಗತಿಸುತ್ತದೆ. ಹೀಗೆ ಥೈಲ್ಯಾಂಡ್‌  ಸ್ನೇಹಪರ ಸ್ಥಳೀಯರು ತಮ್ಮ ಆತ್ಮೀಯ ಆತಿಥ್ಯಕ್ಕೆ ಹೆಸರುವಾಸಿಯಾಗಿದ್ದು, ಇದೇ ಕಾರಣಕ್ಕೆ ಈ ದೇಶವನ್ನು ನಗುವಿನ ನಾಡು ಎಂದು ಕರೆಯುವುದು.
• ಆತ್ಮೀಯ ಸ್ವಾಗತಗಳಿಗೆ ಹೆಸರುವಾಸಿಯಾದ ನಗರಗಳು: ಬ್ಯಾಂಕಾಕ್, ಫುಕೆಟ್, ಚಿಯಾಂಗ್ ಮಾಯ್, ಪಟ್ಟಾಯ ಮತ್ತು ಕ್ರಾಬಿಯಂತಹ ತಾಣಗಳು ತಮ್ಮ ನಿಸರ್ಗ ಸೌಂದರ್ಯ ಮತ್ತು ಬಗೆ ಬಗೆಯ ಆಹಾರಕ್ಕಾಗಿ ಮಾತ್ರವಲ್ಲದೆ ಪ್ರವಾಸಿಗರನ್ನು ನಿಜವಾದ ನಗುಮುಖದಿಂದ ಸ್ವಾಗತಿಸುವ ಸ್ಥಳೀಯರ ಸ್ನೇಹಪರ ಸ್ವಭಾವಕ್ಕೂ ಜನಪ್ರಿಯವಾಗಿವೆ. ಜೊತೆಗೆ ಈ ದೇಶ ಕೈಗೆಟಕುವ ದರದ ಪ್ರವಾಸದ ಕಾರಣಕ್ಕೂ ಹೆಸರುವಾಸಿಯಾಗಿದೆ.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 3:34 pm, Tue, 4 November 25