Women’s Day 2025: ಉದ್ಯೋಗಸ್ಥ ಮಹಿಳೆಯರೇ, ನಿಮ್ಮ ಹಣಕಾಸು ನಿರ್ವಹಣೆ ಹೀಗಿದ್ದರೆ ಬೆಸ್ಟ್

ಇದೀಗ ಕಾಲ ಬದಲಾಗಿದೆ, ಅಡುಗೆ ಮನೆಗೆ ಸೀಮಿತವಾಗಿದ್ದ ಹೆಣ್ಣು ಇಂದು ಗಂಡಿನಷ್ಟೇ ಆರ್ಥಿಕವಾಗಿ ಸ್ವತಂತ್ರಳಾಗಿದ್ದಾಳೆ. ನಾಲ್ಕು ಕಾಸು ಸಂಪಾದಿಸುವ ಮೂಲಕ ಸಂಸಾರ ನಿಭಾಯಿಸುವ ಗಂಡಿಗೂ ಕೂಡ ಹೆಗಲಾಗಿದ್ದಾಳೆ. ಆದರೆ ದುಡಿದ ಅಷ್ಟು ಹಣವೂ ಖರ್ಚು ಆಗಿ ಹೋದರೆ ಆರ್ಥಿಕ ಭದ್ರತೆಗೆ ದಾರಿ ಮಾಡಿಕೊಡುವುದಿಲ್ಲ. ಹೆಣ್ಣು ಮಕ್ಕಳಿಗೆ ಹಣಕಾಸು ನಿರ್ವಹಣೆ (Financial Management) ಯ ಬಗ್ಗೆ ಹೇಳಿ ಕೊಡಬೇಕಾಗಿಲ್ಲ. ಉಳಿತಾಯ ಹಾಗೂ ಹೂಡಿಕೆ ಮಾಡುವುದರಲ್ಲಿ ಕೈ ಒಂದು ಹೆಜ್ಜೆ ಮುಂದೆ ಇದ್ದಾರೆ. ಆದರೆ ಮನೆಯ ಜವಾಬ್ದಾರಿಗಳು ಹೆಚ್ಚಿದ್ದಾಗ ಹಣಕಾಸಿನ ನಿರ್ವಹಣೆ ಮಾಡುವುದು ಕಷ್ಟವಾಗುತ್ತದೆ. ಸರಿಯಾದ ತಂತ್ರಗಳು ಮತ್ತು ಮನಸ್ಥಿತಿಯೊಂದಿಗೆ, ಹಣವನ್ನು ಪರಿಣಾಮಕಾರಿಯಾಗಿ ವಿನಿಯೋಗಿಸಿದರೆ ಆರ್ಥಿಕ ಸ್ವಾತಂತ್ರ್ಯರಾಗಬಹುದು. ಕಿನಾರಾ ಕ್ಯಾಪಿಟಲ್‌ನ ಸ್ಥಾಪಕಿ ಮತ್ತು ಸಿಇಒ ಹಾರ್ದಿಕಾ ಶಾ (Hardika Shah, Capital Founder and CEO of Kinara Capital) ಉದ್ಯೋಗದಲ್ಲಿರುವ ಮಹಿಳೆಯರು ಹಣಕಾಸಿನ ನಿರ್ವಹಣೆ ಹೇಗೆ ಮಾಡಬೇಕು ಎನ್ನುವ ಬಗ್ಗೆ ಕೆಲವು ಸಲಹೆಗಳನ್ನು ನೀಡಿದ್ದಾರೆ, ಈ ಕುರಿತಾದ ಮಾಹಿತಿ ಇಲ್ಲಿದೆ.

ಉದ್ಯೋಗಸ್ಥ ಮಹಿಳೆಯರು ತಮ್ಮ ಹಣಕಾಸನ್ನು ನಿರ್ವಹಿಸಲು ಇಲ್ಲಿದೆ ಸಲಹೆಗಳು

1. ಸ್ಪಷ್ಟ ಹಣಕಾಸು ಯೋಜನೆಯನ್ನು ರಚಿಸಿ: ಆರ್ಥಿಕ ಸ್ವಾತಂತ್ರ್ಯದತ್ತ ಮೊದಲ ಹೆಜ್ಜೆ ಇಡಲು ಬಯಸಿದರೆ ಹಣಕಾಸು ಯೋಜನೆಯತ್ತ ಹಣ ವಿನಿಯೋಗಿಸುವುದು. ಹೌದು, ಅಲ್ಪಾವಧಿ ಮತ್ತು ದೀರ್ಘಾವಧಿಯ ಎರಡೂ ಹಣಕಾಸಿನ ಗುರಿಗಳನ್ನು ಆರ್ಥಿಕ ಭದ್ರತೆಯನ್ನು ನೀಡುತ್ತದೆ. ಮಹಿಳೆಯರಿಗೆ ಖರ್ಚುಗಳನ್ನು ವರ್ಗೀಕರಿಸಿ, ತುರ್ತು ನಿಧಿಗಳಿಗಾಗಿ ಉಳಿತಾಯ ಮಾಡಿ. ಇದು ಯಾವುದೇ ಅನಿರೀಕ್ಷಿತವಾಗಿ ಎದುರಾಗುವ ಆರ್ಥಿಕ ಸಮಸ್ಯೆಯ ವೇಳೆ ಈ ಹಣವನ್ನು ಸುಧಾರಿಸಿಕೊಳ್ಳಲು ನೆರವಾಗುತ್ತದೆ.
2. ತುರ್ತು ನಿಧಿಯಿರಲಿ : ಜೀವನವು ಅನಿರೀಕ್ಷಿತ ವೆಚ್ಚಗಳಿಂದ ತುಂಬಿದ್ದು, ಯಾವಾಗ ಹಣ ಅವಶ್ಯಕತೆ ಬರುತ್ತದೆ ಎಂದು ಹೇಳಲಾಗದು. ಹೀಗಾಗಿ ಹಾರ್ದಿಕಾ ಶಾ ರವರು ತುರ್ತು ನಿಧಿಯ ಮಹತ್ವವನ್ನು ಒತ್ತಿ ಹೇಳಿದ್ದು, ಸಂಬಳದ ಇಂತಿಷ್ಟು ಹಣವನ್ನು ತುರ್ತು ನಿಧಿಯೆಂದು ಎತ್ತಿಡಿ. ನೀವು ನಿಮ್ಮ ಸಂಬಳ ಅಥವಾ ಆದಾಯವನ್ನು ಪಡೆದ ತಕ್ಷಣ, ಖರ್ಚು ಮಾಡಲು ಪ್ರಾರಂಭಿಸುವ ಮೊದಲು, ಒಂದು ನಿರ್ದಿಷ್ಟ ಮೊತ್ತವನ್ನು ಪಕ್ಕಕ್ಕೆ ಇರಿಸಿಕೊಳ್ಳಿ. ಕಷ್ಟದ ಸಮಯದಲ್ಲಿ ಈ ಹಣವನ್ನು ಬಳಸಿಕೊಳ್ಳುವುದೇ ಹೆಚ್ಚು. ತುರ್ತು ಸಮಯದಲ್ಲಿ ಕ್ರೆಡಿಟ್ ಕಾರ್ಡ್‌ಗಳು ಅಥವಾ ಸಾಲಗಳನ್ನು ಅವಲಂಬಿಸದೇ ಈ ತುರ್ತು ನಿಧಿಯಲ್ಲಿಟ್ಟ ಹಣವನ್ನು ಬಳಸಿಕೊಳ್ಳಬಹುದು.
3. ಸ್ಥಿರ ಆಸ್ತಿಗಳ ಮೇಲೆ ಹೆಚ್ಚಿನ ಹೂಡಿಕೆ ಬೇಡ : ಮಹಿಳೆಯರು ತಮ್ಮ ಹಣಕಾಸನ್ನು ನಿರ್ವಹಿಸುವಾಗ ಮಾಡುವ ಸಾಮಾನ್ಯ ತಪ್ಪುಗಳಲ್ಲಿ ಒಂದು ಆಸ್ತಿ ಹಾಗೂ ದುಬಾರಿ ಬೆಲೆಯ ಸ್ಥಿರವಾದ ಸ್ವತ್ತುಗಳಲ್ಲಿ ಅತಿಯಾಗಿ ಹೂಡಿಕೆ ಮಾಡುವುದು. ಅತಿಯಾದ ಹೂಡಿಕೆಯೂ ಆರ್ಥಿಕವಾಗಿ ನಿಮ್ಮ ಕೈಯನ್ನು ಕಟ್ಟಿ ಹಾಕಬಹುದು. ಹೀಗಾಗಿ ಆಸ್ತಿ ಸೇರಿದಂತೆ ಸ್ಥಿರವಾದ ಸ್ವತ್ತುಗಳ ಮೇಲೆ ಹೂಡಿಕಕೆ ಮಾಡುವ ಮೊದಲು ತಮ್ಮ ಹಣಕಾಸಿನ ಗುರಿಗಳನ್ನು ಎಚ್ಚರಿಕೆಯಿಂದ ಗಮನಿಸಲು ಹಾರ್ದಿಕಾ ಷಾ ಕೆಲಸ ಮಾಡುವ ಮಹಿಳೆಯರಿಗೆ ಸಲಹೆ ನೀಡುತ್ತಾರೆ.
4. ಬಹು ಆದಾಯದ ಮೂಲಗಳನ್ನು ಸೃಷ್ಟಿಸಿ : ಈ ದುಬಾರಿ ದುನಿಯಾದಲ್ಲಿ ಆರ್ಥಿಕ ಭದ್ರತೆಗಾಗಿ ಒಂದೇ ಆದಾಯದ ಮೂಲವನ್ನು ಅವಲಂಬಿಸಿದ್ದರೆ ಸಾಲದು. ಹಾರ್ದಿಕಾ ಶಾ ಅವರು ಬಹು ಆದಾಯದ ಮೂಲವನ್ನು ನಿರ್ಮಿಸಿಕೊಳ್ಳಲು ಹೇಳುತ್ತಾರೆ. ಒಂದು ಅಥವಾ ಎರಡು ಕೆಲಸದಲ್ಲಿ ತೊಡಗಿಸಿಕೊಳ್ಳುವ ಮೂಲಕ ಆದಾಯವನ್ನು ಹೆಚ್ಚಿಸಿಕೊಳ್ಳಬಹುದು. ಬಹು ಆದಾಯದ ಮೂಲಗಳು ಆದಾಯ ಹೆಚ್ಚಿಸಿ ಆರ್ಥಿಕ ಒತ್ತಡವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಹೀಗಾಗಿ ಆದಾಯಕ್ಕಾಗಿ ಒಂದೇ ಮೂಲವನ್ನು ಅವಲಂಬಿಸದೇ ಪರ್ಯಾಯ ಆದಾಯದ ಮೂಲಗಳು ಇರುವುದು ಬಹಳ ಮುಖ್ಯ.
5. ಭವಿಷ್ಯಕ್ಕಾಗಿ ಹೂಡಿಕೆ ಮಾಡಿ : ದುಡಿದ ಅಲ್ಪಸ್ವಲ್ಪ ಹಣವನ್ನು ಹೂಡಿಕೆ ಮಾಡುವುದು ಬಹಳ ಮುಖ್ಯವಾಗುತ್ತದೆ, ಇದು ಭವಿಷ್ಯಕ್ಕೆ ನೆರವಾಗುತ್ತದೆ. ಆರ್ಥಿಕ ತಜ್ಞರು ಹೇಳುವಂತೆ ಉದ್ಯೋಗದಲ್ಲಿರುವ ಮಹಿಳೆಯರು ಸಣ್ಣ ಮೊತ್ತವಾಗಿದ್ದರೂ ಸರಿಯೇ ಹೂಡಿಕೆ ಮಾಡುವತ್ತ ಗಮನ ಹರಿಸಿ ಎನ್ನುತ್ತಾರೆ. ಮ್ಯೂಚುವಲ್ ಫಂಡ್‌ಗಳು , ಷೇರುಗಳು ಅಥವಾ ರಿಯಲ್ ಎಸ್ಟೇಟ್‌ನಂತಹ ಸ್ವತ್ತುಗಳಲ್ಲಿ ಹೂಡಿಕೆ ಮಾಡುವುದರಿಂದ ದೀರ್ಘಾವಧಿಯ ಆದಾಯವನ್ನು ಪಡೆಯಬಹುದು. ಆದರೆ ಹಣಕಾಸಿನ ಗುರಿಗಳಿಗೆ ಹೊಂದಿಕೆಯಾಗುವ ಹೂಡಿಕೆಯತ್ತ ಗಮನ ಕೊಡುವುದು ಉತ್ತಮ.
6. ವೃತ್ತಿಪರ ಆರ್ಥಿಕ ತಜ್ಞರ ಸಲಹೆ ಪಡೆಯಿರಿ: ಹೆಚ್ಚಿನವರಿಗೆ ಹಣಕಾಸಿನ ನಿರ್ವಹಣೆ ಹೇಗೆ ಮಾಡಬೇಕು ಎಲ್ಲಿಂದ ಪ್ರಾರಂಭಿಸಬೇಕು ಎನ್ನುವುದು ತಿಳಿದಿರುವುದಿಲ್ಲ. ಈ ಬಗ್ಗೆ ಖಚಿತ ಮಾಹಿತಿ ಇಲ್ಲದಿದ್ದರೆ ಹಣಕಾಸು ತಜ್ಞರಿಂದ ಸಲಹೆ ಪಡೆಯುವುದು. ದಿಟ್ಟ ನಿರ್ಧಾರಗಳನ್ನು ತೆಗೆದುಕೊಳ್ಳುವಂತೆ ಮಾಡುತ್ತದೆ. ಅದರಲ್ಲಿಯೂ ವಿಶೇಷವಾಗಿ ಹೂಡಿಕೆ ತಂತ್ರಗಳು ಅಥವಾ ತೆರಿಗೆ ಯೋಜನೆಯ ಬಗ್ಗೆ ವೃತ್ತಿಪರ ಮಾರ್ಗದರ್ಶನವನ್ನು ಕೇಳುವುದರಲ್ಲಿ ಒಳ್ಳೆಯದು. ಇದು ನಿಮ್ಮಲ್ಲಿರುವ ಗೊಂದಲವನ್ನು ನಿವಾರಿಸಿ, ಹಣಕಾಸು ಹೂಡಿಕೆಯ ಕುರಿತು ಯೋಗ್ಯ ನಿರ್ಧಾರ ತೆಗೆದುಕೊಳ್ಳಲು ಅನುವು ಮಾಡಿಕೊಡುತ್ತದೆ.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ