Murder News: ಹೆಂಗಸನ್ನು ಕೊಂದು, ಕತ್ತರಿಸಿ ಸೂಟ್​ಕೇಸ್​ನಲ್ಲಿ ಸಾಗಿಸಿದ ಹಂತಕರು; ಫ್ರಿಜ್​ನಿಂದ ಬಯಲಾಯ್ತು ಕೊಲೆ ರಹಸ್ಯ!

ದ್ವಾರಕಾ: ಹಣಕ್ಕಾಗಿ ಈ ಜಗತ್ತಿನಲ್ಲಿ ಏನು ಬೇಕಾದರೂ ನಡೆಯುತ್ತದೆ. ತಾವು ಸಿಕ್ಕಿಬೀಳುತ್ತೇವೆಂದರೆ ಬೇರೆಯವರ ಜೀವ ತೆಗೆಯುವುದಕ್ಕೂ ಜನರು ಯೋಚನೆ ಮಾಡುವುದಿಲ್ಲ. ಗುಜರಾತ್ (Gujarat) ರಾಜ್ಯದ ದ್ವಾರಕಾ ಜಿಲ್ಲೆಯಲ್ಲಿ ಕೂಡ ಅದೇ ರೀತಿಯ ಘಟನೆಯೊಂದು ನಡೆದಿದೆ. ಮಹಿಳೆಯೊಬ್ಬಳನ್ನು ಕೊಲೆ ಮಾಡಿದ ಗಂಡ-ಹೆಂಡತಿ ಆಕೆಯ ದೇಹವನ್ನು ಮೂರ್ನಾಲ್ಕು ತುಂಡುಗಳಾಗಿ ಕತ್ತರಿಸಿ, ಆ ಹೆಣವನ್ನು ಸೂಟ್​ಕೇಸ್​ನೊಳಗೆ ತುಂಬಿಕೊಂಡು ಬೇರೆಡೆಗೆ ಸಾಗಿಸಿದ್ದರು. ಆದರೆ, ಅವರು ಮಾಡಿದ ಒಂದೇ ಒಂದು ಸಣ್ಣ ತಪ್ಪಿನಿಂದ ಅವರು ಪೊಲೀಸರ ಕೈಗೆ ಸಿಕ್ಕಿಹಾಕಿಕೊಂಡಿದ್ದಾರೆ. ಹಾಗಾದರೆ, ಆ ತಪ್ಪಾದರೂ ಯಾವುದು?

ಪಕ್ಕದ ಮನೆಯ 72 ವರ್ಷದ ಕವಿತಾ ಎಂಬ ಹೆಂಗಸಿನ ಬಳಿ ಸಾಲ ಪಡೆದಿದ್ದ ತನು ಮತ್ತು ಅನಿಲ್ ಎಂಬ ದಂಪತಿ ಆ ಹಣವನ್ನು ವಾಪಾಸ್ ನೀಡಲು ಸಾಧ್ಯವಾಗದೆ ಪರದಾಡುತ್ತಿದ್ದರು. ಆಗಾಗ ಬಂದ ಹಣ ಕೇಳುತ್ತಿದ್ದ ಹೆಂಗಸಿಗೆ ಏನು ಹೇಳುವುದೆಂದು ತಿಳಿಯದೆ ಒದ್ದಾಡಿದ ಅವರು ಕೊನೆಗೆ ಆಕೆಯನ್ನೇ ಮುಗಿಸಿಬಿಟ್ಟರೆ ತಮ್ಮ 1 ಲಕ್ಷ ರೂ. ಸಾಲದ ವಿಷಯವೂ ಆಕೆಯೊಂದಿಗೆ ಸಮಾಧಿಯಾಗುತ್ತದೆ ಎಂದು ತೀರ್ಮಾನ ಮಾಡಿದರು. ಆದರೆ, ಕೊಲೆ ಮಾಡಿದವನು ಬಚಾವಾಗಲು ಸಾಧ್ಯವೇ ಇಲ್ಲ ಎಂಬುದು ಅವರಿಗೆ ಗೊತ್ತಿರಲಿಲ್ಲ.

ಕೊಲೆಗಾರ ಎಷ್ಟೇ ಬುದ್ಧಿವಂತನಾದರೂ ಒಂದಾದರೂ ಸುಳಿವನ್ನು ಬಿಟ್ಟು ಹೋಗಿರುತ್ತಾನೆ ಎಂಬ ಮಾತು ಈ ಪ್ರಕರಣದಲ್ಲಿಯೂ ಸತ್ಯವಾಗಿದೆ. ಕವಿತಾ ಅವರ ಮಗ- ಸೊಸೆ ತಮ್ಮ ಸಂಬಂಧಿಕರ ಮನೆಗೆ ಹೋಗಿದ್ದನ್ನು ತಿಳಿದುಕೊಂಡು ಪಕ್ಕದ ಮನೆಯ ಗಂಡ-ಹೆಂಡತಿ ತಮ್ಮ ಪ್ಲಾನ್ ಸಿದ್ಧಪಡಿಸಿಕೊಂಡಿದ್ದರು. ಜೂನ್ 30ರ ರಾತ್ರಿ ಕವಿತಾ ಅವರ ಮನೆಯ ಬಾಗಿಲು ಬಡಿದ ಅವರು ಮಚ್ಚಿನಿಂದ ಕೊಚ್ಚಿ ಆಕೆಯನ್ನು ಕೊಲೆ ಮಾಡಿದ್ದರು. ನಂತರ ಆ ಶವವನ್ನು ಮೂರು ಭಾಗಗಳಾಗಿ ತುಂಡರಿಸಿ, ಸಣ್ಣ ಸಣ್ಣ ಚೀಲಕ್ಕೆ ತುಂಬಿದರು. ನಂತರ ಆ ಚೀಲಗಳನ್ನು ಸೂಟ್​ಕೇಸ್​ನೊಳಗೆ ಹಾಕಿದರು.

ಮನೆಯ ತುಂಬ ರಕ್ತದ ಕಲೆಗಳಾಗಿದ್ದರಿಂದ ಯಾವ ಸುಳಿವೂ ಸಿಗಬಾರದೆಂದು ಜಾಗರೂಕತೆಯಿಂದ ಮನೆಯನ್ನು ಸ್ವಚ್ಛಗೊಳಿಸಿದರು. ನಾಲ್ಕೈದು ಬಾರಿ ನೀರಿನಿಂದ ಒರೆಸಿ ಮನೆಯನ್ನು ಶುದ್ಧಗೊಳಿಸಿದ ಅವರು ನಂತರ ಮನೆಯ ಬಾಗಿಲನ್ನು ಹೊರಗಿನಿಂದ ಲಾಕ್ ಮಾಡಿಕೊಂಡು, ಹೆಣ ತುಂಬಿದ್ದ ಸೂಟ್​ಕೇಸನ್ನು ಎಳೆದುಕೊಂಡು ತಮ್ಮ ಮನೆಗೆ ಹೋದರು. ಆದರೆ, ಡೈನಿಂಗ್ ಹಾಲ್​ನಲ್ಲಿ ಕೊಲೆ ಮಾಡಿದ್ದ ಅವರು ಫ್ರಿಜ್ ಮೇಲೆ ಬಿದ್ದಿದ್ದ ರಕ್ತದ ಹನಿಗಳನ್ನು ಕ್ಲೀನ್ ಮಾಡಲು ಮರೆತಿದ್ದರು. ಫ್ರಿಜ್ ಡೋರ್ ಕೂಡ ಕೆಂಪು ಬಣ್ಣದಲ್ಲಿದ್ದುದರಿಂದ ಅದರ ಮೇಲೆ ಬಿದ್ದಿದ್ದ ರಕ್ತ ಅವರ ಗಮನಕ್ಕೆ ಬಂದಿರಲಿಲ್ಲ. ಅಲ್ಲೇ ಅವರು ಎಡವಿದ್ದು!

ಈ ಘಟನೆ ನಡೆದು ನಾಲ್ಕೈದು ದಿನಗಳ ನಂತರ ಮನೆಯಲ್ಲಿ ಕವಿತಾ ಅವರು ಇಲ್ಲದ್ದನ್ನು ಕಂಡು ಯಾರದೋ ಸಂಬಂಧಿಕರ ಮನೆಗೆ ಹೋಗಿರಬಹುದು ಎಂದುಕೊಂಡರು. ಆದರೆ, ಫೋನ್​ಗೂ ಸಿಗದೆ, ಮನೆಗೂ ಬಾರದೆ ಇರುವುದನ್ನು ಕಂಡು ಗಾಬರಿಯಿಂದ ಪೊಲೀಸರಿಗೆ ದೂರು ನೀಡಿದರು. ಮನೆಗೆ ಬಂದ ಪೊಲೀಸರು ಎಲ್ಲ ಕಡೆ ಪರಿಶೀಲನೆ ನಡೆಸಿದಾಗ ಫ್ರಿಜ್​ನ ಬಾಗಿಲಿನಲ್ಲಿ ರಕ್ತದ ಕಲೆಗಳು ಇರುವುದನ್ನು ಗಮನಿಸಿದರು. ಇದರಿಂದ ಅನುಮಾನಗೊಂಡ ಪೊಲೀಸರು ಸುತ್ತಮುತ್ತಲಿನ ಸಿಸಿಟಿವಿ ಕ್ಯಾಮೆರಾಗಳನ್ನೆಲ್ಲ ಪರಿಶೀಲಿಸಿದರು. ಪಕ್ಕದ ಮನೆಯೊಂದರ ಸಿಸಿಟಿವಿಯಲ್ಲಿ ತನು ಮತ್ತು ಅನಿಲ್ ಕವಿತಾ ಅವರ ಮನೆಯೊಳಗೆ ಪ್ರವೇಶಿಸಿದ್ದ ದೃಶ್ಯ ದಾಖಲಾಗಿತ್ತು.

ಆ ಸಿಸಿಟಿವಿ ದೃಶ್ಯದಲ್ಲಿ ಮಧ್ಯರಾತ್ರಿ ವೇಳೆ ತನು ಮತ್ತು ಅನಿಲ್ ಸೂಟ್​ಕೇಸ್​ ಎಳೆದುಕೊಂಡು ವಾಪಾಸ್ ಹೋಗಿದ್ದು ಕೂಡ ರೆಕಾರ್ಡ್ ಆಗಿತ್ತು. ಅನಿಲ್ ಮತ್ತು ತನು ವಾಸವಾಗಿದ್ದ ಮನೆಯ ಬಳಿ ಹೋಗಿ ನೋಡಿದಾಗ ಕೆಲವು ದಿನಗಳಿಂದ ಅವರು ಮನೆಯಲ್ಲಿಲ್ಲ ಎಂಬುದು ಗೊತ್ತಾಗಿತ್ತು. ಇದರಿಂದ ಅನುಮಾನಗೊಂಡ ಪೊಲೀಸರು ಅವರಿಬ್ಬರಿಗಾಗಿ ಹುಡುಕಾಟ ನಡೆಸಿದ್ದರು. ಅವರ ಮೊಬೈಲ್ ನೆಟ್​ವರ್ಕ್​ನ ಜಾಡನ್ನು ಹಿಡಿದು ಪೊಲೀಸರು ಅವರನ್ನು ಬಂಧಿಸಿದ್ದಾರೆ. ವಿಚಾರಣೆ ವೇಳೆ ತಾವೇ ಕೊಲೆ ಮಾಡಿ, ಹೆಣವನ್ನು ನದಿಗೆ ಬಿಸಾಡಿರುವುದಾಗಿ ಅವರು ಒಪ್ಪಿಕೊಂಡಿದ್ದಾರೆ.

ಇದನ್ನೂ ಓದಿ: Udupi Murder: ಬ್ರಹ್ಮಾವರದ ಅಪಾರ್ಟ್​ಮೆಂಟ್​ನಲ್ಲಿ ಮಹಿಳೆಯ ಬರ್ಬರ ಹತ್ಯೆ; ಆಟೋದಲ್ಲಿ ಬ್ಯಾಂಕ್​ಗೆ ಹೋಗಿದ್ದೇ ತಪ್ಪಾಯ್ತ?

(Couple Killed Woman and Disposed Dead body in Suitcase but Blood on Fridge CCTV Video Revealed Murder Secret)