ಹೊಸ ಸಂಶೋಧನೆ: ನಿಮ್ಮ ಮೊಬೈಲ್​ ಮೂಲಕ ಐದೇ ನಿಮಿಷದಲ್ಲಿ ಕೊರೊನಾ ಸೋಂಕು ಪತ್ತೆ ಸಾಧ್ಯ

ವಾಷಿಂಗ್​ಟನ್: ಭಾರತೀಯ ಮೂಲದ ವಿಜ್ಞಾನಿ ನೇತೃತ್ವದ ತಂಡ ಕೇವಲ ಐದೇ ನಿಮಿಷಗಳಲ್ಲಿ ಕೋವಿಡ್-19 ಪತ್ತೆಹಚ್ಚುವ ವಿಧಾನವೊಂದನ್ನು ಆವಿಷ್ಕರಿಸಿದೆ. ಎಲೆಕ್ಟ್ರೋ ಕೆಮಿಕಲ್ ಸಂವೇದಕಗಳ ಮೂಲಕ ದೇಹದಲ್ಲಿ ಕೊರೊನಾ ಸೋಂಕನ್ನು ಇದು ಶೀಘ್ರ ಪತ್ತೆಹಚ್ಚಲಿದೆ.

ಅಮೆರಿಕದ ಇಲಿನೊಯಿಸ್ ವಿಶ್ವವಿದ್ಯಾಲಯಗಳ ಸಂಶೋಧಕರು ಗ್ರಾಫೀನ್ ಧಾತುವಿನ ಎಲೆಕ್ಟ್ರೋಕೆಮಿಕಲ್ ಬಯೋಸೆನ್ಸಾರ್​ಗಳನ್ನ ಅಭಿವೃದ್ಧಿಪಡಿಸಿದ್ದಾರೆ. ಈ ಸಂವೇದಕಗಳು ಕೋವಿಡ್-19 ರೋಗ ತರುವ SARS-CoV-2 ವೈರಾಣು ಉಪಸ್ಥಿತಿಯನ್ನು ಪತ್ತೆಹಚ್ಚುತ್ತದೆ.

ಈ ಸಂಶೋಧನಾ ಪ್ರಬಂಧವು ಅಮೆರಿಕದ ಪ್ರತಿಷ್ಠಿತ ನಿಯತಕಾಲಿಕೆ ಎಸಿಎಸ್ ನ್ಯಾನೊದಲ್ಲಿ ಪ್ರಕಟವಾಗಿದೆ. ಈ ಬಯೊಸೆನ್ಸಾರ್​ನಲ್ಲಿ ಎಲೆಕ್ಟ್ರಿಕಲ್ ದತ್ತಾಂಶಗಳನ್ನು ಅಳೆಯುವ ತಳಹದಿ ಮತ್ತು ಅದರ ಮೂಲಕ ವೈರಾಣುವಿನ ಉಪಸ್ಥಿತಿಯನ್ನು ವಿಶ್ಲೇಷಿಸಬಲ್ಲ ಕೋಡ್​ ಈ ಸೆನ್ಸಾರ್​ನಲ್ಲಿವೆ.

ಪ್ರಾಧ್ಯಾಪಕ ದಿಪಾನ್​ಜನ್ ಪಾನ್ ರೂಪಿಸಿರುವ ಈ ತಂತ್ರಜ್ಞಾನ ಹಲವರ ಗಮನ ಸೆಳೆದಿದೆ. ಫಿಲ್ಟರ್​ ಪೇಪರ್​ ಮೇಲೆ ಗ್ರಾಫೀನ್​ನ ಅತಿಸೂಕ್ಷ್ಮ ಕಣಗಳನ್ನು (nanoplatelets) ಲೇಪಿಸಿ, ಕಂಡಕ್ಟೀವ್ ಫಿಲ್ಮ್​ ಮಾದರಿಯ ತಳಹದಿ ರೂಪಿಸಿಕೊಳ್ಳುವುದು ಈ ಬಯೋಸೆನ್ಸಾರ್ ನಿರ್ಮಾಣದ ಮೊದಲ ಹಂತ. ಇದರ ಮೇಲೆ ಚಿನ್ನದ ಎಲೆಕ್ಟ್ರೋಡ್​ಗಳನ್ನು ಕೂರಿಸಲಾಗುತ್ತದೆ.

ವಿಜ್ಞಾನಿ ದಿಪಾನ್​ಜನ್ ಪಾನ್

ಚಿನ್ನ ಮತ್ತು ಗ್ರಾಫೀನ್​ಗಳ ಅತಿಸೂಕ್ಷ್ಮ ಸಂವೇದನಾ ಸಾಮರ್ಥ್ಯ ಹೊಂದಿವೆ. ಹೀಗಾಗಿ ಕೊರೊನಾ ಸೋಂಕು ಹರಡುವ SARS-CoV-2 ವೈರಾಣುವಿನಲ್ಲಿರುವ ಎನ್​-ಜೀನ್​ ಪ್ರೋಟೀನ್​ಗಳಿಗೆ ಇವು ಸ್ಪಂದಿಸುತ್ತವೆ. ಅವುಗಳ ಉಪಸ್ಥಿತಿಯನ್ನು ಸಾರಿಹೇಳುತ್ತವೆ. ಕೋವಿಡ್-19 ಪಾಸಿಟಿವ್ ಮತ್ತು ನೆಗೆಟಿವ್ ಮಾದರಿಗಳ ಮೇಲೆ ಈ ಸೆನ್ಸಾರ್​ಗಳನ್ನು ತಂಡ ಪ್ರಯೋಗಿಸಿ ಯಶಸ್ವಿಯಾಗಿದೆ.

ಪಾಸಿಟಿವ್ ಮಾದರಿಗಳ ತಪಾಸಣೆ ವೇಳೆ ವೋಲ್ಟೇಜ್​ನಲ್ಲಿ ಗಮನಾರ್ಹ ಪ್ರಮಾಣದ ಏರಿಕೆ ದಾಖಲಾಗಿದೆ. ಕೇವಲ 5 ನಿಮಿಷಗಳಲ್ಲಿ ಫಲಿತಾಂಶ ಸಿಗುತ್ತದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

ಅತ್ಯಂತ ಸುಲಭವಾಗಿ ಸಾಗಿಸಬಹುದಾದ ಮತ್ತು ಅತಿಕಡಿಮೆ ವೆಚ್ಚದ ಈ ಸೆನ್ಸಾರ್​​ಗಳನ್ನು ಬ್ಲೂಟೂತ್​ ಅಥವಾ ವೈಫೈ ಮೂಲಕ ಸ್ಮಾರ್ಟ್​ಫೋನ್​ಗಳಿಗೆ ಸಂಪರ್ಕಿಸಬಹುದು. ವೈದ್ಯರ ಕ್ಲಿನಿಕ್​ಗಳು ಅಥವಾ ಮನೆಯಲ್ಲಿಯೂ ಬಳಸಬಹುದು. ಕೋವಿಡ್-19ರ ಜೊತೆಗೆ ಇತರ ರೋಗಗಳನ್ನು ಪತ್ತೆಹಚ್ಚುವ ಸಾಧ್ಯತೆಯನ್ನೂ ವೈದ್ಯರ ತಂಡ ಪರಿಶೀಲಿಸುತ್ತಿದೆ.

Explainer | ಫೈಝರ್ ಲಸಿಕೆ ಹಾಕಿಸಿಕೊಂಡವರು ಕೊರೊನಾ ಸೋಂಕಿನಿಂದ ಎಷ್ಟು ಸೇಫ್?

Published On - 10:01 pm, Wed, 9 December 20