ಕಣಿವೆ ರಾಜ್ಯದಲ್ಲಿ ಮತ್ತೆ ಹತ್ಯೆಗೆ ಕಾರಣವಾಯ್ತಾ ಕಾಶ್ಮೀರ್ ಫೈಲ್ಸ್ ಸಿನಿಮಾ?; ಕಾಶ್ಮೀರಿ ಪಂಡಿತರು ಹೇಳೋದೇನು?
The Kashmir Files: ದಿ ಕಾಶ್ಮೀರ್ ಫೈಲ್ಸ್ ಸಿನಿಮಾ ಕಾಶ್ಮೀರದ ಯುವಕರು ಹಾಗೂ ಭಾರತದಲ್ಲಿ ದ್ವೇಷವನ್ನು ಹುಟ್ಟುಹಾಕಿರುವ ಆಧಾರರಹಿತ ಸಿನಿಮಾವಾಗಿದೆ. ಇಂತಹವುಗಳನ್ನು ನಿಷೇಧಿಸಬೇಕು ಎಂದು ಫಾರೂಕ್ ಅಬ್ದುಲ್ಲಾ ಒತ್ತಾಯಿಸಿದ್ದಾರೆ.
Updated on:May 17, 2022 | 7:00 PM
ನವದೆಹಲಿ: ಈ ವರ್ಷ ತೆರೆಕಂಡ ಸಿನಿಮಾಗಳ ಪೈಕಿ ‘ದಿ ಕಾಶ್ಮೀರ್ ಫೈಲ್ಸ್’ (The Kashmir Files) ಸಿನಿಮಾ ಭಾರೀ ಚರ್ಚೆಗೊಳಗಾಗಿತ್ತು. ಈ ಸಿನಿಮಾಗೆ ಹಲವು ರಾಜ್ಯಗಳಲ್ಲಿ ತೆರಿಗೆ ವಿನಾಯಿತಿಯನ್ನೂ ನೀಡಲಾಗಿತ್ತು. ಈ ಸಿನಿಮಾದ ಪರ-ವಿರೋಧದ ಚರ್ಚೆ ಇನ್ನೂ ಇಂತಿಲ್ಲ. ಇಂದು ನ್ಯಾಷನಲ್ ಕಾನ್ಫರೆನ್ಸ್ (National Conference) ಮುಖ್ಯಸ್ಥ ಫಾರೂಕ್ ಅಬ್ದುಲ್ಲಾ ಮತ್ತು ಪಿಡಿಪಿಯ ಮೆಹಬೂಬಾ ಮುಫ್ತಿ ಅವರು ‘ದಿ ಕಾಶ್ಮೀರ್ ಫೈಲ್ಸ್‘ ಚಲನಚಿತ್ರವು ದೇಶದಲ್ಲಿ ದ್ವೇಷದ ವಾತಾವರಣವನ್ನು ಸೃಷ್ಟಿಸಿದೆ ಎಂದು ಆರೋಪಿಸಿದ್ದಾರೆ. ಈ ಸಿನಿಮಾದಲ್ಲಿ ಚಿತ್ರಿಸಿರುವ ದೃಶ್ಯಗಳು ಆಧಾರರಹಿತವಾಗಿವೆ ಎಂದು ಫಾರೂಕ್ ಅಬ್ದುಲ್ಲಾ ಹೇಳಿದ್ದಾರೆ.
“ನಾವು ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಅವರನ್ನು ಭೇಟಿ ಮಾಡಿದ್ದೇವೆ. ಜಮ್ಮು ಮತ್ತು ಕಾಶ್ಮೀರದಲ್ಲಿ ಕಾನೂನು ಮತ್ತು ಸುವ್ಯವಸ್ಥೆಯ ಸಮಸ್ಯೆಯನ್ನು ಪ್ರಸ್ತಾಪಿಸಿದ್ದೇವೆ. ನಾವು ಪರಸ್ಪರ ಹತ್ತಿರವಾಗಬೇಕಾದರ ಈ ದ್ವೇಷದ ಮನಸ್ಥಿತಿ ಕೊನೆಗೊಳ್ಳಬೇಕು. ಕಾಶ್ಮೀರ್ ಫೈಲ್ಸ್ ಸಿನಿಮಾದಲ್ಲಿ ಒಬ್ಬ ಮುಸ್ಲಿಂ ಹಿಂದೂವನ್ನು ಕೊಂದಿರುವುದನ್ನು ತೋರಿಸಲಾಗಿದೆ. ಹಾಗೇ, ಅಕ್ಕಿಯನ್ನು ತನ್ನ ರಕ್ತದಲ್ಲಿ ತೊಳೆದು ಅದನ್ನು ಅನ್ನ ಮಾಡಿ ಅದನ್ನು ತಿನ್ನಲು ಹೇಳುತ್ತಾನೆ. ಇದು ಸಾಧ್ಯವೇ? ಇದು ಭಾರತದಲ್ಲಿ ಮಾತ್ರವಲ್ಲದೆ ಕಾಶ್ಮೀರದ ಯುವಕರಲ್ಲೂ ದ್ವೇಷವನ್ನು ಹುಟ್ಟುಹಾಕಿರುವ ಆಧಾರರಹಿತ ಸಿನಿಮಾವಾಗಿದೆ. ಇಂತಹವುಗಳನ್ನು ನಿಷೇಧಿಸಬೇಕು” ಎಂದು ಫಾರೂಕ್ ಅಬ್ದುಲ್ಲಾ ANIಗೆ ತಿಳಿಸಿದ್ದಾರೆ. (Source)
ಮೆಹಬೂಬಾ ಮುಫ್ತಿ ಅವರು ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ, ಜಮ್ಮು ಕಾಶ್ಮೀರದ ಕಣಿವೆಯಲ್ಲಿ ಹಿಂಸಾಚಾರವನ್ನು ಪ್ರಚೋದಿಸಿದ್ದಕ್ಕಾಗಿ ಕಾಶ್ಮೀರ್ ಫೈಲ್ಸ್ ಸಿನಿಮಾವನ್ನು ದೂಷಿಸಿದ್ದಾರೆ. “ನಾವು ಕಣಿವೆಯಲ್ಲಿ ಕಾಶ್ಮೀರಿ ಪಂಡಿತರಿಗೆ ಸುರಕ್ಷಿತ ವಾತಾವರಣವನ್ನು ನಿರ್ಮಿಸಿದ್ದೇವೆ. 2010 ಮತ್ತು 2016ರಲ್ಲಿ ಅಶಾಂತಿಯ ಉತ್ತುಂಗದಲ್ಲಿಯೂ ಸಹ ಕಣಿವೆಯಲ್ಲಿ ಯಾವುದೇ ಪಂಡಿತರಿಗೆ ಹಾನಿಯಾಗಲಿಲ್ಲ. ಕಾಶ್ಮೀರ್ ಫೈಲ್ಸ್ ಸಿನಿಮಾ ಕಾಶ್ಮೀರದ ಕಣಿವೆಯಲ್ಲಿ ಅಶಾಂತಿಯನ್ನು ಸೃಷ್ಟಿಸಿ ಜನರಲ್ಲಿ ದ್ವೇಷವನ್ನು ಹುಟ್ಟುಹಾಕಿದೆ. ಎರಡು ಸಮುದಾಯಗಳ ನಡುವಿನ ಅಂತರವನ್ನು ಹೆಚ್ಚಿಸಿದೆ” ಎಂದು ಟೀಕಿಸಿದ್ದಾರೆ.
ಇದನ್ನೂ ಓದಿ: ಕಾಶ್ಮೀರಿ ಪಂಡಿತ್ ರಾಹುಲ್ ಭಟ್ನನ್ನು ಕೊಂದಿದ್ದ ಇಬ್ಬರು ಉಗ್ರರು ಸೇರಿ ಮೂವರು ಭಯೋತ್ಪಾದಕರ ಎನ್ಕೌಂಟರ್
ಕೆಲವು ದಿನಗಳ ಹಿಂದೆ ಬದ್ಗಾಮ್ನ ಕಂದಾಯ ಇಲಾಖೆ ಕಚೇರಿಯಲ್ಲಿ ಕಾಶ್ಮೀರಿ ಪಂಡಿತ್ ಸಮುದಾಯದ ರಾಹುಲ್ ಭಟ್ ಎಂಬ ಉದ್ಯೋಗಿಯನ್ನು ಉಗ್ರರು ಹತ್ಯೆ ಮಾಡಿದ್ದರು. ಕಚೇರಿಯೊಳಗೆ ನಡೆದ ಈ ಕೊಲೆಯು ಅನೇಕ ಪಂಡಿತರಿಗೆ 1990ರ ದಶಕದ ಪರಿಸ್ಥಿತಿಯನ್ನು ಮತ್ತೆ ನೆನಪಿಸಿತು. ಇದು ಭಾರೀ ಪ್ರತಿಭಟನೆಗೂ ಕಾರಣವಾಗಿತ್ತು. 1990ರಲ್ಲಿ ಕಾಶ್ಮೀರ್ ಫೈಲ್ ಸಿನಿಮಾ ಇರಲಿಲ್ಲ. ಆದರೂ ಅರ್ಧ ಮಿಲಿಯನ್ ಕಾಶ್ಮೀರಿ ಹಿಂದೂಗಳಿಗೆ ತಮ್ಮ ಮನೆಯನ್ನು ತೊರೆಯುವಂತೆ ಒತ್ತಾಯಿಸಲಾಯಿತು. ನಾಡಿಮಾರ್ಗ್, ಸಂಗ್ರಾಂಪೋರಾ, ವಂಧಾಮಾ ಮತ್ತು ತೆಲ್ವಾನಿ ಹತ್ಯಾಕಾಂಡಗಳನ್ನು ಹೇಗೆ ಸಮರ್ಥಿಸಿಕೊಳ್ಳಲು ಸಾಧ್ಯ? ಎಂದು ಕಾಶ್ಮೀರಿ ಪಂಡಿತ್ ಕಾರ್ಯಕರ್ತರೊಬ್ಬರು ಟೀಕಿಸಿದ್ದಾರೆ.
ಸಿನಿಮಾದಲ್ಲಿ ಏನು ತಪ್ಪಾಗಿದೆ? ಅದರಲ್ಲಿ ತೋರಿಸಿದ ಘಟನೆಗಳು ನಿಜವಲ್ಲವೇ? ಈ ಸಿನಿಮಾ ನಮ್ಮ ಮೇಲೆ ಅಂತಹ ಪ್ರಭಾವ ಬೀರಿಲ್ಲ. ಅಕ್ಟೋಬರ್ನಲ್ಲಿ ಕೂಡ ಹತ್ಯೆಗಳು ನಡೆದಿಲ್ಲವೇ? ಕಾಶ್ಮೀರ್ ಫೈಲ್ಗಳಿಂದ ರಾಹುಲ್ ಭಟ್ ಕೊಲ್ಲಲ್ಪಟ್ಟಿಲ್ಲ. ಅವರು ಕಾಶ್ಮೀರಿ ಪಂಡಿತರು ಎಂಬ ಕಾರಣಕ್ಕಾಗಿ ಅವರನ್ನು ಕೊಲ್ಲಲಾಯಿತು ಎಂದು ದುಃಖಿತ ಕಾಶ್ಮೀರಿ ಪಂಡಿತರೊಬ್ಬರು ಅಸಮಾಧಾನ ಹೊರಹಾಕಿದ್ದಾರೆ.
ಇದನ್ನೂ ಓದಿ: ‘ದಿ ಕಾಶ್ಮೀರ್ ಫೈಲ್ಸ್’ ನಿರ್ದೇಶಕ ವಿವೇಕ್ ಅಗ್ನಿಹೋತ್ರಿಗೆ ಬ್ರಿಟನ್ ಸಂಸತ್ತಿನಿಂದ ಆಹ್ವಾನ
1990ರಲ್ಲಿ ಕಾಶ್ಮೀರಿ ಪಂಡಿತರು ಯಾವ ರೀತಿ ಕಾಶ್ಮೀರ ಕಣಿವೆಯಿಂದ ಪಲಾಯನ ಮಾಡಬೇಕಾಯಿತು, ತಮ್ಮದೇ ದೇಶದಲ್ಲಿ ನಿರಾಶ್ರಿತರಂತೆ ಬದುಕುವಂತೆ ಮಾಡಿದ ದೌರ್ಜನ್ಯದ ನೈಜ ವಿವರವನ್ನು ತೋರಿಸಿರುವುದಾಗಿ ‘ದಿ ಕಾಶ್ಮೀರ್ ಫೈಲ್ಸ್’ ಸಿನಿಮಾ ತಂಡ ಹೇಳಿಕೊಂಡಿದೆ. ಭಯೋತ್ಪಾದನೆಯಲ್ಲಿ ಮುಖ್ಯವಾಹಿನಿಯ ರಾಜಕಾರಣಿಗಳ ಪಾತ್ರವನ್ನು ತನಿಖೆ ಮಾಡಲು ತನಿಖಾ ಆಯೋಗವನ್ನು ಕಾಶ್ಮೀರಿ ಪಂಡಿತರು ಒತ್ತಾಯಿಸಿದ್ದಾರೆ. ಈ ವರ್ಷ ಇಲ್ಲಿಯವರೆಗೆ ದಕ್ಷಿಣ ಕಾಶ್ಮೀರ ಮತ್ತು ಶ್ರೀನಗರದಲ್ಲಿ 10 ಪಂಡಿತರು ಮತ್ತು ಕಾರ್ಮಿಕರ ಮೇಲೆ ಭಯೋತ್ಪಾದಕರು ಗುಂಡು ಹಾರಿಸಿದ್ದಾರೆ. 2021ರ ಅಕ್ಟೋಬರ್ನಿಂದ 2022ರ ಮೇವರೆಗೆ ಜಮ್ಮು ಮತ್ತು ಕಾಶ್ಮೀರದಲ್ಲಿ ನಡೆದ ದಾಳಿಯಲ್ಲಿ 31 ನಾಗರಿಕರು ಸಾವನ್ನಪ್ಪಿದ್ದಾರೆ ಮತ್ತು 90 ಜನರು ಗಾಯಗೊಂಡಿದ್ದಾರೆ.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 6:58 pm, Tue, 17 May 22
