ನಿಮ್ಮ ದೈನಂದಿನ ಬದುಕಿನ ಮೇಲೆ ಹೆಚ್ಚು ಪ್ರಭಾವ ಬೀರುತ್ತಾರೆ ಶಾಸಕರು; ಇವರ ಅಧಿಕಾರ ವ್ಯಾಪ್ತಿ, ಕರ್ತವ್ಯಗಳ ಬಗ್ಗೆ ಮಾಹಿತಿ

ನಾವು ಕಳೆದ ಲೇಖನದಲ್ಲಿ ಸಂಸದರು (MP) ಏನು ಮಾಡುತ್ತಾರೆ ಎಂಬುದನ್ನು ನೋಡಿದ್ದೆವು. ಈಗ ನಿಮ್ಮ ದೈನಂದಿನ ಜೀವನಕ್ಕೆ ಸಂಬಂಧಿಸಿದ ಮತ್ತೊಂದು ಪ್ರಮುಖ ವಿಷಯ ಇಲ್ಲಿದೆ. ನಿಮ್ಮ ದೈನಂದಿನ ಬದುಕಿನ ಹೆಚ್ಚಿನ ವಿಷಯಗಳಲ್ಲಿ ಸಂಸದರಿಗಿಂತ ನಿಮ್ಮ ಶಾಸಕರೇ (MLA) ಹೆಚ್ಚು ಪ್ರಾಮುಖ್ಯತೆ ಪಡೆಯುತ್ತಾರೆ.

ಶಾಸಕರು (MLA) ಎಂದರೆ ಸಂಸದರಿಗಿಂತ ಸಣ್ಣ ಕ್ಷೇತ್ರವನ್ನು ಪ್ರತಿನಿಧಿಸಲು, ರಾಷ್ಟ್ರೀಯ ಸಂಸತ್ತಿನ ಬದಲು ನಿಮ್ಮ ರಾಜ್ಯದ ವಿಧಾನಸಭೆಗೆ ಆಯ್ಕೆಯಾದ ಜನಪ್ರತಿನಿಧಿ. ಒಬ್ಬ ಶಾಸಕರು ನಿರ್ವಹಿಸುವ ಕೆಲಸಗಳು ಬಹಳ ಜನರು ಭಾವಿಸಿರುವುದಕ್ಕಿಂತಲೂ ಮಿಗಿಲಾದ ಪ್ರಭಾವವನ್ನು ನಮ್ಮ ಬದುಕಿನ ಮೇಲೆ ಬೀರಬಲ್ಲುವು.

ಭಾರತದ ಸಂವಿಧಾನವು ಕೇಂದ್ರ ಸರ್ಕಾರ ಮತ್ತು ರಾಜ್ಯ ಸರ್ಕಾರಗಳ ನಡುವೆ ಜವಾಬ್ದಾರಿಗಳನ್ನು ಹಂಚಿದೆ. ದೇಶದ ಪ್ರಮುಖ ವಿಷಯಗಳಾದ — ರಕ್ಷಣೆ, ವಿದೇಶಾಂಗ ವ್ಯವಹಾರಗಳು, ಕರೆನ್ಸಿ, ಮತ್ತು ರೈಲ್ವೆ ಇಲಾಖೆಗಳು ಕೇಂದ್ರ ಸರ್ಕಾರಕ್ಕೆ ಸೇರಿವೆ, ಹಾಗೂ ನಿಮ್ಮ ಸಂಸದರು ಹೆಚ್ಚಾಗಿ ನಿರ್ವಹಿಸುವುದು ಇವುಗಳನ್ನೇ. ಆದರೆ ಪೋಲಿಸ್ ಇಲಾಖೆ, ಭೂ ದಾಖಲೆಗಳು (ಆಸ್ತಿ ನೋಂದಣಿ), ಕೃಷಿ, ಸಾರ್ವಜನಿಕ ಆರೋಗ್ಯದ ಬಹುಪಾಲು ಭಾಗ, ಮತ್ತು ಶಾಲಾ ಶಿಕ್ಷಣದ ದೊಡ್ಡ ಪಾಲು ಮುಖ್ಯವಾಗಿ ರಾಜ್ಯ ಸರ್ಕಾರಗಳಿಗೆ ಸೇರಿವೆ. ಇದರರ್ಥ ನಿಮ್ಮ ಮನೆ ಬಾಗಿಲಿಗೆ ಬರುವ ಪೋಲಿಸ್ ಅಧಿಕಾರಿ, ನಿಮ್ಮ ಮನೆ ಇರುವ ಆಸ್ತಿ ದಾಖಲೆ, ನಿಮ್ಮೂರಿನ ಸರ್ಕಾರಿ ಆಸ್ಪತ್ರೆ, ಮತ್ತು ನಿಮ್ಮ ಸ್ಥಳೀಯ ರೈತರು ಅನುಸರಿಸುವ ಕೃಷಿ ನಿಯಮಗಳು ಇವೆಲ್ಲವೂ ದೆಹಲಿಯಲ್ಲಿ ಕುಳಿತಿರುವವರಿಗಿಂತ ನಿಮ್ಮ ರಾಜ್ಯ ಸರ್ಕಾರ ಮತ್ತು ನಿಮ್ಮ ಶಾಸಕರಿಂದಲೇ ಹೆಚ್ಚು ರೂಪುಗೊಳ್ಳುತ್ತವೆ.

ಸಂಸದರಂತೆಯೇ ಶಾಸಕರಿಗೂ ಸಹ ತಮ್ಮ ಕ್ಷೇತ್ರದ ಅಭಿವೃದ್ಧಿಗಾಗಿ ‘ಎಂಎಲ್‌ಎಎಲ್‌ಎಡಿ’ (MLALAD) ಎಂಬ ಕ್ಷೇತ್ರಾಭಿವೃದ್ಧಿ ನಿಧಿ ಸಿಗುತ್ತದೆ, ಇದು ನಾವು ಕಳೆದ ಬಾರಿ ನೋಡಿದ ಎಂಪಿಎಲ್‌ಎಡಿಎಸ್ ನಿಧಿಯ ಸ್ವರೂಪದಲ್ಲೇ ಇರುತ್ತದೆ. ಇದರ ಕಾರ್ಯವೈಖರಿಯೂ ತೀರಾ ಒಂದೇ ರೀತಿಯದ್ದು: ಶಾಸಕರು ಶಾಸಕರಾಗಿ ನೇರವಾಗಿ ಹಣ ಖರ್ಚು ಮಾಡುವ ಬದಲು ಯೋಜನೆಯನ್ನು ಶಿಫಾರಸು ಮಾಡುತ್ತಾರೆ, ಮತ್ತು ಸ್ಥಳೀಯ ಜಿಲ್ಲಾಧಿಕಾರಿ/ಆಡಳಿತವು ಅದನ್ನು ಅನುಮೋದಿಸಿ ಅನುಷ್ಠಾನಗೊಳಿಸುತ್ತದೆ.

ಇಲ್ಲಿ ತೀರಾ ವಿಚಿತ್ರವೆನಿಸುವ ವಿಷಯವೊಂದಿದೆ. ಈ ನಿಧಿಯ ಮೊತ್ತವು ದೇಶಾದ್ಯಂತ ಒಂದೇ ರೀತಿಯಾಗಿ ನಿಗದಿಯಾಗಿಲ್ಲ. ಇದು ನೀವು ಯಾವ ರಾಜ್ಯದಲ್ಲಿ ವಾಸಿಸುತ್ತೀರಿ ಎಂಬುದರ ಮೇಲೆ ಸಂಪೂರ್ಣವಾಗಿ ಅವಲಂಬಿತವಾಗಿರುತ್ತದೆ. ದೆಹಲಿಯಲ್ಲಿ ಶಾಸಕರಿಗೆ ಪ್ರಸ್ತುತ ವರ್ಷಕ್ಕೆ 15 ಕೋಟಿ ರೂ ಸಿಗುತ್ತದೆ. ಇದು ಇಡೀ ದೇಶದಲ್ಲೇ ಅತ್ಯಧಿಕ. ಪಂಜಾಬ್, ಕೇರಳ ಮತ್ತು ರಾಜಸ್ಥಾನಗಳಲ್ಲಿ ಇದು 5 ಕೋಟಿ ರೂ ಇದೆ. ಅಸ್ಸಾಂ, ಛತ್ತೀಸ್‌ಗಢ, ಮಹಾರಾಷ್ಟ್ರ ಮತ್ತು ಕರ್ನಾಟಕಗಳಲ್ಲಿ ಇದು 2 ಕೋಟಿ ರೂ ಇದೆ. ದೇಶದ ಬೇರೆ ಬೇರೆ ಎಡೆ ಇರುವ ಇಬ್ಬರು ಭಾರತೀಯರು ಒಂದೇ ಸಂವಿಧಾನದ ಅಡಿಯಲ್ಲಿ ಇರುತ್ತಾರೆ. ಆದರೆ, ಅವರನ್ನು ಪ್ರತಿನಿಧಿಸುವ ಶಾಸಕರ ಬಳಿ ಇರುವ ಸ್ಥಳೀಯ ಅಭಿವೃದ್ಧಿ ಬಜೆಟ್​ನಲ್ಲಿ ಏಳು ಪಟ್ಟು ಅಂತರ ಕಾಣಬಹುದು. ಪ್ರತಿಯೊಂದು ರಾಜ್ಯ ಸರ್ಕಾರದ್ದೇ ಆದ ಸ್ವಂತ ನಿರ್ಧಾರಗಳು ಈ ವ್ಯತ್ಯಾಸಕ್ಕೆ ಕಾರಣವಾಗಿರುತ್ತದೆ.

ಇದನ್ನೂ ಓದಿ: ನಿಮ್ಮ ಏರಿಯಾದ ರಸ್ತೆ ಗುಂಡಿ ಸಮಸ್ಯೆಗೆ ಎಂಪಿಗೆ ಶಾಪ ಹಾಕ್ತೀರಾ? ಸಂಸದರ ವ್ಯಾಪ್ತಿ, ಜವಾಬ್ದಾರಿಗಳೇನು ಎಂದು ತಿಳಿದಿರಿ

ಈ ನಿಧಿಯ ಹೊರತಾಗಿ, ಶಾಸಕರಿಗೆ ಸಂಸದರಿಗಿಲ್ಲದ ಮತ್ತೊಂದು ಪ್ರಮುಖ ಅಧಿಕಾರ ಅಥವಾ ಶಕ್ತಿ ಇರುತ್ತದೆ. ತಮ್ಮ ರಾಜಕೀಯ ಪಕ್ಷವು ರಾಜ್ಯದಲ್ಲಿ ಸರ್ಕಾರವನ್ನು ರಚಿಸಿದರೆ, ಒಬ್ಬ ಶಾಸಕರು ರಾಜ್ಯದ ಸಚಿವರಾಗಬಹುದು. ಆರೋಗ್ಯ, ಕೃಷಿ ಅಥವಾ ಗೃಹ ಇಲಾಖೆಯಂತಹ ದೈನಂದಿನ ಬದುಕನ್ನು ರೂಪಿಸುವ ಇಲಾಖೆಗಳನ್ನು ನೇರವಾಗಿ ನಡೆಸುವ ಮತ್ತು ನೇರ ಆಡಳಿತಾತ್ಮಕ ಅಧಿಕಾರ ಚಲಾಯಿಸುವ ಅವಕಾಶ ಅವರಿಗೆ ಸಿಗುತ್ತದೆ. ಹೆಚ್ಚಿನ ಸಂಸದರಿಗೆ ಇಂತಹ ನೇರ ಕಾರ್ಯಾಂಗದ ಜವಾಬ್ದಾರಿ ಸಿಗುವುದಿಲ್ಲ; ಸಂಸತ್ತಿನ ಹೆಚ್ಚಿನ ಅಧಿಕಾರಗಳು ಚರ್ಚೆ, ಕಾನೂನು ರಚನೆ ಮತ್ತು ಪರಿಶೀಲನೆಯ ಮೂಲಕ ಕೆಲಸ ಮಾಡುತ್ತವೆಯೇ ಹೊರತು ಇಲಾಖೆಯ ನೇರ ನಿಯಂತ್ರಣದಿಂದ ಅಲ್ಲ.

ಹಾಗಾದರೆ ಸ್ಥಳೀಯವಾಗಿ ಏನಾದರೂ ಸಮಸ್ಯೆಯಾದಾಗ ನಮ್ಮಲ್ಲಿ ಹೆಚ್ಚಿನವರು ಮೊದಲು ಸಂಸದರನ್ನೇ ನೆನಪಿಸಿಕೊಳ್ಳುತ್ತಾರೆ. ಶಾಸಕರ ಬಗ್ಗೆ ಯೋಚಿಸುವುದೇ ಇಲ್ಲವೇಕೆ?

ಭಾಗಶಃ ಇದು ಪ್ರಚಾರ ಮತ್ತು ಪ್ರದರ್ಶನದ ಕಾರಣದಿಂದಾಗಿರಬಹುದು. ರಾಜ್ಯ ಶಾಸನಸಭೆಯ ನಡಾವಳಿಗಳಿಗಿಂತ ರಾಷ್ಟ್ರೀಯ ರಾಜಕೀಯಕ್ಕೆ ಮಾಧ್ಯಮಗಳಲ್ಲಿ ಹೆಚ್ಚಿನ ಸಮಯ ಮತ್ತು ಸ್ಥಳ ಸಿಗುತ್ತದೆ. ಭಾಗಶಃ ಇದು ಒಂದೇ ರೀತಿಯಂತೆ ಕೇಳಿಸುವ ಎರಡು ಹುದ್ದೆಗಳ ನಡುವಿನ ಗೊಂದಲವೂ ಹೌದು. ಮತ್ತು ಭಾಗಶಃ, ನಾವು ಕಳೆದ ಎರಡು ಲೇಖನಗಳಲ್ಲಿ ನೋಡಿದಂತೆ ನಿಮ್ಮ ಬೀದಿಯ ರಸ್ತೆಯನ್ನು ಸರಿಪಡಿಸುವ ಜವಾಬ್ದಾರಿ ಇವರಿಬ್ಬರದೂ ಅಲ್ಲ. ಅದು ಮೂಲತಃ ನಗರ ಪಾಲಿಕೆ ಅಥವಾ ಪಂಚಾಯತಿಗೆ ಸೇರಿದ ವಿಷಯವಾಗಿದೆ.

ಮೂರು ವಿಭಿನ್ನ ಕಚೇರಿಗಳು. ಮೂರು ವಿಭಿನ್ನ ಕೆಲಸಗಳು. ಆರೋಗ್ಯ, ಪೋಲಿಸ್ ಮತ್ತು ಆಸ್ತಿ ವಿಷಯಗಳಲ್ಲಿ ರಾಜ್ಯ ಮಟ್ಟದ ನೀತಿ ರೂಪಿಸುವ ಶಾಸಕರು. ರಾಷ್ಟ್ರೀಯ ಕಾನೂನು ರೂಪಿಸುವ ಮತ್ತು ಕೇಂದ್ರ ಸರ್ಕಾರವನ್ನು ಪ್ರಶ್ನಿಸುವ ಸಂಸದರು. ರಸ್ತೆ ನಿರ್ಮಿಸುವ ಮತ್ತು ಚರಂಡಿ ಸ್ವಚ್ಛಗೊಳಿಸುವ ನಗರ ಪಾಲಿಕೆ ಅಥವಾ ಪಂಚಾಯತಿ.

ಇದನ್ನೂ ಓದಿ: ಗ್ರಾಮದ ಆಡಳಿತ ನಿಜವಾಗಿ ಯಾರ ಕೈಯಲ್ಲಿರುತ್ತದೆ? ಪಂಚಾಯತಿ ಅಧ್ಯಕ್ಷರು, ಗ್ರಾಮಸ್ಥರು ಮತ್ತು ಸರ್ಕಾರದ ಪಾತ್ರ ಮತ್ತು ವ್ಯಾಪ್ತಿ

ಯಾವ ಸಮಸ್ಯೆಗೆ ಯಾರು ಜವಾಬ್ದಾರರು ಎಂಬುದನ್ನು ತಿಳಿದುಕೊಳ್ಳುವುದು ಸಣ್ಣ ತಾಂತ್ರಿಕ ವಿಷಯವಲ್ಲ. ಇದು ಸರಿಯಾದ ದಿಕ್ಕಿನಲ್ಲಿ ಗಟ್ಟಿಯಾಗಿ ಪ್ರಶ್ನಿಸುವುದಕ್ಕೂ ಮತ್ತು ಶೂನ್ಯ ಪ್ರದೇಶದಲ್ಲಿ ಸುಮ್ಮನೆ ಆಕ್ರೋಶ ವ್ಯಕ್ತಪಡಿಸುವುದಕ್ಕೂ ಇರುವ ಸಣ್ಣ ವ್ಯತ್ಯಾಸವಾಗಿದೆ.

ಹಾಗಾಗಿ ಇಲ್ಲೊಂದು ಸಣ್ಣ ಪರೀಕ್ಷೆಯನ್ನು ಮಾಡಿ ನೋಡಿ. ನಿಮ್ಮ ಪ್ರದೇಶದಲ್ಲಿ ನಿಮ್ಮನ್ನು ಹೆಚ್ಚು ಕಾಡುತ್ತಿರುವ ಯಾವುದಾದರೂ ಒಂದು ಸಮಸ್ಯೆಯನ್ನು ನೆನಪಿಸಿಕೊಳ್ಳಿ. ಈಗ ಪ್ರಶ್ನಿಸಿಕೊಳ್ಳಿ: ಇದು ನಿಜವಾಗಿಯೂ ನನ್ನ ಶಾಸಕರ ಕೆಲಸವೇ, ಸಂಸದರ ಕೆಲಸವೇ, ಅಥವಾ ನನ್ನ ಸ್ಥಳೀಯ ಪಾಲಿಕೆ/ಪಂಚಾಯತಿಯ ಕೆಲಸವೇ?

ನಿಮಗೆ ಖಚಿತವಾಗಿ ಗೊತ್ತಿಲ್ಲದಿದ್ದರೆ, ಆ ಅಸ್ಪಷ್ಟತೆಯ ಕುರಿತು ಒಮ್ಮೆ ಯೋಚಿಸಿ. ಏಕೆಂದರೆ ಈ ಅಸ್ಪಷ್ಟತೆ ನಿಮ್ಮ ಹೆಚ್ಚಿನ ನೆರೆಹೊರೆಯವರಿಗೂ ಇರುವುದು ಬಹುತೇಕ ಖಚಿತ.

ಆಧಾರಗಳು: ಭಾರತದ ಸಂವಿಧಾನ, 7ನೇ ಅನುಸೂಚಿ (ಕೇಂದ್ರ, ರಾಜ್ಯ ಮತ್ತು ಸಮವರ್ತಿ ಪಟ್ಟಿಗಳು); ದಿ ಟ್ರಿಬ್ಯೂನ್, “ದೆಹಲಿ ಸರ್ಕಾರವು ಎಂಎಲ್‌ಎಎಲ್‌ಎಡಿ ನಿಧಿಯನ್ನು 10 ರಿಂದ 15 ಕೋಟಿಗೆ ಹೆಚ್ಚಿಸಿದೆ”; ಪಿಆರ್‌ಎಸ್ ಲೆಜಿಸ್ಲೇಟಿವ್ ರಿಸರ್ಚ್, “ಎಕ್ಸ್‌ಪ್ಲೇನ್ಡ್: ಹೌ ಎಂಪಿಎಲ್‌ಎಡಿ ಸ್ಕೀಮ್ ವರ್ಕ್ಸ್”.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ