ನೀರಿನ ಉಗಿಯಿಂದಲೂ ಉರಿಯುತ್ತೆ ಸ್ಟವ್: ಇಂಧನ ಉಳಿಸುವ ದೇಸಿ ತಂತ್ರಜ್ಞಾನ ರೂಪಿಸಿ ಪ್ರಶಸ್ತಿ ಗೆದ್ದ ವ್ಯಾಸ್ಜಿ ಮಿಶ್ರಾ

ಭೋಪಾಲ್, ಸೆಪ್ಟೆಂಬರ್ 15: ಬಡ ಹಾಗೂ ಮಧ್ಯಮ ವರ್ಗದ ಕುಟುಂಬಗಳಿಗೆ ಇಂಧನ ವೆಚ್ಚ ತಗ್ಗಿಸುವ ನಿಟ್ಟಿನಲ್ಲಿ ಮಧ್ಯಪ್ರದೇಶದ ದೇವ್ಸರ್ ಮೂಲದ 16ವರ್ಷದ ವಿದ್ಯಾರ್ಥಿ ವ್ಯಾಸ್ಜಿ ಮಿಶ್ರಾ, ನೀರು ಮತ್ತು ಸೀಮೆಎಣ್ಣೆ ಎರಡನ್ನೂ ಬಳಸಿ ಉರಿಯುವ ವಿಶಿಷ್ಟ ಹೈಬ್ರಿಡ್ ಒಲೆಯನ್ನು ಅಭಿವೃದ್ಧಿಪಡಿಸಿದ್ದಾರೆ. ಕೇವಲ 600 ರೂ. ವೆಚ್ಚದಲ್ಲಿ ತಯಾರಿಸಲಾದ ಈ ಉಪಕರಣವು ಸೀಮೆಎಣ್ಣೆಯ ಬಳಕೆಯನ್ನು ಶೇಕಡಾ 20 ರಷ್ಟು ಉಳಿತಾಯ ಮಾಡುವುದಲ್ಲದೆ, ಅಡುಗೆ ಮನೆಯಲ್ಲಿ ಹೊಗೆಯ ಸಮಸ್ಯೆಯನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ.

ಕಾರ್ಯನಿರ್ವಹಿಸುವ ವಿಧಾನ: ಈ ಹೈಬ್ರಿಡ್ ಒಲೆಯಲ್ಲಿ ಸೀಮೆಎಣ್ಣೆ ಮತ್ತು ನೀರಿಗೆ ಪ್ರತ್ಯೇಕವಾದ ಎರಡು ಟ್ಯಾಂಕ್‌ಗಳಿದ್ದು, ಎರಡೂ ಒಂದೇ ಬರ್ನರ್‌ಗೆ ಸಂಪರ್ಕಗೊಂಡಿರುತ್ತವೆ. ಮೂರು ನಿಯಂತ್ರಕಗಳ (ರೆಗ್ಯುಲೇಟರ್) ಮೂಲಕ ಸೀಮೆಎಣ್ಣೆ, ನೀರು ಹಾಗೂ ಬರ್ನರ್ ಆನ್-ಆಫ್ ನಿಯಂತ್ರಣ ಮಾಡಲಾಗುತ್ತದೆ.

ನೀರಿನ ಉಗಿಯ ಬಳಕೆ: ಆರಂಭದಲ್ಲಿ ಸೀಮೆಎಣ್ಣೆಯ ಮೂಲಕ ಬರ್ನರ್ ಬಿಸಿಯಾದ ನಂತರ, ನೀರಿನ ಹರಿವನ್ನು ಬಿಡಲಾಗುತ್ತದೆ. ಹೆಚ್ಚಿನ ತಾಪಮಾನಕ್ಕೆ ನೀರು ಕ್ಷಿಪ್ರವಾಗಿ ಉಗಿಯಾಗಿ ಪರಿವರ್ತನೆಗೊಂಡು ದಹನ ಪ್ರಕ್ರಿಯೆಗೆ ಪೂರಕವಾಗಿ ಉರಿಯಲು ನೆರವಾಗುತ್ತದೆ. ಇದರಿಂದ ಸೀಮೆಎಣ್ಣೆ ಬಳಕೆ ತಗ್ಗುತ್ತದೆ.

ಐಐಟಿ ಗುವಾಹಟಿ ಪರೀಕ್ಷೆ: ಐಐಟಿ ಗುವಾಹಟಿಯ (IIT Guwahati) ತಜ್ಞರು ಈ ಮಾದರಿಯನ್ನು ವೈಜ್ಞಾನಿಕವಾಗಿ ಪರೀಕ್ಷಿಸಿ, ಇದು ಶೇ. 20ರಷ್ಟು ಇಂಧನ ಉಳಿತಾಯ ಮಾಡುತ್ತದೆ ಎಂಬುದನ್ನು ದೃಢಪಡಿಸಿದ್ದಾರೆ.

ಮತ್ತಷ್ಟು ಓದಿ: Video: ಕಾಯುವಿಕೆ ಕೊನೆಗೂ ಅಂತ್ಯವಾಯ್ತು; ಮಾಲೀಕನನ್ನು ಕಂಡೊಡನೆ ಖುಷಿಯಲ್ಲಿ ಓಡಿ ಬಂದ ಶ್ವಾನ

ರಾಜ್ಯ ಮಟ್ಟದ ಗೌರವ: 2003ರ ರಾಜ್ಯಮಟ್ಟದ ವಿಜ್ಞಾನ ಪ್ರದರ್ಶನದಲ್ಲಿ ಪ್ರಥಮ ಬಹುಮಾನ ಪಡೆದುಕೊಂಡ ಈ ಮಾದರಿಗೆ ಅಂದಿನ ಶಿಕ್ಷಣ ಸಚಿವರಿಂದ ಪ್ರಶಸ್ತಿ ಲಭಿಸಿದೆ.

ರಾಷ್ಟ್ರೀಯ ಇನ್ನೋವೇಶನ್ ಫೌಂಡೇಶನ್ (NIF) ಬೆಂಬಲ: ತಳಮಟ್ಟದ ಪ್ರತಿಭೆಗಳನ್ನು ಪ್ರೋತ್ಸಾಹಿಸುವ ಕೇಂದ್ರ ಸರ್ಕಾರದ ನ್ಯಾಷನಲ್ ಇನ್ನೋವೇಶನ್ ಫೌಂಡೇಶನ್ ಮತ್ತು ಜಿಯಾನ್ (GIAN) ಸಂಸ್ಥೆಗಳು ಈ ಆವಿಷ್ಕಾರವನ್ನು ಗುರುತಿಸಿ, ಇದರ ಮೂಲಮಾದರಿ ಅಭಿವೃದ್ಧಿ ಹಾಗೂ ಮಾರುಕಟ್ಟೆ ಸಂಶೋಧನೆಗಾಗಿ ಮೈಕ್ರೋ ವೆಂಚರ್ ಫಂಡ್‌ನಿಂದ 37,250 ರೂ. ಧನಸಹಾಯ ನೀಡಿವೆ.

ಸಹೋದರರ ಜಂಟಿ ಪರಿಶ್ರಮ: ಈ ಹೈಬ್ರಿಡ್ ಒಲೆಯ ಮೂಲ ಕಲ್ಪನೆ ವ್ಯಾಸ್ಜಿ ಅವರ ಹಿರಿಯ ಸಹೋದರ ಪವನ್‌ಜಿ ಮಿಶ್ರಾ ಅವರದ್ದಾಗಿದ್ದು, ಇಬ್ಬರೂ ಸಹೋದರರು ಸೇರಿ ಸುಮಾರು 6 ತಿಂಗಳ ಕಾಲ ಶ್ರಮಿಸಿ ಈ ಮಾದರಿಯನ್ನು ಯಶಸ್ವಿಯಾಗಿ ರೂಪಿಸಿದರು.

ಗ್ರಾಮೀಣ ಭಾಗಕ್ಕೆ ವರದಾನ: ಎಲ್‌ಪಿಜಿ ಸಿಲಿಂಡರ್ ಬೆಲೆ ಏರಿಕೆ ಹಾಗೂ ಇಂದಿಗೂ ಸೀಮೆಎಣ್ಣೆ ಅಥವಾ ಸಾಂಪ್ರದಾಯಿಕ ಇಂಧನಗಳನ್ನು ನೆಚ್ಚಿಕೊಂಡಿರುವ ಗ್ರಾಮೀಣ ಕುಟುಂಬಗಳಿಗೆ ಇಂತಹ ಕಡಿಮೆ ವೆಚ್ಚದ ದೇಸಿ ಆವಿಷ್ಕಾರಗಳು ಆರ್ಥಿಕ ಮತ್ತು ಆರೋಗ್ಯದ ದೃಷ್ಟಿಯಿಂದ ಅತ್ಯಂತ ಸಹಕಾರಿಯಾಗಿವೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ