ನೆಟ್ ಲೋಕದಲ್ಲಿ ಪ್ರೀತಿ ಪ್ರೇಮ ಪ್ರಣಯ.. ವರ್ಚುವಲ್ ಡೇಟಿಂಗ್​ನತ್ತ ಹೆಚ್ಚಿದ ಒಲವು

ಬೆಂಗಳೂರು: ಬೆಂಗಳೂರಿನಲ್ಲಿ ಪಿಜಿಯೊಂದರಲ್ಲಿ ವಾಸವಿರುವ ಸೌಮ್ಯಾ ಸಾಫ್ಟ್​ವೇರ್ ಎಂಜಿನಿಯರ್. ಲಾಕ್​ಡೌನ್​ನಲ್ಲಿ ಅತ್ತ ಊರಿಗೂ ತೆರಳಲಾಗದೆ, ಇತ್ತ ಸರಿಯಾಗಿ ಕೆಲಸವನ್ನೂ ಮಾಡಲಾಗದೇ ಒಬ್ಬಂಟಿತನ ಅನುಭವಿಸುತ್ತಿದ್ದರು. ಗೆಳೆಯರ ಜೊತೆ ಹೊರಗೆ ಸುತ್ತಾಡಲಾಗದೆ ರೂಮಲ್ಲೇ ಇದ್ದು ಬೇಸತ್ತಿದ್ದರು. ಅದುವರೆಗೆ ಬಳಸಿದ್ದ ಫೇಸ್​ಬುಕ್, ಇನ್​ಸ್ಟಾಗ್ರಾಂ ಬೇಸರ ತರಿಸಿತ್ತು. ಹೊಸ ಸಂಬಂಧವೊಂದರ ಅಗತ್ಯ ಕಾಡಿತು. ಆಗಲೇ, ಅವರು ಡೇಟಿಂಗ್ ಆ್ಯಪ್​ ಡೌನ್​ಲೋಡ್ ಮಾಡಿದ್ದು.

ಶೇ.140ರಷ್ಟು ಹೆಚ್ಚಳ! ಲಾಕ್​ಡೌನ್​ ಜಾರಿಯ ನಂತರ ಭಾರತದಲ್ಲಿ ಡೇಟಿಂಗ್ ಆ್ಯಪ್​ಗಳ ಬಳಕೆ ಶೇ.140ರಷ್ಟು ಹೆಚ್ಚಳ ಕಂಡಿದೆ! ಕೊರೊನಾ ನಂತರ ವರ್ಚುವಲ್ ಜಗತ್ತಿನಲ್ಲಿ ಸಾಮೀಪ್ಯ ಪಡೆಯಲು ಭಾರತೀಯರಲ್ಲಿ ಆಸಕ್ತಿ ಹೆಚ್ಚುತ್ತಿದೆ.

ಟಿಂಡರ್, ಬಂಬಲ್, ಟ್ರುಲಿ ಮ್ಯಾಡ್ಲಿ ಮುಂತಾದ ಆ್ಯಪ್​ಗಳು ಗಣನೀಯವಾಗಿ ಡೌನ್​ಲೋಡ್ ಆಗಿದೆ. ಪ್ರಿಯಾಂಕಾ ಚೋಪ್ರಾ ಹೂಡಿಕೆ ಮಾಡಿರುವ ಅಮೆರಿಕ ಮೂಲದ ಆ್ಯಪ್ ಬಂಬ್ಲ್​ನ ಬಳಕೆದಾರರ ಸಂಖ್ಯೆ ಜುಲೈನಲ್ಲೇ 40 ಲಕ್ಷ ದಾಟಿತ್ತು. ಅಲ್ಲದೆ, ಡೇಟಿಂಗ್ ಆ್ಯಪ್​ಗಳಲ್ಲಿ ಇತರರ ಪ್ರೊಫೈಲ್ ವೀಕ್ಷಣೆ, ಸಂದೇಶ ವಿನಿಮಯ, ವಿಡಿಯೊ ಕಾಲ್​ಗಳ ಬಳಕೆ ಸಮಯವೂ ಹೆಚ್ಚಾಗಿದೆ.

ನೇರ ಭೇಟಿಗೂ ಮುನ್ನ.. ಕೊರೊನಾದಿಂದಾಗಿ ಆಪ್ತರ ಭೇಟಿ ಸಾಧ್ಯವಾಗದ ಕಾರಣ, ಡೇಟಿಂಗ್ ಆ್ಯಪ್​ಗಳಲ್ಲಿ ವಿಡಿಯೊ ಕಾಲ್​ ಮಾಡುವ ಪ್ರಮಾಣವೂ ಹೆಚ್ಚಾಗಿದೆ. ನೇರವಾಗಿ ಭೇಟಿಯಾಗುವ ಮುನ್ನ ಇತರರ ಆಪ್ತ ಪರಿಚಯ ಮಾಡಿಕೊಳ್ಳಲು ವಿಡಿಯೊ ಕಾಲ್ ಬಳಕೆಯಾಗುತ್ತಿದೆ. ಮಾರ್ಚ್​ನಿಂದ ಮೇ ಅವಧಿಯಲ್ಲಿ ಬಂಬ್ಲ್​ನಲ್ಲಿ ವಿಡಿಯೋ ಕಾಲ್ ​ಬಳಸುವವರ ಸಂಖ್ಯೆ ಶೇ.38ರಷ್ಟು ಹೆಚ್ಚಾಗಿದೆ.ಆನ್​ಲೈನ್​ನಲ್ಲೇ ಅಪರಿಚಿತರಿಂದ  ಆಪ್ತರಾಗುವ ಪದ್ಧತಿಗೆ ಭಾರತೀಯರು ಹೊರಳುತ್ತಿದ್ದಾರೆ ಎಂಬುದು ಸ್ಪಷ್ಟವಾಗಿದೆ ಎಂದು ಬಂಬ್ಲ್​ ಆ್ಯಪ್​ನ ಪ್ರೀತಿ ಜೋಷಿ ವಿವರಿಸುತ್ತಾರೆ. 

ಎರಡು, ಮೂರನೇ ಹಂತದ ನಗರಗಳಲ್ಲೂ ಹೆಚ್ಚಿದ ಒಲವು ಮಹಾನಗರಗಳಲ್ಲಿ ಮಾತ್ರವಲ್ಲ, ಎರಡು ಮತ್ತು ಮೂರನೇ ಹಂತದ ನಗರಗಳಲ್ಲಿಯೂ ಡೇಟಿಂಗ್​ ಆ್ಯಪ್​ಗಳ ಬಳಕೆದಾರರ ಸಂಖ್ಯೆ ಹೆಚ್ಚಾಗಿದೆ. ಕಳೆದ 10 ತಿಂಗಳಲ್ಲಿ ಈ ಹಂತದ ನಗರಗಳಿಂದ ಮೂರು ಪಟ್ಟು ಹೆಚ್ಚು ಆದಾಯವನ್ನು ಟ್ರೂಲಿಮ್ಯಾಡ್ಲಿ ಆ್ಯಪ್ ಗಳಿಸಿದೆ.

ಕ್ವಾಕ್ ಕ್ವಾಕ್ ಎಂಬ ಭಾರತೀಯ ಡೇಟಿಂಗ್ ಆ್ಯಪ್​ನ ಶೇ.70 ಬಳಕೆದಾರರು ಎರಡು ಮತ್ತು ಮೂರನೇ ಹಂತದ ನಗರದವರೇ ಆಗಿದ್ದಾರೆ.

Published On - 5:38 pm, Thu, 26 November 20