Australian Open 2022: ಐತಿಹಾಸಿಕ 21ನೇ ಗ್ರ್ಯಾಂಡ್ ಸ್ಲ್ಯಾಮ್ಗೆ ಮುತ್ತಿಕ್ಕಿದ ನಡಾಲ್! ದಾಖಲೆಗಳೆಲ್ಲ ಪುಡಿಪುಡಿ
Rafael Nadal: ಡಾಲ್ ಆಸ್ಟ್ರೇಲಿಯನ್ ಓಪನ್ 2022 ಪ್ರಶಸ್ತಿಯನ್ನು ಗೆಲ್ಲುವ ಮೂಲಕ 21 ನೇ ಗ್ರ್ಯಾಂಡ್ ಸ್ಲಾಮ್ ಗೆದ್ದು ವಿಶ್ವದಾಖಲೆ ಮಾಡಿದ್ದಾರೆ. ಈ ಮೂಲಕ ನಡಾಲ್ ಪುರುಷರ ಸಿಂಗಲ್ಸ್ನಲ್ಲಿ ಅತಿ ಹೆಚ್ಚು ಗ್ರ್ಯಾಂಡ್ ಸ್ಲ್ಯಾಮ್ ಪ್ರಶಸ್ತಿಗಳನ್ನು ಗೆದ್ದ ಆಟಗಾರ ಎನಿಸಿಕೊಂಡಿದ್ದಾರೆ.
Updated on:Jan 30, 2022 | 8:33 PM
ಸ್ಪೇನ್ನ ದಿಗ್ಗಜ ಟೆನಿಸ್ ತಾರೆ ರಾಫೆಲ್ ನಡಾಲ್ (Rafael Nadal) ಇತಿಹಾಸ ಸೃಷ್ಟಿಸಿದ್ದಾರೆ. ನಡಾಲ್ ಆಸ್ಟ್ರೇಲಿಯನ್ ಓಪನ್ 2022 (Australian Open 2022) ಪ್ರಶಸ್ತಿಯನ್ನು ಗೆಲ್ಲುವ ಮೂಲಕ 21 ನೇ ಗ್ರ್ಯಾಂಡ್ ಸ್ಲಾಮ್ ಗೆದ್ದು ವಿಶ್ವದಾಖಲೆ ಮಾಡಿದ್ದಾರೆ. ಈ ಮೂಲಕ ನಡಾಲ್ ಪುರುಷರ ಸಿಂಗಲ್ಸ್ನಲ್ಲಿ ಅತಿ ಹೆಚ್ಚು ಗ್ರ್ಯಾಂಡ್ ಸ್ಲ್ಯಾಮ್ ಪ್ರಶಸ್ತಿಗಳನ್ನು ಗೆದ್ದ ಆಟಗಾರ ಎನಿಸಿಕೊಂಡಿದ್ದಾರೆ. ರೋಜರ್ ಫೆಡರರ್ ಮತ್ತು ನೊವಾಕ್ ಜೊಕೊವಿಕ್ ಅವರನ್ನು ಹಿಂದಿಕ್ಕಿ ನಡಾಲ್ ಈ ದಾಖಲೆ ಮಾಡಿದ್ದಾರೆ. ನಡಾಲ್ ರಷ್ಯಾದ ಡೇನಿಯಲ್ ಮೆಡ್ವೆಡೆವ್ ಅವರನ್ನು 2-6, 6-7, 6-4, 6-4, 7-5 ಸೆಟ್ಗಳಿಂದ ಸೋಲಿಸಿ 5 ಗಂಟೆ 24 ನಿಮಿಷಗಳ ಸುದೀರ್ಘ ಮತ್ತು ಹೋರಾಟದ ಫೈನಲ್ನಲ್ಲಿ ಎರಡನೇ ಬಾರಿಗೆ ಆಸ್ಟ್ರೇಲಿಯನ್ ಓಪನ್ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು. ಅದೇ ಸಮಯದಲ್ಲಿ, ಸತತ ಎರಡನೇ ವರ್ಷ, ಮೆಡ್ವೆಡೆವ್ ಆಸ್ಟ್ರೇಲಿಯನ್ ಓಪನ್ನಲ್ಲಿ ಸೋಲನ್ನು ಎದುರಿಸಬೇಕಾಯಿತು.
ಐದು ಸೆಟ್ಗಳ ಕಾಲ ನಡೆದ ಈ ಪಂದ್ಯದಲ್ಲಿ 35 ವರ್ಷದ ರಫೆಲ್ ನಡಾಲ್ ತನಗಿಂತ 10 ವರ್ಷ ಕಿರಿಯ ರಷ್ಯಾದ ತಾರೆಗೆ ಕಠಿಣ ಹೋರಾಟ ನೀಡಿದರು. 11 ವರ್ಷಗಳ ಹಿಂದೆ, ಇದೇ ಟೂರ್ನಿಯ ಫೈನಲ್ನಲ್ಲಿ ಐದೂವರೆ ಗಂಟೆಗೂ ಹೆಚ್ಚು ಕಾಲ ನಡೆದ ಪಂದ್ಯದಲ್ಲಿ ನೊವಾಕ್ ಜೊಕೊವಿಕ್ ವಿರುದ್ಧ ನಡಾಲ್ ಸೋಲನುಭವಿಸಬೇಕಾಯಿತು. ಇದು ಗ್ರ್ಯಾಂಡ್ ಸ್ಲಾಮ್ ಇತಿಹಾಸದಲ್ಲಿ ಸುದೀರ್ಘ ಫೈನಲ್ ಆಗಿದೆ. ಈಗ 11 ವರ್ಷಗಳ ನಂತರ, ನಡಾಲ್ ಮತ್ತೊಂದು ಸುದೀರ್ಘ ಫೈನಲ್ ಪಂದ್ಯವನ್ನು ಆಡುವ ಮೂಲಕ ಜೊಕೊವಿಕ್ ಅವರನ್ನು ಹಿಂದಿಕ್ಕಿದರು.
ಈ ಪಂದ್ಯಾವಳಿಯ ಕೆಲವು ವಾರಗಳ ಮೊದಲು, ನಡಾಲ್ ಶಸ್ತ್ರಚಿಕಿತ್ಸೆಗೆ ಒಳಗಾಗಬೇಕಾಯಿತು. ಪಂದ್ಯಾವಳಿಯಲ್ಲಿ ಅವರ ಭಾಗವಹಿಸುವಿಕೆ ಸಹ ಅನುಮಾನದಲ್ಲಿತ್ತು. ಆದರೆ ನಡಾಲ್ ಇವೆಲ್ಲವನ್ನೂ ಹಿಂದೆ ಸರಿಸಿ ಹಲವಾರು ಕಠಿಣ ಪಂದ್ಯಗಳ ನಂತರ ಫೈನಲ್ ಪ್ರವೇಶಿಸಿದ್ದರು. ಫೈನಲ್ ಪಂದ್ಯವು ಅತ್ಯುತ್ತಮ ಫಾರ್ಮ್ನಲ್ಲಿದ್ದ ಮೆಡ್ವೆಡೆವ್ ಶೈಲಿಯಲ್ಲಿ ಪ್ರಾರಂಭವಾಯಿತು. ಅವರು ಮೊದಲ ಎರಡು ಸೆಟ್ಗಳನ್ನು ಗೆಲ್ಲುವಲ್ಲಿ ಯಶಸ್ವಿಯದರು. ನಡಾಲ್ ನಂತರ ತಮ್ಮ ಸುದೀರ್ಘ ವೃತ್ತಿಜೀವನದ ಶೈಲಿಯಲ್ಲಿ ತಮ್ಮ ಯುದ್ಧವನ್ನು ತೋರಿಸಿ ಐತಿಹಾಸಿಕ ಪುನರಾಗಮನವನ್ನು ಮಾಡಿದರು.
Another chapter is written ?@RafaelNadal defeats Daniil Medvedev 2-6 6-7(5) 6-4 6-4 7-5 to win his second #AusOpen title in an epic lasting five hours and 24 minutes. ⁰ ?: @wwos • @espn • @eurosport • @wowowtennis #AO2022 pic.twitter.com/OlMvhlGe6r
— #AusOpen (@AustralianOpen) January 30, 2022
ಮೊದಲ ಎರಡು ಸೆಟ್ಗಳು ಮೆಡ್ವೆಡೆವ್ ಪಾಲು ಮೊದಲ ಸೆಟ್ನ ಐದನೇ ಮತ್ತು ಏಳನೇ ಗೇಮ್ಗಳಲ್ಲಿ ಮೆಡ್ವೆಡೆವ್ ಅವರು ನಡಾಲ್ ಅವರ ಸರ್ವ್ ಅನ್ನು ಸತತ ಎರಡು ಬಾರಿ ಮುರಿದರು. ನಡಾಲ್ ಹಲವಾರು ಅನಗತ್ಯ ತಪ್ಪುಗಳನ್ನು ಮಾಡಿದರು, ಇದರಿಂದಾಗಿ ಅವರು ಅಂಕಗಳನ್ನು ಗಳಿಸುವ ಸುಲಭ ಅವಕಾಶಗಳನ್ನು ಕಳೆದುಕೊಂಡರು. ಮೆಡ್ವೆಡೆವ್ ಸುಲಭವಾಗಿ 6-2 ರಿಂದ ಸೆಟ್ ಅನ್ನು ಗೆದ್ದರು. ಎರಡನೇ ಸೆಟ್ ನಲ್ಲಿ ದಿಟ್ಟ ಪ್ರದರ್ಶನ ನೀಡಿದ ನಡಾಲ್ ಮೆಡ್ವೆಡೆವ್ ಅವರ ಸರ್ವ್ ಮುರಿದು 4-1ರ ಮುನ್ನಡೆ ಪಡೆದರು. ಈ ಸಮಯದಲ್ಲಿ, ನಡಾಲ್ ಕೆಲವು ಅತ್ಯುತ್ತಮ ಡ್ರಾಪ್ ಶಾಟ್ಗಳನ್ನು ಆಡಿದರು. ಇದಕ್ಕೆ ಮೆಡ್ವೆಡೆವ್ ಬಳಿ ಉತ್ತರವಿರಲಿಲ್ಲ. ಆದರೆ ಮೆಡ್ವೆಡೆವ್ ಅವರೇ ತಮ್ಮ ಹೋರಾಟದ ಆಟದಿಂದ ಹಿಂತಿರುಗಿ ನಡಾಲ್ ಅವರ ಸರ್ವ್ನಲ್ಲಿ ಗೇಮ್ ಗೆದ್ದರು. ಸುದೀರ್ಘ ಹೋರಾಟದ ನಂತರ ಸೆಟ್ ಟೈಬ್ರೇಕರ್ಗೆ ಹೋಯಿತು. ಟೈಬ್ರೇಕರ್ನಲ್ಲೂ ತೀವ್ರ ಪೈಪೋಟಿ ಕಂಡುಬಂದರೂ, ಮೆಡ್ವೆಡೆವ್ 2ನೇ ಸೆಟ್ ಗೆದ್ದುಕೊಂಡರು.
3-4ನೇ ಸೆಟ್ನಲ್ಲಿ ಪ್ರಬಲ ಪುನರಾಗಮನ ಮೂರನೇ ಸೆಟ್ನಲ್ಲಿ ನಡಾಲ್ ಅತ್ಯುತ್ತಮ ಪ್ರದರ್ಶನ ನೀಡಿ ಉತ್ತಮ ಫಲಿತಾಂಶವನ್ನು ಪಡೆದರು. ಕ್ರೀಡಾಂಗಣದಲ್ಲಿ ನೆರೆದಿದ್ದ ಪ್ರೇಕ್ಷಕರಿಂದ ನಡಾಲ್ಗೆ ನೀಡಿದ ಬೆಂಬಲವು ಮೆಡ್ವೆಡೆವ್ ಅವರ ಆಟದ ಮೇಲೆ ಪರಿಣಾಮ ಬೀರಿತು. ಡ್ರಾಪ್ ಹೊಡೆತಗಳ ಮೆಡ್ವೆಡೆವ್ ಅನೇಕ ತಪ್ಪುಗಳನ್ನು ಮಾಡಿ 4-6 ರಿಂದ ಸೆಟ್ ಅನ್ನು ಕಳೆದುಕೊಂಡರು.
ಮೂರನೇ ಸೆಟ್ ಗೆಲ್ಲುವ ಮೂಲಕ ನಡಾಲ್ ಪಂದ್ಯವನ್ನು ನಾಲ್ಕನೇ ಸೆಟ್ಗೆ ಕೊಂಡೊಯ್ಯುವಲ್ಲಿ ಯಶಸ್ವಿಯಾದರು. ಈ ಸೆಟ್ ಅತ್ಯಂತ ಕಠಿಣ ಪಂದ್ಯವಾಗಿತ್ತು. ಮೊದಲ 5 ಗೇಮ್ಗಳಲ್ಲಿ, ಇಬ್ಬರೂ ಆಟಗಾರರು 3 ಬಾರಿ ಸರ್ವ್ ಮುರಿದರು. ನಡಾಲ್ ಆರನೇ ಗೇಮ್ನಲ್ಲಿ 4-2 ಮುನ್ನಡೆ ಸಾಧಿಸಿದರು. ನಂತರ ಮೆಡ್ವೆಡೆವ್ ಅವರು ನಡಾಲ್ ಅವರ ಸರ್ವ್ ಅನ್ನು ಮುರಿಯುವ ಅವಕಾಶವನ್ನು ಪಡೆದರು. ಆದರೆ ಅವರು ಅದರಲ್ಲಿ ಯಶಸ್ವಿಯಾಗಲಿಲ್ಲ. ನಂತರ ಹಿಂತಿರುಗಿ ನೋಡದ ಮೆಡ್ವೆಡೆವ್ 6-4 ರಿಂದ ಸೆಟ್ ಗೆದ್ದು 2-2 ರಿಂದ ಸಮಬಲ ಸಾಧಿಸಿದರು.
ರೋಚಕ ಐದನೇ ಸೆಟ್ ನಡಾಲ್ ಐದನೇ ಸೆಟ್ನಲ್ಲಿ 3-2 ಮುನ್ನಡೆ ಸಾಧಿಸಿದರು, ಆದರೆ ಆರನೇ ಗೇಮ್ನಲ್ಲಿ ಮೆಡ್ವೆಡೆವ್ಗೆ ಮರಳುವ ಅವಕಾಶವಿತ್ತು. ಆದರೂ, ನಡಾಲ್ ಪಟ್ಟುಹಿಡಿದು 4 ಬ್ರೇಕ್ ಪಾಯಿಂಟ್ಸ್ ಉಳಿಸಿ 4-2 ಮುನ್ನಡೆ ಪಡೆದರು. ಇಲ್ಲಿಂದ ಇಬ್ಬರೂ ಆಟಗಾರರು ಸುದೀರ್ಘ ಆಟಗಳನ್ನು ಆಡಿ ಪಂದ್ಯವನ್ನು ಮುಗಿಸಲು ಬಹಳ ಸಮಯ ತೆಗೆದುಕೊಂಡರು. ನಿರ್ದಿಷ್ಟವಾಗಿ ಹೇಳುವುದಾದರೆ, ಮೆಡ್ವೆಡೆವ್ ನಡಾಲ್ ಅವರ ಸರ್ವ್ನಲ್ಲಿ ಗೆಲುವಿನ ಅವಕಾಶಗಳನ್ನು ಸೃಷ್ಟಿಸಿದರು. ಆದರೆ ಸ್ಪ್ಯಾನಿಷ್ ದೈತ್ಯ ಅವರ ಅನುಭವದ ಆಧಾರದ ಮೇಲೆ ಅವುಗಳನ್ನು ಗೆದ್ದರು.
5-4 ಮುನ್ನಡೆಯಲ್ಲಿದ್ದ ನಡಾಲ್ 10ನೇ ಗೇಮ್ನಲ್ಲಿ ಚಾಂಪಿಯನ್ಶಿಪ್ಗಾಗಿ ಮಾಡಿದ ಸರ್ವ್ನಿಂದ ಪಂದ್ಯದ ಮಹತ್ವದ ತಿರುವು ಬಂದಿತು. 30-0 ಯಿಂದ ನಡಾಲ್ ಮುನ್ನಡೆಯಲ್ಲಿದ್ದರು, ಆದರೆ ಮೆಡ್ವೆಡೆವ್ ಪಂದ್ಯವನ್ನು 5-5 ರಲ್ಲಿ ಸಮಬಲಗೊಳಿಸಿದರು. ಮೆಡ್ವೆಡೆವ್ ಮುಂದಿನ ಗೇಮ್ನ ಸರ್ವ್ನಲ್ಲಿ ಮುನ್ನಡೆ ಸಾಧಿಸುವ ಅವಕಾಶವನ್ನು ಹೊಂದಿದ್ದರು, ಆದರೆ ಈ ಬಾರಿ ನಡಾಲ್ 6-5 ಮುನ್ನಡೆ ಸಾಧಿಸಿ ಚಾಂಪಿಯನ್ಶಿಪ್ಗಾಗಿ ಎರಡನೇ ಬಾರಿಗೆ ಸರ್ವ್ ಪಡೆದರು. ಅಂತಿಮವಾಗಿ, 12 ನೇ ಗೇಮ್ನಲ್ಲಿ, ನಡಾಲ್ ನಿರ್ಣಾಯಕ ಗೆಲುವು ದಾಖಲಿಸುವ ಮೂಲಕ ಪ್ರಶಸ್ತಿ ಮತ್ತು ಇತಿಹಾಸ ನಿರ್ಮಿಸಿದರು.
ಇದನ್ನೂ ಓದಿ:Australian Open 2022: ಸತತ ಎರಡನೇ ಬಾರಿಗೆ ಫೈನಲ್ಗೇರಿದ ಡೇನಿಯಲ್ ಮೆಡ್ವೆಡೆವ್! ಅಂತಿಮ ಎದುರಾಳಿ ನಡಾಲ್
Published On - 8:01 pm, Sun, 30 January 22
