Deodhar Trophy 2023: ಮಯಾಂಕ್ ಮಿಂಚಿಂಗ್: ದಕ್ಷಿಣ ವಲಯ ತಂಡಕ್ಕೆ ರೋಚಕ ಜಯ
West Zone vs South Zone: ಈ ಪಂದ್ಯದಲ್ಲಿ 115 ಎಸೆತಗಳನ್ನು ಎದುರಿಸಿದ ಮಯಾಂಕ್ ಅಗರ್ವಾಲ್ 98 ರನ್ಗೆ ವಿಕೆಟ್ ಒಪ್ಪಿಸಿ ಶತಕ ವಂಚಿತರಾದರು.
Updated on: Jul 26, 2023 | 4:54 PM
Deodhar Trophy 2023: ಪುದುಚೇರಿಯ ಕ್ರಿಕೆಟ್ ಅಸೋಷಿಯೇಷನ್ ಸ್ಟೇಡಿಯಂನಲ್ಲಿ ನಡೆದ ದೇವಧರ್ ಟ್ರೋಫಿಯ 6ನೇ ಪಂದ್ಯದಲ್ಲಿ ದಕ್ಷಿಣ ವಲಯ ತಂಡವು ರೋಚಕ ಜಯ ಸಾಧಿಸಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಪಶ್ಚಿಮ ವಲಯ ತಂಡದ ನಾಯಕ ಪ್ರಿಯಾಂಕ್ ಪಾಂಚಾಲ್ ಬೌಲಿಂಗ್ ಆಯ್ದುಕೊಂಡಿದ್ದರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ದಕ್ಷಿಣ ವಲಯ ತಂಡವು ಉತ್ತಮ ಆರಂಭ ಪಡೆದಿರಲಿಲ್ಲ. ಆರಂಭಿಕ ಆಟಗಾರ ರೋಹನ್ ಕುನ್ನುಮ್ಮಲ್ (5) ಅರ್ಝಾನ್ ಎಸೆತದಲ್ಲಿ ಕ್ಯಾಚ್ ನೀಡಿದರು. ಆ ಬಳಿಕ ಬಂದ ದೇವದತ್ ಪಡಿಕ್ಕಲ್ (2) ಬಂದ ವೇಗದಲ್ಲೇ ಹಿಂತಿರುಗಿದರು. ಇನ್ನು ವಿಕೆಟ್ ಕೀಪರ್ ಬ್ಯಾಟರ್ ಎನ್ ಜಗದೀಸನ್ (6) ಹಾಗೂ ರಿಕಿ ಭುಯಿ (3) ಕೂಡ ಬೇಗನೆ ನಿರ್ಗಮಿಸಿದರು.
ಆದರೆ ಮತ್ತೊಂದೆಡೆ ಮಯಾಂಕ್ ಅಗರ್ವಾಲ್ ಕ್ರೀಸ್ ಕಚ್ಚಿ ನಿಂತಿದ್ದರು. ಎಚ್ಚರಿಕೆಯ ಬ್ಯಾಟಿಂಗ್ ಪ್ರದರ್ಶಿಸಿದ ಮಯಾಂಕ್ ಒಂದೊಂದು ರನ್ಗಳೊಂದಿಗೆ ಸ್ಕೋರ್ ಪೇರಿಸುತ್ತಾ ಸಾಗಿದರು. ಪರಿಣಾಮ 6 ವಿಕೆಟ್ ನಷ್ಟಕ್ಕೆ ದಕ್ಷಿಣ ವಲಯ ತಂಡವು 142 ರನ್ಗಳಿಸಲು ಸಾಧ್ಯವಾಯಿತು.
ಇದಾದ ಬಳಿಕ ಬಿರುಸಿನ ಆಟಕ್ಕೆ ಮುಂದಾದ ಮಯಾಂಕ್ ಅಗರ್ವಾಲ್ರನ್ನು ಔಟ್ ಮಾಡುವಲ್ಲಿ ಪಾರ್ಥ್ ಭುತ್ ಯಶಸ್ವಿಯಾದರು. ಇತ್ತ 115 ಎಸೆತಗಳನ್ನು ಎದುರಿಸಿದ ಮಯಾಂಕ್ 9 ಫೋರ್ಗಳೊಂದಿಗೆ 98 ರನ್ಗೆ ವಿಕೆಟ್ ಒಪ್ಪಿಸಿ 2 ರನ್ಗಳಿಂದ ಶತಕ ವಂಚಿತರಾದರು.
ಇನ್ನು ಅಂತಿಮ ಹಂತದಲ್ಲಿ ಬೌಲರ್ಗಳಾದ ವಿಜಯಕುಮಾರ್ ವೈಶಾಕ್ (20) ಹಾಗೂ ವಿಧ್ವತ್ ಕಾವೇರಪ್ಪ (19) ಅಮೂಲ್ಯ ಕೊಡುಗೆ ನೀಡುವ ಮೂಲಕ ತಂಡದ ಮೊತ್ತವನ್ನು 200ರ ಗಡಿದಾಟಿಸಿದರು. ಇದಾಗ್ಯೂ 46.1 ಓವರ್ಗಳಲ್ಲಿ 206 ರನ್ಗಳಿಗೆ ದಕ್ಷಿಣ ವಲಯ ತಂಡವನ್ನು ಆಲೌಟ್ ಮಾಡುವಲ್ಲಿ ಪಶ್ಚಿಮ ವಲಯ ಬೌಲರ್ಗಳು ಯಶಸ್ವಿಯಾದರು.
207 ರನ್ಗಳ ಸುಲಭ ಗುರಿ ಬೆನ್ನತ್ತಿದ ಪಶ್ಚಿಮ ವಲಯ ಕೂಡ ಉತ್ತಮ ಆರಂಭ ಪಡೆಯಲಿಲ್ಲ. ಆರಂಭಿಕ ಆಟಗಾರ ಪ್ರಿಯಾಂಕ್ ಪಾಂಚಾಲ್ (0) ರನೌಟ್ ಆದರು. ಇದರ ಬೆನ್ನಲ್ಲೇ ಹಾರ್ವಿಕ್ ದೇಸಾಯಿಗೆ ಕನ್ನಡಿಗ ವಿ.ಕೌಶಿಕ್ ಪೆವಿಲಿಯನ್ ಹಾದಿ ತೋರಿಸಿದರು.
ಇನ್ನು ರಾಹುಲ್ ತ್ರಿಪಾಠಿ (15) ಯನ್ನು ಎಲ್ಬಿ ಬಲೆಗೆ ಬೀಳಿಸಿ ವಿಧ್ವತ್ ಕಾವೇರಪ್ಪ 3ನೇ ಯಶಸ್ಸು ತಂದುಕೊಟ್ಟರು. ಇನ್ನು ಅಂಕಿ ಬಾವ್ನೆ (17) ರನೌಟ್ ಆಗಿ ಹೊರನಡೆದರು. ಈ ಹಂತದಲ್ಲಿ ಎಚ್ಚರಿಕೆಯ ಬ್ಯಾಟಿಂಗ್ ಪ್ರದರ್ಶಿಸಿದ ಸರ್ಫರಾಝ್ ಖಾನ್ ತಂಡಕ್ಕೆ ಆಸರೆಯಾಗಿ ನಿಂತರು. 42 ಎಸೆತಗಳಲ್ಲಿ 2 ಭರ್ಜರಿ ಸಿಕ್ಸ್ 5 ಫೋರ್ಗಳೊಂದಿಗೆ 42 ರನ್ ಬಾರಿಸಿ ಅಪಾಯಕಾರಿಯಾಗುವ ಸೂಚನೆ ನೀಡಿದ್ದ ಸರ್ಫರಾಝ್ರನ್ನು ಔಟ್ ಮಾಡುವಲ್ಲಿ ಕೊನೆಗೂ ವಿಜಯಕುಮಾರ್ ವೈಶಾಕ್ ಯಶಸ್ವಿಯಾದರು.
ಸರ್ಫರಾಝ್ ಖಾನ್ ವಿಕೆಟ್ ಸಿಗುತ್ತಿದ್ದಂತೆ ಪಂದ್ಯದ ಮೇಲೆ ಹಿಡಿತ ಸಾಧಿಸಿದ ದಕ್ಷಿಣ ವಲಯ ಬೌಲರ್ಗಳು ಪಶ್ಚಿಮ ವಲಯ ಬ್ಯಾಟರ್ಗಳ ಮೇಲೆ ಒತ್ತಡ ಹೇರುವಲ್ಲಿ ಸಫಲರಾದರು. ಈ ಹಂತದಲ್ಲಿ ಅತಿತ್ ಶೇಠ್ 40 ರನ್ ಬಾರಿಸಿ ಮಿಂಚಿದರು. ಆದರೆ ವಾಷಿಂಗ್ಟನ್ ಸುಂದರ್ ಎಸೆತವನ್ನು ಗುರುತಿಸುವಲ್ಲಿ ಎಡವಿದ ಅತಿತ್ ಎಲ್ಬಿಡಬ್ಲ್ಯೂ ಆಗಿ ನಿರ್ಗಮಿಸಿದರು.
ಈ ವಿಕೆಟ್ನೊಂದಿಗೆ ದಕ್ಷಿಣ ವಲಯ ತಂಡವು ಗೆಲುವನ್ನು ಖಚಿತಪಡಿಸಿಕೊಂಡಿತು. ಅಂತಿಮವಾಗಿ ಪಶ್ಚಿಮ ವಲಯ ತಂಡವನ್ನು 36.2 ಓವರ್ಗಳಲ್ಲಿ 194 ರನ್ಗಳಿಗೆ ಆಲೌಟ್ ಮಾಡಿ, ದಕ್ಷಿಣ ವಲಯ ತಂಡವು 12 ರನ್ಗಳ ರೋಚಕ ಜಯ ಸಾಧಿಸಿತು. ದಕ್ಷಿಣ ವಲಯ ಪರ ಸಾಯಿ ಕಿಶೋರ್ 3 ವಿಕೆಟ್ ಪಡೆದರೆ, ವಾಷಿಂಗ್ಟನ್ ಸುಂದರ್ 2 ವಿಕೆಟ್ ಕಬಳಿಸಿದರು.
ಪಶ್ಚಿಮ ವಲಯ ಪ್ಲೇಯಿಂಗ್ 11: ಹಾರ್ವಿಕ್ ದೇಸಾಯಿ (ವಿಕೆಟ್ ಕೀಪರ್) , ಪ್ರಿಯಾಂಕ್ ಪಾಂಚಾಲ್ (ನಾಯಕ) , ರಾಹುಲ್ ತ್ರಿಪಾಠಿ , ಸರ್ಫರಾಝ್ ಖಾನ್ , ಅಂಕಿತ್ ಬಾವ್ನೆ , ಶಿವಂ ದುಬೆ , ಅತಿತ್ ಶೇಠ್ , ಪಾರ್ಥ್ ಭುತ್ , ಶಮ್ಸ್ ಮುಲಾನಿ , ಅರ್ಜನ್ ನಾಗವಾಸ್ವಾಲ್ಲಾ , ರಾಜವರ್ಧನ್ ಹಂಗರ್ಗೇಕರ್.
ಇದನ್ನೂ ಓದಿ: ICC Test Rankings: ಅಗ್ರ ಹತ್ತರಲ್ಲಿ ಟೀಮ್ ಇಂಡಿಯಾದ ಏಕೈಕ ಆಟಗಾರನಿಗೆ ಸ್ಥಾನ
ದಕ್ಷಿಣ ವಲಯ ಪ್ಲೇಯಿಂಗ್ 11: ರೋಹನ್ ಕುನ್ನುಮ್ಮಲ್ , ಮಯಾಂಕ್ ಅಗರ್ವಾಲ್ (ನಾಯಕ) , ದೇವದತ್ ಪಡಿಕ್ಕಲ್ , ಎನ್ ಜಗದೀಸನ್ (ವಿಕೆಟ್ ಕೀಪರ್) , ಸಾಯಿ ಕಿಶೋರ್ , ವಿಧ್ವತ್ ಕಾವೇರಪ್ಪ , ವಾಷಿಂಗ್ಟನ್ ಸುಂದರ್ , ರಿಕಿ ಭುಯಿ , ವಿಜಯಕುಮಾರ್ ವೈಶಾಕ್ , ವಾಸುಕಿ ಕೌಶಿಕ್ , ಅರುಣ್ ಕಾರ್ತಿಕ್.
