IND vs SL: 3ನೇ ದಿನದಾಟ ಅಂತ್ಯ; ಫಾಲೋಆನ್ ಹೇರಲು ಭಾರತದ ಪ್ರಯತ್ನ
Colombo Test Day 3: ಕೊಲಂಬೊದಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್ ಪಂದ್ಯದ ಮೂರನೇ ದಿನದಾಟದಂತ್ಯಕ್ಕೆ ಶ್ರೀಲಂಕಾ 8 ವಿಕೆಟ್ಗೆ 265 ರನ್ ಗಳಿಸಿದೆ. ಮಳೆಯಿಂದಾಗಿ ಆಟ ಬೇಗನೆ ಮುಕ್ತಾಯವಾಯಿತು. ಸೋನಲ್ ದಿನುಷಾ 85 ರನ್ ಗಳಿಸಿ ಕ್ರೀಸ್ನಲ್ಲಿದ್ದಾರೆ. ಭಾರತಕ್ಕೆ 238 ರನ್ಗಳ ಭಾರಿ ಮುನ್ನಡೆ ದೊರೆತಿದ್ದು, ಫಾಲೋ-ಆನ್ ತಪ್ಪಿಸಲು ಶ್ರೀಲಂಕಾಕ್ಕೆ ಇನ್ನೂ 39 ರನ್ಗಳ ಅವಶ್ಯಕತೆಯಿದೆ. ಪಂದ್ಯ ಕುತೂಹಲಕಾರಿಯಾಗಿದೆ.
Updated on:Aug 25, 2026 | 6:11 PM
ಕೊಲಂಬೊದಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಮೊದಲ ಇನ್ನಿಂಗ್ಸ್ ಆರಂಭಿಸಿರುವ ಆತಿಥೇಯ ಶ್ರೀಲಂಕಾ ತಂಡ ಮೂರನೇ ದಿನದಾಟದಂತ್ಯಕ್ಕೆ 8 ವಿಕೆಟ್ಗಳನ್ನು ಕಳೆದುಕೊಂಡು 265 ರನ್ ಕಲೆಹಾಕಿದೆ. ಮಳೆಯಿಂದಾಗಿ ಮೂರನೇ ದಿನದಾಟವನ್ನು ಬೇಗನೇ ಅಂತ್ಯಗೊಳಿಸಲಾಯಿತು. ಮೂರನೇ ದಿನದಾಟದಂತ್ಯಕ್ಕೆ ಶ್ರೀಲಂಕಾ ಪರ ಲಹಿರು ಕುಮಾರ 8 ರನ್ ಮತ್ತು ಸೋನಲ್ ದಿನುಷಾ 85 ರನ್ ಬಾರಿಸಿ ಕ್ರೀಸ್ನಲ್ಲಿದ್ದಾರೆ. ಮೂರನೇ ದಿನ ಶ್ರೀಲಂಕಾ 257 ರನ್ ಕಲೆಹಾಕಲು 6 ವಿಕೆಟ್ಗಳನ್ನು ಕಳೆದುಕೊಂಡಿತು. ಶ್ರೀಲಂಕಾ ಒಟ್ಟು 83.4 ಓವರ್ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 265 ರನ್ ಕಲೆಹಾಕಿದೆ. ಪ್ರಸ್ತುತ ಭಾರತ 238 ರನ್ಗಳ ಮುನ್ನಡೆ ಸಾಧಿಸಿದ್ದು, ಫಾಲೋ-ಆನ್ ತಪ್ಪಿಸಲು ಶ್ರೀಲಂಕಾಕ್ಕೆ ಇನ್ನು 39 ರನ್ಗಳು ಬೇಕಾಗಿವೆ.
ಶ್ರೀಲಂಕಾಕ್ಕೆ ಕಳಪೆ ಆರಂಭ
ಎರಡನೇ ದಿನದಂದು 2 ವಿಕೆಟ್ ಕಳೆದುಕೊಂಡು 8 ರನ್ ಕಲೆಹಾಕಿದ್ದ ಶ್ರೀಲಂಕಾ ಇಲ್ಲಿಂದ ತನ್ನ ಮೂರನೇ ದಿನದ ಆಟವನ್ನು ಪ್ರಾರಂಭಿಸಿತು. ದಿನದ ಆರಂಭದಲ್ಲಿಯೇ ಆರಂಭಿಕ ಆಟಗಾರ ಸಮಿಲ್ ಮಿಶ್ರಾ ಅವರನ್ನು ಪ್ರಸಿದ್ಧ್ ಕೃಷ್ಣ 19 ರನ್ಗಳಿಗೆ ಔಟ್ ಮಾಡಿದರು. ಇದರೊಂದಿಗೆ, ಶ್ರೀಲಂಕಾ 35 ರನ್ಗಳಿಗೆ ಮೂರು ವಿಕೆಟ್ಗಳನ್ನು ಕಳೆದುಕೊಂಡಿತು. ಆ ಬಳಿಕ ಜೊತೆಯಾದ ಪಸಿಂದು ಸೂರ್ಯಬಂಡಾರ ಮತ್ತು ಕಮಿಂದು ಮೆಂಡಿಸ್ ನಾಲ್ಕನೇ ವಿಕೆಟ್ಗೆ 87 ರನ್ಗಳ ಜೊತೆಯಾಟ ನೀಡಿದರು. ಮತ್ತೆ ದಾಳಿಗಿಳಿದ ಪ್ರಸಿದ್ಧ್, ಮೆಂಡಿಸ್ ಅವರನ್ನು ಔಟ್ ಮಾಡುವ ಮೂಲಕ ಈ ಪಾಲುದಾರಿಕೆಯನ್ನು ಮುರಿದರು. ನಾಯಕ ಧನಂಜಯ ಡಿ ಸಿಲ್ವಾ ಕೂಡ 8 ರನ್ಗಳಿಗೆ ಮಾನವ್ ಸುತಾರ್ಗೆ ವಿಕೆಟ್ ಒಪ್ಪಿಸಿದರು.
ಸೂರ್ಯಬಂಡಾರ ಅರ್ಧಶತಕ
ಮೊದಲ ಟೆಸ್ಟ್ ಪಂದ್ಯದಲ್ಲಿ ದಿನೇಶ್ ಚಾಂಡಿಮಲ್ ಬದಲಿಗೆ ಕನ್ಕ್ಯುಶನ್ ಬದಲಿ ಆಟಗಾರನಾಗಿ ಆಡಿದ್ದ ಪಸಿಂದು ಸೂರ್ಯಬಂಡಾರ ಆ ಪಂದ್ಯದಲ್ಲಿ ಮೊದಲ ಎಸೆತದಲ್ಲೇ ಔಟಾಗಿದ್ದರು. ಆದಾಗ್ಯೂ, ಎರಡನೇ ಪಂದ್ಯದಲ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶಿಸಿದ ಪಸಿಂದು ಶ್ರೀಲಂಕಾವನ್ನು ಸಂಕಷ್ಟದಿಂದ ಪಾರು ಮಾಡಿದರು. ಸೂರ್ಯಬಂಡಾರ 133 ಎಸೆತಗಳಲ್ಲಿ 80 ರನ್ಗಳ ಇನ್ನಿಂಗ್ಸ್ ಆಡಿ ಜಡೇಜಾಗೆ ಬಲಿಯಾದರು. ಲಂಕಾ ಪರ ಅದ್ಭುತ ಫಾರ್ಮ್ನಲ್ಲಿರುವ ಸೋನಾಲ್ ದಿನುಷಾ ಮೊದಲ ಟೆಸ್ಟ್ ಪಂದ್ಯದ ಮೊದಲ ಇನ್ನಿಂಗ್ಸ್ನಲ್ಲಿ ಶತಕ ಬಾರಿಸಿದರೆ, ಎರಡನೇ ಇನ್ನಿಂಗ್ಸ್ನಲ್ಲಿ 84 ರನ್ಗಳ ಇನ್ನಿಂಗ್ಸ್ ಆಡಿದ್ದರು.
ಶತಕದ ಸಮೀಪದಲ್ಲಿ ಸೋನಾಲ್
ಇದೀಗ ಎರಡನೇ ಟೆಸ್ಟ್ನಲ್ಲೂ ತಮ್ಮ ಅತ್ಯುತ್ತಮ ಫಾರ್ಮ್ ಮುಂದುವರಿಸಿರುವ ದಿನುಷಾ ಶತಕದ ಸಮೀಪದಲಿದ್ದು, ತಂಡವನ್ನು ಫಾಲೋ-ಆನ್ನಿಂದ ರಕ್ಷಿಸಲು ಹೋರಾಟ ಮುಂದುವರೆಸಿದ್ದಾರೆ. ಮೂರನೇ ದಿನದ ಆಟದ ಅಂತ್ಯಕ್ಕೆ ಸೋನಾಲ್ 85 ರನ್ಗಳೊಂದಿಗೆ ಅಜೇಯರಾಗಿ ಉಳಿದಿದ್ದಾರೆ. ಭಾರತದ ಪರ ಪ್ರಸಿದ್ಧ್ ಕೃಷ್ಣ ಮತ್ತು ಮಾನವ್ ಸುತಾರ್ ಅದ್ಭುತ ಬೌಲಿಂಗ್ ಪ್ರದರ್ಶನ ನೀಡಿ ತಲಾ ಮೂರು ವಿಕೆಟ್ ಪಡೆದರೆ, ಮೊಹಮ್ಮದ್ ಸಿರಾಜ್ ಮತ್ತು ರವೀಂದ್ರ ಜಡೇಜಾ ತಲಾ 1 ವಿಕೆಟ್ ಪಡೆದಿದ್ದಾರೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 5:35 pm, Tue, 25 August 26
