SL vs AUS: 17 ಎಸೆತಗಳಲ್ಲಿ 4 ವಿಕೆಟ್, 5 ರನ್ ಟಾರ್ಗೆಟ್; ಲಂಕಾ ಎದುರು ಸುಲಭವಾಗಿ ಗೆದ್ದ ಆಸ್ಟ್ರೇಲಿಯಾ
SL vs AUS: ಮೂರನೇ ದಿನದಾಟದಲ್ಲಿ ಶ್ರೀಲಂಕಾ ಆಸ್ಟ್ರೇಲಿಯಕ್ಕೆ 5 ರನ್ಗಳ ಗುರಿಯನ್ನು ನೀಡಿತ್ತು, ಪ್ರವಾಸಿ ತಂಡವು ಯಾವುದೇ ನಷ್ಟವಿಲ್ಲದೆ ಅದನ್ನು ಸಾಧಿಸಿತು.
Updated on: Jul 01, 2022 | 2:24 PM
ಶ್ರೀಲಂಕಾ ವಿರುದ್ಧ ಗಾಲೆಯಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯವನ್ನು ಮೂರನೇ ದಿನವೇ ಆಸ್ಟ್ರೇಲಿಯಾ (Australia) 10 ವಿಕೆಟ್ಗಳಿಂದ ಗೆದ್ದಿದೆ. ಈ ಗೆಲುವಿನೊಂದಿಗೆ ಆಸ್ಟ್ರೇಲಿಯಾ ಎರಡು ಟೆಸ್ಟ್ಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ. ನಾಥನ್ ಲಿಯಾನ್ ಮತ್ತು ಟ್ರಾವಿಸ್ ಹೆಡ್ ( Nathan Lyon and Travis Head) ಆಸ್ಟ್ರೇಲಿಯಾದ ಗೆಲುವಿನಲ್ಲಿ ಮಿಂಚಿದರು, ಅವರ ಭಯಂಕರ ಬೌಲಿಂಗ್ ಮುಂದೆ, ಆತಿಥೇಯ ಬ್ಯಾಟ್ಸ್ಮನ್ಗಳು ಹೆಚ್ಚು ಕಾಲ ಕ್ರೀಸ್ನಲ್ಲಿ ಉಳಿಯಲು ಸಾಧ್ಯವಾಗಲಿಲ್ಲ. ಆಸ್ಟ್ರೇಲಿಯದ ಬೌಲರ್ ಹೆಡ್ ಶ್ರೀಲಂಕಾದ ಎರಡನೇ ಇನ್ನಿಂಗ್ಸ್ನಲ್ಲಿ 17 ಎಸೆತಗಳಲ್ಲಿ 10 ರನ್ ನೀಡಿ, 4 ವಿಕೆಟ್ಗಳನ್ನು ಕಬಳಿಸಿದರು. ಅದೇ ವೇಳೆ ನಾಥನ್ ಲಿಯಾನ್ 11 ಓವರ್ಗಳಲ್ಲಿ 31 ರನ್ ನೀಡಿ 4 ವಿಕೆಟ್ ಪಡೆದರು. ಟ್ರಾವಿಸ್ ಹೆಡ್ ಮೊದಲ ಓವರ್ನಲ್ಲಿಯೇ 2 ವಿಕೆಟ್ ಪಡೆದರು. ಆದರೆ 77 ರನ್ ಗಳಿಸಿದ ಕ್ಯಾಮರೂನ್ ಗ್ರೀನ್ (Cameron Green) ಪಂದ್ಯಶ್ರೇಷ್ಠರಾದರು.
ಟ್ರಾವಿಸ್ ಹೆಡ್ ಎದುರು ಅಸಹಾಯಕ ಶ್ರೀಲಂಕಾ ತಂಡ
ಮೂರನೇ ದಿನದಾಟದಲ್ಲಿ ಶ್ರೀಲಂಕಾ ಆಸ್ಟ್ರೇಲಿಯಕ್ಕೆ 5 ರನ್ಗಳ ಗುರಿಯನ್ನು ನೀಡಿತ್ತು, ಪ್ರವಾಸಿ ತಂಡವು ಯಾವುದೇ ನಷ್ಟವಿಲ್ಲದೆ ಅದನ್ನು ಸಾಧಿಸಿತು. ವಾಸ್ತವವಾಗಿ, ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ ಮೊದಲ ಇನ್ನಿಂಗ್ಸ್ ಅನ್ನು 212 ರನ್ಗಳಿಗೆ ಮುಗಿಸಿತು. ಆತಿಥೇಯ ಬ್ಯಾಟರ್ಗಳು ನಾಥನ್ ಲಿಯಾನ್ ಎದುರು ಅಸಹಾಯಕರಾಗಿ ಕಾಣುತ್ತಿದ್ದರು. ಮೊದಲ ಇನಿಂಗ್ಸ್ನಲ್ಲಿ ಲಯನ್ 5 ವಿಕೆಟ್ ಪಡೆದರು. ಇದಾದ ಬಳಿಕ ಆಸ್ಟ್ರೇಲಿಯ ಮೊದಲ ಇನಿಂಗ್ಸ್ನಲ್ಲಿ 321 ರನ್ ಗಳಿಸಿ ಮುನ್ನಡೆ ಸಾಧಿಸಿತ್ತು. ಗ್ರೀನ್ ಗರಿಷ್ಠ 77 ರನ್ ಗಳಿಸಿದರು. ಅದೇ ಸಮಯದಲ್ಲಿ ಆರಂಭಿಕ ಉಸ್ಮಾನ್ ಖವಾಜಾ 71 ರನ್ ಗಳಿಸಿದರು. ಮೊದಲ ಇನಿಂಗ್ಸ್ನಲ್ಲಿ 100ಕ್ಕೂ ಹೆಚ್ಚು ರನ್ಗಳ ಮುನ್ನಡೆಯಿಂದ ಉತ್ತೇಜಿತರಾದ ಆಸ್ಟ್ರೇಲಿಯದ ಬೌಲರ್ಗಳು ಮೂರನೇ ದಿನದಂದು ಶ್ರೀಲಂಕಾದ ಎರಡನೇ ಇನ್ನಿಂಗ್ಸ್ ಅನ್ನು 113 ರನ್ಗಳಿಗೆ ಆಲೌಟ್ ಮಾಡಿದರು. ಶ್ರೀಲಂಕಾ ತಂಡವು ಎರಡನೇ ಇನ್ನಿಂಗ್ಸ್ನಲ್ಲಿ ಹೆಡ್ ಬೌಲಿಂಗ್ ಮುಂದೆ ಅಸಹಾಯಕರಾದರು. ಕೇವಲ 5 ರನ್ ಟಾರ್ಗೆಟ್ ಪಡೆದ ಆಸ್ಟ್ರೇಲಿಯಾ 4 ಎಸೆತಗಳಲ್ಲಿ 5 ರನ್ಗಳ ಗುರಿಯನ್ನು ಸಾಧಿಸಿತು. ಡೇವಿಡ್ ವಾರ್ನರ್ 4 ಎಸೆತಗಳಲ್ಲಿ 10 ರನ್ ಗಳಿಸಿದರು. ಈ ಟೆಸ್ಟ್ ಪಂದ್ಯದಲ್ಲಿ ಶ್ರೀಲಂಕಾ ಈಗಾಗಲೇ ಏಂಜೆಲೊ ಮ್ಯಾಥ್ಯೂಸ್ ರೂಪದಲ್ಲಿ ದೊಡ್ಡ ಹಿನ್ನಡೆ ಅನುಭವಿಸಿದೆ.
ಇದನ್ನೂ ಓದಿ: IND vs ENG: ಅಂತಿಮ ಟೆಸ್ಟ್ಗೆ ಬುಮ್ರಾ ಕ್ಯಾಪ್ಟನ್! 35 ವರ್ಷಗಳ ನಂತರ ವೇಗದ ಬೌಲರ್ಗೆ ನಾಯಕತ್ವ
ಲಿಯಾನ್ ದಾಖಲೆ
ನಾಥನ್ ಲಿಯಾನ್ ಈ ಟೆಸ್ಟ್ ಪಂದ್ಯದಲ್ಲಿ ಒಟ್ಟು 9 ವಿಕೆಟ್ ಪಡೆದರು ಮತ್ತು ಇದರೊಂದಿಗೆ ಅವರು ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದ 10 ನೇ ಬೌಲರ್ ಎನಿಸಿಕೊಂಡರು. ಮುತ್ತಯ್ಯ ಮುರಳೀಧರನ್ 800 ವಿಕೆಟ್ಗಳೊಂದಿಗೆ ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದಾರೆ. ಲಯನ್ 436 ವಿಕೆಟ್ ಪಡೆದಿದ್ದಾರೆ. ಅವರು ಈ ಪಟ್ಟಿಯಲ್ಲಿ 9ನೇ ಶ್ರೇಯಾಂಕದ ಡೇಲ್ ಸ್ಟೇನ್ ಅವರನ್ನು ಸರಿಗಟ್ಟಲು ಕೇವಲ 3 ವಿಕೆಟ್ಗಳ ಹಿಂದೆ ಇದ್ದಾರೆ. ಶ್ರೀಲಂಕಾ ವಿರುದ್ಧದ ಎರಡನೇ ಟೆಸ್ಟ್ನಲ್ಲಿ ಅವರು ಸ್ಟೇನ್ ಅವರನ್ನು ಹಿಂದಿಕ್ಕಬಹುದು ಎಂದು ನಿರೀಕ್ಷಿಸಲಾಗಿದೆ.
