3 ವರ್ಷಗಳ ಅಜೇಯ ಓಟಕ್ಕೆ ಬ್ರೇಕ್; ಐರ್ಲೆಂಡ್ನಿಂದಲೇ ಆರಂಭ ಐರ್ಲೆಂಡ್ನಲ್ಲೇ ಅಂತ್ಯ

India's T20 Unbeaten Streak Ends: ಐರ್ಲೆಂಡ್ನಿಂದಲೇ ಆರಂಭ ಐರ್ಲೆಂಡ್ನಲ್ಲೇ ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಟೀಂ ಇಂಡಿಯಾದ 3 ವರ್ಷಗಳ ಅಜೇಯ ಓಟಕ್ಕೆ ಐರ್ಲೆಂಡ್ ಅಂತ್ಯ ಹಾಡಿದೆ. 2-0 ಅಂತರದಿಂದ ಸರಣಿ ಸೋಲು ಕಂಡ ಭಾರತದ ಐತಿಹಾಸಿಕ ಯಶಸ್ಸಿನ ಓಟವು ಕೊನೆಗೊಂಡಿತು. ಕುತೂಹಲಕಾರಿಯಾಗಿ, ಈ ಅಜೇಯ ಓಟವು 2023 ರಲ್ಲಿ ಐರ್ಲೆಂಡ್ ವಿರುದ್ಧವೇ ಪ್ರಾರಂಭವಾಗಿ ಇದೀಗ ಅವರ ನೆಲದಲ್ಲಿಯೇ ಅಂತ್ಯಗೊಂಡಿದೆ. ಇದು ಭಾರತದ ಕ್ರಿಕೆಟ್ ಇತಿಹಾಸದಲ್ಲಿ ಒಂದು ಪ್ರಮುಖ ತಿರುವು.

Team India

ಪೃಥ್ವಿಶಂಕರ |
Updated on: Jun 29, 2026 | 7:47 PM

ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಟೀಂ ಇಂಡಿಯಾದ (Team India) ಅಜೇಯ ಓಟ ಕೊನೆಗೂ ಅಂತ್ಯಗೊಂಡಿದೆ. ಟಿ20 ಸರಣಿಯಲ್ಲಿ ಭಾರತವನ್ನು 2-0 ಅಂತರದಿಂದ ಸೋಲಿಸುವ ಮೂಲಕ ಐರಿಶ್ (India vs Ireland) ತಂಡವು ತಮ್ಮ ತವರು ನೆಲದಲ್ಲಿ ಇತಿಹಾಸ ನಿರ್ಮಿಸಿದೆ. ಈ ಸೋಲಿನೊಂದಿಗೆ, ಕಳೆದ 3 ವರ್ಷಗಳಿಂದ ಟಿ20 ಸರಣಿಯಲ್ಲಿ ಸೋಲಿಲ್ಲದ ಸರದಾರನಂತೆ ಮೆರೆಯುತ್ತಿದ್ದ ಟೀಂ ಇಂಡಿಯಾದ ಅಜೇಯ ಓಟಕ್ಕೆ ಅಂತ್ಯ ಸಿಕ್ಕಿದೆ. ಇಲ್ಲಿ ಗಮನಿಸಬೇಕಾದ ಆಸಕ್ತಿದಾಯಕ ಮತ್ತು ವಿಶಿಷ್ಟ ಕಾಕತಾಳೀಯವೆಂದರೆ ಭಾರತದ ಈ ಐತಿಹಾಸಿಕ ಅಜೇಯ ಓಟವು 2023 ರಲ್ಲಿ ಇದೇ ಐರ್ಲೆಂಡ್ ತಂಡವನ್ನು ಸೋಲಿಸುವ ಮೂಲಕ ಪ್ರಾರಂಭವಾಗಿತ್ತು. ಇದೀಗ ಮೂರು ವರ್ಷಗಳ ನಂತರ ಇದೇ ಐರ್ಲೆಂಡ್ ನೆಲದಲ್ಲೇ ಅಂತ್ಯಗೊಂಡಿದೆ.

ಐರ್ಲೆಂಡ್‌ನಿಂದಲೇ ಪ್ರಾರಂಭ

ಭಾರತ ತಂಡವು ತನ್ನ ಕೊನೆಯ 16 ಟಿ20 ಅಂತರರಾಷ್ಟ್ರೀಯ ಪಂದ್ಯಾವಳಿಗಳಲ್ಲಿ (ಸರಣಿಗಳು ಮತ್ತು ಪ್ರಮುಖ ಪಂದ್ಯಾವಳಿಗಳು) ಪ್ರಾಬಲ್ಯ ಸಾಧಿಸಿತ್ತು. ಈ ಅವಧಿಯಲ್ಲಿ, ಭಾರತ ಎರಡು ಬಾರಿ ಟಿ20 ವಿಶ್ವಕಪ್ ಮತ್ತು ಒಂದು ಬಾರಿ ಏಷ್ಯಾಕಪ್ ಗೆದ್ದಿತ್ತು. ಹಾಗೆಯೇ ಏಷ್ಯನ್ ಗೇಮ್ಸ್ನಲ್ಲಿ ಚಿನ್ನದ ಪದಕವನ್ನು ಗೆದ್ದಿತ್ತು. ಈ ಮೂಲಕ 2023 ರ ಆಗಸ್ಟ್ನಿಂದ ಸತತ 16 ಅಂತರರಾಷ್ಟ್ರೀಯ ಟಿ20 ಪಂದ್ಯಾವಳಿಗಳಲ್ಲಿ ಅಜೇಯ ದಾಖಲೆ ಮಾಡಿತ್ತು. 2023 ರಲ್ಲಿ ಟೀಂ ಇಂಡಿಯಾ ಜಸ್ಪ್ರೀತ್ ಬುಮ್ರಾ ನಾಯಕತ್ವದಲ್ಲಿ ಐರ್ಲೆಂಡ್ ಪ್ರವಾಸ ಮಾಡಿತ್ತು. ಆ ಎರಡು ಪಂದ್ಯಗಳ ಸರಣಿಯನ್ನು ಭಾರತ 2-0 ಅಂತರದಿಂದ ಗೆದ್ದುಕೊಂಡಿತ್ತು.

ಐರ್ಲೆಂಡ್ನಲ್ಲೇ ಅಂತ್ಯ

ಇದಾದ ನಂತರ, ಟೀಂ ಇಂಡಿಯಾ ಯಾವುದೇ ಟಿ20 ಸರಣಿಯಲ್ಲಿ ಸೋಲನ್ನು ಎದುರಿಸಿರಲಿಲ್ಲ. ಈ ಅವಧಿಯಲ್ಲಿ, ಭಾರತ 2023 ರ ಏಷ್ಯನ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕ ಗೆದ್ದಿತು, 2024 ರ ಟಿ20 ವಿಶ್ವಕಪ್ ಗೆದ್ದಿತು ಮತ್ತು ನಂತರ 2026 ರ ಟಿ20 ವಿಶ್ವಕಪ್ ಅನ್ನು ತನ್ನದಾಗಿಸಿಕೊಂಡಿತು. ಈ ಮೂರು ವರ್ಷಗಳಲ್ಲಿ, ಟೀಂ ಇಂಡಿಯಾ ಒಟ್ಟು 73 ಟಿ20 ಪಂದ್ಯಗಳನ್ನು ಆಡಿದೆ, ಆದರೆ ಯಾವುದೇ ತಂಡಕ್ಕೂ ಭಾರತವನ್ನು ಸರಣಿಯಲ್ಲಿ ಸೋಲಿಸಲು ಸಾಧ್ಯವಾಗಿರಲಿಲ್ಲ. ಈ 17 ಸರಣಿಗಳಲ್ಲಿ, ಕೇವಲ ಒಂದು ಸರಣಿ ಮಾತ್ರ ಡ್ರಾದಲ್ಲಿ ಕೊನೆಗೊಂಡಿತ್ತು. ಆದರೆ ಈಗ, ಐರಿಶ್ ನೆಲದಲ್ಲಿ ಅಜೇಯ ಸರಣಿ ಗೆಲುವಿನ ಓಟಕ್ಕೆ ಬ್ರೇಕ್ ಬಿದ್ದಿದೆ.