ಚಾಂಪಿಯನ್ ಪಟ್ಟಕ್ಕಾಗಿ ಕೊನೆಯ ನಾಲ್ಕು ಪಂದ್ಯಗಳು ನಾಳಿನಿಂದ | Last 4 matches will decide the winner of IPL 2020

ಬರೋಬ್ಬರಿ 46 ದಿನಗಳ ಲೀಗ್ ಹಂತ ಮತ್ತು 56 ಮೈನವಿರೇಳಿಸಿದ ಪಂದ್ಯಗಳ ನಂತರ ಇಂಡಿಯನ್ ಪ್ರಿಮೀಯರ್ ಲೀಗ್ 13ನೇ ಅವೃತ್ತಿ ಪ್ಲೇ ಆಫ್ ಹಂತ ತಲುಪಿದೆ. ನಾಲ್ಕು ಬಾರಿ ಚಾಂಪಿಯನ್​ಶಿಪ್ ಗೆದ್ದಿರುವ ಮುಂಬೈ ಇಂಡಿಯನ್ಸ್, ಇನ್ನೂ ಪ್ರಶಸ್ತಿ ಗೆಲ್ಲಬೇಕಿರುವ ಡೆಲ್ಲಿ ಕ್ಯಾಪಿಟಲ್ಸ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಮತ್ತು ಒಮ್ಮೆ ಚಾಂಪಿಯನ್ ಪಟ್ಟ ಧರಿಸಿರುವ ಹೈದರಾಬಾದ್ (2009ರಲ್ಲಿ ಡೆಕ್ಕನ್ ಚಾರ್ಜರ್ಸ್ ಚಾಂಪಿಯನ್​ಶಿಪ್ ಗೆದ್ದಿತ್ತು) ನಿರ್ಣಾಯಕ ಹಂತವನ್ನು ತಲುಪಿವೆ. ಮುಂಬೈ ಮತ್ತು ಡೆಲ್ಲಿ ಕ್ರಮವಾಗಿ 18 ಮತ್ತು 16 ಅಂಕಗಳೊಂದಿಗೆ ಮೊದಲಿನೆರಡು ಸ್ಥಾನ ಗಿಟ್ಟಿಸಿದರೆ, ಮಂಗಳವಾರ ನಡೆದ ಕೊನೆಯ ಲೀಗ್ ಪಂದ್ಯದಲ್ಲಿ ಮುಂಬೈಯನ್ನು 10 ವಿಕೆಟ್​ಗಳ ಭಾರಿ ಅಂತರದಿಂದ ಸೋಲಿಸಿ ತನ್ನ ನೆಟ್​ ರನ್​ರೇಟ್ ಉತ್ತಮಪಡಿಸಿಕೊಂಡ ಹೈದರಾಬಾದ್ ಮೂರನೇ ಸ್ಥಾನದೊಂದಿಗೆ ಅರ್ಹತೆ ಪಡೆಯಿತು ಮತ್ತು ಹೈದರಾಬಾದ್​ನಷ್ಟೇ ಅಂಕ ಪಡೆದರೂ ನೆಟ್ ರನ್​ರೇಟ್​ನಲ್ಲಿ ಕೊಂಚ ಹಿಂದಿದ್ದ ಬೆಂಗಳೂರು ನಾಲ್ಕನೇ ತಂಡವಾಗಿ ಪ್ರವೇಶ ಪಡೆಯಿತು.

ಪ್ಲೇ ಆಫ್ ಹಂತದಲ್ಲಿ ಈಗ ನಾಲ್ಕು ಪಂದ್ಯಗಳು ನಡೆಯಲಿವೆ. ಕ್ವಾಲಿಫೈಯರ್ 1, ಎಲಿಮಿನೇಟರ್, ಕ್ವಾಲಿಫೈಯರ್ 2 ಮತ್ತು ಫೈನಲ್.

ಮೊದಲ ಕ್ವಾಲಿಫೈಯರ್ ಪಂದ್ಯದಲ್ಲಿ ಟಾಪ್ ಎರಡು ತಂಡಗಳು ಅಂದರೆ, ಮುಂಬೈ ಮತ್ತು ಡೆಲ್ಲಿ ನವೆಂಬರ್ 5ರಂದು ಅಂದರೆ ನಾಳೆ (ಗುರುವಾರ) ದುಬೈ ಇಂಟರ್​ನ್ಯಾಶನಲ್ ಸ್ಟೇಡಿಯಂನಲ್ಲಿ ಸೆಣಸಲಿವೆ. ಈ ಪಂದ್ಯದಲ್ಲಿ ಗೆಲ್ಲುವ ಟೀಮು ಫೈನಲ್ ತಲುಪುತ್ತದೆ. ಸೋಲುವ ತಂಡ ಟೂರ್ನಿಯಿಂದೇನೂ ನಿರ್ಗಮಿಸುವುದಿಲ್ಲ. ಎಲಿಮಿನೇಟರ್ ಪಂದ್ಯದಲ್ಲಿ ಗೆಲ್ಲುವ ತಂಡದೊಂದಿಗೆ ಆಡಿ ಫೈನಲ್​ಗೆ ಅರ್ಹತೆ ಗಿಟ್ಟಿಸುವ ಮತ್ತೊಂದು ಅವಕಾಶ ಅದಕ್ಕೆ ಸಿಗುತ್ತದೆ. ಎಲಿಮಿನೇಟರ್ ಪಂದ್ಯ ಪಾಯಿಂಟ್ಸ್ ಟೇಬಲ್​ನಲ್ಲಿ 3ಮತ್ತು 4 ನೇ ಸ್ಥಾನ ಪಡೆದ ಹೈದರಾಬಾದ ಮತ್ತು ಬೆಂಗಳೂರು ನಡುವೆ ನವೆಂಬರ್ 6ರಂದು (ಶುಕ್ರವಾರ) ಅಬು ಧಾಬಿಯ ಶೇಖ್ ಜಾಯೆದ್ ಮೈದಾನದಲ್ಲಿ ನಡೆಯಲಿದೆ. ಸದರಿ ಪಂದ್ಯದಲ್ಲಿ ಗೆಲ್ಲುವ ಟೀಮು ಕ್ವಾಲಿಫೈಯರ್ 2 ರಲ್ಲಿ ಆಡುವ ಅರ್ಹತೆ ಗಿಟ್ಟಿಸಿಕೊಳ್ಳುತ್ತದೆ. ಸೋಲುವ ತಂಡ ಟೂರ್ನಿಯಿಂದ ನಿರ್ಗಮಿಸುತ್ತದೆ.

ಅಂದಹಾಗೆ, ಕ್ವಾಲಿಫೈಯರ್ 2ರಲ್ಲಿ ಕ್ವಾಲಿಫೈಯರ್ 1ರಲ್ಲಿ ಸೋತ ಮತ್ತು ಎಲಿಮಿನೇಟರ್​ನಲ್ಲಿ ಗೆದ್ದ ತಂಡಗಳು ಫೈನಲ್​ನಲ್ಲಿ ಆಡುವ ಅರ್ಹತೆ ಗಿಟ್ಟಿಸಲು ಹೋರಾಡುತ್ತವೆ. ಈ ಪಂದ್ಯ ಅಬು ಧಾಬಿಯಲ್ಲಿ ನವೆಂಬರ್ 8 ರಂದು ನಡೆಯಲಿದ್ದು ಸೋಲುವ ತಂಡ ಟೂರ್ನಿಯಿಂದ ಹೊರಬೀಳುತ್ತದೆ.

ಕ್ವಾಲಿಫೈಯರ್ 2ರಲ್ಲಿ ಗೆಲ್ಲುವ ಟೀಮು, ಅದಾಗಲೇ ಕ್ವಾಲಿಫೈಯರ್ 1 ರಲ್ಲಿ ಗೆದ್ದು ಫೈನಲ್ ಪ್ರವೇಶಿದ ಟೀಮಿನೊಂದಿಗೆ ಐಪಿಎಲ್ 2020 ಕಿರೀಟ ಧರಿಸಲು ಸೆಣಸುತ್ತದೆ. ಈ ಸೀಸನ್​ನ ಕಟ್ಟಕಡೆಯ ಪಂದ್ಯ ನವೆಂಬರ್ 10 ರಂದು ದುಬೈಯಲ್ಲಿ ನಡೆಯಲಿದೆ.

ಅಂದಹಾಗೆ, ಲೀಗ್ ಹಂತದ ಟಾಪ್ ಪರ್ಫಾರ್ಮರ್​ಗಳ ಸಾಧನೆಯನ್ನು ಒಮ್ಮೆ ನೋಡೋಣ.

14 ಪಂದ್ಯಗಳಿಂದ 670 ರನ್ ಗಳಿಸಿದ ಕಿಂಗ್ಸ್ ಇಲೆವೆನ್ ಪಂಜಾಬ್ ನಾಯಕ ಕೆ ಎಲ್ ರಾಹುಲ್ ಆರೇಂಜ್ ಕ್ಯಾಪಿನ ಒಡೆಯರಾದರು. ಹೈದರಾಬಾದ್​ನ ಡೇವಿಡ್ ವಾರ್ನರ್ 14 ಪಂದ್ಯಗಳಿಂದ 529, ಡೆಲ್ಲಿ ಕ್ಯಾಪಿಟಲ್ಸ್​ನ ಶಿಖರ್ ಧವನ್ 525 (14), ಆರ್​ಸಿಬಿಯ ದೇವದತ್ ಪಡಿಕ್ಕಲ್ 472 (14), ಆರ್​ಸಿಬಿಯ ವಿರಾಟ್ ಕೊಹ್ಲಿ 460 (14), ಚೆನೈ ಸೂಪರ್ ಕಿಂಗ್ಸ್​ನ ಫಫ್ ಡು ಪ್ಲೆಸ್ಸಿ 449 (13), ಮುಂಬೈನ ಕ್ವಿಂಟನ್ ಡಿ ಕಾಕ್ 443 (14), ಕೆಕೆಆರ್​ನ ಶುಬ್​ಮನ್ ಗಿಲ್ 440 (14), ಮುಂಬೈನ ಇಶಾನ್ ಕಿಷನ್ 428 (12) ಮತ್ತು ಪಂಜಾಬ್​ನ ಮಾಯಾಂಕ್ ಅಗರ್​ವಾಲ್ 424 (11) ಗಳಿಸಿ ಟಾಪ್ ಸ್ಕೋರರ್​ಗಳೆನಿಸಿಕೊಂಡರು.

ಬೌಲರ್​ಗಳ ಪೈಕಿ 14 ಪಂದ್ಯಗಳಿಂದ 25 ವಿಕೆಟ್ ಪಡೆದ ಡೆಲ್ಲಿಯ ಕಗಿಸೊ ರಬಾಡ ಪರ್ಪಲ್ ಕ್ಯಾಪ್ ತಮ್ಮದಾಗಿಸಿಕೊಂಡರು. ಉಳಿದಂತೆ, ಮುಂಬೈನ ಜಸ್ಪ್ರೀತ್ ಬುಮ್ರಾ 23 (13), ಅವರ ಜೊತೆಗಾರ ಟ್ರೆಂಟ್ ಬೌಲ್ಟ್ 20 (13), ಆರ್​ಸಿಬಿಯ ಯುಜ್ವೇಂದ್ರ ಚಹಲ್ 20 (14), ಪಂಜಾಬ್​ನ ಮೊಹಮ್ಮದ್ ಶಮಿ 20 (14), ರಾಜಸ್ತಾನ್ ರಾಯಲ್ಸ್​ನ ಜೊಫ್ರಾ ಆರ್ಚರ್ 20 (14), ಡೆಲ್ಲಿಯ ಌನ್ರಿಖ್ ನೊರ್ಕಿಯ 19 (13), ಹೈದರಾಬಾದ್​ನ ರಶೀದ್ ಖಾನ್ 19 (14), ಕೆಕೆಆರ್​ನ ವರುಣ್ ಚಕ್ರವರ್ತಿ 17 (13) ಮತ್ತು ಮುಂಬೈನ ದೀಪಕ್ ಚಹರ್ 15 (14) ವಿಕೆಟ್​ಗಳನ್ನು ಪಡೆದು ಬೌಲಿಂಗ್​ನಲ್ಲಿ ಮಿಂಚಿದರು.