Novak Djokovic: ಫ್ರೆಂಚ್ ಓಪನ್ನಿಂದ ಹಿಂದೆ ಸರಿದ ನೊವಾಕ್ ಜೊಕೊವಿಚ್
Novak Djokovic: ಸರ್ಬಿಯಾದ 37 ವರ್ಷದ ಟೆನ್ನಿಸ್ ತಾರೆ ನೊವಾಕ್ ಜೊಕೊವಿಚ್ ಈವರೆಗೆ 24 ಗ್ರ್ಯಾಂಡ್ ಸ್ಲಾಂ ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ. ಈ ಹಿಂದೆ 22 ಗ್ರ್ಯಾಂಡ ಸ್ಲಾಂ ಗೆದ್ದು ಇತಿಹಾಸ ನಿರ್ಮಿಸಿದ್ದ ರೋಜರ್ ಫೆಡರರ್ ಅವರ ದಾಖಲೆಯನ್ನು ಮುರಿಯುವ ಮೂಲಕ ಜೊಕೊವಿಚ್ ಈ ಐತಿಹಾಸಿಕ ಸಾಧನೆ ಮಾಡಿರುವುದು ವಿಶೇಷ.
Updated on: Jun 05, 2024 | 7:50 AM
ಹಾಲಿ ಚಾಂಪಿಯನ್ ನೊವಾಕ್ ಜೊಕೊವಿಚ್ (Novak Djokovic) ಪ್ರಸ್ತುತ ಫ್ರೆಂಚ್ ಓಪನ್ ಟೆನ್ನಿಸ್ ಟೂರ್ನಿಯಿಂದ ಹಿಂದೆ ಸರಿದಿದ್ದಾರೆ. ಪ್ರೀ ಕ್ವಾರ್ಟರ್ ಫೈನಲ್ ಪಂದ್ಯದ ವೇಳೆ ಗಾಯಗೊಂಡಿದ್ದ ಜೊಕೊವಿಚ್ ಕ್ವಾರ್ಟರ್ ಫೈನಲ್ಗೂ ಮುನ್ನ ತಮ್ಮ ನಿರ್ಧಾರ ಪ್ರಕಟಿಸಿದ್ದಾರೆ. ಅದರಂತೆ ಇದೀಗ ಕ್ವಾರ್ಟರ್ ಫೈನಲ್ನಲ್ಲಿ ವಾಕ್ಓವರ್ ಪಡೆದಿರುವ ಕ್ಯಾಸ್ಪರ್ ರೂಡ್ ನೇರವಾಗಿ ಸೆಮಿಫೈನಲ್ಗೆ ಪ್ರವೇಶಿಸಿದ್ದಾರೆ.
ಇದಕ್ಕೂ ಮುನ್ನ ನಡೆದ ಫ್ರಾನ್ಸಿಸ್ಕೊ ಸೆರುಂಡೊಲೊ ವಿರುದ್ಧದ ಪಂದ್ಯದ ವೇಳೆ ಜೊಕೊವಿಚ್ ಗಾಯಗೊಂಡಿದ್ದರು. ರಣರೋಚಕ ಹೋರಾಟಕ್ಕೆ ಸಾಕ್ಷಿಯಾಗಿದ್ದ ಪ್ರೀ ಕ್ವಾರ್ಟರ್ನಲ್ಲಿ ನೊವಾಕ್ ಜೊಕೊವಿಚ್ ನೋವಿನ ನಡುವೆಯೂ ಪಂದ್ಯವನ್ನು ಪೂರ್ಣಗೊಳಿಸಿದ್ದರು.
ಈ ಪಂದ್ಯದ ಮೊದಲ ಸುತ್ತಿನಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದ ನೊವಾಕ್ ಜೊಕೊವಿಚ್ 6-1 ಅಂತರದಿಂದ ಸೆಟ್ ಗೆದ್ದಿದ್ದರು. ಆದರೆ ದ್ವಿತೀಯ ಸುತ್ತಿನಲ್ಲಿ ಸೆರುಂಡೊಲೊ ಕಂಬ್ಯಾಕ್ ಮಾಡಿದರು. ಅಲ್ಲದೆ 5-7 ಅಂತರದಿಂದ ಸೆಟ್ ಗೆಲ್ಲುವಲ್ಲಿ ಯಶಸ್ವಿಯಾದರು. ಇನ್ನು ಮೂರನೇ ಸುತ್ತಿನ ವೇಳೆ ನೊವಾಕ್ ಮೊಣಕಾಲಿನ ನೋವಿಗೆ ಒಳಗಾಗಿದ್ದರು. ಇದಾಗ್ಯೂ ಪಂದ್ಯ ಮುಂದುವರೆಸಿದ್ದ ಸರ್ಬಿಯನ್ ತಾರೆ 3-6 ಅಂತರದಿಂದ ಸೋಲನುಭವಿಸಿದರು.
ಆದರೆ ನಾಲ್ಕನೇ ಸುತ್ತಿನಲ್ಲಿ ಮತ್ತೆ ತಮ್ಮ ಅನುಭವವನ್ನು ಧಾರೆಯೆರೆಯುವ ಮೂಲಕ 7-5 ಅಂತರದಿಂದ ಗೆದ್ದರು. ಹಾಗೆಯೇ ಕೊನೆಯ ಸುತ್ತಿನಲ್ಲಿ 6-3 ಅಂತರದಿಂದ ಸೆರುಂಡೊಲೊ ಅವರನ್ನು ಬಗ್ಗು ಬಡಿದು ನೊವಾಕ್ ಜೊಕೊವಿಚ್ ಕ್ವಾರ್ಟರ್ ಫೈನಲ್ಗೆ ಪ್ರವೇಶಿಸಿದ್ದರು.
ಈ ಪಂದ್ಯದ ವೇಳೆ ಮೊಣಕಾಲಿನ ನೋವಿಗೆ ತುತ್ತಾಗಿದ್ದರಿಂದ ನೊವಾಕ್ ಜೊಕೊವಿಚ್ ಹೆಚ್ಚಿನ ವಿಶ್ರಾಂತಿ ಪಡೆದಿದ್ದರು. ಅಲ್ಲದೆ ಈ ಪಂದ್ಯದ ಬಳಿಕ ಸ್ಕ್ಯಾನಿಂಗ್ಗೆ ಒಳಗಾಗಿದ್ದು, ಈ ವೇಳೆ ಮೊಣಕಾಲಿನ ಮಧ್ಯದ ಚಂದ್ರಾಕೃತಿಯಲ್ಲಿ ಗಾಯವಾಗಿರುವುದು ಕಂಡು ಬಂದಿದೆ. ಹೀಗಾಗಿ ಹೆಚ್ಚಿನ ವಿಶ್ರಾಂತಿ ಪಡೆಯುವಂತೆ ವೈದ್ಯರು ಸೂಚಿಸಿದ್ದಾರೆ. ಅದರಂತೆ ಇದೀಗ ನೊವಾಕ್ ಜೊಕೊವಿಚ್ ಪ್ರತಿಷ್ಠಿತ ಫ್ರೆಂಚ್ ಓಪನ್ ಟೆನ್ನಿಸ್ ಟೂರ್ನಿಯಿಂದ ಹಿಂದೆ ಸರಿದಿದ್ದಾರೆ.
ಇದನ್ನೂ ಓದಿ: ಅಲ್ಕರಾಝ್ ವಿರುದ್ಧ ಸೋಲಿನ ಸೇಡು ತೀರಿಸಿಕೊಂಡ ಜೊಕೊವಿಚ್
ಕೋರ್ಟ್ನಲ್ಲಿನ ಜಾರುತ್ತಿದ್ದ ಮೇಲ್ಮೈಯಿಂದಾಗಿ ನಾನು ಗಾಯಗೊಂಡಿದ್ದೇನೆ ಎಂದು ಜೊಕೊವಿಚ್ ಆರೋಪಿಸಿದ್ದಾರೆ. ಪ್ರತಿ ಹಂತದಲ್ಲೂ ನಾನು ಜಾರುತ್ತಿದ್ದೆ. ಇಂತಹ ಅನಿರೀಕ್ಷಿತ ಜಾರುವಿಕೆಯಿಂದಾಗಿ ನನ್ನ ಮೊಣಕಾಲಿಗೆ ಗಾಯವಾಗಿದೆ ಎಂದು ಸರ್ಬಿಯನ್ ತಾರೆ ಕೋರ್ಟ್ನ ಮೇಲ್ಮೈ ಸ್ಥಿತಿಯ ಬಗ್ಗೆ ಪಂದ್ಯಾವಳಿಯ ಪ್ರಾಧಿಕಾರಕ್ಕೆ ದೂರು ನೀಡಿದ್ದಾರೆ.
ನೊವಾಕ್ ಜೊಕೊವಿಚ್ ವಿಡಿಯೋ:
That winning feeling – 370th Grand Slam match win edition 🙌#RolandGarros pic.twitter.com/lGhRTD9Ugf
— Roland-Garros (@rolandgarros) June 3, 2024
ದಾಖಲೆ ಬರೆದ ನೊವಾಕ್:
ನೊವಾಕ್ ಜೊಕೊವಿಚ್ ಈವರೆಗೆ 370 ಗ್ರ್ಯಾಂಡ್ ಸ್ಲಾಂ ಪಂದ್ಯಗಳನ್ನು ಗೆದ್ದಿದ್ದಾರೆ. ಈ ಬಾರಿಯ ಫ್ರೆಂಚ್ ಓಪನ್ನ ಪ್ರೀ ಕ್ವಾರ್ಟರ್ ಫೈನಲ್ನಲ್ಲಿ ಜಯ ಸಾಧಿಸುವ ಮೂಲಕ ಅತೀ ಹೆಚ್ಚು ಗ್ರ್ಯಾಂಡ್ ಸ್ಲಾಂ ಪಂದ್ಯಗಳನ್ನು ಗೆದ್ದ ದಾಖಲೆ ನಿರ್ಮಿಸಿದ್ದಾರೆ. ಇದಕ್ಕೂ ಮುನ್ನ ಈ ದಾಖಲೆ ರೋಜರ್ ಫೆಡರರ್ (369) ಹೆಸರಿನಲ್ಲಿತ್ತು. ಇದೀಗ ಈ ದಾಖಲೆಯೊಂದಿಗೆ ನೊವಾಕ್ ಈ ಬಾರಿಯ ಫ್ರೆಂಚ್ ಓಪನ್ನಿಂದ ಹಿಂದೆ ಸರಿದಿದ್ದಾರೆ.
