Viral: ಅಂಕಲ್‌ ಎಂದು ಕರೆದ ಬಟ್ಟೆ ಅಂಗಡಿಯವನಿಗೆ ಥಳಿಸಿದ ಗ್ರಾಹಕ
ಈ ಸಮಾಜದಲ್ಲಿ ಒಂದು ಚಿತ್ರವಿಚಿತ್ರ ಘಟನೆಗಳು ನಡೆಯುತ್ತಲೇ ಇರುತ್ತವೆ. ಇದನ್ನೆಲ್ಲಾ ನೋಡಿದಾಗ ಕೆಲವು ಬಾರಿ ನಮಗೆಯೇ ಶಾಕ್‌ ಆಗುತ್ತದೆ. ಇದೀಗ ಅಂತಹದ್ದೇ ಘಟನೆಯೊಂದು ನಡೆದಿದ್ದು, ಹೆಂಡತಿಯೊಂದಿಗೆ ಸೀರೆ ಖರೀದಿಸಲು ಬಂದ ಸಂದರ್ಭದಲ್ಲಿ ಬಟ್ಟೆ ಅಂಗಡಿಯವ ತನ್ನನ್ನು ಅಂಕಲ್‌ ಎಂದು ಸಂಭೋಧಿಸಿದನೆಂದು ಕೋಪಗೊಂಡ ವ್ಯಕ್ತಿಯೊಬ್ಬ ಅಂಗಡಿಯವನಿಗೆ ಹಿಗ್ಗಾಮುಗ್ಗಾ ಥಳಿಸಿದ್ದಾನೆ. ಈ ಕುರಿತ ವಿಡಿಯೋ ಇದೀಗ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ.
Updated on: Nov 04, 2024 | 10:25 AM
ಸಾಮಾನ್ಯವಾಗಿ ಎಲ್ಲರೂ ವಯಸ್ಸಿನಲ್ಲಿ ತಮಗಿಂತ ಹಿರಿಯರು ಯಾರಿರುತ್ತಾರೋ ಅವರನ್ನು ಅಂಕಲ್‌, ಆಂಟಿ ಅಥವಾ ಅಕ್ಕ, ಅಣ್ಣ ಎಂದು ಸಂಭೋಧಿಸುತ್ತಾರೆ. ಆದ್ರೆ ಕೆಲ ಮಹಿಳೆಯರಿಗೆ ತಮ್ಮನ್ನು ಆಂಟಿ ಎಂದ್ರೆ ಕೋಪ ಬರುತ್ತೆ. ಅದೇ ರೀತಿ ಇಲ್ಲೊಬ್ಬ ವ್ಯಕ್ತಿಗೆ ತನ್ನನ್ನು ಅಂಕಲ್‌ ಎಂದು ಕರೆದಿದ್ದಕ್ಕೆ ಕೋಪ ಬಂದಿದೆ. ಹೌದು ವ್ಯಕ್ತಿಯೊಬ್ಬ ತನ್ನ ಹೆಂಡತಿಯ ಜೊತೆ ಸೀರೆ ಖರೀದಿಸಿಲು ಹೋದ ಸಂದರ್ಭದಲ್ಲಿ ಆ ಬಟ್ಟೆ ಅಂಗಡಿಯವನು ಆತನನ್ನು ಅಂಕಲ್‌ ಎಂದು ಸಂಭೋಧಿಸಿದನೆಂದು ಕೋಪಗೊಂಡ ಆ ವ್ಯಕ್ತಿ, ಅಂಗಡಿಯವನಿಗೆ ತನ್ನ ಸ್ನೇಹಿತರ ಜೊತೆಗೂಡಿ ಹಿಗ್ಗಾಮುಗ್ಗಾ ಥಳಿಸಿದ್ದಾನೆ. ಈ ವಿಡಿಯೋ ಇದೀಗ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಈ ಘಟನೆ ಮಧ್ಯಪ್ರದೇಶದ ಭೋಪಾಲ್‌ನಲ್ಲಿ ನಡೆದಿದ್ದು, ವ್ಯಕ್ತಿಯೊಬ್ಬ ತನ್ನನ್ನು ತನ್ನ ಹೆಂಡತಿಯ ಮುಂದೆ ಬಟ್ಟೆ ಅಂಗಡಿಯವನು ಅಂಕಲ್‌ ಎಂದು ಕರೆದನೆಂದು ಕೋಪದಿಂದ ಆತನ ಮೇಲೆ ಹಲ್ಲೆ ನಡೆಸಿದ್ದಾನೆ. ಇಲ್ಲಿನ ಬಟ್ಟೆ ಅಂಗಡಿಯ ವಿಶಾಲ್‌ ಎಂಬಾತ ತನ್ನ ಅಂಗಡಿಗೆ ಸೀರೆ ಖರೀದಿಸಲು ಬಂದ ಗ್ರಾಹಕ ರೋಹಿತ್‌ನನ್ನು ಅಂಕಲ್‌ ಎಂದು ಸಂಭೋಧಿಸಿದ್ದನು. ತನ್ನ ಹೆಂಡತಿಯ ಮುಂದೆಯೇ ನನ್ನನ್ನು ಅಂಕಲ್‌ ಎಂದು ಕರೆಯಲು ಆತನಿಗೆ ಎಷ್ಟು ಧೈರ್ಯ ಎಂದು ಕೋಪಗೊಂಡ ರೋಹಿತ್‌ ಸ್ವಲ್ಪ ಹೊತ್ತಿನ ಬಳಿಕ ತನ್ನ ಸ್ನೇಹಿತರನನ್ನು ಕರೆಸಿ ವಿಶಾಲ್‌ಗೆ ಮನಬಂದಂತೆ ಥಳಿಸಿದ್ದಾನೆ. ಹೌದು ವಿಶಾಲ್‌ನನ್ನು ಅಂಗಡಿಯಿಂದ ಹೊರಗೆ ಎಳೆದೊಯ್ದ ರೋಹಿತ್‌ ಮತ್ತು ಆತನ ಸ್ನೇಹಿತರು ದೊಣ್ಣೆ ಮತ್ತು ಬೆಲ್ಟ್‌ನಿಂದ ಥಳಿಸಿ ನಂತರ ಅಲ್ಲಿಂದ ಪರಾರಿಯಾಗಿದ್ದಾರೆ. ನಂತರ ವಿಶಾಲ್‌ ಮಿಸ್ರೋಡ್‌ ಪೊಲೀಸ್‌ ಠಾಣೆಯಲ್ಲಿ ದೂರನ್ನು ನೀಡಿದ್ದು, ದೂರಿನ ಆಧಾರದ ಮೇರೆಗೆ ರೋಹಿತ್‌ ಮತ್ತು ಆತನ ಸ್ನೆಹಿತರ ವಿರುದ್ಧ ಪೊಲೀಸರು ಎಫ್.ಐ.ಆರ್‌ ದಾಖಲಿಸಿಕೊಂಡಿದ್ದಾರೆ.
ಇದನ್ನೂ ಓದಿ: ಪರ ಪುರುಷನೊಂದಿಗೆ ಹೊಟೇಲ್‌ ರೂಮ್‌ಗೆ ಹೋಗಿ ಗಂಡನ ಕೈಲಿ ತಗ್ಲಾಕೊಂಡ ಹೆಂಡ್ತಿ; ವಿಡಿಯೋ ವೈರಲ್
ಈ ಹಲ್ಲೆಗೆ ಸಂಬಂಧಿಸಿದ ಸಿಸಿ ಟಿವಿ ದೃಶ್ಯವೊಂದು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ShabnazKhanam ಹೆಸರಿನ ಎಕ್ಸ್ ಖಾತೆಯಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋದಲ್ಲಿ ರೋಹಿತ್‌ ತನ್ನ ಸ್ನೇಹಿತರೊಂದಿಗೆ ವಿಶಾಲ್‌ಗೆ ಥಳಿಸಿಲು ಅಂಗಡಿಯೊಳಗೆ ನುಗ್ಗುವಂತಹ ದೃಶ್ಯವನ್ನು ಕಾಣಬಹುದು.
ಮತ್ತಷ್ಟು ವೈರಲ್ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
