ಕೊರೊನಾದಿಂದ ಕಂಗೆಟ್ಟಿದ್ದವನಿಗೆ ಹೊಡೆಯಿತು ಲಾಟರಿ! ದುಬೈನಲ್ಲಿ ಭಾರತೀಯನಿಗೆ ಒಲಿಯಿತು ₹ 7 ಕೋಟಿ ಜಾಕ್ಪಾಟ್
ಅವರ ಹೆಸರು ನವನೀತ್ ಸಂಜೀವನ್. ವಯಸ್ಸು 30. ದುಬೈನಲ್ಲಿ ಹೆಂಡತಿ ಮಕ್ಕಳ ಜೊತೆ ವಾಸವಾಗಿದ್ದ ನವನೀತ್, ಖಾಸಗಿ ಕಂಪೆನಿಯಲ್ಲಿ ಕಳೆದ ನಾಲ್ಕು ವರ್ಷಗಳಿಂದ ಕೆಲಸ ಮಾಡುತ್ತಿದ್ದರು. ಕೊರೊನಾ ವೈರಸ್ ಸಮಯದಲ್ಲಿ ಅವರು ಉದ್ಯೋಗ ಕಳೆದುಕೊಂಡಿದ್ದರು.
Updated on:Dec 22, 2020 | 10:40 AM
ದುಬೈ: ದಾರಿ ಮೇಲೆ ಹೋಗುವಾಗ ಅಚಾನಕ್ಕಾಗಿ ಐದು ನೂರು ರೂಪಾಯಿ ಸಿಕ್ಕರೆ ಯಾರಿಗೆ ತಾನೇ ಖುಷಿ ಆಗುವುದಿಲ್ಲ ಹೇಳಿ? ಹೀಗಿರುವಾಗ ರಾತ್ರಿ ಬೆಳಗಾಗುವುದರೊಳಗೆ ನಿಮಗೆ ಏಳು ಕೋಟಿ ಸಿಕ್ಕಿಬಿಟ್ಟರೆ? ಹೀಗೊಂದು ಮ್ಯಾಜಿಕ್ ದುಬೈನಲ್ಲಿ ವಾಸವಾಗಿರುವ ಕೇರಳ ಮೂಲದ ವ್ಯಕ್ತಿಯ ಜೀವನದಲ್ಲಾಗಿದೆ.
ಅವರ ಹೆಸರು ನವನೀತ್ ಸಂಜೀವನ್. ವಯಸ್ಸು 30. ದುಬೈನಲ್ಲಿ ಹೆಂಡತಿ ಮಕ್ಕಳ ಜೊತೆ ವಾಸವಾಗಿದ್ದ ನವನೀತ್, ಖಾಸಗಿ ಕಂಪೆನಿಯಲ್ಲಿ ಕಳೆದ ನಾಲ್ಕು ವರ್ಷಗಳಿಂದ ಕೆಲಸ ಮಾಡುತ್ತಿದ್ದರು. ಕೊರೊನಾ ವೈರಸ್ ಸಮಯದಲ್ಲಿ ಅವರು ಉದ್ಯೋಗ ಕಳೆದುಕೊಂಡಿದ್ದರು. ಕೆಲಸ ಹೋದ ನಂತರ ಬೆಟ್ಟವೇ ತಲೆಯಮೇಲೆ ಬಿದ್ದಂತೆ ಕೂತಿದ್ದ ಸಂಜೀವನ್, ಹೊಸ ಹೊಸ ಕಂಪೆನಿಗಳಿಗೆ ರೆಸ್ಯೂಮ್ ಕಳಿಸುವ ಕೆಲಸದಲ್ಲಿ ಬ್ಯುಸಿಯಾಗಿದ್ದರು.
ನವೆಂಬರ್ 22ರಂದು ನವನೀತ್ ಅದೃಷ್ಟ ಪರೀಕ್ಷೆಗೆ ಮುಂದಾಗಿದ್ದರು. ದುಬೈ ಡ್ಯೂಟಿ ಫ್ರೀ ರಾಫೆಲ್ನಲ್ಲಿ ಲಾಟರಿ ಟಿಕೆಟ್ ಖರೀದಿ ಮಾಡಿದ್ದರು. ಆದರೆ, ಲಕ್ಕಿ ಡ್ರಾದಲ್ಲಿ ವಿನ್ನರ್ ನಾನೇ ಆಗಬಹದು ಎಂದು ಅವರು ಕನಸು ಮನಸಿನಲ್ಲೂ ನೆನೆಸಿರಲಿಲ್ಲ. ನಿನ್ನೆ ಲಕ್ಕಿ ಡ್ರಾನಲ್ಲಿ ಇವರ ಹೆಸರು ಕೂಡ ಇತ್ತು. ಈಗ ಇವರಿಗೆ ಬರೋಬ್ಬರಿ 7.3 ಕೋಟಿ ರೂಪಾಯಿ ಲಭಿಸಿದೆ.
ಈ ಬಗ್ಗೆ ಸ್ಥಳೀಯ ಮಾಧ್ಯಮದ ಜೊತೆ ಖುಷಿ ಹಂಚಿಕೊಂಡಿರುವ ಅವರು, ನನ್ನ ಹೆಂಡತಿ ಇಲ್ಲಿಯೇ ಕೆಲಸ ಮಾಡುತ್ತಿದ್ದಾಳೆ. ಕೆಲಸ ಸಿಗದ ಕಾರಣ ಮನೆಗೆ ಹೋಗಬೇಕು ಎಂದುಕೊಂಡಿದ್ದೆ. ಆದರೆ, ಇಲ್ಲಿ ಸ್ವಲ್ಪ ಸಾಲ ಇತ್ತು. ಹೀಗಾಗಿ, ನಾನು ಇಲ್ಲಿಯೇ ಇರಬೇಕಾಗಿ ಬಂದಿತ್ತು. ಆದರೆ, ಈ ಲಾಟರಿ ನನ್ನ ಜೀವನವನ್ನೇ ಬದಲಿಸಿದೆ ಎಂದಿದ್ದಾರೆ.
Published On - 10:24 pm, Mon, 21 December 20
