Scrapping Policy: ಸರ್ಕಾರಕ್ಕಿಲ್ಲ ಮುತುವರ್ಜಿ; ಹಳೆಯ ವಾಹನಗಳ ಸ್ಕ್ರ್ಯಾಪಿಂಗ್ ಯೋಜನೆಗೆ ರಹದಾರಿ ಯಾವುದಯ್ಯಾ!?

ಹಳೆಯ ವಾಹನಗಳು ಇಡಿಯಾಗಿ ಮತ್ತು ಅವುಗಳ ಹಳತಾದ ಇಂಜಿನ್‌ಗಳು ಮಾಲಿನ್ಯ ಸಮಸ್ಯೆಗಳಿಗೆ ಕಾರಣವಾಗುತ್ತವೆ. ಈ ಹಿನ್ನೆಲೆಯಲ್ಲಿ ಕರ್ನಾಟಕ ಸರ್ಕಾರವು ಡಿಸೆಂಬರ್ 2022 ರಲ್ಲಿ ರಾಜ್ಯ ವಾಹನ ಸ್ಕ್ರ್ಯಾಪಿಂಗ್ ನೀತಿಯನ್ನು ಬಿಡುಗಡೆ ಮಾಡಿತು. ಆದಾಗ್ಯೂ, ಬೆಂಗಳೂರಿನಲ್ಲಿರುವ ಲಕ್ಷಗಟ್ಟಲೆ ವಾಹನಗಳು ಸ್ಕ್ರ್ಯಾಪಿಂಗ್ ವಿಲೇವಾರಿಗೆ ಅರ್ಹವಾಗಿದ್ದರೂ ಕೆಲವೇ ಸಾವಿರ ವಾಹನಗಳು ಮಾತ್ರ ಸ್ಕ್ರ್ಯಾಪ್​ ಆಗಿವೆಯಷ್ಟೆ. ಮಾರ್ಚ್ 31, 2023 ರಂತೆ 15 ವರ್ಷಕ್ಕಿಂತ ಮೇಲ್ಪಟ್ಟ 91,58,577 ವಾಹನಗಳಲ್ಲಿ 33,00,558 ಕ್ಕೂ ಹೆಚ್ಚು ಹಳೆಯ ವಾಹನಗಳು ಬೆಂಗಳೂರು ನಗರದಲ್ಲಿವೆ.

ಕರ್ನಾಟಕದ ನೋಂದಾಯಿತ ವಾಹನ ಸ್ಕ್ರ್ಯಾಪಿಂಗ್ ನೀತಿಯು (Registered Vehicle Scrapping Policy of Karnataka 2022) ಅಯೋಗ್ಯ, ಮಾಲಿನ್ಯಕಾರಕ ವಾಹನಗಳನ್ನು ಹಂತಹಂತವಾಗಿ ಸಂಚಾರದಿಂದ ಮುಕ್ತಗೊಳಿಸುವ ಗುರಿಯನ್ನು ಹೊಂದಿದೆ. ಅವುಗಳ ಜಾಗದಲ್ಲಿ ಸುರಕ್ಷಿತ, ಇಂಧನ-ಸಮರ್ಥ ವಾಹನಗಳಿಗೆ ಅವಕಾಶ ನೀಡಲಾಗುವುದು.

ಇದು 15 ವರ್ಷಗಳಿಗಿಂತ ಹಳೆಯದಾದ, ಜೀವಿತಾವಧಿ ಅಂತ್ಯಗೊಂಡ ವಾಹನಗಳಿಂದ ಉಂಟಾಗುವ ಮಾಲಿನ್ಯ ಹೊರಸೂಸುವಿಕೆಯನ್ನು ನಿಭಾಯಿಸಲು ಮಾತ್ರವಷ್ಟೇ ಅಲ್ಲ. ಹಳೆಯ ವಾಹನಗಳಿಗಾಗಿ ಲಭ್ಯವಿರುವ ಮರುಬಳಕೆ ಸೇವೆಗಳನ್ನು ಹೆಚ್ಚು ಪ್ರಸ್ತುತಗೊಳಿಸಲು, ಅಥವಾ ಸಮರ್ಥವಾಗಿ ವಿಲೇವಾರಿ ಮಾಡುವ ವ್ಯವಸ್ಥೆಯನ್ನು ನಿರ್ಮಿಸುವ ಗುರಿಯನ್ನು ಹೊಂದಿದೆ.

ಇಡೀ ಕರ್ನಾಟಕದಲ್ಲಿ ಫಿಟ್‌ನೆಸ್ ಪ್ರಮಾಣ ಪತ್ರಗಳನ್ನು ಹೊಂದಿರದ, ಜೀವಿತಾವಧಿ ಕೊನೆಗೊಂಡ 14.3 ಲಕ್ಷ ವಾಹನಗಳು ಸ್ಕ್ರ್ಯಾಪಿಂಗ್‌ಗೆ ಯೋಗ್ಯವಾಗಿವೆ. ಮತ್ತು 2027 ರ ವೇಳೆಗೆ ಇನ್ನೂ 66 ಲಕ್ಷ ವಾಹನಗಳು 15 ವರ್ಷ ಅಥವಾ ಅದಕ್ಕಿಂತ ಹಳೆಯದ್ದಾಗುತ್ತವೆ ಎಂದು ಅಂದಾಜಿಸಲಾಗಿದೆ.

ಗಮನಾರ್ಹವೆಂದರೆ ಸರ್ಕಾರಿ ವಾಹನಗಳಿಗೆ ವಾಹನ ಸ್ಕ್ರ್ಯಾಪಿಂಗ್ ನೀತಿಯು ಕಡ್ಡಾಯಗೊಳಿಸಲಾಗಿದೆ. ಆದರೆ ಖಾಸಗಿ ವಾಹನಗಳ ಸ್ಕ್ರ್ಯಾಪಿಂಗ್ ಅನ್ನು ಕಡ್ಡಾಯಗೊಳಿಸಿಲ್ಲ. ಅದು ಇನ್ನೂ ವಾಹನ ಮಾಲೀಕರ ಮರ್ಜಿಯಲ್ಲಿದೆ.

ರಾಜ್ಯದಲ್ಲಿರುವ ಎರಡು ಅಧಿಕೃತ ಸ್ಕ್ರ್ಯಾಪಿಂಗ್ ಕೇಂದ್ರಗಳನ್ನು ನೇರವಾಗಿ ಸಂಪರ್ಕಿಸುವುದರ ಜೊತೆಗೆ, ವಾಹನ ಮಾಲೀಕರು ತಮ್ಮ ವಾಹನಗಳನ್ನು ಸ್ಕ್ರ್ಯಾಪ್ ಮಾಡಲು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯದ ಪರಿವಾಹನ್ ಪೋರ್ಟಲ್‌ನಲ್ಲಿ (Ministry of Road Transport and Highways’ Parivahan portal) ಸ್ವಯಂಪ್ರೇರಿತರಾಗಿ ವಾಹನ ಸ್ಕ್ರ್ಯಾಪಿಂಗ್​​ಗಾಗಿ ಅರ್ಜಿ ಸಲ್ಲಿಸಬಹುದು. ನಂತರ ಅವರು ಯಾವುದೇ RVSF ಸ್ಕ್ರ್ಯಾಪಿಂಗ್ ಕೇಂದ್ರಕ್ಕೆ ತಮ್ಮ ವಾಹನವನ್ನು ತೆಗೆದುಕೊಂಡು ಹೋಗಬಹುದು.

Also Read: Registered Vehicle Scrapping Policy -ಸರ್ಕಾರದ ಅಸಡ್ಡೆ – ಹಳೆಯ ವಾಹನಗಳ ಸ್ಕ್ರಾಪ್​ ನೀತಿಯೇ ಸ್ಕ್ರಾಪ್ ಆಗುತ್ತದಾ?

ರಾಜಧಾನಿ ಸೇರಿದಂತೆ ರಾಜ್ಯದ ಇತರೆ ಭಾಗಗಳಲ್ಲಿ ವಾಹನಗಳ ಸ್ಕ್ರ್ಯಾಪಿಂಗ್ ಮಾಡುವುದು ಕಠಿಣ ಕಾರ್ಯವಾಗಿದೆ. ಗ್ರಾಮೀಣ ಪ್ರದೇಶಗಳಲ್ಲಿ ಜೀವಿತಾವಧಿ ಕೊನೆಗೊಂಡ ವಾಹನಗಳು ಅಧಿಕವಾಗಿವೆ. ಕೃಷಿಗೆ ಬಳಸುವ ಸರಕು ವಾಹನಗಳು ಅಥವಾ ಟ್ರಾಕ್ಟರ್‌ಗಳನ್ನು ಬದಲಿಸಲು ಅವರಿಗೆ ಸಾಲ ಸೌಲಭ್ಯ ಇಲ್ಲದಿರುವುದರಿಂದ ಸ್ಕ್ರ್ಯಾಪಿಂಗ್ ನೀತಿ ಅವರಿಗೆ ಕಷ್ಟಸಾಧ್ಯವಾಗಿದೆ. ಒಟ್ಟಾರೆಯಾಗಿ ವಾಹನಗಳ ಸ್ಕ್ರ್ಯಾಪಿಂಗ್​​ಗೆ ಸ್ವಲ್ಪ ಹಿನ್ನಡೆ ಕಂಡುಬಂದಿದೆ ಎಂದು ಬಿಬಿಎಂಪಿ ಹಿರಿಯ ಅಧಿಕಾರಿಯೊಬ್ಬರು ವಿವರಿಸಿದ್ದಾರೆ. ಸ್ಕ್ರ್ಯಾಪಿಂಗ್ ವ್ಯವಸ್ಥೆ ಅಂಗೀಕರಿಸಿದ್ದರೂ, ಅವುಗಳ ಪಾಲನೆ ಮತ್ತು ಜಾರಿಯಲ್ಲಿ ಅಡೆತಡೆಗಳನ್ನು ನಿವಾರಿಸಿದ ನಂತರವೇ ಅದನ್ನು ಪರಿಣಾಮಕಾರಿಯಾಗಿ ಜಾರಿಗೊಳಿಸಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಖಾಸಗಿ ವಾಹನಗಳಿಗೆ ಕಡ್ಡಾಯ ನೀತಿಯನ್ನು ಕಲ್ಪಿಸದಿದ್ದರೂ, ಅಸ್ತಿತ್ವದಲ್ಲಿರುವ ನೀತಿಗೆ ಒತ್ತು ನೀಡುವುದರಿಂದ ಹೆಚ್ಚಿನ ಖಾಸಗಿ ಮಾಲೀಕರು ಮುಂದೆ ಬರಲು ಪ್ರೋತ್ಸಾಹಿಸಬಹುದು ಎಂಬುದು ಅವರ ಅನಿಸಿಕೆಯಾಗಿದೆ.

17 ಅಥವಾ 19 ವರ್ಷಕ್ಕಿಂತ ಮೇಲ್ಪಟ್ಟ ವಾಹನಗಳನ್ನು ರದ್ದುಗೊಳಿಸಬೇಕೆಂಬ ಕೆಲವು ಕಡ್ಡಾಯ ನಿಯಮಗಳನ್ನು ಕೇಂದ್ರ ಸರ್ಕಾರವು ಹೊರತರಬೇಕಿದೆ. ಆ ನಂತರ ಈಗಿರುವ ಸ್ಕ್ರ್ಯಾಪಿಂಗ್ ನೀತಿಯು ವೇಗ ಪಡೆಯುತ್ತದೆ ಎಂದು ಭಾವಿಸಬಹುದು. ಏಕೆಂದರೆ ಜನರ ಮನಸ್ಥಿತಿ ಬದಲಾಗಬೇಕಿದೆ. ಏನೇ ಆದರೂ ಮುಂದಿನ ಐದು ವರ್ಷಗಳಲ್ಲಿ (ಅಂದರೆ 2027ರ ವೇಳೆಗೆ) ಭಾರೀ ಬದಲಾವಣೆಯನ್ನು ನಿರೀಕ್ಷಿಸಬಹುದು ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.

ಈಗಿರುವ ಮೂಲಸೌಕರ್ಯಗಳಲ್ಲಿ ಸುಧಾರಣೆ ತರುವುದು ಮತ್ತು ಎಲೆಕ್ಟ್ರಿಕ್ ವಾಹನಗಳ ಹೆಚ್ಚು ಹೆಚ್ಚು ಮಾರಾಟದ ಮೂಲಕ ಹಳೆಯ ವಾಹನಗಳ ಸ್ಕ್ರ್ಯಾಪಿಂಗ್ ನೀತಿಯನ್ನು ಪರಿಣಾಮಕಾರಿಯಾಗಿ ಜಾರಿಗೊಳಿಸಬಹುದು ಎಂದು ಆಶಿಸಲಾಗಿದೆ. ದೂರ ಪ್ರಯಾಣಕ್ಕೆ ಎಲೆಕ್ಟ್ರಿಕ್ ವಾಹನಗಳನ್ನು ಸಜ್ಜುಗೊಳಿಸಲು ಕಡಿಮೆ ಅಂತರದಲ್ಲಿ ಎಲೆಕ್ಟ್ರಿಕ್ ವಾಹನಗಳಿಗಾಗಿ ಕ್ಷಿಪ್ರ ಚಾರ್ಜಿಂಗ್ ವ್ಯವಸ್ಥೆಯನ್ನು ನಿಗದಿಪಡಿಸಿದಾಗ ಹಳೆಯ ವಾಹನಗಳ ಸ್ಕ್ರ್ಯಾಪಿಂಗ್ ಯೋಜನೆಗೆ ರಹದಾರಿ ಸಿಗಬಹುದು. ಇದು ಸಂಭವಿಸಿದಲ್ಲಿ ವಾಹನ ಮಾಲೀಕರು ತಮ್ಮ ಹಳೆಯ ವಾಹನಗಳನ್ನು ಸ್ಕ್ರ್ಯಾಪ್ ಮಾಡಲು ಮುಂದೆ ಬರುತ್ತಾರೆ ಎಂದು ಆಶಿಸಲಾಗಿದೆ.

ಸರ್ಕಾರಿ ವಾಹನಗಳಿಗೆ ಸ್ಕ್ರ್ಯಾಪಿಂಗ್ ನೀತಿ ಕಡ್ಡಾಯವಾಗಿ ಜಾರಿಯಾಗಲಿ

ಸ್ಕ್ರ್ಯಾಪಿಂಗ್ ನೀತಿಯು ಜೀವಿತಾವಧಿ ಮುಗಿಸಿದ ಎಲ್ಲಾ ಸರ್ಕಾರಿ ವಾಹನಗಳ ಸ್ಕ್ರ್ಯಾಪ್ ಮಾಡುವುದನ್ನು ಕಡ್ಡಾಯಗೊಳಿಸಿದ್ದರೂ, ರಾಜ್ಯದ ಎರಡೂ ಅಧಿಕೃತ RVSF ಸ್ಕ್ರ್ಯಾಪಿಂಗ್ ಕೇಂದ್ರಗಳಲ್ಲಿ ಇದುವರೆಗೆ ಕೇವಲ ಹತ್ತಾರು ಅರ್ಜಿಗಳನ್ನು ಮಾತ್ರ ಸಲ್ಲಿಸಿರುವುದು ಚಿಂತಗೀಡುಮಾಡುವಂತಿದೆ. ಅದರಲ್ಲೂ ಕೇವಲ ಆರು ಅರ್ಜಿಗಳನ್ನು ಅನುಮೋದಿಸಲಾಗಿದೆ.

ಇಲ್ಲಿ ಗಮನಾರ್ಹ ಸಂಗತಿಯೆಂದರೆ ಫಿಟ್‌ನೆಸ್ ಪ್ರಮಾಣಪತ್ರಗಳನ್ನು ಹೊಂದಿರುವ ಮತ್ತು ನೋಂದಣಿ ಪ್ರಮಾಣಪತ್ರವನ್ನು (Certificate of Registration -RC) ನವೀಕರಿಸಿದ ವಾಹನಗಳೂ ರಸ್ತೆಗಳಲ್ಲಿ ಸಂಚಾರ ಮಾಡುವುದನ್ನು ಮುಂದುವರಿಸುವುದರಿಂದ ಅಂತಹ ವಾಹನಗಳ ಜೀವಿತಾವಧಿ ಮೀರಿದ್ದರೂ ಅವು ಸ್ಕ್ರ್ಯಾಪಿಂಗ್‌ಗೆ ಅರ್ಹವಾಗಿರುವುದಿಲ್ಲ. ಕೆಲವು ಸಂದರ್ಭಗಳಲ್ಲಿ, ವಿಶೇಷವಾಗಿ ಸರ್ಕಾರಿ ವಾಹನ ವಿಷಯದಲ್ಲಿ ಅವುಗಳನ್ನು ಸ್ಕ್ರ್ಯಾಪ್ ಮಾಡುವುದು ಪ್ರಾಯೋಗಿಕವಾಗಿ ಒಳ್ಳೆಯ ನಿರ್ಧಾರವಲ್ಲ.

ಉದಾಹರಣೆಗೆ, ಕರ್ನಾಟಕ ರಾಜ್ಯ ಅಗ್ನಿಶಾಮಕ ಮತ್ತು ತುರ್ತು ಸೇವೆಗಳಲ್ಲಿ (ಕೆಎಸ್‌ಎಫ್‌ಇಎಸ್ Karnataka State Fire and Emergency Services -KSFES) ನೋಂದಾಯಿಸಲಾದ 400 ಕ್ಕೂ ಹೆಚ್ಚು ಅಗ್ನಿಶಾಮಕ ವಾಹನಗಳಲ್ಲಿ ಕನಿಷ್ಠ 284 ವಾಹನಗಳು 15 ವರ್ಷಕ್ಕಿಂತ ಹಳೆಯವು ಎಂಬ ಮಾಹಿತಿಯಿದೆ. ಸರ್ಕಾರಿ ವಾಹನಗಳಿಗೆ ಕಡ್ಡಾಯವಾದ ವಾಹನ ಸ್ಕ್ರ್ಯಾಪಿಂಗ್ ನೀತಿ ಜಾರಿಯಲ್ಲಿರುವುದರಿಂದ ಈ ವಾಹನಗಳನ್ನು ಸಹ ಸ್ಕ್ರಾಪ್​ ಮಾಡಬೇಕು.

ಆದಾಗ್ಯೂ, ಅಗ್ನಿಶಾಮಕ ಇಲಾಖೆ ಇದನ್ನು ವಿಶಿಷ್ಟ ಪ್ರಕರಣ ಎಂದು ಭಾವಿಸುತ್ತದೆ. ಇಲಾಖೆಯ ಅನೇಕ ವಾಹನಗಳು 15 ವರ್ಷಕ್ಕಿಂತ ಹಳೆಯದಾಗಿದ್ದರೂ ಸಹ, ಅವು ಸಾವಿರಾರು ಕಿಲೋಮೀಟರ್‌ಗಳನ್ನು ದಾಟಿರುವುದಿಲ್ಲ. ಏಕೆಂದರೆ ಅವು ದಿನಾ ಸಂಚಾರ ಮಾಡುವಂತಹವುದಲ್ಲ. ಮತ್ತು ಅದರ ಸೀಮಿತ ಠಾಣಾ ವ್ಯಾಪ್ತಿಯಲ್ಲಿ ಕೆಲಸ ಮಾಡುತ್ತವೆ. ಜೀವಿತಾವಧಿ ಮೀರಿದ ವಾಹನಗಳಲ್ಲಿಯೂ ಸಹ, ಕೇವಲ 120 ವಾಹನಗಳಿಗೆ ಮಾತ್ರ ಎಂಜಿನ್ ರಿಪೇರಿ ಅಥವಾ ಸಾಮಾನ್ಯ ನಿರ್ವಹಣೆಯ ಜೊತೆಗೆ ಬದಲಿ ಬಿಡಿ ಭಾಗಗಳ ಅಗತ್ಯವಿರುತ್ತದೆ ಅಷ್ಟೆ. ಏಕೆಂದರೆ ಇಲಾಖೆಯು ತನ್ನ ವಾಹನಗಳನ್ನು ಸದಾ ಸುಸ್ಥಿತಿಯಲ್ಲಿ ಇಟ್ಟಿರುತ್ತದೆ. ಇಂತಹ ತುರ್ತು ಕಾರಣಗಳ ಮಧ್ಯೆ ಜೀವಿತಾವಧಿ ಮೀರಿದೆ ಎಂದು ಅವುಗಳನ್ನು ಸ್ಕ್ರಾಪ್​ ಮಾಡಲು ಸಾಧ್ಯವಿಲ್ಲ ಎನ್ನುತ್ತಾರೆ ಆಯಕಟ್ಟಿನ ಸ್ಥಾನದಲ್ಲಿರುವ ಅಗ್ನಿಶಾಮಕ ಇಲಾಖೆ ಉನ್ನತಾಧಿಕಾರಿಗಳು.

ಈ ಸಕಾರಣಗಳನ್ನು ಮುಂದೊಡ್ಡಿ ಇಲಾಖೆಯು ರಾಜ್ಯ ಸರ್ಕಾರ ಮತ್ತು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯಕ್ಕೆ ಪತ್ರ ಬರೆದಿದೆ. ಮತ್ತು ಮುಂದಿನ ನಿರ್ದೇಶನಕ್ಕಾಗಿ ಕಾಯುತ್ತಿದೆ. ಹಾಗಂತ ಪ್ರಸ್ತುತ, ಆ 284 ಹಳೆಯ ವಾಹನಗಳ ಪೈಕಿ ಯಾವುದೂ ರಸ್ತೆಗಳಲ್ಲಿ ಸಂಚರಿಸುತ್ತಿಲ್ಲ. ಬದಲಿಗೆ ಬ್ಯಾಕ್‌ಅಪ್ ವಾಹನಗಳಾಗಿ ತುರ್ತು ಅಗತ್ಯವಿರುವಾಗ ಮಾತ್ರ ಸೇವೆಗೆ ಬಿಡಲಾಗುತ್ತದೆಯಂತೆ.

Also Read: Monsoon Love Predictions – ಮುಂಗಾರು ಮಳೆಯಲ್ಲಿ ಪ್ರೀತಿಯ ಅಲೆಗಳು.. ಯಾವ ರಾಶಿಯವರೆಲ್ಲಾ ಪ್ರೀತಿ-ಪ್ರೇಮದಲ್ಲಿ ನೆನೆಯುತ್ತಾರೆ ನೋಡಿ!

ನಿರ್ದಿಷ್ಟ ಉದ್ದೇಶಕ್ಕೆ ಅನುಸಾರವಾಗಿ ವಾಹನಗಳ ತಯಾರಿಯನ್ನು ವಿಶೇಷವಾಗಿ ಮಾರ್ಪಡಿಸಿರುವ ಕಾರಣದಿಂದಾಗಿ ಭಾರಿ ಅಗ್ನಿಶಾಮಕ ವಾಹನಗಳ ತಯಾರಿಕೆ ವೆಚ್ಚ ದುಬಾರಿಯಾಗಿರುತ್ತದೆ. ಮತ್ತು ಅವುಗಳ ತಯಾರಿಕೆಗೂ ಸಾಕಷ್ಟು ಸಮಯ ಹಿಡಿಸುತ್ತದೆ. ಬೇಸಿಗೆಯ ಮುಂಚೆ, ಕಾಡಿನಲ್ಲಿ ಅಥವಾ ಆಕಸ್ಮಿಕ ಬೆಂಕಿ ಪ್ರಕರಣಗಳಲ್ಲಿ ಅವುಗಳ ಬಳಕೆಗೆ ಹೆಚ್ಚಿನ ಅವಕಾಶವಿರುತ್ತದೆ. ಅವು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿರುವಾಗ ವಯಸ್ಸಿನ ನೆಪವೊಡ್ಡಿ ಅವುಗಳನ್ನು ಬಳಕೆಯಿಂದ ತೆಗೆದುಹಾಕುವುದು ಉತ್ತಮ ನಿರ್ಧಾರವಲ್ಲ ಎಂದು ಅಧಿಕಾರಿಗಳು ಅರ್ಥೈಸಿದ್ದಾರೆ.

ವಾರಸುದಾರರಿಲ್ಲದ ಅಥವಾ ವಶಪಡಿಸಿಕೊಂಡ ವಾಹನಗಳ ವಿಷಯದಲ್ಲಿ… ಈ ನೀತಿಯು ನಿರ್ದಿಷ್ಟ ಅವಧಿಯವರೆಗೆ ವಾರಸುದಾರರಿಲ್ಲದ ಅಥವಾ ವಶಪಡಿಸಿಕೊಂಡ ವಾಹನಗಳನ್ನು ಹರಾಜಿನ ಮೂಲಕ ಖರೀದಿಸಲು ಸ್ಕ್ರ್ಯಾಪಿಂಗ್ ಕೇಂದ್ರಗಳು (RVSF) ಹಕ್ಕು ಹೊಂದಿರುತ್ತವೆ.

ಉದಾಹರಣೆಗೆ, ಅಪರಾಧ ಅಥವಾ ಅಪಘಾತಗಳಲ್ಲಿ ಭಾಗಿಯಾದ ವಾಹನಗಳ ಹೊರತಾಗಿ ಸಂಚಾರ ಪೊಲೀಸರು ವಶಪಡಿಸಿಕೊಂಡ ವಾಹನಗಳು ಸಾಮಾನ್ಯವಾಗಿ ನ್ಯಾಯಾಲಯದ ವಿಚಾರಣೆಗಳು ಮುಗಿಯುವವರೆಗೆ ಪೊಲೀಸ್ ಠಾಣೆಯ ಆವರಣದಲ್ಲಿಯೇ ಇರುತ್ತವೆ. ವಾಹನಗಳು ಹಲವಾರು ವರ್ಷಗಳೇ ಕಳೆದರೂ ಪೊಲೀಸ್ ಕಸ್ಟಡಿಯಲ್ಲಿದ್ದರೆ ಮುಂದೆ ಸ್ಥಳಾವಕಾಶದ ಕೊರತೆಯೂ ಎದುರಾಗುತ್ತದೆ ಎಂಬುದು ಗಮನಾರ್ಹ.

ಆದಾಗ್ಯೂ, ಅಂತಹ ವಾಹನಗಳನ್ನು ಕೆಲ ಸಮಯದವರೆಗೆ ಯಾರೂ ಕ್ಲೈಮ್ ಮಾಡದಿದ್ದರೆ ಅಥವಾ ವಾಹನವು ದುರಸ್ತಿಗೆ ಮೀರಿ ಅಪಘಾತಕ್ಕೀಡಾಗಿದ್ದರೆ, ಪೊಲೀಸರು ಅದನ್ನು ನ್ಯಾಯಾಲಯದ ಅನುಮತಿಯೊಂದಿಗೆ ಹರಾಜು ಮಾಡಬಹುದು. ಆಸಕ್ತ ಸ್ಕ್ರ್ಯಾಪಿಂಗ್ ಕೇಂದ್ರಗಳು RVSF ಈ ವಾಹನಗಳನ್ನು ಖರೀದಿಸಬಹುದು ಮತ್ತು ಅವುಗಳನ್ನು ಸರಿಯಾಗಿ ವಿಲೇವಾರಿ ಮಾಡಬಹುದು. ಇದರಿಂದ RVSF ಗಳಿಗೆ ತಕ್ಕ ಮಟ್ಟಿಗೆ ಆದಾಯ ಬರುತ್ತದೆ, ಪೊಲೀಸರಿಗೆ ತಮ್ಮ ಠಾಣಾ ಆವರಣಗಳನ್ನು ಸ್ವಚ್ಛಗೊಳಿಸುವುದಕ್ಕೆ ಮತ್ತು ಸಾರ್ವಜನಿಕರಿಗೂ ಇಂತಹ ವಾಹನಗಳಿಂದಾಗುವ ತೊಂದರೆಗಳನ್ನು ತಪ್ಪಿಸಿದಂತಾಗಿ ಎಲ್ಲರಿಗೂ ಸಮ-ಸಮ ಸ್ಥಿತಿ ಪ್ರಾಪ್ತಿಯಾದೀತು ಎಂದು ಆಲೋಚಿಸುತ್ತಾರೆ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು.

ಸ್ಕ್ರ್ಯಾಪಿಂಗ್ ಗಾಗಿ ಹಳೆಯ ವಾಹನಗಳನ್ನು ಜಮಾ ಮಾಡಿರುವುದಕ್ಕೆ ಪ್ರಮಾಣ ಪತ್ರಗಳು (Certificate of Deposit-CoD):

ಫೆಬ್ರವರಿ 29, 2024 ರಂತೆ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯವು ನಿರ್ವಹಿಸುವ ವಾಹನ ಸ್ಕ್ರ್ಯಾಪಿಂಗ್ ಸಂಬಂಧಿತ ಸೇವೆಗಳ ರಾಷ್ಟ್ರೀಯ ಪೋರ್ಟಲ್‌ನಲ್ಲಿರುವ ಡ್ಯಾಶ್‌ಬೋರ್ಡ್‌ ಪ್ರಕಾರ ಕರ್ನಾಟಕದಿಂದ ಅವಧಿ ಮೀರಿದ ವಾಹನಗಳ ಸ್ಕ್ರ್ಯಾಪಿಂಗ್‌ಗಾಗಿ ವಾಹನ ಮಾಲೀಕರುಗಳಿಂದ ಕೇವಲ 1,380 ಅರ್ಜಿಗಳು ಸಲ್ಲಿಕೆಯಾಗಿವೆ. ಅದರಲ್ಲಿ 1,164 ಮಾತ್ರ ಅನುಮೋದನೆಗೊಂಡಿವೆ.

ಇತರ ಹಲವಾರು ರಾಜ್ಯಗಳು ಸಹ ಇದನ್ನು ಉತ್ತಮವಾಗಿ ನಿರ್ವಹಿಸುತ್ತಿಲ್ಲ. ಕರ್ನಾಟಕ ರಾಜ್ಯವು ಸೆಪ್ಟೆಂಬರ್ 2023 ರಿಂದ ಪ್ರತಿ ತಿಂಗಳೂ ನೂರಾರು ಸ್ಕ್ರ್ಯಾಪಿಂಗ್ ಅರ್ಜಿಗಳನ್ನು ಮಾತ್ರವೇ ಅನುಮೋದಿಸಿದೆ. ಜಮಾ ಪ್ರಮಾಣಪತ್ರ (CoD) ನೀಡುವುದೇ ಸಮಸ್ಯೆಯಾಗಿ ಉಳಿದಿದೆ. ಫೆಬ್ರವರಿ 29, 2024 ರ ಲೆಕ್ಕದ ಪ್ರಕಾರ, ಕೇವಲ 423 ವಾಹನಗಳಿಗೆ CoD ಪ್ರಮಾಣಪತ್ರಗಳನ್ನು ನೀಡಲಾಗಿದೆ. ಅದರಲ್ಲಿ 68 ಪತ್ರಗಳಿಗೆ ಇನ್ನೂ ಸಹಿ ಬಿದ್ದಿಲ್ಲ. ಅದೇ ರೀತಿ, ವಾಹನ ಸ್ಕ್ರ್ಯಾಪಿಂಗ್ ( Certificates of Vehicle Scrapping -CVS) ಲೆಕ್ಕದಲ್ಲಿ 84 ಪ್ರಮಾಣಪತ್ರಗಳನ್ನು ಮಾತ್ರ ನೀಡಲಾಗಿದೆ. ಅಂದರೆ ಅಂತಿಮವಾಗಿ ಕೇವಲ 84 ವಾಹಗಳು ಮಾತ್ರ ಸ್ರ್ಕ್ಯಾಪ್​ ಆಗಿವೆ ಎಂಬುದನ್ನು ಸೂಚಿಸುತ್ತದೆ.

RVSF ಕೇಂದ್ರಗಳು ನೀಡುವ ವಾಹನ ಜಮಾ ಪ್ರಮಾಣಪತ್ರದ ಅರ್ಥ ಏನೆಂದರೆ ಸ್ರ್ಕ್ಯಾಪಿಂಗ್​​ಗಾಗಿ ವಾಹನದ ಮಾಲೀಕತ್ವವನ್ನು RVSF ಕೇಂದ್ರಕ್ಕೆ ವರ್ಗಾಯಿಸಲಾಗಿದೆ ಎಂಬುದನ್ನು ಸೂಚಿಸುತ್ತದೆ. ದುರುಪಯೋಗ ಅಥವಾ ಅಕ್ರಮಗಳನ್ನು ತಪ್ಪಿಸಲು ಮತ್ತು ಸ್ಕ್ರ್ಯಾಪಿಂಗ್ ಸೌಲಭ್ಯಕ್ಕೆ ಹಸ್ತಾಂತರಿಸಲಾದ ವಾಹನಗಳ ಸುಲಭ ಟ್ರ್ಯಾಕಿಂಗ್ ಗಾಗಿ ಪ್ರತಿ ಪ್ರಮಾಣಪತ್ರವು ವಿಶಿಷ್ಟ ಗುರುತಿನ ID ಯನ್ನು ಹೊಂದಿರುತ್ತದೆ. ಇನ್ನು ತೆರಿಗೆ ರಿಯಾಯಿತಿಗಳನ್ನು ಪಡೆಯಲು ಹೊಸ ವಾಹನಗಳನ್ನು ಖರೀದಿಸುವಾಗ ವಾಹನ ಮಾಲೀಕರು ಈ ವಾಹನ ಜಮಾ ಪ್ರಮಾಣಪತ್ರವನ್ನು ಸಲ್ಲಿಸಬಹುದು.

ಡಿಜಿಟಲೀಕರಣ ಸೇರಿದಂತೆ ಕಳೆದ 20 ವರ್ಷಗಳಿಂದ ವ್ಯವಸ್ಥೆಗಳಲ್ಲಿ ಸಾಕಷ್ಟು ಬದಲಾವಣೆಗಳು ಆಗಿರುವುದರಿಂದ ಹಳೆಯ ತೆರಿಗೆ ಡೇಟಾ ಮತ್ತು ವಾಹನಗಳ ಡೇಟಾ ವಾಹನ ಮಾಲೀಕರ ಬಳಿಯಾಗಲಿ ಅಥವಾ ಸಾರಿಗೆ ಇಲಾಖೆಯಲ್ಲಿನ ಕಡತಗಳಲ್ಲಿ ಲಭ್ಯವಿಲ್ಲ ಎಂದು ಸ್ವತಃ ಸಾರಿಗೆ ಇಲಾಖೆ ಅಧಿಕಾರಿಗಳೆ ಮಾಹಿತಿ ನೀಡಿದ್ದಾರೆ. ಏನೇ ಆಗಲೀ ಜನವರಿ 22, 2024 ರಿಂದ ಜಾರಿಗೆ ಬಂದಿರುವ ಜೀವಿತಾವಧಿ ಕೊನೆಗೊಂಡ ವಾಹನಗಳಿಗೆ ತೆರಿಗೆ ರಿಯಾಯಿತಿ ಸ್ಲ್ಯಾಬ್‌ಗಳ ಹೊಸ ವ್ಯವಸ್ಥೆಯು ರಾಜ್ಯದಲ್ಲಿ ಹೆಚ್ಚು ವಾಹನಗಳ ಸ್ಕ್ರ್ಯಾಪಿಂಗ್ ಅನ್ನು ಹೆಚ್ಚಿಸುವ ನಿರೀಕ್ಷೆಯಿದೆ.

ನಿಮ್ಮ ವಾಹನದ ವಯಸ್ಸು ಎಷ್ಟು? ವಾಹನವನ್ನು ಸ್ಕ್ರ್ಯಾಪ್ ಮಾಡುವುದು ಹೇಗೆ?

ವಾಣಿಜ್ಯ ಮತ್ತು ಖಾಸಗಿ ವಾಹನಗಳಿಗೆ ವಿವಿಧ ಜೀವಿತಾವಧಿ ಮಾನದಂಡಗಳು ಅನ್ವಯಿಸುತ್ತವೆ. ಸರ್ಕಾರದ ವಾಹನ ಸ್ಕ್ರ್ಯಾಪಿಂಗ್ ನೀತಿಯ ಅಡಿಯಲ್ಲಿ, ಪೆಟ್ರೋಲ್ ಅಥವಾ ಡೀಸೆಲ್ ಇಂಧನದಿಂದ ಖರೀದಿಸಿದ ವೈಯಕ್ತಿಕ ವಾಹನಗಳು 15 ವರ್ಷಗಳ ನಂತರ ಮರು-ನೋಂದಣಿ ಮಾಡಬೇಕಾಗುತ್ತದೆ. ಆದರೆ ಅಂತಹ ಅನುಮೋದನೆಯು ಕೇವಲ 5 ವರ್ಷಗಳವರೆಗೆ ಮಾನ್ಯವಾಗಿರುತ್ತದೆ. 20 ವರ್ಷಗಳ ನಂತರ ನಿಮ್ಮ ವಾಹನವನ್ನು ಚಾಲನೆ ಮಾಡುವುದನ್ನು ಮುಂದುವರಿಸಲು ನೀವು ಬಯಸಿದರೆ, ಪ್ರತಿ 5 ವರ್ಷಗಳಿಗೊಮ್ಮೆ ಅದು ಫಿಟ್‌ನೆಸ್ ಪರೀಕ್ಷೆಗೆ ಒಳಗಾಗಬೇಕು. ಆದಾಗ್ಯೂ, ದೆಹಲಿ-ಎನ್‌ಸಿಆರ್‌ ಪ್ರದೇಶಕ್ಕೆ ವಿಭಿನ್ನ ನಿಯಮಗಳಿವೆ. ಇಲ್ಲಿ ಪೆಟ್ರೋಲ್ ವಾಹನಗಳಿಗೆ ಗರಿಷ್ಠ 15 ವರ್ಷ ವಯೋಮಿತಿ ಇದ್ದರೆ, ಡೀಸೆಲ್ ವಾಹನಗಳಿಗೆ ಗರಿಷ್ಠ 10 ವರ್ಷ ವಯೋಮಿತಿ ಇದೆ. ಮಿತಿಗಿಂತ ಹಳೆಯದಾದ ಕಾರು ದೆಹಲಿಯ ರಸ್ತೆಗಳಲ್ಲಿ ಕಂಡುಬಂದರೆ 10,000 ರೂ ದಂಡ ವಿಧಿಸಿ, ಅದನ್ನು ಸ್ಕ್ರ್ಯಾಪ್ ಮಾಡಲು ನೇರವಾಗಿ ಕಳುಹಿಸಲಾಗುತ್ತದೆ.

Also Read: Political Crime Thriller – ಭಾರತದ ಚೊಚ್ಚಲ ಲೈಂಗಿಕ ಹಗರಣದಿಂದಾಗಿ ಆ ನಾಯಕನಿಗೆ ಪ್ರಧಾನಿ ಖುರ್ಚಿ ಜಸ್ಟ್​​ ಮಿಸ್​ ಆಗಿತ್ತು! ಸಂಜಯ್​ ಗಾಂಧಿ ‘ಕೈ’ವಾಡ ಏನಿತ್ತು?

ವಾಹನದ ಮೇಲಿನ ವಿಮೆ ಲೆಕ್ಕಾಚಾರ ನಿಮ್ಮ ವಾಹನವನ್ನು ನೀವು ಸ್ಕ್ರ್ಯಾಪ್ ಮಾಡಿದಾಗ, ಅದರ ಹಿಂದಿನ ನೋಂದಣಿ ಸಂಖ್ಯೆ ಮತ್ತೆ ಲಭ್ಯವಾಗುತ್ತದೆ. ಯಾವುದೇ ಸಮಸ್ಯೆಗಳನ್ನು ತಪ್ಪಿಸಲು ನಿಮ್ಮ ವಾಹನ ವಿಮಾ ಕಂಪನಿಗೆ ಸ್ಕ್ರ್ಯಾಪಿಂಗ್​ಗೆ ಮುಂಚಿತವಾಗಿ ತಿಳಿಸುವುದು ಮುಖ್ಯವಾಗಿದೆ. ನಿಮ್ಮ ವಾಹನದ ದಾಖಲೆಗಳು ಭವಿಷ್ಯದಲ್ಲಿ ದುರುಪಯೋಗ ವಾಗುವುದನ್ನು ತಪ್ಪಿಸಲು ನಿಮ್ಮ ವಾಹನ ನೋಂದಣಿ ಪ್ರಮಾಣಪತ್ರ ಮತ್ತು ವಿಮಾ ಪಾಲಿಸಿಯನ್ನು ರದ್ದುಗೊಳಿಸುವುದು ಸಹ ಮುಖ್ಯವಾಗಿದೆ. ನಿಮ್ಮ ವಿಮಾ ಪಾಲಿಸಿಯನ್ನು ರದ್ದುಗೊಳಿಸಿದಾಗ, ನಿಮ್ಮ ಸಕ್ರಿಯ ಪಾಲಿಸಿಯ ಮೇಲೆ ನೀವು ಯಾವುದೇ ಕ್ಲೈಮ್‌ಗಳನ್ನು ಪಡೆದುಕೊಂಡಿರದಿದ್ದಲ್ಲಿ, ಅಂದಿನ ಲೆಕ್ಕಾಚಾರದ ಆಧಾರದ ಮೇಲೆ ಮರುಪಾವತಿಗೆ ನೀವು ಅರ್ಹತೆ ಪಡೆಯುತ್ತೀರಿ.

ವಾಹನವನ್ನು ಸ್ಕ್ರ್ಯಾಪ್ ಮಾಡುವಾಗ ಸಲ್ಲಿಸಬೇಕಾದ ದಾಖಲೆಗಳು ಅಧಿಕೃತ ಸ್ಕ್ರ್ಯಾಪಿಂಗ್ ಕೇಂದ್ರದಲ್ಲಿ ನಾಶಪಡಿಸಲು ನಿಮ್ಮ ಕಾರನ್ನು ಸರೆಂಡರ್​ ಮಾಡಿದಾಗ ನೀವು ಕೆಲವು ದಾಖಲೆಗಳನ್ನು ಒದಗಿಸಬೇಕಾಗುತ್ತದೆ. ಇವುಗಳಲ್ಲಿ ನಿಮ್ಮ ವಾಹನದ RC ದಾಖಲೆಯ ನಕಲು, ಕಾರನ್ನು ಅನರ್ಹವೆಂದು ಘೋಷಿಸಲು ಫಿಟ್‌ನೆಸ್ ಪ್ರಮಾಣಪತ್ರ, ನಿಮ್ಮ PAN ಕಾರ್ಡ್, ಠೇವಣಿ ಮಾಡಬಹುದಾದ ಬ್ಯಾಂಕ್ ಖಾತೆಯ ವಿವರಗಳು, ಕ್ರಾಸ್ಡ್ ಚೆಕ್, ಕಾರು ಮಾಲೀಕರಿಂದ ದೃಢೀಕರಣ, ಮತ್ತು ಅನ್ವಯವಾಗುವಂತಿದ್ದರೆ ನೋಂದಾಯಿತ ಮಾಲೀಕರಿಂದ ಮರಣ ಅಥವಾ ಉತ್ತರಾಧಿಕಾರ ಪ್ರಮಾಣಪತ್ರ.

ವಾಹನವನ್ನು ಸ್ಕ್ರ್ಯಾಪ್ ಮಾಡುವುದರಿಂದ ನಿಮಗೆ ಬರುವ ಅಥವಾ ಖರ್ಚು ಮಾಡಬೇಕಾದ ಹಣ ಎಷ್ಟು?

ವಾಹನವನ್ನು ಸ್ಕ್ರ್ಯಾಪ್ ಮಾಡುವ ವೆಚ್ಚವನ್ನು ಅದರ ತೂಕದಿಂದ ನಿರ್ಧರಿಸಲಾಗುತ್ತದೆ. ಸ್ಕ್ರ್ಯಾಪ್ ಮಾಡಬೇಕಾದ ಪ್ರತಿ ಕಿಲೋಗ್ರಾಂ ಲೋಹದ ಭಾಗಗಳಿಗೆ ನೀವು ಸರಿಸುಮಾರು ರೂ 15 ಪಾವತಿಸಬೇಕಾದೀತು. ವಾಹನವು ಉತ್ತಮ ಸ್ಥಿತಿಯಲ್ಲಿದ್ದರೆ ಮತ್ತು ಅದರ ಭಾಗಗಳನ್ನು ಮಾರಾಟ ಮಾಡಬಹುದಾದರೆ, ನೀವು ಅದಕ್ಕೆ ತಕ್ಕಂತೆ ಹೆಚ್ಚಿನ ಬೆಲೆಯನ್ನು ಪಡೆಯಬಹುದು.

ಇನ್ನಷ್ಟು  ಪ್ರೀಮಿಯಂ ಲೇಖನಗಳಿಗಾಗಿ  ಇಲ್ಲಿ ಕ್ಲಿಕ್ ಮಾಡಿ

Published On - 10:36 am, Sat, 13 July 24