ಬಜೆಟ್ನಿಂದ ಷೇರುಪೇಟೆ ಅಲುಗಾಡಲು ಏನು ಕಾರಣ? ಮಾರುಕಟ್ಟೆಯಿಂದ ದೂರವಾಗ್ತಾರಾ ಹೂಡಿಕೆದಾರರು?
Budget effects on stock market: ಇಂದು ಮಂಗಳವಾರ ಮಂಡನೆಯಾದ ಬಜೆಟ್ನಿಂದಾಗಿ ಷೇರು ಮಾರುಕಟ್ಟೆ ಸಾಕಷ್ಟು ಕುಸಿತ ಕಂಡಿತು. ಸೆನ್ಸೆಕ್ಸ್, ನಿಫ್ಟಿ ಸೇರಿದಂತೆ ಪ್ರಮುಖ ಸೂಚ್ಯಂಕಗಳು ಹಿನ್ನಡೆ ಕಂಡವು. ಎಸ್ಟಿಟಿ ತೆರಿಗೆ ಹೆಚ್ಚಳ, ಎಲ್ಟಿಸಿಜಿ, ಎಸ್ಟಿಸಿಜಿ ತೆರಿಗೆ ಹೆಚ್ಚಳ, ಷೇರು ಮರುಖರೀದಿಸುವಾಗ ತೆರಿಗೆ ವಿಧಿಸಿದ್ದು ಈ ಹಿನ್ನಡೆಗೆ ಕಾರಣವಾಗಿರಬಹುದು.
ನವದೆಹಲಿ, ಜುಲೈ 23: ನಿನ್ನೆ ಬಜೆಟ್ ನಿರೀಕ್ಷೆಯಲ್ಲಿ ಗರಿಗೆದರಿದ್ದ ಷೇರು ಮಾರುಕಟ್ಟೆ ಇವತ್ತು ನಿರ್ಮಲಾ ಸೀತಾರಾಮನ್ ಬಜೆಟ್ ಮಂಡನೆ ಮಾಡುತ್ತಿರುವಂತೆಯೇ ಕುಸಿತಕ್ಕೊಳಗಾಯಿತು. ಬಿಎಸ್ಇ ಮತ್ತು ಎನ್ಎಸ್ಇಯ ಹೆಚ್ಚಿನ ಸೂಚ್ಯಂಕಗಳು ಕುಸಿತ ಕಂಡವು. ಸೆನ್ಸೆಕ್ಸ್ ಮತ್ತು ನಿಫ್ಟಿ ಸೂಚ್ಯಂಕ ಹೆಚ್ಚು ಸಂಖ್ಯೆಯ ಅಂಕಗಳ ಹಿನ್ನಡೆ ಕಂಡವು. ದಿನಾಂತ್ಯದ ವೇಳೆಗೆ ತುಸು ಚೇತರಿಕೆ ಕಂಡರೂ ಒಟ್ಟಾರೆ ಷೇರು ಮಾರುಕಟ್ಟೆಗೆ ಇಂದು ಹಿನ್ನಡೆಯ ದಿನವಾಗಿತ್ತು.
ಸೆನ್ಸೆಕ್ಸ್ನ ಪ್ರಮುಖ ಸೂಚ್ಯಂಕಗಳೆಲ್ಲವೂ ಕುಸಿತ ಕಂಡಿವೆ. ಐಟಿ, ವಾಹನ, ಕನ್ಸೂಮರ್, ಎಫ್ಎಂಸಿಜಿ ಇತ್ಯಾದಿ ಕೆಲವೇ ವಲಯವಾರು ಸೂಚ್ಯಂಕಗಳು ಮಾತ್ರವೇ ಹಸಿರು ಬಣ್ಣದಲ್ಲಿವೆ.
ಇದನ್ನೂ ಓದಿ: ಎಸ್ಟಿಟಿ, ಕ್ಯಾಪಿಟಲ್ ಗೇಯ್ನ್ ಟ್ಯಾಕ್ಸ್ ದರಗಳ ಹೆಚ್ಚಳ; ಷೇರು ಹೂಡಿಕೆದಾರರಿಗೆ ಬಜೆಟ್ ಕಹಿ
ಎನ್ಎಸ್ಇಯಲ್ಲೂ ನಿಫ್ಟಿ50 ಸೇರಿದಂತೆ ಪ್ರಮುಖ ಸೂಚ್ಯಂಕಗಳು ಹಿನ್ನಡೆ ಹೊಂದಿವೆ. ಐಟಿ, ಆಟೊ, ಫಾರ್ಮಾ, ಎಫ್ಎಂಸಿಜಿ, ಮೀಡಿಯಾ, ಕನ್ಸಂಪ್ಷನ್ ಇತ್ಯಾದಿ ಸೆಕ್ಟೋರಲ್ ಇಂಡೆಕ್ಸ್ಗಳು ಮಾತ್ರವೇ ಅಂಕ ಹೆಚ್ಚಿಸಿಕೊಂಡಿವೆ. ಒಟ್ಟಾರೆ ಮಿಡ್ಕ್ಯಾಪ್ ಮತ್ತು ಸ್ಮಾಲ್ಕ್ಯಾಪ್ ಸ್ಟಾಕ್ಗಳು ತೀರಾ ಕುಸಿತ ಕಂಡಿರುವುದು ಗಮನಾರ್ಹ.
ಷೇರು ಮಾರುಕಟ್ಟೆ ಕುಸಿಯಲು ಈ ತೆರಿಗೆ ಹೆಚ್ಚಳವೇ ಕಾರಣ
ಇಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ತಮ್ಮ ಬಜೆಟ್ನಲ್ಲಿ ಷೇರು ವ್ಯವಹಾರದಲ್ಲಿ ಮೂರು ರೀತಿಯ ತೆರಿಗೆ ಹೆಚ್ಚಳ ಕ್ರಮ ಕೈಗೊಂಡಿದ್ದಾರೆ. ಮೊದಲನೆಯದು, ಸೆಕ್ಯೂರಿಟಿ ಟ್ರಾನ್ಸಾಕ್ಷನ್ ಟ್ಯಾಕ್ಸ್ ಅಥವಾ ಎಸ್ಟಿಟಿ. ಎರಡನೆಯದು ಕ್ಯಾಪಿಟಲ್ ಗೇಯ್ನ್ ಟ್ಯಾಕ್ಸ್ಗಳಲ್ಲಿ ಹೆಚ್ಚಳ. ಅಂದರೆ ದೀರ್ಘಾವಧಿ ಲಾಭ ಹೆಚ್ಚಳ ತೆರಿಗೆ ಮತ್ತು ಅಲ್ಪಾವಧಿ ಲಾಭ ಹೆಚ್ಚಳ ತೆರಿಗೆಯನ್ನು ಏರಿಸಲಾಗಿದೆ. ಮೂರನೆಯದು, ಷೇರು ಮರುಖರೀದಿಸುವಾಗ ತೆರಿಗೆ ಹಾಕಲು ನಿರ್ಧರಿಸಲಾಗಿದೆ.
ಈ ಮೂರೂ ತೆರಿಗೆ ಕೂಡ ಸರ್ಕಾರಕ್ಕೆ ಆದಾಯ ಹೆಚ್ಚಿಸಲಿವೆ. ಎಫ್ ಅಂಡ್ ಒ ಟ್ರೇಡಿಂಗ್ನಲ್ಲಿ ಮಾತ್ರವೇ ಎಸ್ಟಿಟಿ ತೆರಿಗೆ ಏರಿಸಲಾಗಿರುವುದು. ಫ್ಯೂಚರ್ಸ್ ಟ್ರೇಡಿಂಗ್ನಲ್ಲಿ ಶೇ. 0.0125ರಷ್ಟಿದ್ದ ಸೆಕ್ಯೂರಿಟಿ ಟ್ರಾನ್ಸಾಕ್ಷನ್ ಟ್ಯಾಕ್ಸ್ ಅನ್ನು ಶೇ. 0.02ಕ್ಕೆ ಏರಿಸಲಾಗಿದೆ. ಆಪ್ಷನ್ಸ್ ಟ್ರೆಡಿಂಗ್ನಲ್ಲಿ ಎಸ್ಟಿಟಿಯನ್ನು ಶೇ. 0.0625ರಿಂದ ಶೇ. 0.1ಕ್ಕೆ ಏರಿಸಲಾಗಿದೆ.
ಇನ್ನು, ಷೇರು ಮಾರುವಾಗ ಅನ್ವಯ ಆಗುವ ತೆರಿಗೆ ಪೈಕಿ ಎಸ್ಟಿಸಿಜಿ ತೆರಿಗೆಯನ್ನು ಶೇ. 15ರಿಂದ ಶೇ. 20ಕ್ಕೆ ಹೆಚ್ಚಿಸಲಾಗಿದೆ. ಎಲ್ಟಿಸಿಜಿ ತೆರಿಗೆಯನ್ನು ಶೇ. 10ರಿಂದ ಶೇ. 12.50ಗೆ ಹೆಚ್ಚಿಸಲಾಗಿದೆ.
ಇನ್ನಷ್ಟು ಬಜೆಟ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ