ಇಟಿಎಫ್ ರಿಟರ್ನ್​ನ ಮರುಹೂಡಿಕೆ ನಿಯಮ ಸೇರಿದಂತೆ ಇಪಿಎಫ್​ನಲ್ಲಿ ಮಹತ್ವದ ಬದಲಾವಣೆ

ನವದೆಹಲಿ, ಡಿಸೆಂಬರ್ 2: ಮಹತ್ವದ ಬೆಳವಣಿಗೆಯೊಂದರಲ್ಲಿ ಇಪಿಎಫ್​ಒ ಸಂಸ್ಥೆಯ ಕೇಂದ್ರೀಯ ಟ್ರಸ್ಟೀ ಮಂಡಳಿ (ಸಿಬಿಟಿ) ಹೊಸ ಹೂಡಿಕೆ ನೀತಿಗೆ ಅನುಮೋದನೆ ನೀಡಿದೆ. ಎಕ್ಸ್​ಚೇಂಜ್ ಟ್ರೇಡೆಡ್ ಫಂಡ್​ಗಳಲ್ಲಿ (ಇಟಿಎಫ್) ಮಾಡಿದ ಹೂಡಿಕೆಯನ್ನು ರಿಟರ್ನ್ ಪಡೆಯುವಾಗಿನ ನೀತಿಯಲ್ಲಿ ತುಸು ಬದಲಾವಣೆ ಮಾಡಲಾಗಿದೆ. ಇಟಿಫ್​ಗಳಿಂದ ಬಂದ ಹಣದಲ್ಲಿ ಶೇ. 50ರಷ್ಟು ಮೊತ್ತವನ್ನು ಕೇಂದ್ರದ ಸರ್ಕಾರಿ ಉದ್ದಿಮೆಗಳಲ್ಲಿ ಮತ್ತು ಭಾರತ್ 22 ಫಂಡ್​ಗಳಲ್ಲಿ ಮರು ಹೂಡಿಕೆ ಮಾಡಬೇಕೆನ್ನುವುದು ಸೇರಿದಂತೆ ವಿವಿಧ ಮಾರ್ಗಸೂಚಿಗಳಿಗೆ ಇಪಿಎಫ್​ಒನ ಸೆಂಟ್ರಲ್ ಬೋರ್ಡ್ ಅಫ್ ಟ್ರಸ್ಟೀಸ್ ಅನುಮೋದನೆ ನೀಡಿರುವುದು ತಿಳಿದುಬಂದಿದೆ.

ಶೇ. 50ರಷ್ಟನ್ನು ಸಿಪಿಎಸ್​ಇ ಮತ್ತು ಭಾರತ್ 22 ಫಂಡ್​ಗಳಿಗೆ ಹಾಕಿದಲ್ಲಿ ಅಲ್ಲಿ ಕನಿಷ್ಠ ಹೂಡಿಕೆ ಅವಧಿ 5 ವರ್ಷ ಇರಬೇಕು. ಹಾಗೆಯೇ, ಉಳಿದ ಶೇ. 50ರಷ್ಟು ಹಣವನ್ನು ಗವರ್ನ್ಮೆಂಟ್ ಬಾಂಡ್, ಕಾರ್ಪೊರೇಟ್ ಬಾಂಡ್ ಇತ್ಯಾದಿ ಇತರ ಹಣಕಾಸು ಸಾಧನಗಳನ್ನು ಹೂಡಿಕೆ ಮಾಡಲಾಗುತ್ತದೆ ಎಂದು ಫೈನಾನ್ಷಿಯಲ್ ಎಕ್ಸ್​ಪ್ರೆಸ್ ಪತ್ರಿಕೆಯಲ್ಲಿ ವರದಿಯಾಗಿದೆ.

ಇದನ್ನೂ ಓದಿ: ಕ್ಯೂಐಪಿ ಮೂಲಕ ಈ ವರ್ಷ ಒಂದು ಲಕ್ಷ ಕೋಟಿ ರೂ ದಾಟಿದ ಕಾರ್ಪೊರೇಟ್ ಫಂಡಿಂಗ್; ಇತಿಹಾಸದಲ್ಲೇ ಇದು ದೊಡ್ಡ ಮೊತ್ತ

ಇಪಿಎಫ್ ಸ್ಕೀಮ್​ನಲ್ಲಿ ಮಹತ್ವದ ತಿದ್ದುಪಡಿ

1952ರ ಇಪಿಎಫ್ ಸ್ಕೀಮ್​ಗೆ ಮಹತ್ವದ ತಿದ್ದುಪಡಿ ತರುವ ಕಾರ್ಯಕ್ಕೂ ಸಿಬಿಟಿಯಿಂದ ಅನುಮೋದನೆ ಸಿಕ್ಕಿದೆ. ಈಗಿರುವ ನಿಯಮದ ಪ್ರಕಾರ ಯಾವುದೇ ತಿಂಗಳಲ್ಲಿ 24ನೇ ತಾರೀಖಿನವರೆಗೆ ಸೆಟಲ್ ಆದ ಕ್ಲೇಮ್​ಗಳಲ್ಲಿ ಹಿಂದಿನ ತಿಂಗಳವರೆಗೆ ಮಾತ್ರವೇ ಬಡ್ಡಿ ನೀಡಲಾಗುತ್ತದೆ. ಉದಾಹರಣೆಗೆ, ಜುಲೈ 24ಕ್ಕೆ ನಿಮ್ಮ ಕ್ಲೇಮ್ ಸೆಟಲ್ ಆಗಿದ್ದಲ್ಲಿ ಜೂನ್​ವರೆಗೆ ಮಾತ್ರ ಬಡ್ಡಿ ಸಿಗುತ್ತದೆ. ಜುಲೈ ತಿಂಗಳು ಲೆಕ್ಕಕ್ಕೆ ಇರುವುದಿಲ್ಲ.

ತಿದ್ದುಪಡಿ ಬಳಿಕ ಬರಲಿರುವ ಹೊಸ ನಿಯಮ ಪ್ರಕಾರ ನಿಮಗೆ ಕ್ಲೇಮ್ ದಿನದವರೆಗೂ ಬಡ್ಡಿ ಸಿಗುತ್ತದೆ. ಇದರಿಂದ ಇಪಿಎಫ್ ಸದಸ್ಯರಿಗೆ ತುಸು ಅನುಕೂಲವಾಗುತ್ತದೆ.

ಇದನ್ನೂ ಓದಿ: ಆದಾಯ ತೆರಿಗೆ ಪಾವತಿ: ಮಹಿಳೆಯರ ಸಂಖ್ಯೆಯಲ್ಲಿ ಶೇ. 25ರಷ್ಟು ಏರಿಕೆ; ಎರಡು ಕೋಟಿಗೂ ಅಧಿಕ ಮಹಿಳೆಯರಿಂದ ಐಟಿಆರ್ ಸಲ್ಲಿಕೆ

ಇಪಿಎಫ್​ಒ ಅಮ್ನೆಸ್ಟಿ ಸ್ಕೀಮ್​ಗೆ ಶಿಫಾರಸು

ಮತ್ತೊಂದು ಮಹತ್ವದ ಕ್ರಮದಲ್ಲಿ ಇಪಿಎಫ್​ಒನ ಸಿಬಿಟಿಯು ಅಮ್ನೆಸ್ಟಿ ಸ್ಕೀಮ್ ಜಾರಿಗೊಳಿಸಲು ಶಿಫಾರಸು ಮಾಡಿದೆ. ಅಮ್ನೆಸ್ಟಿ ಎಂದರೆ ಕ್ಷಮಾದಾನ. ಇಪಿಎಫ್​ಒನ ನಿಯಮಗಳನ್ನು ಉಲ್ಲಂಘಿಸಿದ ಅಥವಾ ಹಿಂದಿನ ತಪ್ಪುಗಳನ್ನು ಸರಿಪಡಿಸಲು ಮುಂದಾಗುವ ಕಂಪನಿಗಳಿಗೆ (ಉದ್ಯೋಗದಾತರು) ಸ್ವಯಂ ಆಗಿ ಆ ಮಾಹಿತಿ ಅಥವಾ ವಿವರ ಬಹಿರಂಗಪಡಿಸಲು ಅವಕಾಶ ನೀಡಬೇಕು. ತಪ್ಪು ತಿದ್ದುಕೊಳ್ಳಲು ಮುಂದಾಗುವ ಇಂಥ ಕಂಪನಿಗಳ ಮೇಲೆ ಕಾನೂನು ಕ್ರಮ ಜರುಗಿಸಬಾರದು ಅಥವಾ ದಂಡ ವಿಧಿಸಬಾರದು. ಇದು ಸಿಬಿಟಿ ಶಿಫಾರಸು ಮಾಡಿರುವ 2024ರ ಇಪಿಎಫ್​ಒ ಅಮ್ನೆಸ್ಟಿ ಸ್ಕೀಮ್​ನ ಉದ್ದೇಶವಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ