ಎರಡು ವರ್ಷದಲ್ಲಿ ಪಿಎಫ್ ಎಕ್ಸೆಂಪ್ಷನ್ ಬಿಟ್ಟುಕೊಟ್ಟ 27 ಸಂಸ್ಥೆಗಳು; ಇಪಿಎಫ್​ಒ ವ್ಯಾಪ್ತಿಗೆ ಸೇರ್ಪಡೆಯಾದ 30,000 ಉದ್ಯೋಗಿಗಳು

ನವದೆಹಲಿ, ಜುಲೈ 14: ಕಳೆದ ಎರಡು ವರ್ಷದಲ್ಲಿ 27 ಸಂಸ್ಥೆಗಳು ತಮ್ಮ ಪಿಎಫ್ ಎಕ್ಸೆಂಪ್ಷನ್ ಅನ್ನು ಬಿಟ್ಟುಕೊಟ್ಟಿವೆ. ಇದರೊಂದಿಗೆ ಆ ಸಂಸ್ಥೆಗಳ ಉದ್ಯೋಗಿಗಳ ಪಿಎಫ್ ಫಂಡ್ ನಿರ್ವಹಣೆ ಹೊಣೆ ಇಪಿಎಫ್​ಒಗೆ ವರ್ಗಾವಣೆ ಆದಂತಾಗಿದೆ. ಈ ಕ್ರಮದಿಂದಾಗಿ ಈ 27 ಸಂಸ್ಥೆಗಳಲ್ಲಿನ 30,000 ಉದ್ಯೋಗಿಗಳ ಪಿಎಫ್ ಖಾತೆ ನಿರ್ವಹಣೆ, ಮತ್ತು ಆ ಖಾತೆಗಳಲ್ಲಿನ 1,688 ಕೋಟಿ ರೂ ಹಣವನ್ನು ಇಪಿಎಫ್​ಒ ಸಂಸ್ಥೆಯೇ ನಿರ್ವಹಣೆ ಮಾಡುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಇಪಿಎಫ್​​ಒ ಸಂಸ್ಥೆಯ ಕಾರ್ಯನಿರ್ವಹಣೆಯ ವೈಖರಿ ಬದಲಾಗಿದ್ದು, ಹಣ ಕ್ಲೇಮ್ ಮಾಡುವ ಕ್ರಮ, ಸೆಟಲ್ಮೆಂಟ್ ಮಾಡಲಾಗುವ ಸಮಯ, ವಿವಿಧ ಸೇವೆಗಳಲ್ಲಿ ಸುಧಾರಣೆ ಇವೆಲ್ಲವೂ ಸಕಾರಾತ್ಮಕ ರೀತಿಯಲ್ಲಿ ಬದಲಾವಣೆ ಆಗಿದೆ. ಇದರಿಂದಾಗಿ, ಪಿಎಫ್ ಎಕ್ಸೆಂಪ್ಷನ್ ಇರುವ ಸಂಸ್ಥೆಗಳು ಒಂದೊಂದಾಗಿ ತಮ್ಮ ಜವಾಬ್ದಾರಿಯನ್ನು ಇಪಿಎಫ್​ಒಗೆ ವರ್ಗಾಯಿಸುತ್ತಿವೆ.

ಪಿಎಫ್ ಎಕ್ಸೆಂಪ್ಷನ್ ಎಂದರೇನು?

ಇಪಿಎಫ್ ಯೋಜನೆ ಪ್ರಕಾರ ಒಂದು ಸಂಸ್ಥೆಯ ಉದ್ಯೋಗಿಗೆ ಪಿಎಫ್ ಖಾತೆ ತೆರೆಯಲಾಗುತ್ತದೆ. ಅದಕ್ಕೆ ಉದ್ಯೋಗಿಯ ಸಂಬಳದಿಂದ ಒಂದಷ್ಟು ಹಣವನ್ನು ಸೇರಿಸಲಾಗುತ್ತದೆ. ಕಂಪನಿಯೂ ಸಮಪಾಲು ಹಾಕುತ್ತದೆ. ಈ ಖಾತೆಯಲ್ಲಿ ಜಮೆಯಾಗುವ ಹಣವನ್ನು ಇಪಿಎಫ್​ಒ ಸಂಸ್ಥೆ ಬಾಂಡ್ ಮಾರುಕಟ್ಟೆ ಇತ್ಯಾದಿ ಕಡೆ ಹೂಡಿಕೆ ಮಾಡುತ್ತದೆ. ಈ ಖಾತೆಯಲ್ಲಿರುವ ಹಣಕ್ಕೆ ನಿರ್ದಿಷ್ಟ ವಾರ್ಷಿಕ ಬಡ್ಡಿಹಣವನ್ನು ಇಪಿಎಫ್​ಒ ಸೇರಿಸುತ್ತದೆ. ಆದರೆ, ಕೆಲ ಸಂಸ್ಥೆಗಳು ತಮ್ಮ ಉದ್ಯೋಗಿಗಳ ಇಪಿಎಫ್ ಖಾತೆಯಲ್ಲಿರುವ ಹಣವನ್ನು ತಾವೇ ನಿರ್ವಹಣೆ ಮಾಡುವುದಾಗಿ ಹೇಳಿ ಇಪಿಎಫ್​ಒದಿಂದ ಎಕ್ಸೆಂಪ್ಷನ್​ಗೆ ಅನುಮತಿ ಪಡೆದಿರುತ್ತವೆ.

ಇದನ್ನೂ ಓದಿ: EPF: 2023-24ರ ಸಾಲಿನಲ್ಲಿ ಇಪಿಎಫ್ ಹಣಕ್ಕೆ ಶೇ. 8.25ರ ಬಡ್ಡಿ; ಹಣಕಾಸು ಸಚಿವಾಲಯದಿಂದ ಅನುಮೋದನೆ

2023ರ ಮಾರ್ಚ್ 31ರವರೆಗೆ ಪಿಎಫ್ ಎಕ್ಸೆಂಪ್ಷನ್ ಪಡೆದ ಸಂಸ್ಥೆಗಳ ಸಂಖ್ಯೆ 1,002 ಇದೆ. ಒಟ್ಟು 31,20,323 ಪಿಎಫ್ ಸದಸ್ಯರು ಇಲ್ಲಿದ್ದಾರೆ. ಒಟ್ಟಾರೆ ಇವರ ಖಾತೆಯಲ್ಲಿರುವ ಮತ್ತ 3.52 ಲಕ್ಷ ಕೋಟಿ ರೂ. ಈ ಒಂದು ಸಾವಿರ ಕಂಪನಿಗಳ ಪೈಕಿ 27 ಕಂಪನಿಗಳು ಕಳೆದ ಎರಡು ವರ್ಷದಲ್ಲಿ ತಮ್ಮ ಇಪಿಎಫ್ ಎಕ್ಸೆಂಪ್ಷನ್ ಸೌಲಭ್ಯವನ್ನು ಮರಳಿಸಿವೆ.

ಇಪಿಎಫ್​ಒ ಬಳಿ ಒಟ್ಟಾರೆ ಇರುವ ಫಂಡ್ 2022-23ರ ಹಣಕಾಸು ವರ್ಷದಲ್ಲಿ 21.3 ಲಕ್ಷ ಕೋಟಿ ರೂ. ವರ್ಷದಿಂದ ವರ್ಷಕ್ಕೆ ಈ ಫಂಡ್ ಬೆಳೆಯುತ್ತಲೇ ಇದೆ. 2021-22ರಲ್ಲಿ 18.3 ಲಕ್ಷ ಕೋಟಿ ರೂ ಇತ್ತು. ಒಂದು ವರ್ಷದಲ್ಲಿ ಶೇ. 16.7ರಷ್ಟು ಫಂಡ್ ಗಾತ್ರ ಬೆಳೆದಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ