How to merge two UAN: ಪಿಎಫ್​ ಖಾತೆದಾರರು ಒಂದಕ್ಕಿಂತ ಹೆಚ್ಚು ಯುಎಎನ್​ ಹೊಂದಿದ್ದರೆ ನಿಯಮಬಾಹಿರ; ಇಂಥ ಸನ್ನಿವೇಶ ಏನು ಮಾಡಬೇಕು?

How to merge two UAN: ಪಿಎಫ್​ ಖಾತೆದಾರರು ಒಂದಕ್ಕಿಂತ ಹೆಚ್ಚು ಯುಎಎನ್​ ಹೊಂದಿದ್ದರೆ ನಿಯಮಬಾಹಿರ; ಇಂಥ ಸನ್ನಿವೇಶ ಏನು ಮಾಡಬೇಕು?
ಪ್ರಾತಿನಿಧಿಕ ಚಿತ್ರ

ಒಬ್ಬ ಉದ್ಯೋಗಿ ಎಷ್ಟು ಉದ್ಯೋಗ ಬದಲಾಯಿಸಬಹುದು, ಇಪಿಎಫ್​ ಖಾತೆಯ ಗುರುತಿನ ಸಂಖ್ಯೆ ಬದಲಾಗಬಹುದು. ಆದರೆ ಯುಎಎನ್ (ಯೂನಿಕ್ ಐಡೆಂಟಿಫಿಕೇಷನ್ ನಂಬರ್) ಒಂದೇ ಇರಬೇಕು. ಒಂದು ವೇಳೆ ಎರಡಿದ್ದಲ್ಲಿ ಅದು ನಿಯಮ ಬಾಹಿರ ಆಗುತ್ತದೆ. ಹಾಗಾಗಿದ್ದಲ್ಲಿ ಏನು ಮಾಡಬೇಕು ಎಂಬ ಬಗ್ಗೆ ವಿವರವಾದ ಮಾಹಿತಿ ಈ ಲೇಖನದಲ್ಲಿದೆ.

TV9kannada Web Team

| Edited By: Srinivas Mata

Jun 28, 2021 | 12:04 PM

ಉದ್ಯೋಗಿಗಳ ನಿವೃತ್ತಿ ಬದುಕಿಗಾಗಿ ಸಾಮಾಜಿಕ ಭದ್ರತೆಯಂತೆ ಇರುವುದು ಪ್ರಾವಿಡೆಂಟ್ ಫಂಡ್ (ಕಾರ್ಮಿಕರ ಭವಿಷ್ಯ ನಿಧಿ). ಇಂಥ ಪ್ರಾವಿಡೆಂಟ್ ಫಂಡ್ ಖಾತೆಯ ಜತೆಗೆ ಪ್ರತಿ ಉದ್ಯೋಗಿಗೂ ಇಪಿಎಫ್​ಒದಿಂದ (ಎಂಪ್ಲಾಯೀಸ್ ಪ್ರಾವಿಡೆಂಟ್ ಫಂಡ್ ಆರ್ಗನೈಸೇಷನ್) ಯೂನಿವರ್ಸಲ್ ಐಡಿಂಟಿಫಿಕೇಷನ್ ನಂಬರ್ (ಯುಎಎನ್) ನೀಡಲಾಗುತ್ತದೆ. ಹೀಗೆ ನೀಡುವುದರಿಂದ ಒಬ್ಬ ವ್ಯಕ್ತಿಯ ಉದ್ಯೋಗವನ್ನು ಬದಲಾವಣೆ ಮಾಡಿದರೂ ಈ ಯುಎಎನ್​ನಲ್ಲಿ ಬದಲಾವಣೆ ಆಗಲ್ಲ. ಹೊಸದಾಗಿ ಕೆಲಸಕ್ಕೆ ಸೇರಿದಾಗ ಇಪಿಎಫ್​ಒದಿಂದ ಹೊಸ ಸದಸ್ಯತ್ವ ಗುರುತಿನ ಸಂಖ್ಯೆಯನ್ನು ಪಿಎಫ್ ಅಕೌಂಟ್​ಗೆ ವಿತರಿಸಲಿದ್ದು, ಅದು ಈಗಾಗಲೇ ಇರುವ ಯುಎಎನ್​ ಜತೆಗೆ ಜೋಡಣೆ ಆಗಿರುತ್ತದೆ. ಒಬ್ಬ ಉದ್ಯೋಗಿ ಎಷ್ಟು ಉದ್ಯೋಗವನ್ನು ಬದಲಾವಣೆ ಮಾಡಿಯೂ ವಿವಿಧ ಖಾತೆಗಳನ್ನು ಹೊಂದಿದ್ದರೂ ಅವೆಲ್ಲವೂ ಒಂದೇ ಯುಎಎನ್ ಅಡಿಯಲ್ಲಿ ಬರುತ್ತವೆ. ಉದ್ಯೋಗದಾತರು ಬೇರೆಯವರಾಗಬಹುದು, ಆದರೆ ಯುಎಎನ್ ಒಂದೇ ಇರುತ್ತದೆ. ಆ ಮೂಲಕ ಸದಸ್ಯರಿಗೆ ತಮ್ಮ ಪಿಎಫ್​ ಖಾತೆಗೆ ಸಂಬಂಧಿಸಿದ ಎಲ್ಲ ಮಾಹಿತಿ ಒಂದೇ ಕಡೆ ಸಿಗುತ್ತದೆ.

ಯುಎಎನ್​ ಹೋಮ್​ಪೇಜ್​ಗೆ ತೆರಳಿ ಆನ್​ಲೈನ್​ನಲ್ಲೇ ಪಿಎಫ್​ ಖಾತೆಯ ಪಾಸ್​ಬುಕ್ ಡೌನ್​ಲೋಡ್​ ಮಾಡಬಹುದು, ವರ್ಗಾವಣೆ ಮನವಿ ಮತ್ತು ಹೊಂದಾಣಿಕೆ (ಅಡ್ಜಸ್ಟ್​ಮೆಂಟ್ಸ್) ಕೂಡ ಮಾಡಬಹುದು. ಈಗಾಗಲೇ ಯುಎಎನ್​​ ಇದೆ ಎಂದಿಟ್ಟುಕೊಳ್ಳೋಣ. ಹೊಸದಾಗಿ ಕೆಲಸಕ್ಕೆ ಸೇರಿದಾಗ ಅಲ್ಲಿ ಅದನ್ನು ತಿಳಿಸಿದರೆ, ಈಗಾಗಲೇ ಇರುವ ಯುಎಎನ್​ ಜತೆಗೆ ಸದಸ್ಯತ್ವ ಗುರುತಿನ ಐ.ಡಿ. ಜೋಡಣೆ ಮಾಡಲಾಗುತ್ತದೆ. ಆದರೆ ಕೆಲವು ಸಂದರ್ಭಗಳಲ್ಲಿ ಉದ್ಯೋಗಿಗೆ ಹೊಸ ಯುಎಎನ್ ವಿತರಿಸಲಾಗುತ್ತದೆ. ಈ ಹಿಂದೆ ಉದ್ಯೋಗ ಮಾಡುತ್ತಿದ್ದ ಸ್ಥಳದಲ್ಲಿ ಕೆಲಸ ಬಿಟ್ಟ ದಿನವನ್ನು ಅಪ್​ಡೇಟ್​ ಉದ್ಯೋಗದಾತರು ಮಾಡದಿದ್ದಾಗ ಹಾಗೂ/ಅಥವಾ ಉದ್ಯೋಗಿಯು ತನ್ನ ಯುಎಎನ್​ ಬಗ್ಗೆ ಹೊಸದಾಗಿ ಕೆಲಸಕ್ಕೆ ಸೇರಿದ ಸ್ಥಳದಲ್ಲಿ ಮಾಹಿತಿ ನೀಡದಿದ್ದಾಗ ಈ ಎರಡೂ ಸಂದರ್ಭದಲ್ಲಿ ಎರಡು ಯುಎಎನ್ ವಿತರಣೆ ಆದಂತಾಗುತ್ತದೆ. ಆದ್ದರಿಂದ ಉದ್ಯೋಗ ಬದಲಾವಣೆ ಮಾಡಿದ ಮೇಲೆ ಕಡ್ಡಾಯವಾಗಿ ತಮ್ಮ ಯುಎಎನ್​ ಅನ್ನು ನೀಡಬೇಕು.

ಹೀಗೆ ಎರಡು ಯುಎಎನ್ ಆಗಿದೆ ಎಂದು ಗೊತ್ತಾದ ತಕ್ಷಣ ಒಂದೋ ತಕ್ಷಣವೇ ಎರಡನ್ನೂ ಸೇರಿಸಬೇಕು ಅಥವಾ ಒಂದು ಖಾತೆಯನ್ನು ಡಿ ಆ್ಯಕ್ಟಿವೇಟ್ ಮಾಡಬೇಕು. ಹೀಗೆ ಒಂದು ವೇಳೆ ಮಾಡದಿದ್ದಲ್ಲಿ ಪೆನ್ಷನ್ ಅನುಕೂಲ ದೊರೆಯುವುದಿಲ್ಲ ಮತ್ತು ಈ ಹಿಂದಿನ ಕಂಪೆನಿ ಜಮೆ ಮಾಡಿದ ಮೊತ್ತ ಕೂಡ ಹೊಸ ಖಾತೆಗೆ ಸೇರ್ಪಡೆ ಆಗಲ್ಲ. ಒಂದು ವೇಳೆ ಎರಡು ಯುಎಎನ್​ ಇದೆ ಅಂತಾದರೆ ತಕ್ಷಣವೇ ಮೊದಲಿನ ಖಾತೆಯನ್ನು ಡಿ ಆ್ಯಕ್ಟಿವೇಟ್​ ಮಾಡಬೇಕು. ಏಕೆಂದರೆ, ಹೀಗೆ ಎರಡು ಯುಎಎನ್ ಹೊಂದಿರುವುದು ನಿಯಮಗಳಿಗೆ ವಿರುದ್ಧ. ಇಪಿಎಫ್​ ಖಾತೆಯ ಎಲ್ಲ ಸದಸ್ಯರು ಒಂದು ಯುಎಎನ್​ ಮಾತ್ರ ಹೊಂದಿರಬೇಕು. ಮೊದಲೇ ಹೇಳಿದಂತೆ ಯಾರ ಬಳಿ ಎರಡು ಯುಎಎನ್​ ಇದೆಯೋ ಅಂಥವರು ಯಾವುದಾದರೂ ಒಂದು ಖಾತೆಗೆ ಇಪಿಎಫ್​ ವರ್ಗಾವಣೆ ಮಾಡಿ, ಹಿಂದಿನದನ್ನು ಡಿ​ ಆ್ಯಕ್ಟಿವೇಟ್​ ಮಾಡಬೇಕು.

ಎರಡು ಯುಎಎನ್​ ಖಾತೆಯನ್ನು ಒಗ್ಗೂಡಿಸುವುದು ಹೇಗೆ? ಮೊದಲಿಗೆ ಉದ್ಯೋಗದಾತರಿಗೆ ಅಂದರೆ, ಪ್ರಸ್ತುತ ಕೆಲಸ ಮಾಡುವ ಸಂಸ್ಥೆಗೆ ಈ ಬಗ್ಗೆ ಮಾಹಿತಿ ನೀಡಬೇಕು ಅಥವಾ ಇಪಿಎಫ್​ಗೆ ಈ ಬಗ್ಗೆ ಮಾಹಿತಿ ನೀಡಿ, ಹಿಂದಿನ ಯುಎಎನ್ ಬ್ಲಾಕ್​ ಮಾಡಿ, ಅದರಲ್ಲಿ ಇರುವ ಬಾಕಿಯನ್ನು ಸದ್ಯಕ್ಕೆ ಸಕ್ರಿಯವಾಗಿರುವ ಖಾತೆಗೆ ವರ್ಗಾವಣೆ ಮಾಡುವಂತೆ ಕೇಳಿಕೊಳ್ಳಬೇಕು. ಬ್ಲಾಕ್​ ಆದ ಯುಎಎನ್​ಗೆ ಹೊಂದಿಕೊಂಡಿರುವ ಪಿಎಫ್​ ಖಾತೆಯಿಂದ ಸಕ್ರಿಯ ಆಗಿರುವ ಖಾತೆಗೆ ವರ್ಗಾವಣೆ ಆಗಲು ಉದ್ಯೋಗಿಯು ಕ್ಲೇಮ್ ಫೈಲ್ ಮಾಡಬೇಕು. ಈ ಸಮಸ್ಯೆಯನ್ನು ಬಗೆಹರಿಸುವುದಕ್ಕೆ ಯುಎಎನ್​ನಿಂದ ದೃಢೀಕರಣ ಆಗುತ್ತದೆ. uanepf@epfindia.gov.in -ಈ ಇಮೇಲ್​ ವಿಳಾಸಕ್ಕೆ Subject (ವಿಷಯ) ಎಂದಿರುವ ಸಾಲಿನಲ್ಲಿ ಹಳೇ ಹಾಗೂ ಹೊಸ ಯುಎಎನ್ ಹಾಕಿ ಮೇಲ್​ ಕಳುಹಿಸಬೇಕು. ಇದಕ್ಕೆ ಸಮಯ ತೆಗೆದುಕೊಳ್ಳುತ್ತದೆ.

ಹೊಸದಕ್ಕೆ ಹಣದ ವರ್ಗಾವಣೆ ಆಗುವುದರೊಂದಿಗೆ ಹಳೆಯದು ಡಿ ಆ್ಯಕ್ಟಿವೇಟ್ ಆಗುತ್ತದೆ. ವರ್ಗಾವಣೆಗೆ ಮನವಿ ಸಲ್ಲಿಸಿದ ಮೇಲೆ ಇಪಿಎಫ್​ಒದಿಂದ ವರ್ಗಾವಣೆ ಕ್ಲೇಮ್​ ದೃಢೀಕರಣ ಆಗುತ್ತದೆ. ಎರಡೂ ಯುಎಎನ್ ಜೋಡಣೆ ಮಾಡಿ, ವರ್ಗಾವಣೆ ಪ್ರಕ್ರಿಯೆ ಪೂರ್ಣಗೊಂಡ ಮೇಲೆ ಹಳೆಯದನ್ನು ಇಪಿಎಫ್​ಒದಿಂದ ಡಿ ಆ್ಯಕ್ಟಿವೇಟ್​ ಮಾಡಲಾಗುತ್ತದೆ. ಎರಡು ಯುಎಎನ್​ ಒಗ್ಗೂಡಿಸುವ ಕೆಲಸ ತಾನಾಗಿಯೇ ಮುಗಿಯುತ್ತದೆ. ಒಂದು ಸಲ ಇಪಿಎಫ್​ಒದಿಂದ ಹೊಸ ಯುಎಎನ್​ ದೃಢೀಕರಣವಾದ ನಂತರ ಅದನ್ನು ಪಿಎಫ್​ ಖಾತೆ ಜತೆಗೆ ಜೋಡಿಸಲಾಗುತ್ತದೆ.

ಅಂದಹಾಗೆ, ಎರಡರ ಪೈಕಿ ಒಂದು ಯುಎಎನ್ ಆಟೋಮೆಟಿಕ್ ಆಗಿ ಡಿ ಆ್ಯಕ್ಟಿವೇಟ್ ಆಗುವುದಕ್ಕೆ ಇನ್ನೂ ಒಂದು ವಿಧಾನ ಇದೆ. ಅದು ಈಗಾಗಲೇ ವಿವರಿಸಿದ್ದಕ್ಕಿಂತ ಕಡಿಮೆ ಸಮಯದಲ್ಲಿ ಮುಗಿಯುತ್ತದೆ. ಆ ಬಗ್ಗೆ ಹಂತಹಂತವಾದ ವಿವರಣೆಗೆ ಮುಂದೆ ಓದಿ.

ಹಂತ 1: ಇಪಿಎಫ್​ಒ ಪೋರ್ಟಲ್​ಗೆ ಭೇಟಿ ನೀಡಿ. ಹಂತ 2: ದಾಖಲೆಗಳನ್ನು ಬಳಸಿ ಪ್ರವೇಶಿಸಬೇಕು. ಹಂತ 3: ಮೆನು ಬಾರ್​ನಲ್ಲಿ “Claim” ಎಂಬುದರ ಮೇಲೆ ಕ್ಲಿಕ್ ಮಾಡಬೇಕು. ಹಂತ 4: ಆನ್​ಲೈನ್ ವರ್ಗಾವಣೆ ಕ್ಲೇಮ್​ಗೆ “Request for Transfer of account” ಮೇಲೆ ಕ್ಲಿಕ್ ಮಾಡಬೇಕು. ಹಂತ 5: Captcha ನಮೂದಿಸಿ ಮತ್ತು GET PIN ಎಂಬುದರ ಮೇಲೆ ಕ್ಲಿಕ್ ಮಾಡಿ. ಹಂತ 6: ನೋಂದಾಯಿತ ಮೊಬೈಲ್ ಫೋನ್​ ಸಂಖ್ಯೆಗೆ PIN ಬಂದ ಮೇಲೆ, ಅದನ್ನು ನಮೂದಿಸಿ, ಆನ್​ಲೈನ್ ಕ್ಲೇಮ್ ಅರ್ಜಿಯನ್ನು ಸಲ್ಲಿಸಬಹುದು.

ಗಮನಿಸಬೇಕಾದ ಅಂಶ ಏನು ಗೊತ್ತಾ? ಯಾವಾಗ ಇಪಿಎಫ್​ ವರ್ಗಾವಣೆಗೆ ಮನವಿ ಮಾಡಲಾಗುತ್ತದೋ ಆಗಲೇ ಇಪಿಎಫ್​ಒ ಸಾಧನವು ತಾನಾಗಿಯೇ ನಕಲಿ (ಡೂಪ್ಲಿಕೇಟ್) ಯುಎಎನ್​ ಅನ್ನು ಪತ್ತೆ ಮಾಡಿಬಿಡುತ್ತದೆ. ಒಂದು ಸಲ ಐಡಿಂಟಿಫಿಕೇಷನ್ ಪ್ರಕ್ರಿಯೆಯು ಮುಗಿದ ಮೇಲೆ ಯಾವ ಹಳೆ ಯುಎಎನ್​ನಿಂದ ಹಣ ವರ್ಗಾವಣೆ ಆಗಿರುತ್ತದೋ ಅದು ಡಿ ಆ್ಯಕ್ಟಿವೇಟ್ ಆಗುತ್ತದೆ. ಆ ತಕ್ಷಣವೇ ಹಳೆ ಇಪಿಎಫ್​ ಖಾತೆಯು ಹೊಸ ಯುಎಎನ್​ ಜತೆಗೆ ಜೋಡಣೆ ಆಗುತ್ತದೆ. ಹಳೆ ಯುಎಎನ್ ಡಿ ಆ್ಯಕ್ಟಿವೇಷನ್ ಸ್ಟೇಟಸ್ ಬಗ್ಗೆ ಆ ನಂತರ ಸಂದೇಶ ಬರುತ್ತದೆ. ಒಂದು ವೇಳೆ ಹೊಸ ಯುಎಎನ್ ಆ್ಯಕ್ಟಿವೇಟ್ ಮಾಡಿಲ್ಲ ಎಂದಾದಲ್ಲಿ ಅದನ್ನು ಮಾಡುವುದು ಹೇಗೆ ಎಂಬ ಬಗ್ಗೆ ಸೂಚನೆಗಳು ಬರುತ್ತವೆ.

ಇದನ್ನೂ ಓದಿ: EPFO: ವಿಲೀನವಾದ ಬ್ಯಾಂಕ್​ನಲ್ಲಿ ಖಾತೆಯಿದ್ದರೆ ತಕ್ಷಣವೇ ಪಿಎಫ್​ ಅಕೌಂಟ್​ನಲ್ಲಿ ಬ್ಯಾಂಕ್ ಮಾಹಿತಿ ಅಪ್​ಡೇಟ್ ಮಾಡಿ​

ಇದನ್ನೂ ಓದಿ: Aadhaar matching deferred: ಆಧಾರ್ ಜತೆ ಉದ್ಯೋಗಿ ಮಾಹಿತಿ ತಾಳೆ ಆಗಲು ಸೆ.​1ಕ್ಕೆ ಗಡುವು ಮುಂದೂಡಿದ ಇಪಿಎಫ್​ಒ

(How to merge two UAN of PF account through online? Here is the step by steps to be followed by an account holder)

Follow us on

Related Stories

Most Read Stories

Click on your DTH Provider to Add TV9 Kannada