ಏರ್ಟೆಲ್ ಆಯ್ತು, ಈಗ ಜಿಯೋ ಕೂಡ ಸ್ಟಾರ್ಲಿಂಕ್ ಜೊತೆ ಒಪ್ಪಂದ; ಏನಿದು ಸ್ಟಾರ್ಲಿಂಕ್ ಇಂಟರ್ನೆಟ್?
Airtel and jio partnership with Starlink: ಇಲಾನ್ ಮಸ್ಕ್ ಮಾಲಕತ್ವದ ಸ್ಪೇಸ್ಎಕ್ಸ್ ಸಂಸ್ಥೆಗೆ ಸೇರಿದ ಸ್ಟಾರ್ಲಿಂಕ್ ಜೊತೆ ಭಾರ್ತಿ ಏರ್ಟೆಲ್ ಮತ್ತು ಜಿಯೋ ಪ್ಲಾಟ್ಫಾರ್ಮ್ಸ್ ಒಪ್ಪಂದ ಮಾಡಿಕೊಂಡಿವೆ. ನಿನ್ನೆಯಷ್ಟೇ (ಮಾ. 11) ಏರ್ಟೆಲ್ ಸಂಸ್ಥೆ ಸ್ಟಾರ್ಲಿಂಕ್ ಜೊತೆ ಒಪ್ಪಂದ ಮಾಡಿಕೊಂಡಿರುವುದನ್ನು ಘೋಷಿಸಿತ್ತು. ಇವತ್ತು (ಮಾ. 12) ಜಿಯೋ ಪ್ಲಾಟ್ಫಾರ್ಮ್ಸ್ ಕೂಡ ತಾನು ಸ್ಟಾರ್ಲಿಂಕ್ ಜೊತೆ ಒಪ್ಪಂದ ಮಾಡಿಕೊಂಡಿರುವುದಾಗಿ ತಿಳಿಸಿದೆ.
ನವದೆಹಲಿ, ಮಾರ್ಚ್ 12: ಹಲವು ದೇಶಗಳಲ್ಲಿ ಸೆಟಿಲೈಟ್ ಇಂಟರ್ನೆಟ್ ಸರ್ವಿಸ್ ನೀಡುತ್ತಿರುವ ಇಲಾನ್ ಮಾಸ್ಕ್ ಅವರ ಸ್ಟಾರ್ಲಿಂಕ್ನ ಇಂಟರ್ನೆಟ್ ಸರ್ವಿಸ್ (Starlink satellite internet service) ಇದೀಗ ಭಾರತದಲ್ಲಿ ಲಭ್ಯವಾಗುತ್ತಿದೆ. ಏರ್ಟೆಲ್ ಮತ್ತು ರಿಲಾಯನ್ಸ್ ಜಿಯೋ ಸಂಸ್ಥೆಗಳು ಸ್ಟಾರ್ಲಿಂಕ್ ಇಂಟರ್ನೆಟ್ ಸೇವೆಯನ್ನು ಭಾರತದಲ್ಲಿ ತರಲು ಸ್ಪೇಸ್ಎಕ್ಸ್ ಜೊತೆ ಒಪ್ಪಂದ ಮಾಡಿಕೊಂಡಿವೆ. ನಿನ್ನೆಯಷ್ಟೇ ಭಾರ್ತಿ ಏರ್ಟೆಲ್ ಸಂಸ್ಥೆ ಕೂಡ ಸ್ಪೇಸ್ ಎಕ್ಸ್ ಜೊತೆ ಪಾರ್ಟ್ನರ್ಶಿಪ್ ಒಪ್ಪಂದ ಮಾಡಿಕೊಂಡಿತ್ತು. ಈಗ ಜಿಯೋ ಪ್ಲಾಟ್ಫಾರ್ಮ್ಸ್ ಕೂಡ ಇದೇ ಹಾದಿ ತುಳಿದಿದೆ.
ಸ್ಪೇಸ್ಎಕ್ಸ್ ಸಂಸ್ಥೆ ಸ್ವತಂತ್ರವಾಗಿ ಸ್ಟಾರ್ಲಿಂಕ್ ಇಂಟರ್ನೆಟ್ ಸೇವೆಯನ್ನು ಒದಗಿಸುತ್ತದೆ. ಈಗ ಟೆಲಿಕಾಂ ಕಂಪನಿಗಳಾದ ಏರ್ಟೆಲ್ ಮತ್ತು ಜಿಯೋ ಹೇಗೆ ಸ್ಟಾರ್ಲಿಂಕ್ ಸರ್ವಿಸ್ ಅನ್ನು ಅಳವಡಿಸಿಕೊಳ್ಳುತ್ತವೆ ಎಂಬುದು ಸ್ಪಷ್ಟವಾಗಿ ಗೊತ್ತಾಗಿಲ್ಲ
ಸ್ಟಾರ್ಲಿಂಕ್ ಉಪಕರಣಗಳ ಮೂಲಕ ಇಂಟರ್ನೆಟ್
ಸ್ಟಾರ್ಲಿಂಕ್ನ ಸೆಟಿಲೈಟ್ ಇಂಟರ್ನೆಟ್ ಸೇವೆ ಪಡೆಯಲು ಅದರದ್ದೇ ಆದ ಒಂದು ವಿಶೇಷ ಉಪಕರಣವನ್ನು ಬಳಸಬೇಕು. ರೂಟರ್ ಮೂಲಕ ವೈಫೈ ಇಂಟರ್ನೆಟ್ ಪಡೆಯುವಂತೆ ಸ್ಟಾರ್ಲಿಂಕ್ನ ಉಪಕರಣವನ್ನು ಸ್ಥಾಪಿಸಿ ಆ ಮೂಲಕ ಸೆಟಿಲೈಟ್ ಇಂಟರ್ನೆಟ್ ಪಡೆಯಬಹುದು.
ಇದನ್ನೂ ಓದಿ: ಅತಿಶ್ರೀಮಂತರ ಪಟ್ಟಿಯಲ್ಲಿ ಅಂಬಾನಿ, ಅದಾನಿ ನಂತರ 42 ವರ್ಷದ ರೋಷನಿ ಮಲ್ಹೋತ್ರಾ
ಏರ್ಟೆಲ್ ಮತ್ತು ಜಿಯೋ ಸಂಸ್ಥೆಗಳು ತಮ್ಮ ರೀಟೇಲ್ ಸ್ಟೋರ್ಗಳಲ್ಲಿ ಈ ಸ್ಟಾರ್ಲಿಂಕ್ ಉಪಕರಣಗಳನ್ನು ಗ್ರಾಹಕರಿಗೆ ಆಫರ್ ಮಾಡುವ ಸಾಧ್ಯತೆ ಇದೆ. ಟೆಲಿಕಾಂ ಕಂಪನಿಗಳ ನೆಟ್ವರ್ಕ್ ಸಿಗದ ಕೆಲ ಪ್ರದೇಶಗಳಲ್ಲಿ ಸ್ಟಾರ್ಲಿಂಕ್ ಉಪಯೋಗಿಸಬಹುದು.
ಸ್ಟಾರ್ಲಿಂಕ್ಗೂ ಸಾಂಪ್ರದಾಯಿಕ ಸೆಟಿಲೈಟ್ ಇಂಟರ್ನೆಟ್ಗೂ ಏನು ವ್ಯತ್ಯಾಸ?
ಸೆಟಿಲೈಟ್ ಇಂಟರ್ನೆಟ್ ಹೊಸದೇನೂ ಅಲ್ಲ, ಅದು ಮೂರು ದಶಕಗಳಿಂದಲೂ ಇದೆ. ಆದರೆ, ಇತ್ತೀಚೆಗೆ ಸ್ಟಾರ್ಲಿಂಕ್, ಒನ್ವೆಬ್ ಇತ್ಯಾದಿ ಕಂಪನಿಗಳು ಹೊಸ ಸೆಟಿಲೈಟ್ ತಂತ್ರಜ್ಞಾನದೊಂದಿಗೆ ಇಂಟರ್ನೆಟ್ ಸರ್ವಿಸ್ ನೀಡುತ್ತಿವೆ. ಹಿಂದೆಲ್ಲಾ ಭೂಮಿಯ ಮೇಲೆ ಎತ್ತರದ ಕಕ್ಷೆಯಲ್ಲಿ (35,000 ಕಿಮೀ ಎತ್ತರ) ಕೆಲವೇ ಕೆಲವು ಸೆಟಿಲೈಟ್ಗಳ ಮೂಲಕ ಇಂಟರ್ನೆಟ್ ಪಡೆಯಲಾಗುತ್ತಿತ್ತು.
ಈಗ ಇಲಾನ್ ಮಸ್ಕ್ ಅವರ ಸ್ಪೇಸ್ ಎಕ್ಸ್ ಸಂಸ್ಥೆ ಭೂಮಿಯ ಕೆಳ ಕಕ್ಷೆಯಲ್ಲಿ ಬರೋಬ್ಬರಿ 40,000 ಪುಟ್ಟ ಪುಟ್ಟ ಸೆಟಿಲೈಟ್ಗಳನ್ನು ವಿವಿಧೆಡೆ ಕೂರಿಸಿದೆ. ಭೂಮಿಯಿಂದ ಕೇವಲ 550 ಕಿಮೀ ಎತ್ತರದಲ್ಲಿರುವ ಈ ವಿಸ್ತೃತ ಸೆಟಿಲೈಟ್ಗಳು ಬಹಳ ಪ್ರಬಲ ಇಂಟರ್ನೆಟ್ ಸರ್ವಿಸ್ ನೀಡಬಲ್ಲುವು. ಫೈಬರ್ ಇಂಟರ್ನೆಟ್ನಷ್ಟು ವೇಗ ಇಲ್ಲದಿದ್ದರೂ 250 ಎಂಬಿಪಿಎಸ್ವರೆಗೂ ಇಂಟರ್ನೆಟ್ ವೇಗ ಸಿಗುತ್ತದೆ.
ಇದನ್ನೂ ಓದಿ: ಸುಲಭ ಸಾಲದ ಆಸೆಗೆ ಬಿದ್ದು ನಕಲಿ ಲೋನ್ ಆ್ಯಪ್ ಜಾಲಕ್ಕೆ ಬೀಳದಿರಿ; ಈ ಅಂಶಗಳು ತಿಳಿದಿರಲಿ
ಒನ್ವೆಬ್, ಹ್ಯೂಸ್ನೆಟ್, ಕ್ಯೂಪರ್ ಸಿಸ್ಟಮ್ಸ್, ಟೆಲಿಸ್ಯಾಟ್ ಮೊದಲಾದವು ಸ್ಟಾರ್ಲಿಂಕ್ಗೆ ಪ್ರಬಲ ಪ್ರತಿಸ್ಪರ್ಧಿಗಳಾಗಿವೆ. ಒನ್ವೆಬ್ ತುಸು ಎತ್ತರ ಕಕ್ಷೆಯಲ್ಲಿ ಕೆಲವೇ ನೂರು ಸೆಟಿಲೈಟ್ಗಳನ್ನು ಹರಿಬಿಟ್ಟಿದೆ. ಕ್ಯೂಪರ್ ಸಿಸ್ಟಮ್ಸ್, ಹ್ಯೂಸ್ನೆಟ್, ಟೆಲಿಸ್ಯಾಟ್ ಸಂಸ್ಥೆಗಳು ಸ್ಟಾರ್ಲಿಂಕ್ನಂತೆ ಕೆಳ ಕಕ್ಷೆಯಲ್ಲಿ ಸಾಕಷ್ಟು ಸೆಟಿಲೈಟ್ಗಳನ್ನು ಕೂರಿಸುತ್ತಿವೆ. ಆದರೆ, ಸ್ಟಾರ್ಲಿಂಕ್ನ ಸೆಟಿಲೈಟ್ಗಳು ಬಹಳ ಪುಟ್ಟದಾಗಿದ್ದು, ಇವು ಲೆಸರ್ ಮೂಲಕ ಪರಸ್ಪರ ಸಂವಹನ ನಡೆಸುತ್ತವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 11:24 am, Wed, 12 March 25