ಪೇಟಿಎಂನಲ್ಲಿ ಕೆಲಸ ಕಳೆದುಕೊಂಡ ಶೇ. 10ಕ್ಕೂ ಹೆಚ್ಚು ಉದ್ಯೋಗಿಗಳು; ಈ ವರ್ಷ ಕಂಡ ಅತಿದೊಡ್ಡ ಲೇ ಆಫ್​ಗಳಲ್ಲಿ ಇದೂ ಒಂದು

ಬೆಂಗಳೂರು, ಡಿಸೆಂಬರ್ 25: ಪೇಟಿಎಂನ ಮಾತೃ ಸಂಸ್ಥೆ ಒನ್ 97 ಕಮ್ಯೂನಿಕೇಶನ್ಸ್ ತನ್ನ 1,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಿದೆ ಎಂದು ಎಕನಾಮಿಕ್ ಟೈಮ್ಸ್ ಪತ್ರಿಕೆಯಲ್ಲಿ ವರದಿ ಆಗಿದೆ. ಕಳೆದ ಕೆಲ ತಿಂಗಳುಗಳಾದ್ಯಂತ ಈ ಲೇ ಆಫ್ (Layoffs) ಪ್ರಕ್ರಿಯೆ ನಡೆದಿರುವುದು ತಿಳಿದುಬಂದಿದೆ. ಶೇಕಡಾವಾರು ಲೆಕ್ಕದಲ್ಲಿ ಶೇ. 10ಕ್ಕೂ ಹೆಚ್ಚು ಮಂದಿ ಕೆಲಸ ಕಳೆದುಕೊಂಡಿದ್ದಾರೆ. ಈ ವರ್ಷ ಭಾರತದ ಟೆಕ್ ಕಂಪನಿಯೊಂದು ಮಾಡಿದ ಅತಿದೊಡ್ಡ ಲೇ ಆಫ್​ಗಳ ಪೈಕಿ ಪೇಟಿಎಂನದ್ದೂ ಒಂದು.

ಪೇಟಿಎಂನ ಕಾರ್ಯಾಚರಣೆಗಳ ಮರುರಚನೆ ಮಾಡಲು ಮತ್ತು ವೆಚ್ಚ ಕಡಿತ ಮಾಡಲು ಒನ್ 97 ಕಮ್ಯೂನಿಕೇಶನ್ಸ್ ಈ ಕ್ರಮ ಕೈಗೊಂಡಿದೆ ಎಂದು ಹೇಳಲಾಗುತ್ತಿದೆ. ಈ ನಿಟ್ಟಿನಲ್ಲಿ ಉದ್ಯೋಗ ಕಡಿತ ಮಾತ್ರವಲ್ಲ, ಇತರ ಕ್ರಮಗಳನ್ನೂ ಅದು ಕೈಗೊಂಡಿದೆ ಉದಾಹರಣೆಗೆ, ಅದರ ಯುಪಿಐ ಪ್ಲಾಟ್​ಫಾರ್ಮ್​ನಲ್ಲಿ ‘ಬಯ್ ನೌ ಪೇ ಲೇಟರ್’ (Buy now pay later) ಯೋಜನೆಯನ್ನು ನಿಲ್ಲಿಸಿತ್ತು. ಹಾಗೆಯೇ, ಸಣ್ಣ ಸಾಲಗಳ ನೀಡುವಿಕೆಯನ್ನೂ (small ticket loans) ನಿಲ್ಲಿಸಿತ್ತು.

ಇದನ್ನೂ ಓದಿ: ತೈಲ ಆಮದಿಗೆ ರುಪಾಯಿಯಲ್ಲಿ ಹಣ ಪಾವತಿಸುವ ಆಫರ್; ಸ್ಪಂದಿಸದ ತೈಲ ಪೂರೈಕೆದಾರರು; ಕಾರಣ ಏನು?

ದೊಡ್ಡ ಮೊತ್ತದ ವೈಯಕ್ತಿಕ ಸಾಲ ಮತ್ತು ವರ್ತಕರಿಗೆ ನೀಡುವ ಸಾಲದ ಬಗ್ಗೆ ಹೆಚ್ಚಿನ ಒತ್ತು ಕೊಡುವ ಕಾರ್ಯತಂತ್ರವನ್ನು ಪೇಟಿಎಂ ಅನುಸರಿಸಲು ನಿರ್ಧರಿಸಿದೆ.

ಕಳೆದ ಕೆಲ ತಿಂಗಳುಗಳಲ್ಲಿ ಶೇ. 10ರಷ್ಟು ಉದ್ಯೋಗಿಗಳನ್ನು ಕೆಲಸದಿಂದ ಲೇ ಆಫ್ ಮಾಡಿದೆಯದರೂ, ಸೇಲ್ಸ್ ವಿಭಾಗದಲ್ಲಿ 50,000ಕ್ಕೂ ಹೆಚ್ಚು ಮಂದಿಯನ್ನು ನೇಮಕಾತಿ ಮಾಡುವ ಉದ್ದೇಶವನ್ನು ಪೇಟಿಎಂ ವಾರದ ಹಿಂದಷ್ಟೇ ವ್ಯಕ್ತಪಡಿಸಿತ್ತು. ಸಣ್ಣ ನಗರ ಮತ್ತು ಪಟ್ಟಣಗಳಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ವರ್ತಕರನ್ನು ಪೇಟಿಎಂ ವ್ಯಾಪ್ತಿಗೆ ತರಲು ಈ ಬೃಹತ್ ಸಂಖ್ಯೆಯಲ್ಲಿ ಉದ್ಯೋಗಿಗಳನ್ನು ನೇಮಕ ಮಾಡಲಾಗುತ್ತಿದೆ.

ಇದನ್ನೂ ಓದಿ: Year Ender 2023: ವರ್ಷದ ಕೊನೆಯಲ್ಲಿ ಹೂಡಿಕೆ ತಪ್ಪುಗಳ ಮೆಲುಕು; ಈ ನಾಲ್ಕು ಅಂಶ, ಹುಷಾರ್

‘ಈ ವರ್ಷ ಪೇಟಿಎಂ ಪ್ಲಾಟ್​ಫಾರ್ಮ್​ನಲ್ಲಿ ಜೋಡಿತವಾದ ವರ್ತಕರ ಸಂಖ್ಯೆ 5 ಕೋಟಿ ದಾಟಬೇಕು,’ ಎಂದು ಪೇಟಿಎಂ ಸಂಸ್ಥಾಪಕರು ಮತ್ತು ಸಿಇಒ ವಿಜಯ್ ಶೇಖರ್ ಶರ್ಮಾ ಇತ್ತೀಚೆಗೆ ಬ್ಲೂಮ್​ಬರ್ಗ್ ಸುದ್ದಿ ಸಂಸ್ಥೆಗೆ ತಿಳಿಸಿದ್ದರು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ