ಕೈಮೀರುತ್ತಿರುವ ಹಣದುಬ್ಬರ; ಆರ್​ಬಿಐ ತುರ್ತಾಗಿ ಬಡ್ಡಿದರ ಏರಿಸಬಹುದು: ಯೂನಿಯನ್ ಬ್ಯಾಂಕ್ ವರದಿ

ಮುಂಬೈ, ಅಕ್ಟೋಬರ್ 16: ಹಣದುಬ್ಬರ ನಿರೀಕ್ಷೆಮೀರಿ ಹೆಚ್ಚಿನ ಮಟ್ಟಕ್ಕೆ ಏರುತ್ತಿರುವ ಹಿನ್ನೆಲೆಯಲ್ಲಿ ಆರ್​ಬಿಐ ತುರ್ತು ಕ್ರಮ ತೆಗೆದುಕೊಳ್ಳುವ ಸಾಧ್ಯತೆ ಇದೆ ಎಂದು ಯೂನಿಯನ್ ಬ್ಯಾಂಕ್​ನ ರಿಸರ್ಚ್ ವರದಿಯೊಂದು ಅಂದಾಜಿಸಿದೆ. ಈ ವರದಿ ಪ್ರಕಾರ, ಮುಂದಿನ ದ್ವೈಮಾಸಿಕ ಎಂಪಿಸಿ ಸಭೆಗೆ ಮುನ್ನವೇ ಮಧ್ಯಂತರ ಕ್ರಮವಾಗಿ ರೆಪೋ ದರ ಏರಿಸಬಹುದು. ಸೆಪ್ಟೆಂಬರ್ ತಿಂಗಳಲ್ಲಿ ರೀಟೇಲ್ ಹಣದುಬ್ಬರ ಶೇ. 5.54ಕ್ಕೆ ಏರಿದೆ. ಸಗಟು ದರ ಹಣದುಬ್ಬರ ಶೇ. 11.39ಕ್ಕೆ ಏರಿರುವುದು ಆರ್​ಬಿಐಗೆ ತುರ್ತು ಕ್ರಮ ತೆಗೆದುಕೊಳ್ಳುವಂತೆ ಮಾಡಬಹುದು.

ಆಗಸ್ಟ್ ತಿಂಗಳಲ್ಲಿ ಹೋಲ್​ಸೇಲ್ ಹಣದುಬ್ಬರ ಶೇ. 9.92 ಇತ್ತು. ಸೆಪ್ಟೆಂಬರ್​ನಲ್ಲಿ ಇದು ಶೇ. 10.60ಕ್ಕೆ ಏರಬಹುದು ಎಂದು ಯೂನಿಯನ್ ಬ್ಯಾಂಕ್ ಸೇರಿದಂತೆ ಹಲವು ಹಣಕಾಸು ಸಂಸ್ಥೆಗಳು ಅಂದಾಜು ಮಾಡಿದ್ದವು. ಆದರೆ, ಎಲ್ಲರ ಎಣಿಕೆ ಮೀರಿ ಹಣದುಬ್ಬರ ಶೇ. 11.39ಕ್ಕೆ ಏರಿದೆ.

ಇದನ್ನೂ ಓದಿ: ಈ ಬಾರಿ ನೊಬೆಲ್ ಪ್ರಶಸ್ತಿ ಪಡೆದ ಇಬ್ಬರು ಆರ್ಥಿಕತಜ್ಞರು ರೂಪಿಸಿದ ಎಕನಾಮಿಕ್ ಮಾಡಲ್​ಗಳು ಎಷ್ಟು ಉಪಯುಕ್ತ ನೋಡಿ…

ಈ ಹಿನ್ನೆಲೆಯಲ್ಲಿ ಆರ್​ಬಿಐ ಎಂಪಿಸಿ ತನ್ನ ಡಿಸೆಂಬರ್ ತಿಂಗಳ ಸಭೆಯಲ್ಲಿ 50 ಮೂಲಾಂಕಗಳಷ್ಟು ರೆಪೋ ದರ ಏರಿಸಬಹುದು. ಅದಕ್ಕೂ ಮುನ್ನ ಹೆಚ್ಚುವರಿ ಸಭೆ ನಡೆಸಿ ಮಧ್ಯಂತರವಾಗಿ ಬಡ್ಡಿದರ ಏರಿಸಬಹುದು ಎಂದು ಯೂನಿಯನ್ ಬ್ಯಾಂಕ್ ರಿಸರ್ಚ್ ವರದಿ ಅಭಿಪ್ರಾಯಪಟ್ಟಿದೆ.

ಈ ತಿಂಗಳು ನಡೆದ ಆರ್​ಬಿಐ ಎಂಪಿಸಿ ಸಭೆಯಲ್ಲಿ ರೆಪೋ ದರವನ್ನು 25 ಮೂಲಾಂಕಗಳಷ್ಟು ಏರಿಸಲಾಗಿದೆ. ಶೇ. 5.25 ಇದ್ದ ರೆಪೋ ದರವನ್ನು ಶೇ. 5.50ಕ್ಕೆ ಏರಿಸಿತು. ಯೂನಿಯನ್ ಬ್ಯಾಂಕ್ ವರದಿ ಪ್ರಕಾರ, ಡಿಸೆಂಬರ್​ನಲ್ಲಿ 50 ಮೂಲಾಂಕಗಳಷ್ಟು ಏರಿಸಿ, ಬಡ್ಡಿದರವನ್ನು ಶೇ. 6ಕ್ಕೆ ತರಬಹುದು. ನವೆಂಬರ್​ನಲ್ಲೂ ಪರಿಷ್ಕರಣೆ ಆದರೆ ಬಡ್ಡಿದರ ಶೇ. 6.25ಕ್ಕೆ ಹೋಗಿ ನಿಲ್ಲಬಹುದು.

ಇದನ್ನೂ ಓದಿ: ಸೆಪ್ಟೆಂಬರ್​ನಲ್ಲಿ ಹಣದುಬ್ಬರ ದರ ಶೇ. 5.54ಕ್ಕೆ ಏರಿಕೆ; ಆಹಾರ ಬೆಲೆ ಏರಿಕೆಯ ಪಾತ್ರವೇ ಹೆಚ್ಚು

ಅಕ್ಟೋಬರ್ ತಿಂಗಳ ಆರ್​ಬಿಐ ಎಂಪಿಸಿ ಸಭೆಯಲ್ಲೂ ಮುಂದಿನ ದಿನಗಳಲ್ಲಿ ರೆಪೋ ದರ ಏರಿಸುವ ಸಾಧ್ಯತೆಯ ಸುಳಿವನ್ನು ನೀಡಲಾಗಿದೆ. ಬಡ್ಡಿದರ ಇಳಿಸುವ ಸಾಧ್ಯತೆಯನ್ನು ತಳ್ಳಿಹಾಕಲಾಗಿದೆ. ಅಗತ್ಯ ಬಿದ್ದರೆ ಬಡ್ಡಿದರ ಏರಿಸಲು ಆರ್​ಬಿಐ ಸಿದ್ಧವಿದೆ ಎಂಬ ಸಂದೇಶವನ್ನು ರವಾನಿಸಲಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ