Elon Musk: ಸ್ಪ್ಯಾಮ್ ಖಾತೆಯಲ್ಲಿ ವ್ಯತ್ಯಾಸ ಇರುವುದರಿಂದ ಟ್ವಿಟ್ಟರ್ ಖರೀದಿ ದರದಲ್ಲೂ ಕಡಿತ ಆಗಬಹುದು ಎಂದ ಎಲಾನ್ ಮಸ್ಕ್
ಕಂಪೆನಿ ತಿಳಿಸಿದ್ದಕ್ಕಿಂತ ಹೆಚ್ಚಿನ ಪ್ರಮಾಣದಲ್ಲಿ ಸ್ಪ್ಯಾಮ್ ಇರುವುದರಿಂದ ಟ್ವಿಟ್ಟರ್ನ ಖರೀದಿ ದರವನ್ನು ಕಡಿಮೆ ಮಾಡಬಹುದು ಎಂದು ಎಲಾನ್ ಮಸ್ಕ್ ಹೇಳಿದ್ದಾರೆ.
Updated on: May 17, 2022 | 5:42 PM
ಟ್ವಿಟ್ಟರ್ (Twitter) ಕಂಪೆನಿ ಹೇಳಿದ್ದಕ್ಕಿಂತ ಕನಿಷ್ಠ ನಾಲ್ಕು ಪಟ್ಟು ಹೆಚ್ಚು ನಕಲಿ ಖಾತೆಗಳಿವೆ. ಆದ್ದರಿಂದ ಕಡಿಮೆ ಬೆಲೆಗೆ ಕೇಳುವುದಾಗಿ ಸೋಮವಾರ ಎಲಾನ್ ಮಸ್ಕ್ ಹೇಳಿದ್ದಾರೆ. “ಅವರು ಕ್ಲೇಮ್ ಮಾಡಿದ್ದಕ್ಕಿಂತ ಹೆಚ್ಚು ಕೆಟ್ಟದ್ದಾಗಿರುವುದಕ್ಕೆ ನೀವು ಅದೇ ಬೆಲೆಯನ್ನು ನೀಡುವುದಕ್ಕೆ ಸಾಧ್ಯವಿಲ್ಲ,” ಎಂದು ಮಿಯಾಮಿಯಲ್ಲಿ ಅವರು ಹೇಳಿದ್ದಾರೆ. ಕಳೆದ ಶುಕ್ರವಾರ ಟ್ವಿಟ್ಟರ್ ಖರೀದಿ ಬಗ್ಗೆ ತಿಳಿಸಿದ್ದ ಅವರು, ಸ್ಪ್ಯಾಮ್ ಖಾತೆ ಬಗ್ಗೆ ಬಾಕಿ ಮಾಹಿತಿ ಬರಬೇಕಾಗಿರುವುದರಿಂದ 4400 ಕೋಟಿ ಅಮೆರಿಕನ್ ಡಾಲರ್ನ ಟ್ವಿಟ್ಟರ್ ಖರೀದಿ ವ್ಯವಹಾರಕ್ಕೆ ತಾತ್ಕಾಲಿಕ ತಡೆ ಹಾಕಿರುವುದಾಗಿ ಹೇಳಿದ್ದರು. ಟ್ವಿಟ್ಟರ್ ಅಧಿಕಾರಿಗಳ ಅಂದಾಜಿನ ಪ್ರಕಾರ ನಕಲಿ ಖಾತೆಗಳ ಪ್ರಮಾಣ ಶೇ 5ರೊಳಗೆ ಇದೆ. ಆದರೆ ಮಸ್ಕ್ ಅಂದಾಜು ಪ್ರಕಾರ ಕನಿಷ್ಠ ಶೇ 20ರಷ್ಟಿದೆ.
ಹಾಗಿದ್ದರೆ ಟ್ವಿಟ್ಟರ್ ಖರೀದಿಯನ್ನು ಬೇರೆ ದರದಲ್ಲಿ ಮಾಡಲಾಗುತ್ತದೆಯೇ ಎಂಬ ಪ್ರಶ್ನೆಗೆ, ಈ ಪ್ರಶ್ನೆ ವಿಷಯಕ್ಕೆ ಹೊರತಾದದ್ದೇನಲ್ಲ ಎಂದಷ್ಟೇ ನಾನು ಹೇಳಲು ಹೊರಟಿರುವ ಅರ್ಥ ಎಂದು ಮಸ್ಕ್ ತಿಳಿಸಿದ್ದಾರೆ. “ಹೆಚ್ಚೆಚ್ಚು ಪ್ರಶ್ನೆಗಳನ್ನು ನಾನು ಕೇಳಿದರೆ, ಹೆಚ್ಚು ನನ್ನ ಆತಂಕ ಬೆಳೆಯುತ್ತದೆ,” ಎಂದಿದ್ದಾರೆ. “ಅವರು ಹೇಳಿಕೊಳ್ಳುವ ಪ್ರಕಾರ ಈ ಸಂಕೀರ್ಣವಾದ ವಿಧಾನವನ್ನು ಅವರು ಮಾತ್ರ ಅರ್ಥ ಮಾಡಿಕೊಳ್ಳುವುದಕ್ಕೆ ಸಾಧ್ಯ. ಇದು ಅಂಥ ರಹಸ್ಯ ಏನಾಗಿರಲಿಕ್ಕಿಲ್ಲ, ಮನುಷ್ಯರ ಆತ್ಮ ಅಥವಾ ಆ ರೀತಿಯ ಹಾಗೆ,” ಎಂದಿದ್ದಾರೆ. ಮಸ್ಕ್ ಅವರ ಈ ಅಭಿಪ್ರಾಯ ಬಂದ ಮೇಲೆ ಟ್ವಿಟ್ಟರ್ ಷೇರುಗಳ ನಷ್ಟ ಇನ್ನಷ್ಟು ವಿಸ್ತರಣೆ ಆಗಿದೆ.
ಇದನ್ನೂ ಓದಿ: Elon Musk: ಟ್ವಿಟ್ಟರ್ ಖರೀದಿಗೆ ತಾತ್ಕಾಲಿಕ ತಡೆ; ಬೇಡವೇ ಬೇಡ ಅಂದರೆ ಎಲಾನ್ ಮಸ್ಕ್ಗೆ 100 ಕೋಟಿ ಯುಎಸ್ಡಿ ಬರೆ
ಎಲಾನ್ ಮಸ್ಕ್ ಒಪ್ಪಿಕೊಂಡ ಬೆಲೆಯಲ್ಲೇ ಮುಂದುವರಿಯಬಹುದೇ ಎಂಬ ಅನುಮಾನದ ಹಿನ್ನೆಲೆಯಲ್ಲಿ ಕಂಪೆನಿಯ ಸ್ಟಾಕ್ ಶೇ 8ರಷ್ಟು ಕುಸಿದು, 37.39 ಡಾಲರ್ ಮುಟ್ಟಿದೆ. ಇನ್ನು ಟ್ವಿಟ್ಟರ್ ಸಿಇಒ ಪರಾಗ್ ಅಗರ್ವಾಲ್ ಸೋಮವಾರ ಟ್ವೀಟ್ ಮಾಡಿ, ಕಳೆದ ನಾಲ್ಕು ತ್ರೈಮಾಸಿಕದಿಂದ ಸ್ಪ್ಯಾಮ್ ಖಾತೆಗಳು ಶೇ 5ಕ್ಕಿಂತ ಕಡಿಮೆ ಇವೆ ಎಂದಿದ್ದಾರೆ. ಸ್ವತಂತ್ರ ಸಂಶೋಧಕರ ಪ್ರಕಾರ, ಟ್ವಿಟ್ಟರ್ ಪ್ರೊಫೈಲ್ಗಳಲ್ಲಿ ಶೇ 9ರಿಂದ 15ರಷ್ಟಿದೆ ಎಂದು ಅಭಿಪ್ರಾಯ ಪಡುತ್ತಾರೆ.
ವಾಣಿಜ್ಯ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ, ಪ್ರಮುಖ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
