ಅಲ್ಲು ಅರ್ಜುನ್​ ಪುತ್ರ ವರ್ಸಸ್​ ಜೂ. ಎನ್​ಟಿಆರ್​ ಪುತ್ರ; ಪಾತ್ರಕ್ಕಾಗಿ ಸ್ಟಾರ್ ಕಿಡ್​ಗಳ ಪೈಪೋಟಿ?

ಶಕುಂತಲೆಯ ಮಗ ಭರತನ ಪಾತ್ರಕ್ಕಾಗಿ ಈಗ ಬಾಲಕನೊಬ್ಬನನ್ನು ನಿರ್ದೇಶಕರು ಆಯ್ಕೆ ಮಾಡಬೇಕಿದೆ. ಆ ಪಾತ್ರಕ್ಕೆ ಅಲ್ಲು ಅಯಾನ್​ ಮತ್ತು ಅಭಯ್​ ರಾಮ್​ ಹೆಸರುಗಳು ಕೇಳಿಬರುತ್ತಿವೆ.

ಅಲ್ಲು ಅರ್ಜುನ್​ ಪುತ್ರ ವರ್ಸಸ್​ ಜೂ. ಎನ್​ಟಿಆರ್​ ಪುತ್ರ; ಪಾತ್ರಕ್ಕಾಗಿ ಸ್ಟಾರ್ ಕಿಡ್​ಗಳ ಪೈಪೋಟಿ?
ಅಲ್ಲು ಅರ್ಜುನ್​, ಅಲ್ಲು ಅಯಾನ್​, ಜ್ಯೂ. ಎನ್​ಟಿಆರ್​, ಅಭಯ್​ ರಾಮ್​

ಸ್ಟಾರ್​ ಕಲಾವಿದರ ಮಕ್ಕಳು ಕೂಡ ಚಿತ್ರರಂಗಕ್ಕೆ ಕಾಲಿಡುವುದು ಭಾರತದ ಎಲ್ಲ ಭಾಷೆಯ ಚಿತ್ರರಂಗದಲ್ಲೂ ಸರ್ವೇಸಾಮಾನ್ಯ. ನೆಪೋಟಿಸಂ ಬಗ್ಗೆ ಪರ-ವಿರೋಧದ ಚರ್ಚೆ ಏನೇ ಇದ್ದರೂ ಕೂಡ ಸ್ಟಾರ್​ ಕುಟುಂಬದ ಕುಡಿಗಳಿಗೆ ಬಹುಬೇಗ ಅವಕಾಶಗಳು ಸಿಕ್ಕಿಬಿಡುತ್ತವೆ. ಅದೇನೇ ಇರಲಿ, ಈಗ ಅಲ್ಲು ಅರ್ಜುನ್​ ಪುತ್ರ ಅಲ್ಲು ಅಯಾನ್​ ಹಾಗೂ ಜ್ಯೂ. ಎನ್​ಟಿಆರ್​ ಪುತ್ರ ಅಭಯ್​ ರಾಮ್​ ಕೂಡ ಬಣ್ಣದ ಲೋಕಕ್ಕೆ ಕಾಲಿಡುತ್ತಾರೆ ಎಂಬ ಸುದ್ದಿ ಹಬ್ಬಿದೆ. ಇನ್ನೂ ಎಳೆ ಬಾಲಕರಾಗಿರುವ ಈ ಪೋರರ ನಡುವೆ ಪಾತ್ರಕ್ಕಾಗಿ ಪೈಪೋಟಿ ನಡೆಯುತ್ತಿದೆ ಎಂಬ ಮಾತು ಟಾಲಿವುಡ್​ ಅಂಗಳಲ್ಲಿ ಹರಿದಾಡುತ್ತಿದೆ!

ಸದ್ಯ ‘ದಿ ಫ್ಯಾಮಿಲಿ ಮ್ಯಾನ್​ 2’ ವೆಬ್​ ಸಿರೀಸ್​ ಮೂಲಕ ಭಾರಿ ಯಶಸ್ಸು ಕಂಡಿರುವ ನಟಿ ಸಮಂತಾ ಅಕ್ಕಿನೇನಿ ಅವರು ‘ಶಾಕುಂತಲಂ’ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಖ್ಯಾತ ನಿರ್ದೇಶಕ ಗುಣಶೇಖರ್​ ಅವರು ಈ ಚಿತ್ರಕ್ಕೆ ನಿರ್ದೇಶನ ಮಾಡುತ್ತಿದ್ದಾರೆ. ಶಕುಂತಲೆಯಾಗಿ ಸಮಂತಾ ಕಾಣಿಸಿಕೊಂಡರೆ, ಶಕುಂತಲೆಯ ಮಗ ಭರತನ ಪಾತ್ರಕ್ಕಾಗಿ ಈಗ ಬಾಲಕನೊಬ್ಬನನ್ನು ನಿರ್ದೇಶಕರು ಆಯ್ಕೆ ಮಾಡಬೇಕಿದೆ. ಆ ಪಾತ್ರಕ್ಕೆ ಅಲ್ಲು ಅಯಾನ್​ ಮತ್ತು ಅಭಯ್​ ರಾಮ್​ ಹೆಸರುಗಳು ಕೇಳಿಬರುತ್ತಿವೆ.

ಟಾಲಿವುಡ್​ನಲ್ಲಿ ಹರಿದಾಡುತ್ತಿರುವ ಈ ಗಾಸಿಪ್ ಬಗ್ಗೆ ಯಾರೂ ಸಹ ಅಧಿಕೃತವಾಗಿ ಮಾತನಾಡಿಲ್ಲ. ತಮ್ಮ ಪುತ್ರರನ್ನು ಲಾಂಚ್​ ಮಾಡುವ ಬಗ್ಗೆ ಜ್ಯೂ. ಎನ್​ಟಿಆರ್ ಆಗಲಿ, ಅಲ್ಲು ಅರ್ಜುನ್​ ಆಗಲಿ ಏನನ್ನೂ ಹೇಳಿಕೊಂಡಿಲ್ಲ. ಚಿತ್ರತಂಡದಿಂದಲೂ ಸ್ಪಷ್ಟನೆ ಸಿಕ್ಕಿಲ್ಲ. ಹಾಗಿದ್ದರೂ ಕೂಡ ಅಭಿಮಾನಿಗಳು ತಮ್ಮದೇ ರೀತಿಯ ಲೆಕ್ಕಾಚಾರಗಳನ್ನು ಹಾಕುತ್ತಿದ್ದಾರೆ.

ಜ್ಯೂ. ಎನ್​ಟಿಆರ್​ ಅವರು ಬಾಲ ನಟನಾಗಿಯೇ ಚಿತ್ರರಂಗಕ್ಕೆ ಕಾಲಿಟ್ಟಿದ್ದರು. 1996ರಲ್ಲಿ ಅವರು ನಟಿಸಿದ ಎರಡನೇ ಚಿತ್ರಕ್ಕೆ ಇದೇ ಗುಣಶೇಖರ್​ ಅವರು ನಿರ್ದೇಶನ ಮಾಡಿದ್ದರು. ಹಾಗಾಗಿ ಈಗ ಜ್ಯೂ. ಎನ್​ಟಿಆರ್​ ಪುತ್ರನನ್ನೂ ಅವರೇ ಬಾಲನಟನಾಗಿ ಲಾಂಚ್​ ಮಾಡಬೇಕು ಎಂದು ಅಭಿಮಾನಿಗಳು ಬಯಸುತ್ತಿದ್ದಾರೆ. ಆದರೆ ಚಿತ್ರತಂಡ ಮೂಲಗಳಿಂದ ಬೇರೆಯದೇ ಸಮಾಚಾರ ಕೇಳಿಬರುತ್ತಿದೆ. ‘ಸದ್ಯಕ್ಕಂತೂ ನಿರ್ದೇಶಕರು ಆ ರೀತಿಯ ಯಾವುದೇ ಪ್ಲ್ಯಾನ್​ ಮಾಡಿಕೊಂಡಿಲ್ಲ. ಎಲ್ಲ ಕಡೆ ಹೈಪ್​ ಸೃಷ್ಟಿ ಆಗಿರುವುದರಿಂದ ಸ್ಟಾರ್​ ಕಿಡ್​ಗಳಲ್ಲಿ ಒಬ್ಬನನ್ನು ಆಯ್ಕೆ ಮಾಡಿಕೊಳ್ಳಬಹುದೇನೋ’ ಎನ್ನಲಾಗುತ್ತಿದೆ.

ಜ್ಯೂ. ಎನ್​ಟಿಆರ್​ ಅವರು ರಾಜಮೌಳಿ ನಿರ್ದೇಶನದ ‘ಆರ್​ಆರ್​ಆರ್’ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಅತ್ತ, ಅಲ್ಲು ಅರ್ಜುನ್​ ‘ಪುಷ್ಪ’ ಸಿನಿಮಾದ ಕೆಲಸಗಳಲ್ಲಿ ಬ್ಯುಸಿ ಆಗಿದ್ದಾರೆ.

ಇದನ್ನೂ ಓದಿ:

Butta Bomma Song: ‘ಬುಟ್ಟ ಬೊಮ್ಮ..’ ಹಾಡಿಗೆ ಮತ್ತೊಂದು ದಾಖಲೆ; ಹಿರಿಹಿರಿ ಹಿಗ್ಗಿದ ಅಲ್ಲು ಅರ್ಜುನ್​ ಫ್ಯಾನ್ಸ್​​

ಪ್ರಶಾಂತ್​ ನೀಲ್​ ಜನ್ಮದಿನ; ಪ್ರೀತಿಯಿಂದ ಶುಭಕೋರಿದ ಜ್ಯೂ. ಎನ್​ಟಿಆರ್​ ಕಾಯುತ್ತಿರುವುದು ಆ ಒಂದು ಕ್ಷಣಕ್ಕಾಗಿ