‘ಬಿಗ್ ಬಾಸ್’ ಮನೆಗೆ ಬಂತು ಸೌಂದರ್ಯಾ ತಾಯಿಯ ಪತ್ರ: ಹೊರಗೆ ಬಂದಮೇಲೆ ರಿಯಲ್ ಸ್ವಯಂವರ

‘ಬಿಗ್ ಬಾಸ್‘ ಕನ್ನಡದ ಮನೆಯಲ್ಲಿ ಪ್ರತಿದಿನವೂ ಹೊಸ ಹೊಸ ಹಲ್ಚಲ್ ಸೃಷ್ಟಿಯಾಗುತ್ತಲೇ ಇದೆ. ಸ್ಪರ್ಧಿಗಳ ನಡುವಿನ ಆಟ, ತಮಾಷೆ ಹಾಗೂ ಭಾವನಾತ್ಮಕ ಕ್ಷಣಗಳು ವೀಕ್ಷಕರನ್ನು ರಂಜಿಸುತ್ತಿವೆ. ಇದೀಗ ಮನೆಯ ಸ್ಪರ್ಧಿ ಸೌಂದರ್ಯಾ ಶೆಟ್ಟಿ ಅವರಿಗೆ ಸಂಬಂಧಿಸಿದಂತೆ ಆಸಕ್ತಿಕರ ಸುದ್ದಿಯೊಂದು ಹೊರಬಿದ್ದಿದ್ದು, ಅವರ ಮದುವೆಯ ವಿಚಾರ ಮನೆಯಲ್ಲಿ ಹಾಗೂ ಹೊರಗಡೆ ಸಖತ್ ಚರ್ಚೆಗೆ ಗ್ರಾಸವಾಗಿದೆ. ಸೌಂದರ್ಯಾ ಅವರ ಮದುವೆಗೆ ಸಂಬಂಧಿಸಿದಂತೆ ಅವರ ಕುಟುಂಬದಲ್ಲೂ ಸಿದ್ಧತೆಗಳು ನಡೆಯುತ್ತಿರುವ ಸುಳಿವು ಸಿಕ್ಕಿದೆ.

ಕಳೆದ ವಾರ ಬಿಗ್ ಬಾಸ್ ಮನೆಯಲ್ಲಿ ಸ್ಪರ್ಧಿಗಳಿಗಾಗಿ ವಿಶೇಷವಾದ ‘ಸ್ವಯಂವರ’ ಟಾಸ್ಕ್ ಒಂದನ್ನು ಆಯೋಜಿಸಲಾಗಿತ್ತು. ಈ ಮೋಜಿನ ಟಾಸ್ಕ್‌ನಲ್ಲಿ ಸೌಂದರ್ಯಾ ಶೆಟ್ಟಿ ಅವರು ವಧುವಿನ ಗೆಟಪ್​​ನಲ್ಲಿ ಮಿಂಚಿ ಎಲ್ಲರ ಗಮನ ಸೆಳೆದಿದ್ದರು. ಮನೆಯ ಇತರ ಸದಸ್ಯರು ವರನಾಗಲು ಪ್ರಯತ್ನಿಸಿ ಆಟವನ್ನು ಮತ್ತಷ್ಟು ರಂಜನೀಯಗೊಳಿಸಿದ್ದರು. ಸೌಂದರ್ಯಾ ಕೂಡ ಈ ಟಾಸ್ಕ್ ಅನ್ನು ಅತ್ಯಂತ ಜಾಣ್ಮೆಯಿಂದ ಮತ್ತು ತಮಾಷೆಯಾಗಿ ನಿರ್ವಹಿಸಿ ಪ್ರೇಕ್ಷಕರನ್ನು ನಗಿಸಿದ್ದರು.

ಈ ನಡುವೆ ಬಿಗ್ ಬಾಸ್ ಮನೆಯಲ್ಲಿದ್ದ ಸೌಂದರ್ಯಾ ಶೆಟ್ಟಿ ಅವರಿಗೆ ಅವರ ತಾಯಿ ಗೀತಾ ಅವರಿಂದ ಒಂದು ವಿಶೇಷವಾದ ಲೇಖನ ಅಥವಾ ಪತ್ರ ತಲುಪಿದೆ. ತಾಯಿಯ ಪತ್ರವನ್ನು ಕಂಡ ಸೌಂದರ್ಯಾ ಕ್ಷಣಕಾಲ ಭಾವುಕರಾದರೂ, ಅದರಲ್ಲಿದ್ದ ಸಾಲುಗಳನ್ನು ಓದುತ್ತಿದ್ದಂತೆ ಅವರ ಮುಖದಲ್ಲಿ ನಗು ಅರಳಿದೆ. ಬಿಗ್ ಬಾಸ್ ಮನೆಯಲ್ಲಿ ನಡೆದ ಈ ಘಟನೆ ಈಗ ವೀಕ್ಷಕರ ಗಮನ ಸೆಳೆದಿದ್ದು, ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ.

ತಾಯಿ ಗೀತಾ ಬರೆದ ಈ ಪತ್ರದಲ್ಲಿ ತಮ್ಮ ಮಗಳ ಮದುವೆಯ ಬಗ್ಗೆ ತಮಾಷೆಯಾಗಿ ಹಾಗೂ ಪ್ರೀತಿಯಿಂದ ಉಲ್ಲೇಖಿಸಿದ್ದಾರೆ. ‘ಬಿಗ್ ಬಾಸ್ ಮನೆಯಲ್ಲಿ ನಡೆದ ಸ್ವಯಂವರ ಟಾಸ್ಕ್ ನಿಜಕ್ಕೂ ತುಂಬಾ ಚೆನ್ನಾಗಿತ್ತು. ನೀನು ಬಿಗ್ ಬಾಸ್ ಮನೆಯಿಂದ ಹೊರಗೆ ಬಂದಮೇಲೆ ನಿನಗೂ ನಿಜವಾದ ಸ್ವಯಂವರ ಮಾಡುತ್ತೇವೆ’ ಎಂದು ತಾಯಿ ಗೀತಾ ಪತ್ರದಲ್ಲಿ ಬರೆದಿದ್ದಾರೆ. ತಾಯಿಯ ಈ ತಮಾಷೆಯ ಮಾತನ್ನು ಇಡೀ ಮನೆಯ ಸದಸ್ಯರ ಮುಂದೆ ಓದುತ್ತಾ ಸೌಂದರ್ಯಾ ಶೆಟ್ಟಿ ಬಿದ್ದು ಬಿದ್ದು ನಕ್ಕಿದ್ದಾರೆ.

ಇದನ್ನೂ ಓದಿ: ಸೌಂದರ್ಯಾ-ಧನುಷ್​​ಗೆ ಓಪನ್ ಆಯ್ತು ಬಿಗ್ ಬಾಸ್ ಮುಖ್ಯದ್ವಾರ

ತಾಯಿಯ ಈ ಪತ್ರದಿಂದಾಗಿ ಸೌಂದರ್ಯಾ ಶೆಟ್ಟಿ ಅವರ ಮದುವೆಗೆ ಮನೆಯಲ್ಲಿ ಈಗಾಗಲೇ ಸಿದ್ಧತೆಗಳು ಹಾಗೂ ಮಾತುಕತೆಗಳು ಆರಂಭವಾಗಿವೆ ಎಂಬುದು ಸ್ಪಷ್ಟವಾಗಿದೆ. ಬಿಗ್ ಬಾಸ್ ಪ್ರಯಾಣ ಮುಗಿದ ತಕ್ಷಣ ಸೌಂದರ್ಯಾ ಶೆಟ್ಟಿ ಹಸಮಣೆ ಏರಲಿದ್ದಾರಾ ಎಂಬ ಕುತೂಹಲ ಈಗ ಅವರ ಅಭಿಮಾನಿಗಳಲ್ಲಿ ಮೂಡಿದೆ. ತಾಯಿಯ ಪ್ರೀತಿಯ ಪತ್ರ ಹಾಗೂ ಸ್ವಯಂವರದ ವಿಚಾರ ಬಿಗ್ ಬಾಸ್ ಮನೆಯಲ್ಲಿ ಸದ್ಯ ಹೈಲೈಟ್ ಆಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.