ವಿಡಿಯೋದಲ್ಲಿ ಅಪ್ಪನ ಜೊತೆಯೇ ಲೈಂಗಿಕತೆ, ಪ್ರೆಗ್ನೆನ್ಸಿ, ಡ್ರಗ್ಸ್​ ಬಗ್ಗೆ ಮಾತಾಡಿದ ಆಲಿಯಾಗೆ ನೆಟ್ಟಿಗರಿಂದ ಕೆಟ್ಟ ಕಮೆಂಟ್​

ಬೋಲ್ಡ್​ ಆದಂತ ಸಿನಿಮಾಗಳಿಂದ ಫೇಮಸ್​ ಆದವರು ನಿರ್ದೇಶಕ ಅನುರಾಗ್​ ಕಶ್ಯಪ್​. ‘ಗ್ಯಾಂಗ್ಸ್ ಆಫ್ ವಸ್ಸೇಪುರ್​​’ ರೀತಿಯ ಸಿನಿಮಾಗಳನ್ನು ಮಾಡಿ ಅವರು ಸೈ ಎನಿಸಿಕೊಂಡಿದ್ದಾರೆ. ರಿಯಲ್ ಲೈಫ್​ನಲ್ಲಿಯೂ ಅವರದ್ದು ನೇರ ನಡೆ-ನುಡಿ. ಬೋಲ್ಡ್​ ಹೇಳಿಕೆಗಳ ಮೂಲಕವೂ ಅವರು ಆಗಾಗ ಸುದ್ದಿ ಆಗುತ್ತಾರೆ. ಈ ವಿಚಾರದಲ್ಲಿ ಅವರ ಪುತ್ರಿ ಆಲಿಯಾ ಕಶ್ಯಪ್​ (Aaliyah Kashyap) ಕೂಡ ಕಮ್ಮಿಯೇನಲ್ಲ. ಆ ಕಾರಣದಿಂದ ಆಲಿಯಾ ಆಗಾಗ ಸೋಶಿಯಲ್​ ಮೀಡಿಯಾದಲ್ಲಿ ಟ್ರೋಲ್​ಗೆ (Troll) ಒಳಗಾಗುತ್ತಾರೆ. ಆ ಬಗ್ಗೆ ಅವರು ಇತ್ತೀಚೆಗೆ ಹೇಳಿಕೊಂಡಿದ್ದಾರೆ.

ಆಲಿಯಾ ಕಶ್ಯಪ್​ ಅವರು ಯೂಟ್ಯೂಬ್​ನಲ್ಲಿ ತಮ್ಮದೇ ಚಾನೆಲ್​ ಶುರು ಮಾಡಿದ್ದಾರೆ. ಅದರಲ್ಲಿ ಅವರು ಹಲವು ಬಗೆಯ ವಿಡಿಯೋಗಳನ್ನು ಅಪ್​ಲೋಡ್​ ಮಾಡುತ್ತಾರೆ. ಆ ಪೈಕಿ ಒಂದು ವಿಡಿಯೋದಲ್ಲಿ ಅವರು ತಮ್ಮ ತಂದೆ ಅನುರಾಗ್​ ಕಶ್ಯಪ್​ ಜೊತೆ ಲೈಂಗಿಕತೆ, ಡ್ರಗ್ಸ್​, ಪ್ರೆಗ್ನೆನ್ಸಿ ಮುಂತಾದ ವಿಚಾರಗಳ ಬಗ್ಗೆ ಚರ್ಚೆ ಮಾಡಿದ್ದರು. ಆ ವಿಡಿಯೋ ನೋಡಿದ ಬಹುತೇಕರಿಗೆ ಅದೇಕೋ ಸರಿ ಎನಿಸಿಲ್ಲ. ಹಾಗಾಗಿ ಆಲಿಯಾರನ್ನು ಸಿಕ್ಕಾಪಟ್ಟೆ ಟ್ರೋಲ್​ ಮಾಡಿದ್ದರು.

‘ಇಂಥ ಪ್ರಗತಿಪರ ತಂದೆ-ತಾಯಿ ಇರುವುದು ಎಷ್ಟು ಒಳ್ಳೆಯದಲ್ಲವೇ ಎಂದು ಅನೇಕರು ನನಗೆ ಮೆಸೇಜ್​ ಮಾಡಿದರು. ಎಷ್ಟೋ ಜನರ ಮನಸ್ಸಿನಲ್ಲಿ ಇಂಥ ವಿಷಯಗಳ ಬಗ್ಗೆ ಪ್ರಶ್ನೆ ಇರುತ್ತದೆ. ಆದರೆ ಅವುಗಳನ್ನು ತಂದೆ-ತಾಯಿ ಜೊತೆ ಹೇಳಿಕೊಳ್ಳಲು ಅವರು ಹಿಂಜರಿಯುತ್ತಾರೆ. ಅಂಥವರ ಪ್ರಶ್ನೆಗಳಿಗೆ ಉತ್ತರ ಸಿಗಲು ಒಂದು ವೇದಿಕೆಯ ಅವಶ್ಯಕತೆ ಇದೆ. ಆದರೆ ಇನ್ನೊಂದು ವರ್ಗದ ಜನರಿಗೆ ಈ ರೀತಿಯ ವಿಚಾರಗಳನ್ನು ಚರ್ಚೆ ಮಾಡುವುದು ಸರಿ ಎನಿಸುವುದಿಲ್ಲ’ ಎಂದು ಆಲಿಯಾ ಹೇಳಿದ್ದಾರೆ.

‘ನನ್ನ ಆ ವಿಡಿಯೋಗೆ ಬಂದಿರುವ ಕೆಲವು ಕಮೆಂಟ್​ಗಳನ್ನು ನೀವು ನೋಡಬೇಕು. ಸೆಕ್ಸ್​, ಪ್ರೆಗ್ನೆನ್ಸಿ, ಡ್ರಗ್ಸ್​ ಬಗ್ಗೆ ತಂದೆಯ ಜೊತೆ ಚರ್ಚೆ ಮಾಡಿದ್ದಕ್ಕಾಗಿ ಜನರು ನನ್ನನ್ನು ತೀವ್ರವಾಗಿ ದ್ವೇಷ ಮಾಡಿದ್ದಾರೆ. ನಾಚಿಕೆ ಆಗಬೇಕು. ಅಪ್ಪನ ಜೊತೆ ಯಾರಾದರೂ ಇಂಥದ್ದೆಲ್ಲ ಮಾತಾಡ್ತಾರಾ ಎಂದೆಲ್ಲ ಜನರು ಕಮೆಂಟ್​ ಮಾಡಿದ್ದಾರೆ’ ಎಂದು ಆಲಿಯಾ ಹೇಳಿಕೊಂಡಿದ್ದಾರೆ.

‘ನಾನು ನನ್ನ ತಂದೆ-ತಾಯಿ ಜೊತೆ ತುಂಬ ಮುಕ್ತವಾಗಿ ಮಾತನಾಡುತ್ತೇನೆ. ಅವರು ನನ್ನ ಜೊತೆ ಸ್ನೇಹಿತರ ರೀತಿ ಇದ್ದಾರೆ’ ಎಂದು ಸಹ ಆಲಿಯಾ ಹೇಳಿದ್ದಾರೆ.