Ajay Devgn: 175 ಕೋಟಿ ರೂ. ಗಡಿಯತ್ತ ‘ದೃಶ್ಯಂ 2’ ಸಿನಿಮಾ; ವರ್ಷಾಂತ್ಯಕ್ಕೆ ಅಜಯ್ ದೇವಗನ್ ಹ್ಯಾಪಿ
Drishyam 2 Total Collection: ಈ ವರ್ಷ ಅಜಯ್ ದೇವಗನ್ ನಟನೆಯ ‘ರನ್ವೇ 34’ ಹಾಗೂ ‘ಥ್ಯಾಂಕ್ ಗಾಡ್’ ಸಿನಿಮಾಗಳು ನಿರೀಕ್ಷಿತ ಮಟ್ಟದಲ್ಲಿ ಕಲೆಕ್ಷನ್ ಮಾಡಲಿಲ್ಲ. ವರ್ಷಾಂತ್ಯದಲ್ಲಿ ಅವರ ಕೈ ಹಿಡಿದಿರುವುದು ‘ದೃಶ್ಯಂ 2’ ಚಿತ್ರ.
Updated on: Dec 01, 2022 | 7:00 AM
ಒಟಿಟಿ ಪ್ರಭಾವ ಜಾಸ್ತಿ ಇವರು ಈ ಕಾಲದಲ್ಲಿ ರಿಮೇಕ್ ಸಿನಿಮಾಗಳು ಸೂಪರ್ ಹಿಟ್ ಆಗುವುದು ಅಚ್ಚರಿಯೇ ಸರಿ. ಬಾಲಿವುಡ್ನಲ್ಲಿ ಅಜಯ್ ದೇವಗನ್ (Ajay Devgn) ನಟನೆಯ ‘ದೃಶ್ಯಂ 2’ ಸಿನಿಮಾ ಈ ವರ್ಷ ಜಯಭೇರಿ ಬಾರಿಸಿದೆ. ಮೋಹನ್ಲಾಲ್ ನಟನೆಯ ಮಲಯಾಳಂನ ‘ದೃಶ್ಯಂ 2’ ಸಿನಿಮಾದ ಹಿಂದಿ ರಿಮೇಕ್ ಆಗಿರುವ ಈ ಚಿತ್ರಕ್ಕೆ ಉತ್ತರ ಭಾರತದ ಮಂದಿ ಫಿದಾ ಆಗಿದ್ದಾರೆ. ಮೊದಲ ದಿನದಿಂದಲೂ ಈ ಚಿತ್ರ ಉತ್ತಮ ಕಲೆಕ್ಷನ್ ಮಾಡುತ್ತಿದೆ. ಬಿಡುಗಡೆಯಾಗಿ 12 ದಿನ ಕಳೆದಿದ್ದರೂ ಕೂಡ ಪ್ರತಿ ದಿನ ಬಹುಕೋಟಿ ರೂಪಾಯಿ ಕಲೆಕ್ಷನ್ (Box Office Collection) ಮಾಡುವ ಮೂಲಕ ‘ದೃಶ್ಯಂ 2’ (Drishyam 2) ಸಿನಿಮಾ ಯಶಸ್ಸು ಗಳಿಸಿದೆ. ಆ ಮೂಲಕ ಬಾಲಿವುಡ್ ಬಾಕ್ಸ್ ಆಫೀಸ್ಗೆ ಹೊಸ ಚೈತನ್ಯ ನೀಡಿದೆ.
ನವೆಂಬರ್ 18ರಂದು ‘ದೃಶ್ಯಂ 2’ ಚಿತ್ರ ರಿಲೀಸ್ ಆಯ್ತು. ಮೊದಲ ದಿನ ಈ ಸಿನಿಮಾ ಗಳಿಸಿದ್ದು 15.38 ಕೋಟಿ ರೂಪಾಯಿ. ಮರುದಿನ ಕಲೆಕ್ಷನ್ (21.59 ಕೋಟಿ ರೂ.) ಹೆಚ್ಚಿತು. ಭಾನುವಾರ ಬರೋಬ್ಬರಿ 27.17 ಕೋಟಿ ರೂಪಾಯಿ ಬಾಚಿಕೊಳ್ಳುವ ಮೂಲಕ ಅರ್ಧಶತಕ ಬಾರಿಸಿ ಮುನ್ನುಗಿತು. ನಂತರದ ಕೆಲವೇ ದಿನಗಳಲ್ಲಿ 100 ಕೋಟಿ ರೂಪಾಯಿ ಕ್ಲಬ್ ಕೂಡ ಸೇರಿತು. ಈಗ 155 ಕೋಟಿ ರೂಪಾಯಿಗೂ ಹೆಚ್ಚು ಕಲೆಕ್ಷನ್ ಮಾಡಿ ಮುನ್ನುಗ್ಗುತ್ತಿದೆ.
12ನೇ ದಿನವಾದ ನವೆಂಬರ್ 29ರಂದು ‘ದೃಶ್ಯಂ 2’ ಚಿತ್ರ 5.15 ಕೋಟಿ ರೂಪಾಯಿ ಗಳಿಸಿದೆ. ಇದೇ ರೀತಿ ಇನ್ನೂ ಒಂದಷ್ಟು ದಿನ ಕಮಾಯಿ ಮುಂದುವರಿದರೆ ಅನಾಯಾಸವಾಗಿ 175 ಕೋಟಿ ರೂಪಾಯಿ ಕಲೆಕ್ಷನ್ ಆಗಲಿದೆ. ಅಂತಿಮವಾಗಿ ಈ ಚಿತ್ರದ ಗಳಿಕೆ ಎಷ್ಟಾಗಲಿದೆ ಎಂಬುದನ್ನು ತಿಳಿಯುವ ಕೌತುಕ ಮೂಡಿದೆ.
ಈ ವರ್ಷ ಅಜಯ್ ದೇವಗನ್ ನಟನೆಯ ‘ರನ್ವೇ 34’ ಹಾಗೂ ‘ಥ್ಯಾಂಕ್ ಗಾಡ್’ ಸಿನಿಮಾಗಳು ನಿರೀಕ್ಷಿತ ಮಟ್ಟದಲ್ಲಿ ಕಲೆಕ್ಷನ್ ಮಾಡಲಿಲ್ಲ. ಕೊನೆಗೂ ಅವರ ಕೈ ಹಿಡಿದಿರುವುದು ‘ದೃಶ್ಯಂ 2’ ಚಿತ್ರ. ಈ ಸಿನಿಮಾದ ಗೆಲುವಿನಿಂದಾಗಿ ವರ್ಷಾಂತ್ಯದಲ್ಲಿ ಅವರ ಮುಖದಲ್ಲಿ ನಗು ಅರಳುವಂತಾಗಿದೆ. ಅವರ ವೃತ್ತಿಜೀವನದ ಮೈಲೇಜ್ ಹೆಚ್ಚಲು ಈ ಚಿತ್ರ ಸಹಕಾರಿ ಆಗಿದೆ.
‘ದೃಶ್ಯಂ 2’ ಸಿನಿಮಾದಲ್ಲಿ ಅಜಯ್ ದೇವಗನ್ ಜೊತೆ ಟಬು, ಇಶಿತಾ ದತ್ತ, ಶ್ರಿಯಾ ಶರಣ್, ಅಕ್ಷಯ್ ಖನ್ನಾ ಮುಂತಾದವರು ನಟಿಸಿದ್ದಾರೆ. ಅಭಿಷೇಕ್ ಪಾಠಕ್ ನಿರ್ದೇಶನ ಮಾಡಿದ್ದು, ದೇವಿಶ್ರೀ ಪ್ರಸಾದ್ ಅವರು ಸಂಗೀತ ಸಂಯೋಜನೆ ಮಾಡಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
