ಅಕ್ಷಯ್ ಕುಮಾರ್ ಆ್ಯಕ್ಷನ್ ಸೀನ್ ಕದಿಯುವುದು ಎಲ್ಲಿಂದ? ಸ್ವತಃ ಒಪ್ಪಿಕೊಂಡ ನಟ
ಸಿನಿಮಾಗಳಲ್ಲಿ ನಟ ಅಕ್ಷಯ್ ಕುಮಾರ್ ಮಾಡುವ ಆ್ಯಕ್ಷನ್ ದೃಶ್ಯಗಳನ್ನು ನೋಡಿ ಅಭಿಮಾನಿಗಳು ಎಂಜಾಯ್ ಮಾಡುತ್ತಾ ಬಂದಿದ್ದಾರೆ. ಅವುಗಳ ಹಿಂದಿನ ರಹಸ್ಯವನ್ನು ಈಗ ಅಕ್ಷಯ್ ಕುಮಾರ್ ಬಹಿರಂಗಪಡಿಸಿದ್ದಾರೆ. ‘ಟಾಮ್ ಆ್ಯಂಡ್ ಜೆರಿ’ ಕಾರ್ಟೂನ್ ಶೋನಿಂದ ತಾವು ಆ್ಯಕ್ಷನ್ ಕಾನ್ಸೆಪ್ಟ್ ಕಾಪಿ ಮಾಡಿರುವುದಾಗಿ ಅಕ್ಷಯ್ ಕುಮಾರ್ ಒಪ್ಪಿಕೊಂಡಿದ್ದಾರೆ.
ಎಲ್ಲ ಬಗೆಯ ಪಾತ್ರಗಳನ್ನು ಮಾಡಿ ಅಕ್ಷಯ್ ಕುಮಾರ್ ಅವರು ಸೈ ಎನಿಸಿಕೊಂಡಿದ್ದಾರೆ. ಕಾಮಿಡಿ, ಆ್ಯಕ್ಷನ್ ಎರಡರಲ್ಲೂ ಅವರು ಅಭಿಮಾನಿಗಳನ್ನು ಮೆಚ್ಚಿಸಿದ್ದಾರೆ. ಬಯೋಪಿಕ್ಗಳ ಮೂಲಕವೂ ಅವರು ಜನಮನ ಗೆದ್ದಿದ್ದಾರೆ. ಈಗ ಅವರು ನಟಿಸಿರುವ ‘ಖೇಲ್ ಖೇಲ್ ಮೇ’ ಸಿನಿಮಾ ಬಿಡುಗಡೆಗೆ ಸಜ್ಜಾಗಿದೆ. ಆಗಸ್ಟ್ 15ರಂದು ಈ ಚಿತ್ರ ತೆರೆಕಾಣಲಿದೆ. ‘ಸ್ತ್ರೀ 2’, ‘ವೇದಾ’ ಸಿನಿಮಾಗಳ ಭಾರಿ ಪೈಪೋಟಿ ನಡುವೆ ಖೇಲ್ ಖೇಲ್ ಮೇ’ ತೆರೆಕಾಣುತ್ತಿದೆ. ಈ ಸಿನಿಮಾದ ಬಗ್ಗೆ ಮಾತನಾಡುವಾಗ ಅಕ್ಷಯ್ ಕುಮಾರ್ ಅವರು ಒಂದು ರಹಸ್ಯವನ್ನು ಬಯಲು ಮಾಡಿದ್ದಾರೆ.
ಹೆಲಿಕಾಪ್ಟರ್ ಸೀನ್ ಸೇರಿದಂತೆ ಹತ್ತಾರು ಬಗೆಯ ಆ್ಯಕ್ಷನ್ ದೃಶ್ಯಗಳ ಮೂಲಕ ಅಕ್ಷಯ್ ಕುಮಾರ್ ಅವರು ಫೇಮಸ್ ಆಗಿದ್ದಾರೆ. ಅಷ್ಟಕ್ಕೂ ಅವರು ಇಂಥ ದೃಶ್ಯಗಳನ್ನು ಎಲ್ಲಿಂದ ಕದಿಯುತ್ತಾರೆ ಗೊತ್ತಾ? ‘ಟಾಮ್ ಆ್ಯಂಡ್ ಜೆರಿ’ ಕಾರ್ಟೂನ್ ಶೋನಿಂದ! ಈ ವಿಚಾರವನ್ನು ಸ್ವತಃ ಅಕ್ಷಯ್ ಕುಮಾರ್ ಅವರು ಒಪ್ಪಿಕೊಂಡಿದ್ದಾರೆ. ಅಷ್ಟೇ ಅಲ್ಲದೇ, ನ್ಯಾಷನಲ್ ಜಿಯೋಗ್ರಾಫಿಕ್ ಚಾನಲ್ ನೋಡಿಗೂ ಆ್ಯಕ್ಷನ್ ದೃಶ್ಯಕ್ಕೆ ಕಾನ್ಸೆಪ್ಟ್ ಕಾಪಿ ಮಾಡಿರುವ ಬಗ್ಗೆ ಅಕ್ಷಯ್ ಕುಮಾರ್ ಮಾತನಾಡಿದ್ದಾರೆ.
ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ‘ಖೇಲ್ ಖೇಲ್ ಮೇ’ ಸಿನಿಮಾದ ನಟ ಫರ್ದೀನ್ ಖಾನ್ ಅವರು, ‘ಟಾಮ್ ಆ್ಯಂಡ್ ಜೆರಿ ನನ್ನ ಮೆಚ್ಚಿನ ಕಾಮಿಡಿ ಕಾರ್ಟೂನ್ ಶೋ’ ಎಂದು ಹೇಳಿದರು. ಆ ಮಾತಿಗೆ ಆಕ್ಷೇಪ ಎತ್ತಿದ ಅಕ್ಷಯ್ ಕುಮಾರ್ ಅವರು, ಅದು ಕಾಮಿಡಿ ಶೋ ಅಲ್ಲ ಎಂದು ವಾದಿಸಿದರು. ತಮ್ಮ ಈ ಅಭಿಪ್ರಾಯಕ್ಕೆ ಕಾರಣ ಏನು ಎಂಬುದನ್ನು ಕೂಡ ಅವರು ವಿವರಿಸಿದರು.
ಇದನ್ನೂ ಓದಿ: ಹಾಜಿ ಅಲಿ ದರ್ಗಾ ನವೀಕರಣಕ್ಕೆ 1.21 ಕೋಟಿ ರೂಪಾಯಿ ದೇಣಿಗೆ ನೀಡಿದ ಅಕ್ಷಯ್ ಕುಮಾರ್
‘ಟಾಮ್ ಆ್ಯಂಡ್ ಜೆರಿ ಕಾಮಿಡಿ ಶೋ ಅಲ್ಲ. ಅದು ಆ್ಯಕ್ಷನ್ ಮತ್ತು ಕೌರ್ಯ. ನಾನು ಒಂದು ರಹಸ್ಯವನ್ನು ನಿಮಗೆ ಹೇಳುತ್ತೇನೆ. ನಾನು ಹಲವು ಸಿನಿಮಾಗಳಲ್ಲಿ ಮಾಡಿದ ಆ್ಯಕ್ಷನ್ ದೃಶಗಳನ್ನು ತೆಗೆದುಕೊಂಡಿದ್ದೇ ಟಾಮ್ ಆ್ಯಂಡ್ ಜೆರಿಯಿಂದ. ಹೆಲಿಕಾಪ್ಟರ್ ದೃಶ್ಯವನ್ನು ಪೂರ್ತಿಯಾಗಿ ತೆಗೆದುಕೊಂಡಿದ್ದೇ ಈ ಕಾರ್ಟೂನ್ನಿಂದ. ಅದೇ ರೀತಿ ನ್ಯಾಷನಲ್ ಜಿಯೋಗ್ರಾಫಿಕ್ ಚಾನಲ್ನಿಂದಲೂ ತೆಗೆದುಕೊಂಡಿದ್ದೇವೆ. ಅಲ್ಲಿಯೂ ನಿಮಗೆ ದೊಡ್ಡ ಆ್ಯಕ್ಷನ್ ಕಾಣಿಸುತ್ತದೆ’ ಎಂದು ಅಕ್ಷಯ್ ಕುಮಾರ್ ಅವರು ಹೇಳಿದ್ದಾರೆ.
ಇದನ್ನೂ ಓದಿ: ‘ಗುಟ್ಕಾ ಪ್ರಚಾರ ಮಾಡುವವರಿಗೆ ಹೊಡೆಯಬೇಕು, ಅಕ್ಷಯ್ ಕುಮಾರ್ಗೆ ನಾನು ಬೈಯ್ದಿದ್ದೇನೆ’: ಮುಖೇಶ್ ಖನ್ನಾ
ಅಕ್ಷಯ್ ಕುಮಾರ್ ಅವರು ನಟಿಸಿದ ಈ ಹಿಂದಿನ ಸಿನಿಮಾಗಳಾದ ‘ಬಡೆ ಮಿಯಾ ಚೋಟೆ ಮಿಯಾ’, ‘ಸರ್ಫಿರಾ’, ‘ಮಿಷನ್ ರಾಣಿಗಂಜ್’, ‘ಸೆಲ್ಫಿ’, ‘ರಾಮ್ ಸೇತು’ ಮುಂತಾದ ಸಿನಿಮಾಗಳು ಸಾಲು ಸಾಲಾಗಿ ಸೋತಿವೆ. ಈಗ ಅವರು ‘ಖೇಲ್ ಖೇಲ್ ಮೇ’ ಸಿನಿಮಾದಿಂದ ಗೆಲ್ಲುತ್ತಾರೋ ಅಥವಾ ಇಲ್ಲವೋ ಎಂಬುದು ಆಗಸ್ಟ್ 15ರಂದು ಗೊತ್ತಾಗಲಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
