ಕೊನೆ ಆಯಿತು ಹೇಮಾ ಮಾಲಿನ ಮಗಳ ದಾಂಪತ್ಯ ಜೀವನ; ಪತಿಯಿಂದ ವಿಚ್ಛೇದನ ಪಡೆದ ಇಶಾ

ಹೇಮಾ ಮಾಲಿನಿ (Hema Malini) ಹಾಗೂ ಧರ್ಮೇಂದ್ರ ಅವರ ಮಗಳು ಇಶಾ ಡಿಯೋಲ್ ಅವರ ದಾಂಪತ್ಯ ಜೀವನ ಕೊನೆಯಾಗಿದೆ. 11 ವರ್ಷಗಳ ಕಾಲ ಸಂಸಾರ ನಡೆಸಿದ್ದ ಇಶಾ ಹಾಗೂ ಭರತ್ ತಖ್ತಾನಿ ಅವರು ಅಧಿಕೃತವಾಗಿ ಬೇರೆ ಆಗಿರುವುದಾಗಿ ಘೋಷಿಸಿದ್ದಾರೆ. ಇಬ್ಬರೂ ಒಟ್ಟಾಗಿ ಈ ಬಗ್ಗೆ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ಮಕ್ಕಳ ಯೋಗಕ್ಷೇಮಕ್ಕೆ ಇಬ್ಬರೂ ಆದ್ಯತೆ ನೀಡುವುದಾಗಿ ತಿಳಿಸಿದ್ದಾರೆ. ಹಲವು ಸಿನಿಮಾಗಳಲ್ಲಿ ಇಶಾ ನಟಿಸಿದ್ದಾರೆ. ‘ನಾವು ಸೌಹಾರ್ದಯುತವಾಗಿ ಪರಸ್ಪರ ಬೇರೆಯಾಗಲು ನಿರ್ಧರಿಸಿದ್ದೇವೆ. ನಮ್ಮ ಇಬ್ಬರು ಮಕ್ಕಳ ಹಿತಾಸಕ್ತಿ ಮತ್ತು ಏಳ್ಗೆ ನಮಗೆ ಅತ್ಯಂತ ಮಹತ್ವದ್ದಾಗಿದೆ’ ಎಂದು ಅವರು ತಿಳಿಸಿದ್ದಾರೆ. ಇಬ್ಬರ ನಡುವೆ ವೈಮನಸ್ಸು ಮೂಡಿತ್ತು. ಈಗ ವಿಚ್ಛೇದನದಲ್ಲಿ ಇದು ಕೊನೆ ಆಗಿದೆ.

2012ರ ಜೂನ್ 29ರಂದು ಮುಂಬೈನ ಇಸ್ಕಾನ್ ದೇವಾಲಯದಲ್ಲಿ ಇಶಾ ಹಾಗೂ ಭರತ್ ಮದುವೆ ಆದರು. ಈ ದಂಪತಿಗೆ ರಾಧ್ಯಾ (6 ವರ್ಷ) ಹಾಗೂ ಮಿರಾಯಾ (4 ವರ್ಷ) ಹೆಸರಿನ ಇಬ್ಬರು ಹೆಣ್ಣುಮಕ್ಕಳು ಇದ್ದಾರೆ. ಇಶಾ ಹಾಗೂ ಭರತ್ ಬೇರೆ ಆಗುತ್ತಾರೆ ಎನ್ನುವ ಸುದ್ದಿ ಕಳೆದ ಕೆಲ ಸಮಯಗಳಿಂದ ಹರಿದಾಡುತ್ತಲೇ ಇತ್ತು. ಈಗ ಈ ಸುದ್ದಿ ನಿಜವಾಗಿದೆ.

ಇಶಾ ಅವರು ಸಾರ್ವಜನಿಕವಾಗಿ ಕಾಣಿಸಿಕೊಂಡಾಗ, ಕುಟುಂಬದ ಕಾರ್ಯಕ್ರಮದಲ್ಲಿ ಭಾಗಿ ಆದಾಗ ಭರತ್ ಎಲ್ಲಿಯೂ ಕಾಣುತ್ತಿರಲಿಲ್ಲ. ಹೇಮಾ ಮಾಲಿನಿ ಅವರ 75ನೇ ವರ್ಷದ ಬರ್ತ್​ಡೇ ಆಚರಣೆ ವೇಳೆ, ಇಶಾ ಹುಟ್ಟುಹಬ್ಬ ಆಚರಣೆ ವೇಳೆ ಭರತ್ ಹಾಜರಿ ಇರಲಿಲ್ಲ. ಇದು ಸಾಕಷ್ಟು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿತ್ತು.

ಬೇರೆ ಸಂಬಂಧ?

ಭರತ್ ಅವರು ಬೇರೆ ರಿಲೇಶನ್​ಶಿಪ್ ಹೊಂದಿದ್ದಾರೆ ಎನ್ನಲಾಗುತ್ತಿದೆ.  ಭರತ್ ಅವರು ಬೆಂಗಳೂರಿನಲ್ಲಿ ಹೊಸ ವರ್ಷ ಆಚರಣೆ ಮಾಡಿದ್ದರು. ಈ ವೇಳೆ ಅವರ ಜೊತೆ ಯುವತಿಯೊಬ್ಬರು ಕಾಣಿಸಿಕೊಂಡಿದ್ದರು. ಇವರ ಜೊತೆ ಭರತ್ ಮದುವೆ ಆಗಲು ನಿರ್ಧರಿಸಿದ್ದಾರೆ ಎನ್ನಲಾಗುತ್ತಿದೆ. ಈ ಕಾರಣದಿಂದಲೇ ಇಶಾ ಅವರಿಂದ ದೂರ ಆಗುವ ನಿರ್ಧಾರ ತೆಗೆದುಕೊಂಡಿದ್ದಾರೆ ಎಂದು ವರದಿ ಆಗಿದೆ.

ಇದನ್ನೂ ಓದಿ: ಸಿನಿಮಾದಲ್ಲಿ ಬಿಕಿನಿ ಹಾಕಲು ತಾಯಿ ಹೇಮಾ ಮಾಲಿನಿ ಬಳಿ ಒಪ್ಪಿಗೆ ಕೇಳಿದ್ದ ಇಶಾ ಡಿಯೋಲ್

ಇಶಾ ಬಣ್ಣದ ಬದುಕು

ಇಶಾ ಚಿತ್ರರಂಗಕ್ಕೆ ಕಾಲಿಟ್ಟಿದ್ದು 2002ರಲ್ಲಿ. ‘ಕೊಯಿ ಮೆರೆ ದಿಲ್ ಸೆ ಪೂಚೆ’ ಅವರ ನಟನೆಯ ಮೊದಲ ಸಿನಿಮಾ. ಆ ಬಳಿಕ ಹಲವು ಸಿನಿಮಾಗಳಲ್ಲಿ ಅವರು ನಟಿಸಿದರು. 2015ರಿಂದ ಈಚೆ ಇಶಾ ಸಿನಿಮಾಗಳಲ್ಲಿ ನಟಿಸಿಲ್ಲ. ವೆಬ್​ ಸೀರಿಸ್​ಗಳಲ್ಲಿ ಇಶಾ ಕಾಣಿಸಿಕೊಂಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ

Published On - 10:35 am, Wed, 7 February 24