War 2: ಭರ್ಜರಿಯಾಗಿ ಬಾಲಿವುಡ್ಗೆ ಎಂಟ್ರಿ ಕೊಡಲಿರುವ ಜೂ ಎನ್ಟಿಆರ್, ಹೃತಿಕ್ ಜೊತೆ ಜುಗಲ್ಬಂಧಿ
ಜೂ ಎನ್ಟಿಆರ್ ಈಗ ಗ್ಲೋಬಲ್ ಸ್ಟಾರ್ ಆಗಿಬಿಟ್ಟಿದ್ದಾರೆ. ತೆಲುಗು ಬಿಟ್ಟು ಬೇರೆ ಭಾಷೆಯ ಸಿನಿಮಾಗಳಲ್ಲಿ ನಟಿಸದಿದ್ದ ಜೂ ಎನ್ಟಿಆರ್ ಇದೀಗ ಬಾಲಿವುಡ್ಗೆ ಪದಾರ್ಪಣೆ ಮಾಡಲು ಸಜ್ಜಾಗಿದ್ದಾರೆ.
Updated on: Apr 05, 2023 | 3:29 PM
ಆರ್ಆರ್ಆರ್ (RRR) ಸಿನಿಮಾದ ಗೆಲುವಿನ ಮೂಲಕ ರಾಮ್ ಚರಣ್ (Ram Charan) ಹಾಗೂ ಜೂ ಎನ್ಟಿಆರ್ (Jr NTR) ಇಬ್ಬರೂ ಗ್ಲೋಬಲ್ ಸ್ಟಾರ್ಗಳಾಗಿದ್ದಾರೆ. ರಾಮ್ಚರಣ್ಗೆ ಈಗಾಗಲೇ ಹಾಲಿವುಡ್ (Hollywood) ಆಫರ್ ದೊರಕಿದೆ, ಬಾಲಿವುಡ್ನಿಂದಲೂ ಆಫರ್ಗಳು ಬರುತ್ತಿವೆ. ಆದರೆ ಜೂ ಎನ್ಟಿಆರ್ಗೆ ಆರ್ಆರ್ಆರ್ ಬಳಿಕ ಆ ರೀತಿಯ ಯಾವುದೇ ಗುರುತರ ಆಫರ್ ಬಂದ ಬಗ್ಗೆ ವರದಿಯಾಗಿರಲಿಲ್ಲ. ಆದರೆ ಇದೀಗ ಅಂಥಹಾ ಸುದ್ದಿಯೊಂದು ಹೊರಬಿದ್ದಿದ್ದು, ಜೂ ಎನ್ಟಿಆರ್ ಬಾಲಿವುಡ್ಗೆ ಕಾಲಿಡಲು ಸಜ್ಜಾಗಿದ್ದಾರೆ. ಅದೂ ದೊಡ್ಡ ನಿರ್ಮಾಣ ಸಂಸ್ಥೆಯ ಸಿನಿಮಾ ಮೂಲಕ.
ಬಾಲಿವುಡ್ನಲ್ಲಿ ಈಗಾಗಲೇ ತನ್ನದೇ ಆದ ಅಭಿಮಾನಿ ಬಳಗ ಹೊಂದಿರುವ ವಾರ್ ಸಿನಿಮಾದ ಎರಡನೇ ಭಾಗದಲ್ಲಿ ನಟ ಹೃತಿಕ್ ರೋಷನ್ ಜೊತೆಗೆ ಜೂ ಎನ್ಟಿಆರ್ ಕಾಣಿಸಿಕೊಳ್ಳಲಿದ್ದಾರೆ. ವಾರ್ ಸಿನಿಮಾದ ಮೊದಲ ಭಾಗದಲ್ಲಿ ಹೃತಿಕ್ ರೋಷನ್ ಜೊತೆಗೆ ಯುವನಟ ಟೈಗರ ಶ್ರಾಫ್ ನಟಿಸಿದ್ದರು. ಪಕ್ಕಾ ಆಕ್ಷನ್ ಸಿನಿಮಾ ಆಗಿದ್ದ ವಾರ್ ಸೂಪರ್ ಹಿಟ್ ಆಗಿತ್ತು. ಇದೀಗ ಅದರ ಎರಡನೇ ಭಾಗವನ್ನು ಸಿದ್ಧಾರ್ಥ್ ಆನಂದ್ ನಿರ್ದೇಶನ ಮಾಡಲಿದ್ದು, ಹೃತಿಕ್ ಜೊತೆಗಾರನ ಪಾತ್ರಕ್ಕೆ ಜೂ ಎನ್ಟಿಆರ್ ಅವರನ್ನು ಒಪ್ಪಿಸಲಾಗಿದೆ.
ಈ ಹಿಂದಿನ ವಾರ್ ಹಾಗೂ ಇತ್ತೀಚೆಗಿನ ಸೂಪರ್-ಡೂಪರ್ ಹಿಟ್ ಸಿನಿಮಾ ಪಠಾಣ್ ಅನ್ನು ನಿರ್ಮಾಣ ಮಾಡಿರುವ ಬಾಲಿವುಡ್ನ ಅತಿ ದೊಡ್ಡ ನಿರ್ಮಾಣ ಸಂಸ್ಥೆ ಯಶ್ ರಾಜ್ ಫಿಲಮ್ಸ್ ಅವರೇ ವಾರ್ 2 ಸಿನಿಮಾವನ್ನು ನಿರ್ಮಾಣ ಮಾಡುತ್ತಿದ್ದಾರೆ. ವಾರ್ 2, ಜೂ ಎನ್ಟಿಆರ್ ಅವರ ಮೊದಲ ಅಧಿಕೃತ ಹಿಂದಿ ಸಿನಿಮಾ ಆಗಿದೆ. ಆದರೆ ಈ ಹಿಂದೆ ಜೂ ಎನ್ಟಿಆರ್ ನಟಿಸಿರುವ ಹಲವು ತೆಲುಗು ಸಿನಿಮಾಗಳು ಹಿಂದಿಗೆ ಡಬ್ ಆಗಿ ಬಿಡುಗಡೆ ಆಗಿವೆ. ಟಿವಿಗಳಲ್ಲಿಯೂ ಪ್ರಸಾರವಾಗಿವೆ.
ವಾರ್ 2 ಸಿನಿಮಾ ನಿರ್ದೇಶಕ ಸಿದ್ಧಾರ್ಥ್ ಆನಂದ್, ಪ್ರಸ್ತುತ ಬಾಲಿವುಡ್ನ ಯಶಸ್ವಿ ಯುವನಿರ್ದೇಶಕ ಎನಿಸಿಕೊಂಡಿದ್ದಾರೆ. ಈಗಾಗಲೇ ಶಾರುಖ್ ಖಾನ್ರ ಪಠಾಣ್ ಸಿನಿಮಾ ನಿರ್ದೇಶನ ಮಾಡಿರುವುದು ಇವರೇ. ಹೃತಿಕ್ ರೋಷನ್ ಜೊತೆ ಈಗಾಗಲೇ ಎರಡು ಸಿನಿಮಾ ಮಾಡಿರುವ ಸಿದ್ಧಾರ್ಥ್ ಇದೀಗ ಫೈಟರ್ ಹೆಸರಿನ ಸಿನಿಮಾವನ್ನು ನಿರ್ದೇಶನ ಮಾಡುತ್ತಿದ್ದಾರೆ. ಅದರಲ್ಲಿ ಹೃತಿಕ್ ರೋಷನ್ ಹಾಗೂ ದೀಪಿಕಾ ಪಡುಕೋಣೆ ನಟಿಸುತ್ತಿದ್ದಾರೆ. ಫೈಟರ್ ಸಿನಿಮಾದ ಬಳಿಕ ವಾರ್ 2 ಸಿನಿಮಾ ಕೈಗೆತ್ತಿಕೊಳ್ಳಲಿದ್ದಾರೆ.
ಇದನ್ನೂ ಓದಿ: ಪ್ರಭಾಸ್, ಅಲ್ಲು ಅರ್ಜುನ್ ಬಳಿಕ ಜೂ ಎನ್ಟಿಆರ್ ಮೇಲೆ ಕಣ್ಣಿಟ್ಟ ಟಿ-ಸೀರೀಸ್
ಜೂ ಎನ್ಟಿಆರ್ ಪ್ರಸ್ತುತ ಕೊರಟಾಲ ಶಿವ ನಿರ್ದೇಶನದ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾಕ್ಕೆ ಜಾನ್ಹವಿ ಕಪೂರ್ ನಾಯಕಿ. ಆ ಸಿನಿಮಾದ ಬಳಿಕ ಪ್ರಶಾಂತ್ ನೀಲ್ ನಿರ್ದೇಶನದ ಹೊಸ ಸಿನಿಮಾದಲ್ಲಿ ಜೂ ಎನ್ಟಿಆರ್ ನಟಿಸಲಿದ್ದಾರೆ. ಈ ಎರಡೂ ಸಿನಿಮಾಗಳು ಮುಗಿದ ಬಳಿಕವಷ್ಟೆ ಜೂ ಎನ್ಟಿಆರ್ ವಾರ್ 2 ಸಿನಿಮಾ ಕೈಗೆತ್ತಿಕೊಳ್ಳಲಿದ್ದಾರೆ.
ವಾರ್ ಸಿನಿಮಾಕ್ಕೆ ಈಗಾಗಲೆ ಅಭಿಮಾನಿಗಳಿದ್ದಾರೆ. ಗೂಢಚಾರಿಯನ್ನು ಕತೆಯನ್ನು ಒಳಗೊಂಡಿರುವ ಹೈ ಆಕ್ಷನ್ ಸಿನಿಮಾ ಇದಾಗಿರಲಿದೆ. ವಿದೇಶದಲ್ಲಿ ನಡೆಯುವ ಭರ್ಜರಿ ಆಕ್ಷನ್ ದೃಶ್ಯಗಳನ್ನು ಸಿನಿಮಾ ಒಳಗೊಂಡಿರುತ್ತದೆ. ಜೂ ಎನ್ಟಿಆರ್ ಬಾಲಿವುಡ್ನಲ್ಲಿ ಕಮಾಲ್ ಸೃಷ್ಟಿಸುತ್ತಾರೆಯೇ ಕಾದು ನೋಡಬೇಕಿದೆ.
