ಹುಡುಗಿ ರೀತಿ ಮಾತಾಡುತ್ತಿದ್ದ ಕರಣ್ ಜೋಹರ್; ಧ್ವನಿ ಬದಲಾವಣೆಗೆ ಮಾಡಿದ್ದೇನು?

ನಿರ್ಮಾಪಕ, ನಿರ್ದೇಶಕ ಕರಣ್ ಜೋಹರ್ (Karan Johar) ಅವರನ್ನು ಹಲವು ರೀತಿಯಲ್ಲಿ ಟ್ರೋಲ್ ಮಾಡಲಾಗುತ್ತದೆ. ಹಾಗಂತ ಇದು ಅವರಿಗೆ ಹೊಸದೇನೂ ಅಲ್ಲ. ಚಿಕ್ಕ ವಯಸ್ಸಿನಿಂದಲೂ ಜನರು ಅವರನ್ನು ಅಪಹಾಸ್ಯ ಮಾಡುತ್ತಿದ್ದರು. ಬಾಡಿ ಶೇಮಿಂಗ್ ಕೂಡ ಮಾಡುತ್ತಿದ್ದರು. ಆ ಬಗ್ಗೆ ಕರಣ್ ಜೋಹರ್ ಅವರು ಈಗ ಮೌನ ಮುರಿದಿದ್ದಾರೆ. ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಈ ಕುರಿತು ಅವರು ಮಾತನಾಡಿದ್ದಾರೆ. ಮೊದಲು ಕರಣ್ ಜೋಹರ್ ಅವರ ಧ್ವನಿ (Karan Johar Voice) ಹುಡುಗಿಯರ ರೀತಿ ಇತ್ತು! ಅಲ್ಲದೇ ಅವರು ನಡೆಯುವುದು ಕೂಡ ಹಾಗೆಯೇ ಇತ್ತು. ಅದನ್ನು ಬದಲಾಯಿಸಿಕೊಳ್ಳಲು ಅವರು ತರಬೇತಿ ಪಡೆದುಕೊಂಡರು.

‘ನಾನು ಪಬ್ಲಿಕ್ ಸ್ಪೀಕಿಂಗ್ ಕ್ಲಾಸ್​ಗೆ ಹೋಗಿದ್ದೆ. ಕ್ಲಾಸ್ ಮುಗಿದ ಬಳಿಕ ಅವರು ನನ್ನನ್ನು ತಡೆದು ನಿಲ್ಲಿಸಿ ಒಂದು ಮಾತು ಹೇಳಿದರು. ನಿಮ್ಮ ಧ್ವನಿ ಹುಡುಗಿಯರ ರೀತಿ ಇದೆ. ಹಾಗಾಗಿ ಈ ಸಮಾಜದಲ್ಲಿ ನಿಮಗೆ ತುಂಬ ತೊಂದರೆಗಳು ಎದುರಾಗಲಿವೆ. ನಿಮ್ಮ ಧ್ವನಿ ಗಂಡಸರ ರೀತಿ ಆಗಬೇಕು. ಅದಕ್ಕಾಗಿ ನಾವು ನಿಮಗೆ ಅಭ್ಯಾಸ ಮಾಡಿಸುತ್ತೇವೆ ಅಂತ ಸಲಹೆ ನೀಡಿದ್ದರು’ ಎಂದಿದ್​ದಾರೆ ಕರಣ್ ಜೋಹರ್.

‘ಗಂಡಸರ ರೀತಿ ಧ್ವನಿ ಬರಬೇಕು ಎಂಬ ಕಾರಣಕ್ಕೆ ನಾನು ಆ ತರಗತಿಗೆ ಎರಡು, ಮೂರು ವರ್ಷ ಹೋದೆ. ಕಂಪ್ಯೂಟರ್ ಕ್ಲಾಸ್​ಗೆ ಹೋಗುತ್ತಿದ್ದೇನೆ ಅಂತ ಅಪ್ಪನಿಗೆ ಹೇಳಿದ್ದೆ. ಯಾಕೆಂದರೆ ನಿಜ ಹೇಳಲು ನನಗೆ ನಾಚಿಕೆ ಆಗುತ್ತಿತ್ತು. ಮೂರು ವರ್ಷಗಳ ಬಳಿಕ ನನಗೆ ಗಡುಸು ಧ್ವನಿ ಬಂತು. ಹೇಗೆ ನಡೆಯಬೇಕು? ಗಂಡಸರ ರೀತಿ ಕಾಣುವುದು ಹೇಗೆ ಎಂಬುದನ್ನು ನನಗೆ ಕಲಿಸಿಕೊಟ್ಟರು’ ಎಂದು ಕರಣ್ ಜೋಹರ್ ಹೇಳಿದ್ದಾರೆ.

ಈ ಎಲ್ಲ ಘಟನೆಗಳಿಂದ ಕರಣ್ ಜೋಹರ್ ಅವರು ಅನುಭವ ಪಡೆದಿದ್ದಾರೆ. ‘ಈಗ ನಾನು ಯಾರಿಗೂ ಈ ರೀತಿ ಸಲಹೆ ಕೊಡುವುದಿಲ್ಲ. ನೀವು ನೀವಾಗಿಯೇ ಇರಿ ಅಂತ ನಾನು ಹೇಳುತ್ತೇನೆ. ನೀವು ಒಂದು ರೀತಿ ನಡೆಯುತ್ತೀರಿ ಎಂದರೆ ಹಾಗೆಯೇ ಇರಿ. ಅದೇ ರೀತಿ ಮುಂದುವರಿಯಿರಿ. ಬೇರೆಯವರಿಗಾಗಿ ನಿಮ್ಮನ್ನು ನೀವು ಬದಲಾಯಿಸಿಕೊಳ್ಳಬೇಡಿ ಎನ್ನುತ್ತೇನೆ’ ಎಂಬುದು ಕರಣ್ ಜೋಹರ್ ಮಾತುಗಳು.

ಇದನ್ನೂ ಓದಿ: ‘ರಾಜಮೌಳಿ ಸಿನಿಮಾಗಳಲ್ಲೂ ಲಾಜಿಕ್ ಇರಲ್ಲ’: ಕರಣ್ ಜೋಹರ್ ವಾದ

ಬಾಲಿವುಡ್​ನಲ್ಲಿ ನಿರ್ದೇಶಕನಾಗಿ, ನಿರ್ಮಾಪಕನಾಗಿ ಕರಣ್ ಜೋಹರ್ ಅವರು ಯಶಸ್ಸು ಕಂಡಿದ್ದಾರೆ. ‘ಕುಚ್ ಕುಚ್ ಹೋತಾ ಹೈ’, ‘ಕಭಿ ಖುಷಿ ಕಭಿ ಗಮ್’, ‘ಕಭಿ ಅಲ್ವಿದಾ ನಾ ಕೆಹ್ನಾ’, ‘ಮೈ ನೇಮ್ ಈಸ್ ಖಾನ್’, ‘ಸ್ಟೂಡೆಂಟ್ ಆಫ್​ ದಿ ಇಯರ್’, ‘ಬಾಂಬೆ ಟಾಕೀಸ್’, ‘ಯೇ ದಿಲ್​ ಹೈ ಮುಷ್ಕಿಲ್’, ‘ರಾಕಿ ಔರ್ ರಾಣಿ ಕಿ ಪ್ರೇಮ್ ಕಹಾನಿ’ ಸಿನಿಮಾಗಳಿಗೆ ಅವರು ನಿರ್ದೇಶನ ಮಾಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.