ಸುಕೇಶ್ ಚಂದ್ರಶೇಖರ್ ಬಹು ಕೋಟಿ​ ವಂಚನೆ ಪ್ರಕರಣ: ಜಾಕ್ವೆಲಿನ್ ಬಳಿಕ ನೋರಾಗೆ ಹೆಚ್ಚಿತು ಸಂಕಷ್ಟ

ಸುಕೇಶ್ ಚಂದ್ರಶೇಖರ್ (Sukesh Chandrashekhar) ಮಾಡಿರುವ 200 ಕೋಟಿ ರೂಪಾಯಿ ವಂಚನೆ ಪ್ರಕರಣ ನಿತ್ಯ ಸಾಕಷ್ಟು ತಿರುವುಗಳನ್ನು ಪಡೆದುಕೊಂಡು ಸಾಗುತ್ತಿದೆ. ಸುಕೇಶ್​ಗೂ ನಟಿ ಜಾಕ್ವೆಲಿನ್ ಫರ್ನಾಂಡಿಸ್​​​ಗೂ ನಿಕಟ ಸಂಪರ್ಕ ಇತ್ತು ಎಂಬ ವಿಚಾರ ತನಿಖೆಯಿಂದ ಸಾಬೀತಾಗಿದೆ. ಜಾಕ್ವೆಲಿನ್ (Jacqueline Fernandez) ಅವರು ದುಬಾರಿ ಗಿಫ್ಟ್ ಪಡೆಯುತ್ತಿದ್ದ ವಿಚಾರವೂ ರಿವೀಲ್ ಆಗಿದೆ. ಈ ಕಾರಣದಿಂದ ಈ ಪ್ರಕರಣದಲ್ಲಿ ಜಾಕ್ವೆಲಿನ್​ ಅವರನ್ನು ಆರೋಪಿ ಎಂದು ಈಗಾಗಲೇ ಚಾರ್ಜ್​​ಶೀಟ್​ನಲ್ಲಿ ಉಲ್ಲೇಖ ಮಾಡಲಾಗಿದೆ. ಈ ಬೆನ್ನಲ್ಲೇ ಬಾಲಿವುಡ್ ನಟಿ ನೋರಾ ಫತೇಹಿ ಅವರಿಗೆ ಈ ವಂಚನೆ ಕೇಸ್​ನಲ್ಲಿ ಸಂಕಷ್ಟ ಎದುರಾಗುವ ಸಾಧ್ಯತೆ ಜೋರಾಗಿದೆ.

ಇತ್ತೀಚೆಗೆ ನಟಿ ನೋರಾ ಅವರನ್ನು ದೆಹಲಿ ಪೊಲೀಸರು ಕರೆದು ವಿಚಾರಣೆ ಮಾಡಿದ್ದಾರೆ. ನೋರಾ ಅವರು ವಿಚಾರಣೆಗೆ ತೆರಳುತ್ತಿರುವ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ನೋರಾ ಜತೆಗೆ ಪಿಂಕಿ ಇರಾನಿ ಕೂಡ ಇದ್ದರು. ಚಂದ್ರಶೇಖರ್​​ ಅವರನ್ನು ನೋರಾಗೆ ಪರಿಚಯ ಮಾಡಿಸಿದ್ದು ಇದೇ ಪಿಂಕಿ ಎಂಬ ವಿಚಾರ ಈ ಮೊದಲೇ ರಿವೀಲ್ ಆಗಿದೆ. ಆರಂಭದಲ್ಲಿ ಇಬ್ಬರನ್ನೂ ಪ್ರತ್ಯೇಕವಾಗಿ ವಿಚಾರಣೆ ಮಾಡಲಾಗಿದ್ದು, ಆ ಬಳಿಕ ಒಟ್ಟಾಗಿ ಕೂರಿಸಿ ಪ್ರಶ್ನೆ ಕೇಳಲಾಗಿದೆ.

ಈ ಮೊದಲು ಜಾರಿ ನಿರ್ದೇಶನಾಲಯದ ಅಧಿಕಾರಿಗಳ ಎದುರು ನೋರಾ ವಿಚಾರಣೆಗೆ ಹಾಜರಾಗಿದ್ದರು. ಕೆಲ ಗಂಟೆಗಳ ಕಾಲ ವಿಚಾರಣೆ ಮಾಡಲಾಗಿತ್ತು. ಅದಾದ ಕೆಲವೇ ವಾರಗಳ ಬಳಿಕ ಅವರು ಮತ್ತೆ ವಿಚಾರಣೆಗೆ ಹಾಜರಿ ಹಾಕಿದ್ದಾರೆ. ಕೆಲ ಪ್ರಮುಖ ವಿಚಾರಗಳು ಬೆಳಕಿಗೆ ಬಂದ ಕಾರಣ ನೋರಾ ಅವರನ್ನು ಪ್ರಶ್ನೆ ಮಾಡಲಾಗಿದೆ.

ಆರಂಭದಲ್ಲಿ ಜಾಕ್ವೆಲಿನ್ ಮೇಲೆ ತೀವ್ರ ಅನುಮಾನ ಮೂಡಿತ್ತು. ಸುಕೇಶ್ ಹಾಗೂ ಜಾಕ್ವೆಲಿನ್ ಮಧ್ಯೆ ಕನೆಕ್ಷನ್ ಇದ್ದ ವಿಚಾರ ತನಿಖೆಯಿಂದ ಖಚಿತವಾಗಿತ್ತು. ಈ ಕಾರಣದಿಂದ ಚಾರ್ಜ್​​ಶೀಟ್​ನಲ್ಲಿ ಅವರ ಹೆಸರನ್ನು ಆರೋಪಿ ಸ್ಥಾನದಲ್ಲಿ ಉಲ್ಲೇಖಿಸಲಾಗಿದೆ. ಇದಾದ ಬೆನ್ನಲ್ಲೇ ನೋರಾ ಅವರನ್ನು ವಿಚಾರಣೆ ನಡೆಸಲಾಗುತ್ತಿದೆ. ಅವರ ತಪ್ಪು ಇದರಲ್ಲಿ ಕಂಡು ಬಂದಲ್ಲಿ ನೋರಾ ಅವರಿಗೂ ಸಂಕಷ್ಟ ಕಟ್ಟಿಟ್ಟ ಬುತ್ತಿ.

ಇದನ್ನೂ ಓದಿ: ನೀಲಿ ಡ್ರೆಸ್​ ಧರಿಸಿ ಮಿಂಚಿದ ನೋರಾ ಫತೇಹಿ; ಐಟಂ ಸಾಂಗ್​ ಸುಂದರಿಯ ಫೋಟೋ ವೈರಲ್​

ನೋರಾ ಫತೇಹಿ ಅವರು ಐಟಂ ಸಾಂಗ್​ಗಳ ಮೂಲಕವೇ ಹೆಚ್ಚು ಫೇಮಸ್​ ಆಗಿದ್ದಾರೆ. ಅವರ ಎಲ್ಲ ಹಾಡುಗಳು ಸೂಪರ್​ ಹಿಟ್​ ಆಗಿವೆ. ನಟನೆ, ಡ್ಯಾನ್ಸ್​ ಮಾತ್ರವಲ್ಲದೇ ಕಿರುತೆರೆ ಕಾರ್ಯಕ್ರಮಗಳ ಜಡ್ಜ್​ ಆಗಿಯೂ ಅವರು ಕೆಲಸ ಮಾಡುತ್ತಾರೆ.