Kiara Advani: ‘ಕಿಯಾರಾ ಜೊತೆ ಬಲವಂತವಾಗಿ ಕಿಸ್​ ಮಾಡಬೇಕಾಯ್ತು’: ಎಲ್ಲವನ್ನೂ ಒಪ್ಪಿಕೊಂಡ ಶೇರ್​ಷಾ ಹೀರೋ ಸಿದ್ದಾರ್ಥ್​

ನಟ ಸಿದ್ದಾರ್ಥ್​ ಮಲ್ಹೋತ್ರಾ ಅವರು ಈಗ ಯಶಸ್ಸಿನ ಖುಷಿಯಲ್ಲಿ ತೇಲುತ್ತಿದ್ದಾರೆ. ಅವರು ನಟಿಸಿದ ‘ಶೇರ್​ಷಾ’ ಸಿನಿಮಾ ಇತ್ತೀಚೆಗೆ ಅಮೇಜಾನ್​ ಪ್ರೈಂ ಮೂಲಕ ಬಿಡುಗಡೆಯಾಗಿ ಜನಮೆಚ್ಚುಗೆ ಗಳಿಸಿದೆ. ಹುತಾತ್ಮ ಯೋಧ ವಿಕ್ರಮ್​ ಬಾತ್ರಾ ಅವರ ಜೀವನದ ಕಥೆಯನ್ನು ಆಧರಿಸಿ ಈ ಸಿನಿಮಾ ಮೂಡಿಬಂದಿದೆ. ವಿಕ್ರಮ್​ ಬಾತ್ರಾ ಅವರ ಪಾತ್ರಕ್ಕೆ ಸಿದ್ದಾರ್ಥ್​ ಬಣ್ಣ ಹಚ್ಚಿದ್ದು, ಅವರ ಪ್ರೇಯಸಿ ಪಾತ್ರದಲ್ಲಿ ನಟಿ ಕಿಯಾರಾ ಅಡ್ವಾಣಿ ಅಭಿನಯಿಸಿದ್ದಾರೆ. ಇಬ್ಬರ ನಡುವಿನ ಕಿಸ್​ ದೃಶ್ಯ ಕೂಡ ಪ್ರೇಕ್ಷಕರ ಕಣ್ಣು ಕುಕ್ಕಿದೆ. ಈ ಬಗ್ಗೆ ‘ದಿ ಕಪಿಲ್​ ಶರ್ಮಾ ಶೋ’ನಲ್ಲಿ ಪ್ರಶ್ನೆ ಎದುರಾಗಿದೆ. ಸಿನಿಮಾ ಪ್ರಚಾರದ ಸಲುವಾಗಿ ‘ದಿ ಕಪಿಲ್​ ಶರ್ಮಾ ಶೋ’ನಲ್ಲಿ ಸಿದ್ದಾರ್ಥ್​ ಮಲ್ಹೋತ್ರಾ ಮತ್ತು ಕಿಯಾರಾ ಅಡ್ವಾಣಿ ಭಾಗವಹಿಸಿದ್ದರು. ಆಗ ಅವರಿಬ್ಬರಿಗೂ ಕಪಿಲ್​ ಒಂದು ಪ್ರಶ್ನೆ ಕೇಳಿದರು. ‘ಈ ಸಿನಿಮಾದಲ್ಲಿ ಬರುವ ಕಿಸ್​ ದೃಶ್ಯ ಮೊದಲೇ ಸ್ಕ್ರಿಪ್ಟ್​ನಲ್ಲಿ ಇತ್ತಾ ಅಥವಾ ನೀವೇ ನಿಮ್ಮ ಕ್ರಿಯೇಟಿವಿ ತೋರಿಸಿ ಆ ದೃಶ್ಯವನ್ನು ಸೇರಿಸಿದ್ರಾ’ ಎಂದು ಅವರು ಕೇಳಿದರು. ಅದಕ್ಕೆ ಸಿದ್ದಾರ್ಥ್​ ನೀಡಿದ ಉತ್ತರ ಎಲ್ಲರಲ್ಲೂ ಅಚ್ಚರಿ ಮೂಡಿಸುವಂತಿತ್ತು.

‘ವಿಕ್ರಮ್​ ಬಾತ್ರಾ ಅವರ ಜೀವನವನ್ನು ಶೇ.90ರಷ್ಟು ಆಧರಿಸಿ ಈ ಸಿನಿಮಾ ಸಿದ್ಧವಾಗಿದೆ. ಕಿಸ್ಸಿಂಗ್​ ದೃಶ್ಯಗಳು ಕೂಡ ನಮ್ಮ ಪಾತ್ರದ ಭಾಗವಾಗಿದ್ದವು. ಆ ದೃಶ್ಯದಲ್ಲಿ ನಟಿಸುವಾಗ ತುಂಬ ಕಷ್ಟ ಆಯಿತು. ಬಲವಂತದಿಂದ ಅದನ್ನೆಲ್ಲ ಮಾಡಬೇಕಾಯಿತು’ ಎಂದು ಸಿದ್ದಾರ್ಥ್​ ಹೇಳಿದ್ದಾರೆ. ಈ ಮಾತು ಕೇಳಿ ಎಲ್ಲರೂ ಜೋರಾಗಿ ನಕ್ಕಿದ್ದಾರೆ.

ರಿಯಲ್​ ಲೈಫ್​ನಲ್ಲಿ ಸಿದ್ದಾರ್ಥ್​ ಮಲ್ಹೋತ್ರಾ ಮತ್ತು ಕಿಯಾರಾ ಅಡ್ವಾಣಿ ಪರಸ್ಪರ ಪ್ರೀತಿಸುತ್ತಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ. ಅದಕ್ಕೆ ಸಾಕ್ಷಿ ನೀಡುವ ರೀತಿಯಲ್ಲೇ ಅವರಿಬ್ಬರು ನಡೆದುಕೊಳ್ಳುತ್ತಿದ್ದಾರೆ. ಹೊಸ ವರ್ಷ ಆಚರಿಸಲು ಸಿದ್ದಾರ್ಥ್​ ಮತ್ತು ಕಿಯಾರಾ ಮಾಲ್ಡೀವ್ಸ್​ಗೆ ತೆರಳಿದ್ದರು. ಹಾಗಿದ್ದರೂ ಕೂಡ ಈ ಜೋಡಿ ತಮ್ಮ ಪ್ರೀತಿಯ ವಿಚಾರವನ್ನು ಸಾರ್ವಜನಿಕವಾಗಿ ಒಪ್ಪಿಕೊಂಡಿಲ್ಲ. ಈ ಹಿಂದೆ ‘ಕಾಫಿ ವಿತ್​ ಕರಣ್​’ ಶೋನಲ್ಲಿ ಭಾಗವಹಿಸಿದ್ದಾಗಲೂ ಸಿದ್ದಾರ್ಥ್​ಗೆ ಈ ಬಗ್ಗೆ ಪ್ರಶ್ನೆ ಎದುರಾಗಿತ್ತು. ಆಗಲೂ ಅವರು ಡೇಟಿಂಗ್​ ವದಂತಿಯನ್ನು ತಳ್ಳಿ ಹಾಕಿದ್ದರು. ಸದ್ಯ ಅವರು ‘ಮಿಷನ್​ ಮಜ್ನು’ ಚಿತ್ರದ ಕೆಲಸಗಳಲ್ಲಿ ಬ್ಯುಸಿ ಆಗಿದ್ದಾರೆ. ಆ ಚಿತ್ರದಲ್ಲಿ ಅವರಿಗೆ ರಶ್ಮಿಕಾ ಮಂದಣ್ಣ ಜೋಡಿಯಾಗಿದ್ದಾರೆ. ಇತ್ತೀಚೆಗಷ್ಟೇ ಈ ಚಿತ್ರದ ಶೂಟಿಂಗ್​ ಮುಗಿದಿದೆ.

ಇದನ್ನೂ ಓದಿ:

Kiara Advani: ಮಾದಕ ನೋಟದಲ್ಲಿ ಮಿಂಚುತ್ತಿರುವ ಕಿಯಾರಾ; ಪಡ್ಡೆಹುಡುಗರ ನಿದ್ದೆಗೆಡಿಸುವ ಚಿತ್ರಗಳು ಇಲ್ಲಿವೆ

ಸಿದ್ಧಾರ್ಥ್​ ಮಲ್ಹೋತ್ರಾ ಜತೆ ಲವ್ವಿಡವ್ವಿ? ಎಲ್ಲವನ್ನೂ ಹೇಳಿಕೊಂಡ ನಟಿ ಕಿಯಾರಾ

Published On - 8:37 am, Thu, 23 September 21