ಆಸ್ಕರ್​ಗೆ ‘ಧುರಂಧರ್’ ಏಕೆ ಆಯ್ಕೆ ಆಗಿಲ್ಲ? ಸಿಕ್ಕಿದ್ದು 4 ವೋಟ್ ಮಾತ್ರ

99ನೇ ಅಕಾಡೆಮಿ ಪ್ರಶಸ್ತಿ (ಆಸ್ಕರ್) ರೇಸ್‌ಗೆ ಭಾರತದಿಂದ ಮರಾಠಿಯ ‘ಗೋಂಧಲ್’ ಸಿನಿಮಾ ಅಧಿಕೃತವಾಗಿ ಆಯ್ಕೆಯಾಗಿದೆ. ರಣ್‌ವೀರ್ ಸಿಂಗ್ ಅಭಿನಯದ ಸೂಪರ್ ಹಿಟ್ ‘ಧುರಂಧರ್’ ಚಿತ್ರವನ್ನು ಹಿಂದಿಕ್ಕಿ ‘ಗೋಂಧಲ್’ ಈ ಮೈಲಿಗಲ್ಲು ಸಾಧಿಸಿದೆ. ಬಾಕ್ಸ್ ಆಫೀಸ್‌ನಲ್ಲಿ ಸಾವಿರಾರು ಕೋಟಿ ಗಳಿಸಿದ್ದ ‘ಧುರಂಧರ್’ ಆಸ್ಕರ್‌ಗೆ ಯಾಕೆ ಆಯ್ಕೆಯಾಗಲಿಲ್ಲ ಎಂಬ ಚರ್ಚೆ ಶುರುವಾಗಿತ್ತು. ಇದೀಗ ಚಲನಚಿತ್ರ ಫೆಡರೇಶನ್ ಸದಸ್ಯ ವಿವೇಕ್ ವಾಸ್ವಾನಿ ಈ ರಹಸ್ಯವನ್ನು ಬಿಚ್ಚಿಟ್ಟಿದ್ದಾರೆ.

‘ಧುರಂಧರ್’ ಸಿನಿಮಾ ಆಸ್ಕರ್ ಅರ್ಹತೆಗೆ ಸೂಕ್ತವಾಗಿರಲಿಲ್ಲ ಎಂದು ಜ್ಯೂರಿ ಸದಸ್ಯ ವಿವೇಕ್ ವಾಸ್ವಾನಿ ತಿಳಿಸಿದ್ದಾರೆ. ಆಯ್ಕೆ ಮಂಡಳಿಯಲ್ಲಿದ್ದ ಕೆಲವರಿಗೆ ಈ ಸಿನಿಮಾ ಇಷ್ಟವಾಗಿತ್ತು. ಆದರೆ ಭಾರತೀಯ ಸಂಸ್ಕೃತಿಯನ್ನು ಪ್ರತಿನಿಧಿಸುವ ವಿಷಯದಲ್ಲಿ ಚಿತ್ರ ಹಿಂದುಳಿದಿತ್ತು. ಹೀಗಾಗಿ ಅಂತಿಮ ನಿರ್ಧಾರದಲ್ಲಿ ಈ ಚಿತ್ರಕ್ಕೆ ಆಸ್ಕರ್ ಟಿಕೆಟ್ ಸಿಗಲಿಲ್ಲ.

ಒಟ್ಟು 14 ಜನರಿದ್ದ ಜ್ಯೂರಿ ತಂಡದಲ್ಲಿ ‘ಧುರಂಧರ್’ ಪರವಾಗಿ ಮತ ಹಾಕಿದ್ದು ನಾಲ್ವರು ಮಾತ್ರ. ಭಾರತದಿಂದ ಸಲ್ಲಿಕೆಯಾಗಿದ್ದ ಒಟ್ಟು 33 ಸಿನಿಮಾಗಳ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿತ್ತು. ಅಂತಿಮವಾಗಿ ಮರಾಠಿಯ ‘ಗೋಂಧಲ್’, ‘ಅಂಗ್’ ಮತ್ತು ‘ಮೈನೆ ವಾಪಸ್ ಆಯೇಗಾ’ ಚಿತ್ರಗಳು ಕೊನೆ ಹಂತ ತಲುಪಿದ್ದವು. ಇವುಗಳಲ್ಲಿ ‘ಗೋಂಧಲ್’ ಅಂತಿಮವಾಗಿ ಆಯ್ಕೆಯಾಯಿತು.

ಸಂತೋಷ್ ದವಾಖರ್ ನಿರ್ದೇಶನದ ‘ಗೋಂಧಲ್’ ಸಿನಿಮಾ ಮಹಾರಾಷ್ಟ್ರದ ಸಾಂಪ್ರದಾಯಿಕ ಜಾನಪದ ಸಂಸ್ಕೃತಿಯ ಹಿನ್ನೆಲೆ ಹೊಂದಿದೆ. ಈ ಚಿತ್ರದ ಸಾಂಸ್ಕೃತಿಕ ಹಿನ್ನೆಲೆ ಜ್ಯೂರಿ ಸದಸ್ಯರ ಮನ ಗೆಲ್ಲುವಲ್ಲಿ ಯಶಸ್ವಿಯಾಗಿದೆ. ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲೂ ಈ ಸಿನಿಮಾ ಈಗಾಗಲೇ ಪ್ರಶಸ್ತಿ ಬಾಚಿಕೊಂಡಿದೆ. ಈ ಚಿತ್ರಕ್ಕೆ ಇಳಯರಾಜ ಸಂಗೀತ ನೀಡಿದ್ದಾರೆ.

ಇದನ್ನೂ ಓದಿ:  ‘ಧುರಂಧರ್’ ಸಿನಿಮಾದಲ್ಲಿ ಕಥೆಯೇ ಇಲ್ಲ: ಸೂಪರ್ ಹಿಟ್ ಚಿತ್ರವನ್ನು ಟೀಕಿಸಿದ ನಿರ್ದೇಶಕ

ಆದಿತ್ಯ ಧಾರ್ ನಿರ್ದೇಶನದ ‘ಧುರಂಧರ್’ ಸರಣಿಯ ಚಿತ್ರಗಳು ಬಾಕ್ಸ್ ಆಫೀಸ್‌ನಲ್ಲಿ ಸುಮಾರು 3,000 ಕೋಟಿ ರೂಪಾಯಿ ಗಳಿಸಿದ್ದವು. ರಣ್‌ವೀರ್ ಸಿಂಗ್ ಜೊತೆಗೆ ಸಂಜಯ್ ದತ್ ಹಾಗೂ ಮಾಧವನ್ ಅಂತಹ ದೊಡ್ಡ ತಾರಾಗಣವೇ ಚಿತ್ರದಲ್ಲಿತ್ತು. ಆದರೆ ಆಸ್ಕರ್ ತಲುಪಲು ಕೇವಲ ಕಮರ್ಷಿಯಲ್ ಗೆಲುವು ಸಾಲದು ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.