ಚಿರಂಜೀವಿ ಮಗಳ ಡಿವೋರ್ಸ್​ ಸುದ್ದಿಗೆ ಸಿಕ್ತು ಇನ್ನೊಂದು ಸಾಕ್ಷಿ; ಗಂಡನನ್ನೇ ಅನ್​ಫಾಲೋ ಮಾಡಿದ ಶ್ರೀಜಾ

ಸೆಲೆಬ್ರಿಟಿಗಳ ವಯಲದಲ್ಲೀಗ ಡಿವೋರ್ಸ್ (Divorce)​ ಟ್ರೆಂಡ್​ ಜೋರಾಗಿದೆ ಎಂದು ನೆಟ್ಟಿಗರು ತಮಾಷೆ ಮಾಡುತ್ತಿದ್ದಾರೆ. ಅಷ್ಟರಮಟ್ಟಿಗೆ ಸಿನಿಮಾ ಮಂದಿ ವಿಚ್ಛೇದನ ಪಡೆದುಕೊಳ್ಳುತ್ತಿದ್ದಾರೆ. ಆಮಿರ್​ ಖಾನ್​-ಕಿರಣ್​ ರಾವ್​, ನಾಗ ಚೈತನ್ಯ-ಸಮಂತಾ, ಧನುಷ್​​-ಐಶ್ವರ್ಯಾ ರಜನಿಕಾಂತ್​ ಸೇರಿದಂತೆ ಅನೇಕರು ಇತ್ತೀಚೆಗೆ ದಾಂಪತ್ಯ ಜೀವನಕ್ಕೆ ಅಂತ್ಯ ಹಾಡಿದರು. ಈಗ ‘ಮೆಗಾ ಸ್ಟಾರ್​’ ಚಿರಂಜೀವಿ ಪುತ್ರಿ ಶ್ರೀಜಾ (Sreeja Konidela) ಸಂಸಾರದಲ್ಲಿಯೂ ಬಿರುಕು ಮೂಡಿರುವುದು ತಿಳಿದುಬಂದಿದೆ. ಈ ಕುರಿತಂತೆ ಚಿರಂಜೀವಿ ಕುಟುಂಬದಿಂದ ಯಾವುದೇ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ. ಆದರೆ ಶ್ರೀಜಾ ಅವರ ನಡೆಯಿಂದಾಗಿ ಎಲ್ಲರಿಗೂ ಅಚ್ಚರಿ ಮೂಡಿದೆ. ಕೆಲವೇ ದಿನಗಳ ಹಿಂದೆ ಅವರು ತಮ್ಮ ಇನ್​ಸ್ಟಾಗ್ರಾಮ್​ ಖಾತೆಯಲ್ಲಿ ಗಂಡನ ಹೆಸರು ತೆಗೆದು ಹಾಕಿದ್ದರು. ಶ್ರೀಜಾ ಕಲ್ಯಾಣ್​ ಎಂದಿದ್ದ ಹೆಸರನ್ನು ಅವರು ಶ್ರೀಜಾ ಕೊನಿಡೆಲಾ ಎಂದು ಬದಲಾಯಿಸಿಕೊಂಡರು. ಈಗ ಗಂಡ ಕಲ್ಯಾಣ್​ ದೇವ್​ (Kalyaan Dhev) ಅವರನ್ನು ಶ್ರೀಜಾ ಅನ್​ಫಾಲೋ ಮಾಡಿದ್ದಾರೆ. ಆ ಮೂಲಕ ಡಿವೋರ್ಸ್​ ವದಂತಿಗೆ ಪೂರಕವಾಗುವಂತೆ ಅವರು ನಡೆದುಕೊಂಡಿದ್ದಾರೆ. ಈ ದಂಪತಿ ನಡುವೆ ಬಿರುಕು ಮೂಡಿದೆ ಎಂದು ಕೆಲವು ಮಾಧ್ಯಮಗಳು ಈಗಾಗಲೇ ವರದಿ ಮಾಡಿವೆ.

ತಮ್ಮ ಕುಟುಂಬದ ಇತರೆ ಎಲ್ಲರನ್ನೂ ಶ್ರೀಜಾ ಫಾಲೋ ಮಾಡುತ್ತಿದ್ದಾರೆ. ಆದರೆ ಈ ಪಟ್ಟಿಯಲ್ಲಿ ಅವರ ಪತಿ ಕಲ್ಯಾಣ್​ ದೇವ್​ ಹೆಸರು ಇಲ್ಲ. ಆ ಮೂಲಕ ತಾವು ಪತಿಯಿಂದ ಅಂತರ ಕಾಯ್ದುಕೊಂಡಿರುವುದನ್ನು ಶ್ರೀಜಾ ಸೂಚಿಸಿದ್ದಾರೆ. ಆದರೆ ಸದ್ಯಕ್ಕಂತೂ ಕಲ್ಯಾಣ್​ ದೇವ್​ ಅವರು ಶ್ರೀಜಾ ಅವರನ್ನು ಫಾಲೋ ಮಾಡುತ್ತಿದ್ದಾರೆ.

ಅಮೆರಿಕಾದಲ್ಲಿ ಆಭರಣಗಳ ಬಿಸ್ನೆಸ್​ ನಡೆಸುತ್ತಿರುವ ಉದ್ಯಮಿಯ ಪುತ್ರನಾದ ಕಲ್ಯಾಣ್​ ದೇವ್​ ಜೊತೆ ಚಿರಂಜೀವಿ ಪುತ್ರಿ ಶ್ರೀಜಾ ಮದುವೆ 2016ರ ಮಾರ್ಚ್​ನಲ್ಲಿ ನೆರವೇರಿತ್ತು. ಶ್ರೀಜಾಗೆ ಅದು ಎರಡನೇ ಮದುವೆ. ಮೊದಲ ಪತಿ ಸಿರೀಶ್​ ಭಾರದ್ವಜ್​ಗೆ ಅವರು ಅದಾಗಲೇ ವಿಚ್ಛೇದನ ನೀಡಿದ್ದರು. ಈಗ ಅವರು ಎರಡನೇ ಪತಿ ಕಲ್ಯಾಣ್​ ದೇವ್​ ಅವರಿಂದಲೂ ಡಿವೋರ್ಸ್​ ಪಡೆಯಲಿದ್ದಾರಾ ಎಂಬ ಅನುಮಾನ ಬಲವಾಗಿದೆ.

ತಮ್ಮ ಸಂಸಾರದಲ್ಲಿ ಬಿರುಕು ಮೂಡಿರುವ ಬಗ್ಗೆ ಶ್ರೀಜಾ ಅವರಾಗಲಿ, ಕಲ್ಯಾಣ್​ ದೇವ್​ ಅವರಾಗಲಿ ಯಾವುದೇ ಹೇಳಿಕೆ ನೀಡಿಲ್ಲ. ಇಬ್ಬರು ಹೆಣ್ಣು ಮಕ್ಕಳ ಜೊತೆ ಶ್ರೀಜಾ ವಾಸಿಸುತ್ತಿದ್ದಾರೆ. ಪ್ರಸ್ತುತ ಕಲ್ಯಾಣ್​ ದೇವ್​ ಅವರು ಬಿಸ್ನೆಸ್​ ಟ್ರಿಪ್​ ಸಲುವಾಗಿ ವಿದೇಶಕ್ಕೆ ತೆರಳಿದ್ದಾರೆ ಎನ್ನಲಾಗಿದೆ.

ಇತ್ತೀಚೆಗೆ ಕಲ್ಯಾಣ್​ ದೇವ್​ ನಟನೆಯ ‘ಸೂಪರ್​ ಮಚ್ಚಿ’ ಸಿನಿಮಾ ತೆರೆಕಂಡಿತು. ಆ ಚಿತ್ರದಲ್ಲಿ ಅವರಿಗೆ ಕನ್ನಡದ ನಟಿ ರಚಿತಾ ರಾಮ್​ ಜೋಡಿ ಆಗಿದ್ದರು. ಆ ಚಿತ್ರಕ್ಕೆ ‘ಮೆಗಾ ಸ್ಟಾರ್​’ ಫ್ಯಾಮಿಲಿ ಕಡೆಯಿಂದ ಯಾರೂ ಬೆಂಬಲ ನೀಡಲಿಲ್ಲ. ಆ ಕಾರಣದಿಂದಲೂ ಡಿವೋರ್ಸ್​ ಕುರಿತ ಅನುಮಾನ ಬಲವಾಗಿದೆ.

ಇದನ್ನೂ ಓದಿ:

‘ಅವನಿಗೆ ನನ್ನ ಬಗ್ಗೆಯೇ ಹೆಚ್ಚು ಚಿಂತೆ ಆಗಿತ್ತು’; ಮಗನ ಡಿವೋರ್ಸ್​ ಬಗ್ಗೆ ಬಾಯ್ಬಿಟ್ಟ ನಾಗಾರ್ಜುನ

‘ಧನುಷ್​-ಐಶ್ವರ್ಯಾ ವಿಚ್ಛೇದನ ಪಡೆದಿಲ್ಲ, ಇದು ಸಣ್ಣ ಜಗಳ ಅಷ್ಟೇ’; ಧನುಷ್ ತಂದೆ ಅಚ್ಚರಿಯ ಹೇಳಿಕೆ​